Paul in “Ka Hlen Suak Zo” a timi pawl

Raldonak ṭha ka do zo, ka tlan zuamawknak a ṭheh zo ih rinnak ka kilkhawi ngah zo. 2 Tim. 4:7 (CKJV)

          Hi Baibal cangte hi Paul in zumnak lamih a fa a simi Timote hnenih  a kuatmi a si. Hi ca hi Paul in a ngan tikah rei ka nung nawnlo ding ti a thei aw zo. Timote kha thazang nasa zetih a pek rual in thu ngai thlakin a forhfial ih cumi rualin a ca duhmi a ngan ṭheh hnuah amai dinhmun a ngan. Cui a dinhmun a ngan langmi ahcun zumtu pawl ih kan zohṭhim dingmi le kan thazang laknak dingah a thupi zet. Pual in Pathian a rennak ih a dinhmun pathuam a tarlangmi cu a tlun ih Baibal cang kan tarlangmi ah fiang zetin a lang ih hi thu pawl hmangin thazang la tlang sehla.

1. Raldonak ṭha ka do zo

          Paul ih canganmi pawlkan zoh tikah Zumtu pawl nunnak cu raldo nun a si kan ti thei ding. Zumtu kan si veten do dong ral kan nei. Paul in kan ral a simi fiang zetih in simmi cu Satan a si (Efs.6:11,12). Hmun dang khalah kan hmu thei (Jeims 4:7, 1 Pit.5:9).Pathian do hmaisa biktu hi zumtupawl ih kan do ral cu a si. Ziangtin saw satan cu kan do thei ding, minung bangih hmuh theih le a si fawn lo kan ti men thei. Kan thei dingmi cu Satan in zumtu pawl donak ah hmanmi a neih vekin Satan ih hman rua pawl kan do asile satan do kan si. Curuangah Satan do kan timi cu:

          (a). Tisa duhnak do : Taksa le tisa hi a bang aw lo. Kan taksa cu Pathian in a duhmi a si, hi kan taksa tello in Pathian hna kan ṭuan thei lo. Kan do dingmi cu kan taksa silo in tisa a si. Tisa kan timi cu minung hlun kan ti khal a sual lo ding. Zumlo tu pawl cu tisa duhnak lawng an nei ih tisa duhnak a hua tu Thlarau an nei ve lo. Zumtu kan si rungah kan tisa hi a hlo lo ih cumi takcu kan damsung kan do dingmi a si. Hi kan tisa duhnak kan do lo in kan nun ah cun Satan ih dunnak  tlun tu kan si. Satan hin kan tisa ah hnaṭuan in Pathian duhlo zawngih nung zumtu pawl in thlem ringring. Cui tisa hnaṭuan, kan do dingmipawl cu ziang an si ti cu Baibal ah fiang te in a lang ( Efs. 5:16-21).

          (b). Zirhnak sual : Paul ih nunnak kan zoh tikah zirhnak sual hi nasa takin a do ih zirhnak sual a um vivo lai dingmi lak khal ah zumtu pawl ralrinnak nasa takin a pe ti kan hmu thei (2 Tim.2:16; 1 Tim.4-6, Rom.16:17; Efs.4:14,15). Zirhnak sual kan ti tikah Baibal hmang siin zirhnak diklo a fehpitu kha sim duhmi a si. Dungthluntu san kan zoh tikah zirhnak sualin zumtu pawl lakah buainak zasa zet in a suah ter, a hleice in nunau pawl hi zirhnak sual ih hruai penmi an tam cuang (1 Tim.3:6,7). Cun zumtu hmaisa pawl khal kan zoh asile zirhnak sual ruangah buainak an tong nasa. Kawhhran hmaisa pawl in khawmpi ih thu an rel tam bikmi khal zirhnak sual thuhla a si (Kawhhran khawmpi). Satan pa hin sualralnak le thil ṭhalo cun zumtu pawl in neh ṭheu lo ruangah Baibal hmang tahratin zumtu pawl lamzin dik ihsin peng dingah hna a ṭuan rero. Curuangah zirhnak sual dodalnak hmangin Satan kan do theinak dingah Baibal, Pathain thu hi nasa zetin kan siar, zir, hliakhlai a ṭul. Jesuh rori hman Satan in cathianghlim hmangin a thlem a si ahucn zumtu pawl khal in hlah lo ding.

          (c). Cozah thilti theinak : Hlan zumtu pawl hi an minung pi in an do timen lawng a si lo Acozah rori ih donak khal an rak tong. Rome Acozah in Jesuh a zumtu pawl, ‘Jesuh cu ka Bawipa a si’ a titu pawl cu Rome Acozah lakih hel ah an ruat ih nasa tak in an rak hrem. Cuvek lak khalah Paul cu hnget zetin a ding (Fil. 1:30). Satan in acozah cahnak hmangin Pathian hnaṭuantu pawl in Pathian thuthanṭha an phuan thei lonak dingah nasa takin a cangvai. Leilam thuneihnak le thilti theinak hmangin zumtu pawl in dodalnak kan ton tikah dung sip ding kan si lo ti hi Paul nunnak ihsin zir ding kan nei.

2. Ka Tlanzuam awknak ka ṭheh zo

Paul in tlanzuam awknak ka ṭheh zo a tik tikah an san lai ih zuamawknak a rak ummi densen phahin a simmi a si thei. Tlan zuamawknak thu thawn peh aw in kan hmuh theimi pawl:

(a) An san laiih tlan zuam awknak a um vekin Khristian pawl khal kan hmai ih a um mi tlan zuam awknak an teima zetin tlan uh si a ti (Heb.12:1).

(b) Tlan zuam awknak ahcun daan le dun a um (Mai duhduhih um a ngah lo) 2 Tim.2:5.

(c) Zuamawknak ih teltu cun a siat theimi laksawng hrangah ah nsa zetin an sawizoi aw vekin kan taksa sawizoi  a ṭul (1 Kor.9:25,26)

(d) Tlan zuamnak ah hmuitinmi le zuam man  um. (Fil.3:12-14).

A tlun ih tarlang vekin zumtu nun cu daithlan a ngah lo zia a langter. Paul cun ka tlan zuamawknak ak ṭheh zo tiah a ti thei vekin kan nunnak ah laksawng nah dingin tlan uh si.

3. Zumnak ka kilkhawi ngah zo

          Paul in zumnak ka kilkhawi ngah zo a ti tikah zirhsualnak tamtak lak ihsin zumnak a thlauthlak lo zia a sim duhnak tla a si thei ih Pathian in tuah ding ih fialmi pawl a thih ni tiang rinumtak ih a hlensuak ngah thu a simnak tla a si thei. A tu kan san khalah zirhnak sual hi a tam zet lai ih cumi lak ihsin kan zumnak kan kilkhawi ṭhat a thupi zet. Zirhnak sual hi Paul in a do rual in zumnak dik khal a kai hnget. Paul ih Korin zumtu pawl ca a kuat tikah “Zumnak sungah nan um maw umlo nan mah te’n cek aw uh” tiah a ti (2Kor.13:5)

          Hi thu thum hi a zate’n a peh zom awk ṭheh ruangah tampin ngan lo in a tlun ta bik thu ah ziang maw zat a fiang ko ding. Dungthluntu lakah Paul hi rel hawlh zet le kan uar zetmi a si ih uar tlak khal a si. a nunnak ih Pathian a rian dan ah kan zir ding tampi a um. A thihnak caan a nai tikih hi thil pathum hi ka hlen suak ngah lo a ti bang tuk in kan nin zumtu khal dai thlang lo inkan dam sung tawite ah rinum, teima, thungai thlakin Pathian rian sinsin uh si.