Presbyterian (USA) cun kawhhran ih hman dingmi hlabu an tawlrel tikah hi hla hi telh dingmi ah a tel ve. Sihmanseh la hlabu ih telh dingah an hnak dohtu a um; cucu a cang thumnak ih “the wrath of God was satisfied = Pathian thinhengnak cu a dai zo, diriam ter a si” timi a si. Himi tlar hi cu Pathian thu feh dan (Theologically) thawn a kaih thei in an thei lo. Curuangah hla phuantu hnenah “the wrath of God was satisfied” timi kha “the love of God was magnified = Pathian ih duhdawtnak cu nasa sin in langter a si” tiih thleng dingin an va sim. Asinan hlaphuahtu cun an rak lungkim lo, curuangah hlabu tawlrel dingih tuanvo neitu committee member 15 sung ihsin 9/6 vote in hlabu sungih telh lo dingah hnemhnget a si.
Hi hla, mipi sak hlawh zetmi hlabu sungih telh a si lo tikah, mithen khat cun ‘Pathian thinhengnak’ lam hi hlabu ihsin hlon an duh a si hi tiah soiseltu an um. Asinan committee cun ‘Pathian thinhengnak’ lam hi kn buaipimi a si lo ih ‘diriam ter a si - satisfied’ timi sawn hi kan ngaimawhmi sawn cu, tiin an sangleet. Ziangahtile ‘Jesuh thihnak in Pathian thinhengnak a riamter’ timi hi Bible ah a um lo, cun thinglamtah hi Pathian thinhengnak riam ternak/ cemternak a siloih A duhduawtnak a langsuahnak a si sawn, ti hi an ṭan a si. Cun himi thu ah thu um betmi cu ‘Pathian thinhengnak’ timi cun kan Pathian hi thinheng hmang Pathian a sinak a lang terih mihi in midang Pathian lam hoi ding a dawnkham sawn thei, tiah ruahnak a um bet.
Thubet
“Pathian thinhengnak cu riamter a si/ a dai zo” timi thu ah fehpi dan bang aw lo zet a um. Prebyterian Church (U.S.A) (PCUSA) lam cun hi vek thu hi Bible ih zirhnak a si lo tiih an ruah laiah Presbyterian Church of America (PCA) lam vet hung cun an cohlang ve thung. ‘riamter – satisfied’ timi hi a cafang in Bible ah hmuh ding um lo khal sehla a thu um dan in fiang takin kan hmu thei. Misual parih Pathian thinhengnak cu thinglamtah parih a luangmi Khrih thisen in a dai ter, Pathian lung a awi ter, a lung a kim ter a si’. ‘Pathian thinhengnak’ timi hin khrihhnenih ra dingah midang a dawnkhamnak a um cuang lo tiah an ti.
Khristian lakah hin ngaih dan bang aw lo tete hi a um duh zet. Atu kan san khalah mi ṭhenkhat cun Pathian thinhengnak thu, Hremhmun thu, tivek hi siam ciamco lo ding mi ngai paih zawng a si lo. Cuhnakin Pathian thatnak, duhdawtnak le vanram thu rel tam sawn ding, cumi in mi hip sawn tiih ruat an um. Cun khatlam ah, Pathian ih thatnak le duhdawtnak, vanram thu lawn guar ciamco ih sim ding a si lo, Pathian ih thuṭhennak, thinhengnak, mi a hremnak le hremhmun thu khal phuan ding, Bible ih zirhmi hril a si. Himi in Pathian hi thinheng hmang le mi siatsuah hmang a sinak a langter tinak a si lo ih Pathian hi sual hua, thil tha lo dodal, dik lonak zohliam men lo tu le misual dantattu a sinak in midik a sinak a lang ter sawn ih, nun dan dik kan thiamnak ding hrangah kan theih a tengteng tul sawnmi tiih fehpi tu an um ve.
Khuimi a dik sawn, a tha sawn timi cu kanmah le kan hmuh dan ah a thum aw. Nang teh khuimi deuh sawn hi na fehpi sawn?
No comments:
Post a Comment