Khristian
Innsang
( Efesa.6:1-4 )
Leitlun ah Innsang tampi kan um nan
kan zaten’n Khrihtian innsang kan si theh lo. Innsang um dan ding khal
Khrihtian le Khristian lo khal in kan zirh aw cio. Innsang dinhmun leh kekar
dan ding hi zohman thiam ci akna um lo ih thiam famkim theih khal a si lo.
Innsang pakhat le pakhat kan din hmun le kan siank, mizia pawl tla a bang aw
cio lo tikah zir ih thei/ thiam famkim theih khal kas i lo. Cumi sung ihsin
Khristian innsang in kan theih tul mi pawl zoh tlang sehla.
1.Inn cu Pathian ih dinmi a si.
Sem.2:21-24; Matt.19:6
Innsang timi hi milai ih phuah leh
din thok a si lo. Pathian in milai hmaisa bik a tuah ihsin
innsang a din thok
zo. Curuangah innsang timi cu Pathian ih dinmi a si ti hi kan pom a tul.
Matthai sungah Pathian ih a kom mi cu zohman in then hlah hai seh a ti tikah
Pathian ih kommi kan sinak kha a lang fiang ter nasa. Zumtu cun tu ih ka koppi
hi lei dan ih kan sar awk men a si lo Pathain ih kommi kan si ti hi kan pom
rori dingmi a si. Kan koppi hi kan duhthu a sam maw sam lo maw ziangvek an si
khal le Pathian ih kom kan sinak kha kan feng a tul. Midang beisei ding kan si
lo ih tuhi ka koppi hi Pathian in ka hrangih in pekmi a si timi ah kan thum aw
ding a si. Himi ah kan lungawi tawk lo a si ahcun Pathian ih in pekmi parah kan
lungawi tawk lo tinak a si.
2.Nupi pasal cu Pumkhat kan si. Marka.10:8
Nupi leh pasal hi pumkhat kan sinak
theih feng a tul nasa. Kan um tlang mai hi pumkhat kan sinak a famkimnak a si
mai lo. Nupi pasal ah nei aw si in leh hmun khat ah um tlang cing si in pumkhat
lo ih um hi a theih ti kan theih a tul. Pumkhat timi umzia cu ziang a si kan ti
asile nom ah nuam tlang, har ah hartlang,
ziangkim hmang/ pal tlang khi a si. Innsang nu hmuah ti rawl thaw, thuamhnaw
tha zetzet leh nuamzet ih a um laiah pasal cu har emem, thuamhnaw tha nei mumal
lo, ei thaw ei ve lo a si ahcun cumi cu pumkhat an si lo tinak a si.
Cun pumkhat kan sinak langsuahnak
leh dingmi cu kan karlak ah thuthup hi a um ding a si lo. Kan koppi theih lo
tein ziang si maw kan tuah a si ahcun kan pumkhat aw lo nasa tinak a si. Thu
leh hla 100 ah 100 kan thei aw thluh ding tinak cu a si lo nan thil poi tham
thilah thupte ih tuahmi a um ding a si
lo. Na nupi/pasal khui ah a feh? Ziang a tuah? Tiih in suttu hnenah ka thei lo
ti hi cu ningzah umtak thil a si, poipeng hruak thil a si lo ahcun. Harsatnak
pakhat khat a thlen tikah buainak ih in bet theu mi cu ka theih pi lo timi a si
theu. Hi thil ziangah a thleng kan ti asile a thupthiar ih thil kan tuah theu
ruangah a si. Thil holam vek si ih buainak in thlen theutu cu online hi a si.
Online kan hman mi thil pakhat khat ( facebook,email,whatsapp,wechat ect ) hi
kan password kan sim aw ding a si. Online Account a thupte’n kan neih le kan
hman mi in nupa ziang maw ti zat ah buainak a thlen ter a si. Curuangah kan
koppi thawn kan karlak ah thuthup a um ding a si lo.
3.Fate ih thlalang kan si. Efs.6:4
Kan fa le te an nauhak lai can ah an nun zirhtu bik cu kan simmi si lo in kan um dan hi a si. Kan tongkam
hmanmi, kan thuam awk daan, kan cangvaih dan nitin ih a hmuhmi kha a nunnak
zirhtu bik a si tikah fa le hrangah thlalang kan si zia kan theih a tul. Kan fa
le in tuah hai seh ti ih kan duh lo mi cu kan mah khal in an hmuhah kan tuah lo
a tul. Thil har zet si khal sehla kan zuam dingmi a si. Kan um daan cu in cawng
hlah uh kan ti hman ah in cawng thotho ding. Upat hnu hmanah si maw kan um dank
an cawn awk. Mi pakhat kan thlun tampi hi kan theihlo lai ah a um dan tampi kan
rak cawn mi a rak um ringring. Kan fa le sinsin cun ziang tluk in in cawng
ding. Curuangah an thlalang kan si.
Innsang khawm, thlacam a nei theu
pawl leh tongkam tha a hmang theu pawl cu an fa le hnen ihsin theih a theih.
Kan um dan hi kan fa le nun ah a lang theh tikah mi lak ah kan innsang um dan
cu kan thup thei lo mi tampi a um. Nu le pa ih kan hnatuan, kan tuah theumi khi
kan fa le pawl in zawte an phuah, lemcannak ih an hmanmi a si.
4.Pathian thu ih hruaitu ding kan
si. Joel 1:3
Fate hi nu le pa kanum ruangih kan
ngahmi an si mai lo, Pathian in in pekmi laksawng an si. Curuangah Pathian ih
laksawng in pekmi fanau pawl hi in petu Pathian thu ih kaihhruai ding cu nu leh
pa ih tuanvo a si. Kan fate Pathian thu ih an um theinak dingah mi dang va ring
ding kan si lo, kan mah rori in kaihruai ding kan si. Cumi ah an nauhak lai can
hi a kaihhruai ding can tak cu a si. Upat hnuah kan ti theu tikah a rak tlai
tuk zo theu a si (Thuf.22:6 ) . 2 Siang. 5:2 ah Israel nauhak nute, sal ih an
kaihmi thukan hmu thei. Nauhak te a sin an a pu Naman in pharnat a neihmi
damnak lamzin sim theitu a si. Ziangtuln in Pathian thu ih kaihhruaimi a si
ding ti hi cu a tongmi ihsin kan thei thei. Ti leh rawl, sin leh fen, thil leh
ri kan neih pawl hi Pathian in in pek mi an si zia hi an nauhak lai ihsin kan
sim theih a tul.
Kan
fa le Pathian thu kan sim lo hi tluknak hram a si tihi kan hngilh lo a tha. Israel
pawl an tluk tamtuk nak san khal an fa le pawl Pathian thu an sim lo ruangah a si. Thut. 2:10
5.Kan innsang hi kan hmunpi bik a
si.
Khui tawk hmun le ram kan thlen hman
ah kan thinlung ih a hlam bikmi cu kan mai innsang te khi a si. Riahsiat,
lungawi kan tonah kan innsang te hi kan thumawknak bik a si. Mai innsang ziang
vek in an um ding ti ngaihtuahnak nei lo in leng lam lawnglawng ah kan thinlung
a uma si ahcun kan innsang kan tluksan ziar zo a si. Curuangah kan innsang
hnakih thupi, poimawh hi hmun dang a um lo ti kan theih a tul. Hmun dang ah
hlim zet le nuam zet in kan um hmanah kan innsang ih kan hlim lo a si ahcun mi
hlawhtling kan si hrih lo. Mai innsang ih ngam lo, mi innsang lawnglawng ih um
rero mi kan si ahcun rem that awk ding tumpi kan nei tinak a si. Curuangah kan
innasng te hi kan hlimnak, lungawinak, nomnak, thumawknak ding hmunpi a si.
Innsang thu ah zohman a famkim kan
um lo, kan thih tiang zir vivo ding kan si ih cumi ah Khristian innsang in a
theih tul poimawh zual hi a hlawkpi tu kan um ding beiseinak thawn hi tarlannak
a si. Pathian in nan innsang a thar in lo thlawsuah hram seh.
No comments:
Post a Comment