Sam.127:3 Faate cu Bawipa ih laksawng an
si; Amah ih malsawmnak an si.
Saam 127 hi nupi
tam zet a neitu Solomon ih nganmi a si. Nupi tampi a neih bang tuk ih fate khal
a neh ding hi zum a um nasa. Nupi 1000 lai nei a si ih Bible ah a fa hmin tam a
langlo ( Bible ahcun a ṭulmi te lawng ngan lang a si deuh) nan tampi a neih zum
a um. Cu lawng silo in leitlun ih mifim bik leh lian bik a si. Cu tluk ih a
nasa zetmi Siangpahrang Solomon ih nganmi a si tikah kan hrangah hin a sunglawi
hleice in ka thei. Bible dangdang kan zoh khawm tikah Fate hi Bawipa ih ro in
pekmi, laksawng an si zia leh A malsawmnak an
si thu pawl kan hmu thei a si.
1. Ziangkim hram Pathian :
Kan thupi “Fate
cu Bawipa ih laksawng an si” timi hin a langter mi pakhat cu Bawipa lo cun fate
hi kan neih thei mi a si lo, Bawipa ih in pekmi a si ruangah Amai hnen lawngin
kan kan nei thei a si. Ziangkim hi a mah ih ṭhum aw an si zia hitin hun tar
lang seh la.
a) Bawipa lo cun
innsaktu pawl ih hnaṭuan cu a lak. Sam.127:1
b) Bawipa lo cun
khaw kiltu pawl in kilvennak a lak. Sam.127:1
c) Bawipa lo cun
zonzai ih kan hnaṭuan hi a lak. Sam.127:2
d) Bawipa hi kan
ṭulmi inpetu a si. Sam.127:2
e) Bawipa hi
fanau in petu a si. Sam.127:3
Solomon hi fate a nei ve ih lennak khalah hminhmang a si. Cun
singpahrang a si laiah ral do hniaihniai khal theih ding a um lo. Asinan
Solomon hin minung lam thilti hi a re lo nasa.
a) Fanau a neihmi
hi Bawipai in pek ti a fiang.
b) Dai te in ram
a uk thei hi Bawipai’ kilvennak ti a fiang.
c) Kha tluk a
lennak kha Bawipai ruangah ti thei.
d) Ziang kim
hrampi cu Pathian a si ti a tarlang.
e) Bawipa locun
ziangkim hi a lak ti a fiang.
Solomon in fate
ka neih hi nupi ka neih tam ruangah a si a ti lo nasa. Ziangkim hi Bawi
thawngih kan comi, kan hmuhmi, kan neihmi an si, Pathian hmin thangṭhat si ko
seh.
2. Fate hi Bawipa ih laksawng an si:
a)
Zohhnik ( Behold/Lo ) : Solomon hi hi thu pawl a ngan ih cang 3
nak a thlen tikah “Zoh hnik” tin a thok ter. Behold, children are a heritage from the
Lord, the fruit of the womb a reward (ESV). Cucun ziang a lang ter ti le
tu ih a hun rel ding mi hi a thupit ter, theih lo ding a phang, theih
tengteng dingah a duh tinak a si. Curuang ah fate hi Bawipai laksawng an si zia
hi Solomon in thei lo ih kan um ding a phang. Phundangin kan sim a sile Solomon
hmangin Pathian phuansuah awknak a si ruangah Pathian in fate kan neihmi pawlk
hi Amai laksawng in pe mi a si zia kan theih lo ding a phang tinak a si.
b)
Ro : Thuhmai hruai ih kan tarlang zo bangin Bible dang kan siar a si
le fate hi Bawipai hnenih in kan comi ro an si zia a lang. Cui ro cu Pathian ih
ta a si ih in pek sawngmi an si. “An si” a ti ruangah fate hmuahhmiuah a huap
ṭheh. ‘A tam sawn, a ṭhen cu’ cu a ti lo ruangah tu ih kanneih mi tefa pawl peh
na neihmi tefa pawl hi kan mai ta an silo ih an za te’n Pathian ta an si. Ro
timi cu a neitu in mi pakhat hnenih a pek/roh mi kha a si. Lei dan ahcun Ro nei
tu an thih ding tik lawngah a dam lai mipawl hnenah an roh aw sawng
tlawngpi ṭheu. Pathian cun fate, ro in pek tikah Amah Pathian a thih
thlang ding ruangh a si lo, thi thei lo Pathian a si ih ro in coter liolio mi
an si.
c)
Laksawng : Laksawng timi cu lungawinak/nomnak lam hoi ih rel
duhmi a si. Pathian in fate hi laksawng ih in pekmi a si tikah in petu Pathian
hnenah lungawi thu sim ding kan si. Pathian ih in pekmi fanau pawl hi kan nun
nuam tertu,lungawinak in petu an si. Nauhak an um lonak hmun ram cu a ṭhing, a
rehmi hmun a si ih minung nunnak hrangah sam mi a um ringring. Nauhak an um in
khua ram a hlunghlai ih hmailam hrang ruahsannak a tamter ih minung si dan ding
famkimnak khal a si. Pathian in minung pawl nun nomnak ding hrangih in pekmi
laksawng pakhat cu fanau pawl hi an si.
d)
Malsawmnak : Fate hi Bawipai malsawmnak an si zia tu ih kan hmanmi
Bible hin a tarlang ih ṭha ka ti zet. Pathian thluasuah kan donmi tamtak lakah
fate hi Pathian thluasuah pakhat a si. Sersiamnak thu kan zoh asile “ fa tampi
nei in pungzai uh..” a timi hi thupek a si lo. Thupek hi cu pekmi ih an ti thei
ding awm ruangih pek a si ṭheu. Fa tampi neih ding hi Pathian in minung hnenih
a thu pek si lo in ‘thluasuah a peknak’ sawn a si. Fa tampi nei ding in Pathian
in minung thluasuah a pe Sem.1:28.
3. Ralkap ih kenmi conkiang :
Ralkap ih kenmi conkiang cu a kengtu in hmuitinmi a nei ih a
hmuitinnak ah a sai ṭheu. Conkiang cu a kengtu ih thu sungah a fehnak ding a
um, a conkiang thu a si lo. Pathian in fanau in pek hi daithlan men ih um ding
kan si lo, an fehnak ding, an thlennak ding hi nu le pa in hmui tin mi kan neih
a ṭul. Hmuitin mi nei in kan kilkhawi ṭha si ahcun kan hmuitin mi lamah an feh
ko ding. An mah te ṭhan ih kan ṭhan len ter a si ahcun an thlennak ding hi
duhum lo taktak tla a si thei.
Kan ruah ding ih
kan duhmi cu kan fate hi Pathian ih in pekmi a si ih cu ti asile kan fate hi in
petu Pathian hnenah kan hruai ngah maw? ti hi a si. In petu Pathian hnen thleng
lo tla an si pang maw ti hi phan a um nasa. Curuangah nu le pa in Pathian in in
pekmi fanau pawl hi in petu Pathian thei ngah ding rori in an nauhak lai ihsin
kan kilkhawi ihkan zirh ṭhat a ṭul. “ Ka nauhak laiah ka n le pa in in sim lo
pi” ti ih in mawh thluk lo nak dingah ṭan kan la kei uh. Pathian an theihnak
dingah 100 ah 100 kan ti thei tinak lam cu a si lo nan kan ṭuanvo cu a si.
Thuṭhentu cabu
kan siar tikah Israel pawl an tluk thu hmuh ding a tam nasa. A san pakhat cu an
fa le pawl kha Pathian thu an sim lo ruangah a si. Cule
cuih san ih Israel mi pawl cu an thi ih cuih hnu ih a hung suakmi san
thar cun
Bawipa siseh, Bawipa in Israel hrangih a tuahmi
hmuahhmuah siseh, an thei lo Thuṭ.2:10.
Kan fanau pawl an nauhak lai ihsin Pathian thu ih an ṭhanlen lo a
si ahcun kan hmabak pakhat cu’ tluk’ a si.
Kan fa le hrangah
hin hmuitinmi tampi kan nei ko ding, cumi lakih kan hrelh lo dingmi cu in petu
Pathian theitu an si ding hi a si. Timote hi kan theih lar zetmi a si ih Pual
khalin a rinsan zetmi leh a ngainat zetmi a si. Timote hi a nunnak kan zoh
tikah a nauhak lai ihsin Pathian thu thawn rak kai hruai ngahmi a si 2 Tim. 3:
15. Cui a nauhak lai ihsin an rak kaih hruainak cu a upat tiangin mi pitling ih
tuahtu a si. Kum zawngin nauhak zet lai khal sehla Kawhhran kilkhawi dingah
Paul ih rinsan zetmi a si.
Pathian ih laksawng a lo pekmi fanau
kha a lo petu Pathian hneh thlen sal dingah zuam aw.
Thuf.22:6 Nauhak kha
nundaan dik zirh aw, A tar tiangin cuih lamzin ihsin a pial lo ding.
