Na Thei Hrih ve maw? Hi Thu (8) hi!

Kan theih zetmi thu vek ih lang si a sidan diktak kan theih ngah lo mi thu hi ziang zat tak um kei maw! A hnuai lam ih tarlangmi pawl hi kanza te theihlo mi thu cu a si hrimhrim lo ding. Asinan mi tam sawn in a tlangpi thu ih kan theih lo mi cu a si a zum um. Cu pawl cu vun tarlang vivo seh la.

1.  Moses in a nupi a ṭhen.

          “Moses in a nupi a ṭhen” timi cu hmuh ding a um lo nan hi a hnauilam ih Bible cang tarlanmi zoh tikah Moses in nupi a ṭhen hi zum a um nasa.

Suah.18:2 Cutikah Moses ih nupi, a pu hnenih a kuatmi, Zipporah cu Jethro in Moses hnenah a ratpi.

Mip. 12:1 Hazeroth ih an um laiah cun, Moses in Kush nunau a ṭhit; curuangah Miriam le Aaron in Moses cu an thangsiat.

2. Samson sam mettu hi Delilah a si lo.

          Pathian in huham cahnak thawn a thommi Samson ih sam mettu kha Delilah hmang maw kan ti ṭheu mi kha a rak si lo a kawhmi pa sawn a si hmel.

Thuṭ. 16:19 Delilah in Samson cu a cawn parah a thlim, a ihthatter ih mi pakhat a kawh ih Samson ih samphiar phiar sarih cu a hleptan thluh.

3. Jesuh hi mi hmelṭha a si lo.

          Jesuh hmel hi ziang vek teu a si ti sim fiang theitu an um lo nan Thukam hlun sungih a lang dan vek in a hmel a ṭhat hmel lo.

Isai.52:2…. Kan zoh duhnak dingah pianhmang ṭhatnak le mawinak a nei lo. Kan thinlung le kan mit in latu dingah mawinak zianghman a nei hrimhrim lo.

4. Ramsa 2 hnakih tam Noah in lawngsung ah hruaimi a nei.

          Kan theih ṭheu dan tlangpi ahcun Pathian ih fial bang tuk in Noah in lawng sungih ramsa a hruai luh tikah ramsa, a nupa kop te’n a hruai lut ti hi a si. Sem.6:19 vekin a sual ti ding cu a um cuanglo. Asinan kan theih bet ṭheu lo mi cu mi 2 hnakin tam hruai luh mi khal a nei ti hi a si.

Sem.7:2,3 Saram thiang ei ṭha phunkim in phunkhat ah khuah sarih ciar keng aw; a sinain a thiang lo ramsa cu phunkhat ah a nu le a pa khuah khat ciar lawng la aw. Vate khal a phunkim in phunkhat ah khuah sarih ciar in keng aw. Himi pawl cu leilung ih cithlah saaltu dingah an si.

5. David in David ti si lo hmang dang a neih hmel.

          David ti ihkan theih lar zet mi hi hmin dang a neih hmel. Hmin hmai sa an phuahmi a si lo len hmin dang an phuahmi a si ding.

2 Sam. 21:19 Cuih hnuah Gob ahcun Filistin mi thawn an do-aw lala. Cutawkah Bethlehem khuami Jair ih fapa Elhanan in Git khuami mitumzet pa, a feiko cu thiamtlang tia a si mi Goliath a that.

6. Samson, hnam dangmi fala nei tertu hi Pathian a si.

          Samson cu Timnah khua a a lengih cunah fala a vung nei, a nu le pa hnenah cui fala ṭhitsak ding ina dil nasa. Hnam dangmi fala a si tikah a nule pa in an lungkim lo zet. Cucu Samson in a mai palung in fala a vung nei men hmang maw tinak laiah Pathian ih neither a rak si.

Thuṭ. 14:4 Filistin mi pawl do dingah Bawipa in tikcu ṭha a hawl ruangah Bawipa in Samson cu hiti in thil a tuahter a si, ti kha a nu le a pa in an thei lo.

7. Calvary ( Kalvari) timi hi Bible ah hmuh ding a umlo.

          Calvary ti hi Khristian pawl in kan uar bikmi lak ih tel a si. Pathian thu kan simmi ah leh kan hla pawl ahhin a tel tam nasa. Asinan Calvary timi hi Bible ah a rak um lo. Bible ih kan hmuh dan sawn ahcun Golgotha ( Luruh hmun ) ti sawn in a si. Cucu kan ti sual tinak lam cu a si lo, Golgotha leh Calvary cu thu hmun a si lo, rel duhmi sawn cu a calvary kha kan theih larlar thawn a ṭongfang Bible ih hmuh ding a um lo thu sawn kha a si.

Luk.23:33 ah voi khat te cu hmuh ding a um ih si hman sehla KJV Bible lawng ah a si. Bible dang ah a um nak tla a um men thei nan, Bible version tam sawn ahcun Calvary ti lo in “Luruh” ti sawn in a um.

8. Ka lo phatsan lo ding titu hi Piter lawng a si lo, dungthlun zaten an si.

         Na hnenih thi ve ding ka si hman ah ka lo phat san lo ding ti ih titu hi Piter lawng hmang maw kan ti ṭheumi kha piter lawng si lo in dungthluntu zate in an ti ṭheh a si.

Matt.26:35 Piter in, “Na hnenih thi ve ding ka si hmanah ka lo phatsan dah lo ding,” a ti. Dungthluntu dang pawl khal in cuti cun an ti ciar.