Mari Leh Elizabeth Tonawknak ihsin Zirnak 5

Mari leh Elizabeth Tonawknak

            ( Luk.1:39-56 )

            Mari leh Elizabeth hi Pathian duhsaknak, Pathian thlawsuah co hlei ce an si ih Jesuh Suahnak thu reltikah an pahnih ih an tonawknak hi rel hlawh zetmi a si. Hi nunau pahnih hi leidan khalih sungkhat aw an si ih mi tha zet an si veve. An thuhla ihsin zir vivo  hnik sehla.

1.      Van lam fa an von veve. ( Luk.1:12, 31 )

            Elizabeth hi fa nei thei lo nu cing a si ih Judah pawl hrangah cun nunau fa nei thei lo cu Pathian ih dungtunmi tluk ih an ruahmi, an nautatmi a si. Curungah fa nei thei lo nunau cu an hma a

pam ngaingai. Culaiah ruah ban lo in vancungmi cun nau a pai ding thu an simih a naupai mi cu mi menmen si lo in Thukam Hlun lam khal ih an rak phuancia mi, Jesuh lamzin sialsaktu ding a si. Mari khal hi mipa ci tel riai lo in vanlam fa a pai ve ih cucu mi vannei a ti aw ih mi hmuahhmuah in mi thlawsuak in ti ding tiah hla a sak hngehnge.

            Hi te pahnih nunnak kan zoh tikah an parih thil a thleng mi hi lei dan ahcun thil cang thei lo a si ko nan Pathian hrangah cun a cang thei lo mi a um lo ti a lang ter nasa. Kan parah lei dan ih a cang thei lo kan timi a thlen can a um theu ding.Asinan Bawipa thawn cun ziang hmuahhmuah a cang thei a si.

2.      Mari in Elizabeth a tlawng. ( Luk.1:39-40 )

            Mari cu a hnenih a runglangmi vancungmi in a fehsan hnuah Judea pengih a ummi Elizabeth tlawng dingah a pok. Vancungmi ih simbang in Mari cun Elizabeth ih nau a pai thu a thei zo ih Elizabeth cun Mari ih naupai thu a thei hrih lo thung. Mari in Elizabeth a va tlawn hi thil awl ai te  a silo, naupai khualtlawnnak dingah cun peng 80/ 130 km tluk ih hla si. Curuangah ngai tlawn maimai ih tlawng a silo ti a fiang. Ziang ruangah a tlawn ti asile Amah hi Vanlam nau pai a si ih amah vekih vanlamnau a pai ve mi, Pathian ṭihmi Elizabeth kha ton ih thuhla rel ih thazang pe aw in lungawinak thu sim aw ding kha a cak a si bik ko.

            Kan nunnak ah vun zoh aw ve sehla lungawinak kan tontikah, thlawsuah kan don tikah khui ah kan feh theu? Mi ṭhenkhat cu lungawi kan ton tikah leitlun nomcennak ih kan lawm ṭheu hi ziang tluk riahsiat za a si. Zo hnenah kan feh ṭheu? Khawvelmi pawl hnenah maw Pathianmi pawl hnenah kan feh ṭheu tihi kan cek awk ding ah siseh la.

3.      Elizabeth par ih thil a cangmi. ( Luk.1:41-45 )

            Mari cu Elizabeth hnen a tlen veten cibai a buk ih cu veten Elizabeth parah thil thleng pathum a um. 
(1) A pum sungih naute cu lungawi in a khir 
(2) Elizabeth cu Thlarau thianghlim in a khat cih 
(3) Lungawi in ringpi’n a au. 

        Mari in Elizabeth a len ih zarah Elizabeth parah hi thilpawl a thleng, a va sunglawi em. Elizabeth pumsung naute hi thla ruk a si zo tikah a cang ṭheu ko ding asinan hi ṭum ih a cang dan kha cu ni dang vek si lo in lungawi ih  khir a si ih tlunah Amah kha Thlarau thianghlim in a khat bet.

            Pathian mi leh Pathian mi an tonawknak ah, an um khawmnak ah thlawsuah, thiltha a thleng ṭheu. Khawlvelmi pawl hi kan hnong ding tinak lam  a si lo. Khawvelmi pawl khal Pathian lam an hoi theinak dingah nasa zet te’n ṭan kan la ding a si ko. Tu ih kan sim duhmi cu Pathian mi pawl tonkhawmnak ah Pathian in thlawsuah a thlen ter ṭheu. Na innsang ah Pathian mi pawl an lut ṭheu a si ahcun siatnak hnakin thlawsuah in a lo pan ding tinak a si.

4.      Elizabeth ih tongsuahmi ( Luk.1:42-45 )

            Sim zo bangin Elizabeth hin Mari ih nau pai thu hi a thei cia lo. Asinan Mari ih ṭong a theih tikah Mari cu ka Bawipa ih nu tiah a ko. Jesuh hi a sem pek fang lawng a si lai ding nan Elizabeth cun ka Bawipa tiah a ko zo. Curuangah Jesuh hi Bawipa ti ih ko hmaisa biktu a si. Cun Bawipa ih nu tiih a kawh tikah upatnak a pek zia kan hmu thei.Hi te pahnih an tonawk tikah an pawlkom awk dan hi a va mawi ve.

            Zumtu kan nih, Jesuh neitu pawl khat le khat kan pawlkom awk tikah upatnak pek awk thiam a va thupi ve. Kan mah vek si lopawl hi ziangih siar lo kan si pang maw? Kanmah hi sibik ih ruat aw tahrat ih midang ziang ih rello hi a awl nasa. Curuangah Pathian mi pawl cun midang zumtu pawl hi upatnak thawn kan pehtlaihawk ding a si.

5.      Mari ih nun mawi ( Luk.1:46-49 )

            Mari cu mi ropi Jesuh paitu, Pathian  ih thlawsuahmi asinan cuimi cu uanawknak sual ah a luhpi lo ih Pathian thangṭhatnak ah a hmang sawn. A hlasakmi ah a tluankhawnnak a umlo ih Pathian sunloihnak leh a lungawinak thu lawng hmuh ding a um.

            Zumtu in Pathian thlawsuah kan don deuhdeuh ih kan ralrin deuhdeuh a ṭul. Pathian ih thlawsuahmi, khaisanmi kan si hin keimah si hmang maw ti ih rak uanthuanawk a awl zet. Pathian thlawhsuahmi kan sinak hi uanawknak sual ih in hnuk lo nak dingah kan nun ralrin a ṭul. Pathian thlawsuah kan don sinsin asile Amah thangṭhat sinsin nun kan neih ding hi a kan ṭul mi a si.