1. Abraham! Abraham (Sem.22:11)
Pathian in hmin a nolhih a kawhmi hmaisa bik cu Abraham a si. Ziangvek dinhmun ah a ko, khui tawk ah a ko timi thu ah Abraham ih thuanthu malte’n vun tar lang sehla. Abraham hi fate nei thei lo a siih fata kan nei leh ding timi ruahsannak a um nawn lo hnuah Pathian in a nupi Sarah hnen ihsin fapa, Isaak a pek. Fate nei thei nawn lo hnu ih fate nei cu ziang tlumin a duh ding ti hi cu kan theihthiam pi ko ding. Veikhat cu Pathian in “ na fapa neihsun Isaak kha Moriah ramah fehpi in meiur thawinak ah pe aw” tiah a ti. Hihi Pathian ih hniksaknak a si. Abraham in cui thu a thieh tikah siang takin a fapa neihsun Isaak cu a hruaiih Moriah ram tlang pakhat ah meiur thawinak pe dingin biakṭheng a don ih namih sun a tum. Cui zawng teah van lam ih sin Abraham! Abraham! tiah an run ko. Vancungmi cun “na fapa parah zianghman tuah hlah …na siannak ruangah Pathian na ṭihzah ti ka thei zo” tiah a ti. Pathian in fapa a pekmi kha Pathian in a dil sal tikah siangtakin Pathian hnenah a pe mai. Cui a siannak thinlung an hmuh ngah ciah in vanlam cun Abraham! Abraham! tiah an run ko.
Zumtu pawl kan nunnak ah hi vek thil hi tong ve sehla Pathian ih hniksaknak parah ziang kan bang pei? Kan neih dahlo mi Pathian in pe in cui in pekmi, kanneihsunte cu a dil sal sehla kan sian pei maw? A caan caan ahcun in petu Pathian hnakin in pekmi thlawsuah hi kan duh sawn caan a um pang maw? A thlawsuah kan donmi a hnenih peksal dingah siannak kan neihmi Pathian lungawinak a si.
2. Jakob, Jakob! (Sem.46:2)
Jakob hi fate unau hleihnih a nei ih nu pali ihhrin an si. A fa le lakah Racheal ih hrinmi Josef le Benjamin hi a ngaina hleice cuang. Josef uc a u le ih an zuarih an pa Jokob hnenah sahrang in a deh tiah an bum ih Jakob cu riahsia in a ṭap. An umnak khua le ram ih paam a tlun ruangaha fa le cu Izip ramih pursum dingah a thlah hai.Ṭum hnih an fehnak ahcun siang lo cing tein Benjamin khal a thlah ve. An ra kir sal tikah Josef a nunglai, Izip ram hmuahhmuah uktu a si tiah a pa cu a sim tikah Jakob cu a mang a bang. Cu tin Josef umnak Izip ih vai dingin an pok ih Beersheba an thlen in Pathian hnenah thawinak a pe. Cui zan ah Pathian cu langnnak in a rung phuang aw ih Jakob,Jakob! tiah a run ko ih “na tefa pawl cu Izip ramah miphun tumzet ahka tuah ding” tiin thu a tiam. ‘Josef a nunglai’ timi thu duh umtak a theih tikah Pathian a theih hnilh lo, Bawipa hnenah thawinak a pek.
Pathian in kan hrang ṭhatnak dingih khua a khanmi hi zumtu in kanrak theithiamlo caan a um ṭheu. Jakob khal a duhdawt zetmi a fapa Josef thawn kum reipi an ṭhen aw. Asinan cucu an ṭhatnak ding ih Pathian ih khawkhan daan a si. Pathian in an hrangih lungawinak ni a suah ter sal tikah cun Jakob in Pathian theih hngilh lo in thawinak a pe. Zumtu hrangah Bawipa in lungawinak ni a suah ter tikah amah thieh hngilh lo tu kan si ding a thupizet.
3. Moses, Moses! (Suah.3:4)
Moses cu Izip ram ihsin Midian ramih a tlan tikah a pu Jethro ih tuu le me rual khalin a um. Veikhat cu ran a khalhnak ah hrambur kang hmangin Pathian in Moses, Moses! Tiah a run ko. Pathian in a kawhnak san cu Izip ramih sala tangmi Israel pawl runsuak dingah a si. “Israelmi pawl an hrem an tuarnak, aihramnak le an tuarnakpawl ka hmu zo” tiah Pathian in a ti. Saltannak ihsin runsuahtu dingah Pathian in a ko.
Tuisun ni tiang Pathian ih hnaṭuan sunglawi bik cu sal tangmipawl run suah hi a si. Moses in Pathianih kawhnak cu a el rero nan a el thei lo. Zumtu pawlnn kan dai thlan thieh lo mi hnaṭuan cu sal tangmi pawl runsuah hna hi a si. Pathian in a Fapa Jesuh Khrih hmangin rundamnak in tuahsak zo ih cui thuthangṭha cu saltangmipawl hnenih au suahpi dingah ṭuanvo in pe. Pathian in thupi zetiha ruahmi cu a zumtu pawlin thupi ah kan ret lo thei lo.
4. Samuel, Samuel (1 Sam.3:10)
Samuel hi puithiam eli hnenih ṭhanglian a si ih vekhat cu zan ih a ih laiah Pathain in “Samuel,Samuel” tiin a run ko. Pathian in Samuel hnenih a run simmi cu Eli ih sungkhat pawl a hrem ding thu a si. Puithiam Eli ih fale pawl in thilṭha lo an tuahmi kha Eli in a thei nan a kham duh lo kha Pathian thinheng tertu a si (1 Sam.3:13). A fapa pawl cun Pathian umnak puanthlam sungih hnaṭuantu pawl an sualpi ṭheu. Pathian ih hremnak cu an parah a thleng ih a thi ṭheh ih Pathian in Samuel cu Puithiam ah a tuah.
Pathian in a hnaṭuan tu dingah in ret ih kan fanau pawl nun dan khalah Pathian hin in cit hlehle. Kan fa le pawl an nun a dawngdah ti kan thei na cingih kham duhlo tu kan si ahcun Pathian thinhnengnak kan parah a theng thei.
5. Martha, Martha! (Luk.10:41)
Veikhat cu Martha tei’ inn ah Jesuh a thlen tikah Martha le Mari cu an um dan a bang aw lo nasa. Mari cu Jesu’i kehram ah to in a thusimmi a ngai rero laiah Martha cu hanṭuan tampi ah a buaiih Mary to men hmu thei loin a thin a ṭeu. Martha in Jesuh hnenah “ka nau in hnaṭuani tun ṭheh hi na poisa lo maw” ti tiangin a ti. Cutikah Jesuh cun a hmin voi hnih sal in “Martha,Martha! Nang cu thil tampi helhkam in awloksawng in an um; a ṭul ngaingaimi cu Pakhat lawng a um cucu Mari in a hril ngah” tiah a ti.
Leitlun ah ṭulmi tampi cu kan nei ko nan Jesuh in a ṭul ngaingai mi cu pakhat lawng a um a ti. Cucu Pathian thu a si. Leitlun ihkanum sungah nuntu khawsaknak hrangah ah thil tampi kan ṭulmi pawl ngaihtuah cu a ṭul ko nan Pathian thu bik kan ngaihsak ngah lo a si ahcun kan ṭhelh lellel tiknak a si. “A ram le a felnak hawlhmaisa uhla thil dang hmuahhmuah cu a lo pe bet ding a si” timi hi kan theih ringring a ṭul.
6. Simon, Simon (Luk.22:31)
Dungthluntu hlei hnih lakah Simon (Piter) lawng hi hmin sal nolh ih a kawhmi a si. Jesuh kaih a si hlan deuhte ah ziangvek thil an tongding timi kha a hmu cia ṭheh ih Jesuh in “Simon, Simon, ngaihnik!” tiah faak zetin a ko ih thu a sim. Hniksak an si caan a thlen tikah zumnak lamih an tlaksam lo nak dingah le Jesuh hnenlam a hoi sal tikah a unau pawl thazang pe dingah a cah.
Zumtu pawl hi ziang vekih hniksaknak kan ton tik khalah zumnak lamah baibah ih kan um ding hi a duh lo. Cum zumnak lamih kan unau awl thazang pe ding khalah in forh. Zumtu pawl cu unau kan si ṭheh vekin kan cak deuhmi pawl in a cak lo deuhmipawl thazang pe ih khat le khat somso aw ding in duh.
7. Saul, Saul (Tirh.9:4)
Sual hi zumtu pawl hrem rero tu a si ih zumtu pawl a hrem hi Jesuh hremtu ka si ti a thei ban lo. Veikhat cu zumtu pawl kaihrem dingih a feh laiah Damaskas khua a thlen zik ah tleu in a run sun thlukih aw cun “Saul, Saul ziangah so i hrem?” tiah a run ti. Hi thu hmangin fiang teih kan theih theimi cu zumtu le Jesuh Khrih hi pum khat kan si zia hi a si. Pathian ih minung pawl parih kan tuahmi hi Jesuh parih tuah kan si zia khal a lang. Minung parih tuah si hmang kan ti awk laiah Jesuh parih tuahkan si. Pathian minung pawl kan zoh ṭhat hin Jesuh zohṭhatu kan si ih Pathian minung pawl parih thil ṭha lo kan tuah hin Jesuh parih thil ṭha lo tuah kan si.
Thukam hlun le Thukam thar sungih hmin kawh nolhmi pawl kan tarlang mi ah Thukam thar le Thukam hlun ta hi danglam nak tete a um. Thukam hlun ahcun Pathian in thil pakhat khat tuahter duhmi a neih ruangah a ko hai. Thukam thar ahcun thil thupi sim duhmi, theih ter duhmi a neih ruangah a hmin a sal hai. Thukham hlunih a kawh mi pawl cu:
# Pathian in Abraham, Abraham tiih a kawh tikah ..
Abraham in “Bawipa hinah ka um” a ti. Sem.22:11
# Pathian in Jakob,Jakob tiih a kawh tikah..
Jakob in “ Bawipa, hinah ka um” tiah a ti. Sem.46:2
# Pathian in Moses, Moses tiih a kawh tikah..
Moses in “Bawipa, hinah ka um” tikah a ti. Suah.3:4
# Pathian in Samuel, Samuel tiih a kawh tikah..
Samuel in “Bawipa na sim duhmi cu sim aw..” tiah a ti.
No comments:
Post a Comment