Pathian Ih In Hruai Dan

Pathian Ih In Hruai Dan

Isai.55:8-9 Bawipa in, “Ka ruahnak cu nan ruahnak bangtuk a si lo. Ka lamzin le nan lamzin cu an dang aw a si. Van tla khi leilung hnakih a saang bangtuk in Ka ruahnak le ka lamzin cu nan ruahnak le nan lamzin hnakin a sang sawn a si.

            Zumtu zo khalin kan duh dan leh kan ruah dan ahcun Pathian minung pawl cu harsatnak tuar lo, ziangkim tuahmi parah tluangin hmui ngel sehla, zumlo tu pawl hnakin hleice takin thawsuah dawng sehla timi hi kan thinlung sungih kan paimi a si deuh cio ko ding tiah zum a um nasa. Hmansehla cui kan ruah dan leh kan beisei dan vekin thil a cang theu lo. Cu tikah Pathian sawn riangri khi mawh thluk duhnak neih a awl te. Pathian hi mawh thluk ding ci a rak si lo, thil ziangkim hi um zia nei, duhsan nei in in rak hruai sawn a si. A lam zin leh a ruahnak pawl hi kan theih ban sawn theu lo ruangah kan nun a rak buai hi  a si sawn theu. Pathian in Israel pawl a hruai dan in vun zoh vivo sehla.

1. Ziangruangah Pathian in harsatnak in tuar ter?

    Daan.8:16 Nehhnu-ih nan ṭhatnak dingah harsatnak in a lo hniksak hai a si.

            Pathian in Israel pawl Izip ram ih an harsatnak sung ihsin a hruai suah tikah harsatnak tong lo tein a hruai thei tuk ko.  Hmansehla harsatnak tampi an tong ih Pathian tla a vuivai, hruaitu Moses tla an mawh thluk. Izip ram ihsin Kanaan lam panih an fehnak ah harsatnak an tonmi hi a tam zet.

Pathian in ziang ruangah hi tluk har fualfo in Israel pawl a hruai timi thusuhnak hi kan thinlung sungah a lang men thei. Hruaitu Pathian hi a tawntai tuk maw si? Tawntai lamlam hlah, cui harsatnak pawl cu nehhnu ih an thatnak ding hrangah Pathian in a thlen termi a si sawn.

           

            Zumtu tampi in harsatnak kan tuar tikah Pathian in in dungtun, in thlauthla a si hi tiih ruah a awl te. Pathian in in tlauthla a si hrimhrim lo, Pathian in kan parah harsatnak a thleng ter a si ahcun cumi cu kan thatnak ding hrangah a si sawn. Cui harsatnak cu tuar laiah a har zet theu ko nan thatnak a suahpimi hmuh ngah hi cun Pathian hnenih lungawi thusim ding a rak si sawn. Joseph khal a mai suahsempi a u le pawl in an hrem, an zuar ih Izip ramah mi hnenum ih a can thluh hnuah thawng thlak tiang a tuar. Pathian ih tumtahmi theih lo ahcun Joseph ih u le pawl hi mit kem um tak an si ih Joseph hi zangfah um tak a si. Hmansehla khai Joseph tuarnak kha Pathian ih khawkhannak a rak si ih an thatnak ding a rak si (Saam 105:17). Kan damnak dingah sii in dawh theu bangin kan thatnak dingah Pathian in harsatnak in tuar ter theu.

            Daan.8:16 NKJV ahcun “ lo tangdor ter dingah (that he might humble you)” timi tla  a ngan tel. Minung hi harsatnak kan ton dah lo tikah puarthau a awl te, ti luplo ih um a awl ngaingai. Harsatnak kan vun tong ih ti ngaihnak kan theih nawn lo cin ri ahcun puarthau a theih nawn lo nasa. A hleice in mi bawm tu si loin bom cop kan hun si hicun tangdor aw ti a tul nawn lo. Cu vekin Pathian hmai ah puarthau ih kan umlo nak dingah leh tangdor ten kan um theinak dingah harsatnak kan parah a thleng ter. Cumi cu zumtu pawl kan nun mawi ter tu, tha tertu a si.

2. Ziangruangah Pathian in mangman thiam, thilmak tuahthei pawl a zuah?

Daan.13:2,3 Profet a si lole mangman thiamtu pakhat khat

 nan lakah an suak ih,....thilmak zetzet le

mangbangza an lo hmuh ih,

cuih an lo hmuhmi thilmak zetzet pawl cu

dikzetih a kim ngaingai khal le,

 cubangtuk cu zianghman ah va siar hlah uh....

            Mangbangza  hi Pathian lawngin a tuahlo, Pathian minung pawl lawng khalin an tuah lo, Khawvelmi khal in an tuah ve ti cu Bible ah fiang zetin kan hmu thei. Ni neta ah tla cun Pathian ih minung pawl hman bum ngahmi an nei lai ding. Mangbangza hi Pathian ta ih ruah thluh mai a awl te, thil danglam deuh a um cun kan pan huho leh mai theu ih thlarau cei in kan cei ciamco ih kan hliak hlai theu lo hi in ti siattu ah a cang thei. Asile Pathian in ziang ruangah a minung sisi lo  ih hi vek in mangman thiam, hmailam thu sim thei, mangbangza tuah thei pawl hi a zuah a si pei? Ziangah a that theh men lo? Hiang pawl in le Pathian minung pawl an thlem theu fawn. Anmah pawl lung dingin le Pathian in in siang fawn si lo. Pathian in hiang pawl hi that theh sehla Amai minung hnen lawngah mangbangza tuahtheinak pe sehla Pathian minung pawl cu awl ai te’n kan thei thei ding nan si khawh. Pathian in hiang pawl a zuahnak san cu kan thin le lung zate’n Amah kan duhdawt maw duhdawt lo ti in hliah duh rungah a si. Dan.13:3.... Bawipa cu nan thin le nan lung zatein nan duhdaw maw duhdaw lo ti ih nanmah hniksaknak ah Bawipa nan Pathian in amah cu a hmang a si. Pathian kan duhdawt a si ahcun Amai thu kan thlun ding, Amai thu thlun loin hiang pawl thu kan thlun swn a si ahcun Pathian thinlung cu ziang tluk in a na ding. Zum tu mi thenkhat cu mangbang, harsat ton deuh le kut tial zoh thiam leh a ziang thiam si maw hi pan kan uar thei zet ih Pathian hi kan thinlung zaten kan duhdawt lo zia le kan rinsanlo zia lang ter tu a si ih tlunah Pathian ih hniksaknak ah kan tling lo nasa tinak a si. Leitlun mithiam hnakin Pathian kan pan sawn kei uh, Amai thu kan thlunsawn kei uh.

3. Ziangruangah Pathian in Kanaan ram ih miphun dang pawl a dawi thluh lo?

(a)  Zirhduhmi a neih ruangah:  Pathian in Israel pawl Kanaan ram ih a hruai luh tikah ral an do ih nehnak a pe. Asinan Kanaan ram sungih miphung dang pawl kha Pathian in a that thluh duh lo, zuahmi a nei ih cu pawl cun Israelmi hrangah mi hnaihnok ah an rung cang. Ziangruangah si pei Pathian in Israel pawl ih ral hi cimit duh lo ih a zuah? An umnak ram sungah ral um lo te’n um sehla a thlamuan thlak ding thawi. Pathian in zirhduh a neih ruangah a si. Ziang a zirh duh kan ti a si le ral do an zir nak dingah leh raldo hi ziangvek a si ti an theihnak dingah a si.Thut.3:2 Israel mi pawl hrek khat raldo hi ziangvek a si ti a thei hrih lo pawl in raldo an zirnak le an theihnak dingah a taanter hrimmi an si. Ral an do dah lo a si ahcun an pupa pawl in ral an rak do hi ziangvel in a har timi an thei nawnlo ding ih Pathian in ral a nehsak tikah ziang tluk in a man hla ti tla an theithei nawn lo ding.

Zumtu khal hi dotu/ ral kan nei ringring. Lei kan um sungah cun raltu cu kan nei ringring ding. Cumi cun kan Bawipa Jesuh khal kan mai ruangah raltu a neih hi ziang tluk a har ti leh kan neh theilo mi sual ral in nehsaknak a man khun zia in thei suak tertu si hramseh la. Cun Israel pawl in ral an sun tikah Pathian an hlam ih an rinsan bangin ral kan neih  hi Amah Pathian in rinsan tertu leh mah leh mah rinsan kan tlak lo zia kan theinak dingah si hram seh.

(b) Hniksaknak hrangah: Thuthentu cabu kan siar tikah Israel pawl in an kiangkap um miphun dang pawl ih nun zia cawngih Pathian an duntun thu hi hmuh ding a tam nasa. Pathian in hi miphun dang a zuahnak san cu kan thumaw an thlun deuh miphun dang nun dan an cawng sawn ti hniksaknak ding hrangah a si.Thut.3:4 Bawipa in an pupa pawl hnenah Moses hmangin a thupek kha Israel mi pawl ih an thlun le thlun lo theih hliahnak ah cuih miphun dang pawl cu a umter hrim a si.

Zumtu pawl kan umnak hi leipar ah Pathian in zumlo tu pawl kan kiangih um a siang. Zumtu leh zumlo tu kan um khawm ruri in siang hrih. Nini khat ahcun zumlotu pawl lakih tel nawn lo dingah in rung hruai leh ding. Tu ih zumtu pawl umnak ih zumlo tu khal an um a sian hrihnak cu ka thu maw khawvelmi pawl umdan an thlun deuh ti Pathian in in hniksak duh hrih ruangah a si. Zumtu kan nunnak vun zoh fiang aw sal cio sehla Pathian thu maw kan thlun deuh, kan kiangkap um dan. Tulai san a sisi, mi tla an ti ve sisi ti men in Pathian duhlomi lamzin kan zawh pang maw? Lawng cu tidai parah a feh nan a sungih tidai a luh in a pil theu bangin Pathian minung pawl khal hi lei parah kan feh rero ko nan kan nun sungah hi lei ( khawvel thil) a luh a siah cun kan pil. Paul in Timote hnenah “ Nangcu Pathian minung na si ruangah himi pawl hi hrial aw” (2 Tim. 6:11) a ti bangin kan kiangkap ah khawvel mipawl cun Pathian duh lo zawngih an nun hmanah cumi ih telve ding kan si lo.

 kan ni cu Pathian minung kan si ruangah tulai nun dan hnak in Pathian duh zawngin kan nung sawn ding.

Zumtu pawl van kan thlen tikah cun hiang pawl hin ziang tik hmanah in ti buai nawn lo ding. Leitlun ahcun hiang pawl hi Pathian in kan par ih  a thlen ding a siang hrih lai. Nun dan kan thiamnak dingah leh ralrin kan thiamnak dingah a si. Kan theih thiam lo mi leh kan ruah ban lomi kan parih thil a thlengmi hi Bawipa in duhsan a rak neih ruangah a si theu ti hi kan nunnak ah a thar in thazang kan la tlang kei uh.