Na Tuah Theimi Tuah Aw Cui Tlun cu Pathian

Na Tuah Theimi Tuah Aw

Marka 14:8

Pathian in mi pakhat cio hi kan mah le tawk zawnin tuahtheinak in pe theh. Midang tuahmi vek kan tuah thei lo a si hmanah mi dangih tuah theilo mi tuahtheinak in pe ve. Pathian in kan mha le tawk zawn in kan hmaika tuah tuah dingmi in ret sak caan a um. Kan tuah theilomi kan tuah lo caan ah Pathian in in mawhsiat dah lo. In fialmi a um a si ahcun kan tuah theimi a si ding. Curuangah kan tulmi mi cu kan tuah theinak zawn ah rinum takih tuah ding kha a si. Kan tuah theimi kan tuah a si ahcun a bak cu Pathian kut ah a um. Tuah thei tawk a tuahtu pawl leh Pathian ih tuahsakmi pawl vun zoh vivo sehla.

1. Mi zeng pai’ rualpi pali ( Marka 2:1-12 )

             Jesuh kha Kapernaum ih a um laiah mipi tampi a hnenah an ra ih thu a sim hai. Cu lai ah mi pa li ih zeng pakhat an rak zawn, asinan mipi an tamtuk ruangah Jesuh hnen thleng ko in mipi an pah tlang thei. Cutikah Jesuh umnak zawn diphun cu bauh tahratin Jesuh hmaiah an vun thlak. Jesuh cun an zumnak a hmuh tikah mi zeng pa cu a dam ter.  Hi mi pa li in mi zeng pa hi an dam ter thei lo, asinan an tuahtheimi an tuah, cucu mi zeng pa kha Jesuh hnen ih zawn a si. An nih in an tuah thei mi an tuah in Jesuh cun an tuah thei lo mi mi zeng pa cu a rak dam ter.

            Kan mah in kan tuah thei lo hmanah harsatnak a neimi pawl hi Pathian hnenah hruaitu ding kan si. Kan mai thil ti theinak in zohman kan dam ter thei lo ding, asinan Jesuh hnenah kan thlenpi thei. Kan tuahtheimi kan tuah dingih Pathian in kan tuah thei lo mi in tuah sak ding a si.

2. Nauhak pate pakhat ( Johan 6:1-13; Marka 6:34-44)

            Jesuh cun a dungthlun pawl hnenah an mahte lawng an um theinak hmun fianrial ih feh ding ah a sawm hai. Asinan mipi in an thei ih mipi tampi in an thlun thotho ih Jesuh cun thu a zirh hai. Tlai lam an rung si tikah rawl ei a rung cu thawn dungthluntu pawl cu ei leh in dingah mangbang thlatem in an um. Jesuh cun thu a sut hai ih “Sang ziangzat so nan neih” tiah a ti. Mi nung thawng nga hrangah sang leh ngai thawng nga nan nei maw tiah a sut lo. An neih zat kha a sut ih an neih zat ih cangvaih a tum sawn. An vun dap tikah nauhak pate ih ken mi sang panga leh nga pum hnih lawng kha a si. Jesuh cun cui sang panga leh nga pum hnih cu mipi thawng nga (5000) darnak ah a hman, a hlei an khawm sal tikah bawm 12 an ngah a si kha.

Pathian in ziang tluk in kan nei tam ti lam hi a thupit lem lo ih kan neih zat ih cangvaih a tum sawn a si. Voi tampi cu kan naih zat leh   thiltulmi kan khaikhin tikah thlatem in kan um theu. Asinan ziangzat kan nei tiah buai lo in Pathian cun kan neih sun hmangin mangbangza a lang ter theu sawn. Kan neih a hnen kan thlen sianglo a si ahcun mangbangza a thleng dingmi kan sung thei tinak a si.

3. Piter in Jesuh lawng a san (Luka 5:1-7)

            Piter cu zan var te’n sur a vorh ih  pakhat te hman kai lo in a hlawhsam cu kan thei theh. Jesuh a hnen a ra thlen tikah Jesuh kha a lawng a san ih Jesuh in Piter lawng hmangin mipi thu a sim. Piter cu nga kai sal dingah ti ngaihnak a um nawn lo, a sur hman a sop rero zo. Asianan a ti thei mi, Jesuh kha a lawng a hman ter ih Jesuh ih fial bangtuk in li thuknak lamah a sur a vorh sal tikah ngai tam ngaingai a kai sal.

            Pathian hnenah kan pek thei tawk kan pek hin Pathian in kan mai’ theinak ih kan ti thei nawn lo mi kha in ngah sal ter theu a si. Pathian parah kan tuah theimi kan tuah hin kan hlawhsam zonak khalah Pathian in hlawhtlinnak in pe sal theu a si.

4. Thlaanlung thawntu pawl ( Johan 11:38-44)

            Lazarus cu a thi ih a phumnak nili a rei zo hnuah Jesuh cu Lazarus an phumnak thlaan lam ah a feh. Lazarus a kaih thawh ding hi Mari tei’ unau khal in an zum ban lo. Asinan Jesuh cu Lazarus kai tho dingah hmun dang ih a khual tlawnnak ihsin a ra kir a si. Ziangkim ti theitu a si ko nan Lazarus thlaan lung thawn dingah mi a fial. Thlaan lung cu mi dangin thawn lo khal hai sehla Jesuh cun a tuah dingmi a tuah thei tuk thotho. Asianan thlaan lung thawn a fial. Thlaan lung an thawn tikah Jesuh in Lazarus cu thlaan sung ihsin a kai tho.

            Pathian cun minung hmang lo khal in mangbangza a tuah dingmi cu a tuah thei tuk ko, asinan mangbangza a tuah ding tikah fialmi in neih theu a si. Cui in fialmi cu kan tuah nakah mangbangza a lang ter theu. A cang thei mi kan tuahnak hmunah a cang theilomi hi Pathian in a tuah theu.

5. Aaron leh Hur ( Joshua 17:8-13)

            Joshua leh a ralkap pawl in Amalek pawl an do laiah tlang parah Moses, aaron leh Hur cu an so ih, Moses in a ban a phar tikah Israel pawl in amalek pawl cu an neh. Asinan Moses cu a ban a kham tikah ral pawl in an rak nor sal theu. Cutikah Aaron leh Hur in Moses ih ban cu an thlir sak ih cu ti cun ral cu an neih khawsuak. Aaron leh Hur in anmai ban thlir tahratin ral nehnak cu an co thei lo, asinan Moses ban an thlir saknak thawn in an ral pawl cu an neh a si.

            Hruaitu ropi cu kan si kher lo ding, asinan hruaitu tung dingtu cu kan si thei. Kan mah hi hruaitu kan si lo hmanah Pathian in hruaitu ih a ret mi pawl hi kan bomnak in Pathian in thil ropi a tuah thei a si. Hruai tu hi ziang hmuahhmuah tuah theitu a si lo, famkim khal kan um lo. Cu mi ah kan hruaitu pawl khi a ti thei ngai pei maw tiih thlir liamtu ding men kan si lo ih kan mai bomnak an tul theu ti thei in leh kan bomnak thawngin Pathian in thil ropi a cang suak ter thei a si ti kan thei thar sal kei uh.

6. Israel nauhak nute (2 Siang. 5:8-13)

            Siria pawl in Israel pawl an do laiih an kaihmi nau hak nute cu Naaman hnenum ah a cang. Naman cu zohman ih theih lo in phaarnat a rak nei. Cu mi cu hi nauhak nute in a rak thei. Ral ih kaitu a hung phaar cu direm ding a awm nan cu vek thinlung kha hi nute in a nei lo. Cun a phaar nat khal a ti dam thei lo. Asinan a dam theinak ding lamzin a khih hmuh ih a khih hmuh bang tukin Naaman cu Israel ramah a fehih Pathian Profet hmangin damnak a co ta riai. Culawng hman silo in Namaan kha Pathian nung betu ah a tuah thei. Cu mi a fengnak cu Naaman kha a dam tikah Israel leilung phur dil an ram ih tlun dingah a dil. Kha lai sanih an ruahnak ah pathian hi mai ramleilung lawngin biak a theih an ti. Curuangah siria ram ih a kir sal khalah Pathian a biak theinak dingah Israel leilung phurh hnih a dilnak san a si.

            Israel nute hi a sermon dupdo lo, Pathian thu khal a rel ciamco lo nan amah thawngin a pu Naaman cu Pathian theitu a cang a si. Mi dangih harsatnak hi kan mah cun kan cinfel sak thei kher lo nan lamzin khihhmuhtu kan si thei. Cui kan tuahtheimi kan tuahmi parah Amah Pathian rung phuang aw in a thilti theinak a run lang ter ding a si.

A cangtheimi tuah aw la Pathian in a cangtheilomi a tuah ding.

Ca siarmi>>>https://www.sermoncentral.com/sermons/do-what-you-can-and-god-will-do-the-rest--do-what-is-possible-and-god-will-dr-stanley-vasu-sermon-on-action-164015?page=1