Jesuh suahnak thu kan zoh tikah Jesuh
pai a si dan thu ah siseh, kiangkap thil a thleng mi ah siseh thil danglam tampi a um. Hiang
thil danglam a thlengmi pawl hin a suakmi mi naute Jesuh hi mi menmen a si lo
zia lang tertu pakhat a si. Jesuh suahnak ih thil danglam a thlengmi tampi
lakah a ṭhen tar lang
hnik sehla.
1.
Mipa ci tello ih nau pai Mari. Matt. 1:18; 2:23
Mari hi
fala him ti a si ih kan theih cio ṭheh bang tuk in mipa thawn a pawl aw hrih lo
mi fala a si. Thlarau thianghlim thawngin mipa ci tello in nau a pai. Bible sung ah mipa tello ih naupai cu
Mari lawng a si. Cu cu lei dan in thil cang thei lo mi a si. Mari hi nau a pai
ah a him timenlawng hman si lo in nau te a neuh tiang in a him. San thar ṭongin
a rel a si le nau neih tiang rori virgin a si
( Matt.1:25 ). Mipa ci tello ih Jesuh a suahnak thu in thu pahnih
tarnglang sehla.
a) Pafa pek kan si : Kan hnenah naute a suak zo; Kan hrangah fapa peek a si zo;..Isai.9:6. Jesuh
hi Mari sungih sin a suak tikah minung dinhmun la in a hung suahnak lawng a si
ih Fapa a sinak, a rak um thoknak a si lo. Fapa dinhmun ih a dinnak cu lei leh van sersiam hlan ihsin a um zo.
Curuangah mipa ci tengteng ih a suah a ṭul lo. Um hrih lo an sem theinak dingah
mipa ci a tel tengteng a ṭul. Jesuh cu um cia zo ih suak a si ruangah mipa ci a
ṭul ve lo. Mipa ci tello ih a suahnak hin Jesuh hi kan hrangih pekmi fapa a si zia lang fiang tertu a
si. “Pe” timi um zia um a um hrih lo mi pek awk a theih lo ih a um cia mi lawng
pek awk a si. Amah Jesuh rori khal in Mari pum sung ihsin a suah hlan ah a rak
um zo zia a tar lang. Jesuh in, “Thungaite in ka lo sim: Abraham
a suah hlan khalah Keimah a si mi ka si,” tiah a ti ( Johan 8:58).
Curuangah mipa ci tello ih a suahnak hin Jesuh cu hlan ihsin rak um cia zo mi
leh, Pathian in kan hrangih a pek ih in pekmi a sinak lang tertu a si.
b) Sual nei lo a si : Tluk
siat hnu ih a suakmi tap oh cu zohman sual nei lo kan um lo. Mipa ci ih suak
kan si ih kan suah hlan hman ihsin sual ci
cu kan sungah a um cia zo. Asinan Jesuh cu mipa ci tel ve lo, Thlarau
thianghlim thawngih pai mi a si vekin Jesuh cu a thianghlim, sual nei ve lo,
sual thei lo a si. Sikhalsehla kanmah ih ruangah Pathian in
sualnak zianghman a nei lomi Khrih kha……2 Kor.5:21
Mi ṭhen khat in Jesuh hi minung sinak
za ah za ( 100% ) a nei a si ahcun kan mah vek in sual, ruahnak ṭha lo..tvp tla
a nei ve kei cu an ti ṭheu. Sual kan neih hi minung za ah za kan sinak a silo,
hi cu tluk siatnak ruangih kan dinhmun sawn a si. Pathian in minung, Adam leh
Evi a rak tuah tikah sual nei cia in a rak tuah lo, sual hrimhrim an nei lo,
asinan Adam leh Evi kha minung sinak ah za ah za an si thotho. Jesuh khal Mari
pum sungin a suah tikah minung sinak ah za ah za a si ko nan sual nei lo a si. Cucu
rundamtu a sinak zawn ih thil thupi zet a si. Sual nei lo mi lawng in misual
pawl a run dam thei.Nunau hrin minung lakih sual nei lo um sun cu Jesuh Khrih
lawng a si.
2.
Josef in Mari a ihpi lo
( Matt.1:25 )
Jesuh a
suahhlan ah Josef leh Mary an ṭhi aw zo ti cu el theih lo in kan theih feng
theimi a si. Hi mi ah thil danglam zet a um mi cu ziang a si ti le Josef hin a
nupi Mari cu nau a neih tiang a ihpi (pawl) lo. Josef hi mipa sinak ih ṭonṭaihnak
a neih ruangih Mari hi ihpi lo a si lo ti cu kan thei thei, Matt.15:55, 56 kan
zoh a si le Josef hin Jesuh si lo fa dang ziang maw zat a nei ti a lang.
Curuangah Josef hi cu mipa sinak ah mi pangai a si ti cu rinhleh ding a um lo.
Cu ti a si ahcun ziang ruangih Mari kha ih pi lo ha a si ding ti hi ruah tlak
thil a si. A san si bik ih lang cu Matt.1:20 ah kan hmuh thei mi cu, vancungmi
in Josef hnenah Mari ih naupai mi hi Thlarau thianghlin thawngih pai, van lam
fa a si zia leh rundamtu ding a si zia an sim theih ruangah a si ding. Josef in
Mari ihpi lo te ih a umnak ruangah Jesuh hi Mipa ci tello ih suak a sinak, minung
pangai vek men a si lo nak, Pathian Fapa a sinak kha fiang te’n a lang ter.
Hi
Josef nunnak ihsin thil ropi tak zir ding a um mi cu Pathian tu ruangih Josef
ih serhhran awk theinak hi a si. Minung
minunnak ih kan thlir a si ahcun nupi pasal kan neih awk tikah zo cio khalih
kan nu pa pawl awk ( Sex ) hi kan ruahsan ṭhehmi a si. Dam lo nak pakhat khat
in in tlak buak a si ceng lo ahcun Sex hman ding hi kan thin lung in a bawh mi
a si. Sex hi :
Nu le
pa in lainat awk tertu
Nomnak
sangbik in petu
Kan
diriam tertu
Lungawinak
in thlen theitu
Kan nun
handam tertu …tvp
a si.
Josef in hiang pawl hmuahhmuah hi Pathian thu a
donmi ruangih colhsan hrih hi a hreh lo.
Minung lakah Josef bang tukih hi tluk sup aw thei hi an um pei maw? Rel duhmi
sawn cu Josef in Pathian hrangih a nun a serhawknak hi a ropi tuk lawm mam.
Zumtu kan nunnak ah zoh aw sehla Pathian thu ih ruangah ziang tlukin nomnak,
hlimnak kan ngah theimi kan colhsan/ fehsan ngam?
Pathian
hrangah sumpai kan ngah ding mi kan caan hrih maw?
Pathian
ruangah kanmai nomnak ding thil kan fehsan dah maw?
Pathian
hrangah tuah na duh kuahko mi na suup dah maw?
Pathian
hrangah nangmah lam ah ziang tluk caanmi na nei zo?
3.
Van hlarem mawi a thang
(Luk.2:13,14)
Vancungmi
pawl in Pathian an thangṭhat tikah Vanah Pathian an thangṭhat ṭheu. Asinan
Jesuh a suah tikah leimi pawl ih theih ban dingin tuukhal pawl mi hmuh rori ah
leh an theih thei ding rori in Pathian thangṭhatnak hla an sak. Job. 38: 7 kan
zoh asile Pathian in leilung hram a ṭoh laiah vancungmawi pawl lungawi in an au
ih hla an sak, cu bang tukin Pathian in rundamnak hram a ṭohnak Jesuh a suah
tikah Vanmipi pawl lungawi in hla an sak ve a si. Pathian in leimi hrangih
rundamnak lamzin a sial hi vamlam lungawinak a tlin bangtuk in misual pakhat
Pathian hnenih a hruaikir a si tikah vancungmi lungawinak a tling ( Luk.15:10).
Vancungmi pawl ih hla an sak mi cu:
a) Pathian an thangṭhat : Pathian
in leilung rundamtu dingah a fapa in pek tikah vancungmi lungawi in hla an sak.
Jesuh hi leimi hrangih pek a si tikah vancungmi hman lungawi Pathian an thangṭhat
a si ahcun a pekmi minung pawl tla hi cu ziang tluk in Pathian thangṭhat sinsin
ding kan si. Pathian in a fapa rori a lo peknak zawnah Pathian na thangṭhat dah
maw? Jesuh a lo pek nak parah Pathian hnenah
lungawi thu na sim dah maw? Pathian in nitin kannunnak ih in ngaihsaknak
cu vun ret ṭha hrih in fapa Jesuh Khrih in pek vial lawng hman hi damsung
theipa tawp ih Pathian thangṭhat ding kan si. Vanmi cun lei ih a rungsuah ah
Pathian thangṭhatnak inhla an sak zo, tu ah nangmai caan a si, kumkhaw nun na
neih theinak dingih a fapa a lo petu Pathian thangṭhat hi daithlang pang hlah
law.
b) Remnak leng ko seh :Adam hrin minung hmuahhmuah kan zate’n Pathian ih ral
kan si (Rom.5:10). Pathian thawn ral kan si dan hi kan zoh asile Pathian in minung
parah ral a tho a si lo ih minung sawn hi Pathian parah ral a tho sawn a si.
Pathian thu tlansan in Satan thu kan thlun sawn. Thil a si dan vekin feh ding
siseh la minung sawn hin Pathian hnenah remnak tuah ding a si, asinan cumi cu
minung hrangah thil cang thei a si lo. Curuangah Pathian, a mawh lo sawn in a
mawhmi minung thawn remnak a um theinak dingah a fapa in pe, a va mak lawm mam
ve! Cumi cu vanmipi pawl in dai te’n an umpi men lo ih naute Jesuh a suah
tikah “A duhdawtmi
minung pawl umnak leilungah hin remnak leeng koseh,” ti in
hla an sak.
Lei leh
van remnak tuah thei tu um sun cu Amah Jesuh pakhat lawng a si. Ziangah
tile Pathian pakhat lawng a um ih minung le Pathian karlakah remnak tuahtu
minung palai pakhat a um. Cuih palai cu mi hmuahhmuah tlen dingah a nunnak a
petu Khrih Jesuh a si ( 1 Tim.2:5,6).
Vancungmi
pawl hin a menmen in hla ansak lo ih remnak palai a suah lawnglawng ah hi hla
hi an sak a si. Pathian thawn rel a simi hi Jesuh ih ruangah Pathian thawn kan
rem aw zo. Pathian hmin thangṭhat si ko seh.
