Johan
cakaut pathumnak hi cakuat tawite a si ih hmansehla hi cakuat tawite ahcun
zumtu pawl kan nunnak hrangah zir ding thupi tak in pe. HI cakuat sungah hin mi
pa thum ih thuhla ngan lang ih cui mi
pathum pawl ih thuhla ihsin kan dir ding mi le kan ralrin dingmi pawl am um.
A.
Gaius
Gaius
timi hmin hi an san laiah hmin lar zet a si. Johan kuat thumnak hi Gaius hnenih
a kuatmi a si ih thuhla tampi lang lo khal sehla Gaius hi zumtu zohṭhim tlak
zet a si zia kan hmu thei. Cu pawl cu:
1. Thlarau
lamih a dammi
(cang 2): Gaius hi thlarau lamih mi harhdam a si zia theih a si rualrual in ziang hmuahhmuah ah
harhdam ih a um theinak dingah thla cam sak a si thu kan hmu.Thlarau lamih harhdammi
timi cu kumkhua nun kan neih lawng hi rel duhmi a si lo ding. Thlarau lamih dam
timi cun zumtu nunnak ih kan tuah dingmi pawl khalih nun felfai a neih lam khal
a tel ding.
Zumtu pawl
thlarau lamih a harhdammi kan si ding hi a thupi zet. Thlarau lamih a harhdammi
kan si lawngah miin kan kiangih um hi nuam an ti dingih mi dang hrangah phur
rit kan si lo ding. Taksa daan khalah a harhdam lo mi pawl hnenih um cu thaw a
veng thei ngaingai lo. Thlarau lamih harhdam cu ziangvek a si ti hi cu fiang
zetih sim cu a har ding, hmansehla a harhdam mi le a damlo mi zumtu hi cu nitin
kan nunnak ihsin ziang maw zat cu theih awk thei nak a um ding. Kan zumtu pi
pawl hi kan hnenah an ngam lo tuk a si ahcun thlarau lamah damlonak kan nei tla
a si ih cun kan mah lala khal kan zumtupi hnenih tel nuam a kanti lo cun
thlarau lamah kan damlo tla a si thei. Cun Johan cakuat ngantu in Gaius cu
ziang hmuahhmuah ih a dammi si dingah thla a camsak tikah taksa damnak khal a
tel ṭheh. Zumtu ṭhenkhat in thlarau lam thu lawng hi thupi takah retih lei
taksa lam zianghman ih siar nawn lo an um. Thlarau lamih a harhdammi kan si
ding a thupit vekin kan taksa lam harhdamnak khal a thupi tihi kan theih a ṭul.
Lei ih kan um sungah Pathian hna cak sinih kan ṭuan theinak dingah taksa
harhdamnak hi a thupi zet.
2. Thutak sungah
a um ringring
(cang 3-4): Gaius cu Pathian thutak sungih a um ringring mi a si.
Thutak cu ziang a si? Pathian cu thutak a si ih a tongkam khal thutak a si
(Johan 14:6; :17:17). Johan in Gaius
kha thutak sungih a um thu a theih tikah ziang tlukina lung a awi. “ka faa le
pawl thutak sungah an nungcang ti ka theih hnakih ka lung i awitertu thu dang a
um nawn lo” tiah a ti. Zumtu pawl cun hi leitlun ah kan len le len lo, inn ṭha
lo ṭha kan neih le neih lo hnakin kan faa le pawl, kan innsang hi Pathian
thutak sungah kan um hi kan lung awinak bik a si. Sum le pai tampi, inn ṭha lo ṭha
nei hman nung la kan innsang Pathian thutakin kan um loah cun lungawi a kim
thei lo.
3. Rinum zetih
hnaṭuantu a si (cang 5):
Gaius cu Khristian unau pawl hrangah rinum takin Pathian hna a ṭuantu a si. Kan
mai hrang hlawknak ding hrangih hnaṭuan hi cu a awl nan midang hrangih hman awk
hi cu a har zet. Asinan kan Baibal in Pathian hrang le midang hrangih nun hman dinghy
in zirhmi a si. A dung kan thlunmi Jesuh khal a mai hrangah siloin midang
hrangih pumpe awmi a si. Pathian kan rian timi Amah ruangih midang hrangih kan
hmanawknak hi a si. Pathian kan rennak ih a thupi zetmi cu rinumnak a si.
Rinumnak kan timi cu kan parih thuneitu pawl kan kiangkap le hmuh ban ih an um
lo khalle ṭha tak le feltak in hna kan ṭuan thotho khi a si. Pathian hi hmuh
theihin kan hnenih a um lo tikah rinumnak hi a thupi hleice.
B.
Diotrefes
Diotrefes
hi a thuhla a lang tamlo nasa ih a thuhla lang sunte khal duh um lo tak a si. A
hnuailam ah vun tarlang sehla:
1. Hotu si
duhtu a si(cang 9) : Diotrefes cunmidang hnakih dinhmun sangih din a duh. Hi
dinhmun hi zumtu tampi inkan zuan ṭheumi a si. Jesuh dungthuntu lak khalah Jeim
le Johan in sinak sang co duhah Jesuh hnenah an rak feh dah. Jesuh cun
khawvelmi vek a si hlah uh, annih cu an hruaimi pwl parah thu an nei tuk tiah a
rak sim hai. Pathian hnaṭuan hi riantu dinhmun ih din a si timi hi kan hngilh
pang ṭheu. Miin in sunloih le mithmai ṭha kan co tikah riantu kan si ti hi kan
theihawk cingcing ding a thupi zet.
2. Pathian hnaṭuantu a co
hlang lo(cang9): Hi cang hi TEV ahcun “ka simmi zianghman ih a siar lo ding” tiah a um
ih version dangah cun ‘in rak cohlang lo ding’ tit la in a um. A fiangmi cu Diotrefes
in Johan thawn pehpar awk a duh lo tinak a si. Diotrefes vek kawhhran hruaitu
pawl cun hmun dang ihsin mai kawhhran sungih mi dang ra lut ding hi cu ṭul an
ti lem lo, mai sungah mahte ih relbawl awk hi tawk an ti.
3.Thuphan per
le mi thuhla siazetin a rel (cang10): Diotrefes cun zumtu
pawl in an thuhla kha se zetin a rel lawng si lo in thuphan a per. Pathian hi
thutak a siih a sungah thuphan a um ve lo ruangh thuphan huatu a si. Thuphan
per hmang le Pathian cu kop awk a theih lo. Zumtu pawl kannunnak ah Diotrefes
vek hi theih ding kan um phahphah ṭheu. Midang thuhla se zetih rel hi nuam ti
zet kan si pang maw? Kan unau pwl ih thuhla sezetih rel hi Pathian in duh lo ti cu kan theih ṭheihmi a si ko ding
nan kan rak tuah ngah sal ṭheu. Cuangruangah saam hlangantu ih a ngan bang in “ka
hmurkaa ah vengtu re hram aw” tiah Pathian hnenah nitin kan nun hlan a ṭul.
C.
Demetrias
Demetrias
thuhla hi midang hnakin a lang tawi
cuang. Asinan a thuhla lang sunte hi duhum tak a si. Cucu:
Mi Zokhal in an
lawm (cang10): Demetrias hi ziangvekin a nung
timi hi a thu in ngan lang silo khal sehla a hnaṭuanmi ah zo khal ih lawm tlak
in hna a ṭuan ti a fiang. Zumtu in mi lom beisei in hna kan ṭuan ding cu a si
hrimhrim lo nan kan hnaṭuanmi parah lwm tlak hnaṭuantu kansi ding lawngte a
thupi nasa. Hnaṭuantu hi cu antam ṭheu nan lam tlak hnaṭuantu hi cu mi malte an
si ṭheu. Kan ni khal Pathian hna kan ṭuannak
ah lom beisei ih ṭuantu siloin lom tlakih ṭuantu kan si dinghi a thupi zet.
Hi Johan
cakuat sungih mi pathum nunnak ihsin kan ngansuahmi pawl hi zumtu kan nunnak ih
kan in caktertu le ralrin kanthiamtheinak ding hrangah siartu nan zate’n
Pathian in lo thlawsuah hramseh.
Ca siarmi pawl : The preacher outline and Sermon Bible
Answers by Keith Piper
