Christmas hman a sual maw? ( Is it wrong to celebrate Christmas? )

Christmas Thuhla

            Christmas timi tongfang ih sullam cu Khrih ih mipi tinak a si mai ih a puai zawng ih kan rel a si le Jesuh Khrih suahnak lomnak ih kan hmangmi a si. Jesuh Khrih ih suah ni thla hi felfai tak ih a theitu an um lo ih hi Dec.25^th khal hi Jesuh suahcam lom si lo in Jesuh suahnak ( Minung ih a rungcannak ) lomnak ih hman ding a si.Christmas hi zumtu zate in kan hmang thluh cuang lo ih zumlotu khal a hmangtu tampi an um ve thotho. Hi cahram tawite ah hin

·         Ziangah Dec.25 ah kan hmang?

·         Christmas hman a sual maw?

timi tawite in keimai hmuhdan ka run tar lang ding.

1.      Ziangah Dec.25 ah Christmas  kan hmang.

            Christmas hi Dec.25^th lawng ih hman a si lo ih thla dang/ni dang ih hmang khal an um culci ko.Asinan Dec.25^th hi kan hmang tlangpi bik, leitlun hnin tertu bik a si. Christmas hi kumzabi pahnihnak lam ihsin hman thok a si tiah zingzawitu thenkhat in an sim dan a si ih a hman thok a sinak cu felfai ten theih a har.Dec.25^th ih Christmas hman a si thu record hmaisa bik cu AD 336, Constantine in Rome a uk lai caan ah khan a si. Cui hnu kumrei lo te ah Pope Julias in Jesuh suahcaam cu Dec.25^th ih hmang dingah ( official in ) a phuang.( http://www.whychristmas.com/customs/25th.shtml ).

            Dec.25^th ih hman a sinak san hi ruahnak tampi a um ih  pakhat ten hun tarlang seh la. Rome san laiah puai pakhat an neihmi cu Dies Natalis Solis Invicti ( Neih theihlo Ni ih suahcaam/birthday ) an Ni pathain Mithra suahcaam a si ih Dec.25^th an an hmang. Cu mi cu hlan zumtu pawl in Neh theihlo Ni suahcaam cu Neh theih lo Pathian Fapa suahcaam ah an run hmang/thleng a si thei.

            Christmas hi dungthlun san laiah an hmang lo ih ruangah lehhnu ih rung ummi a si ti hi cu el theih lo a si vek in hmuhdah/ruahdan um thei hi hun tar lang sehla.

a.       Bible sungah a um lo, dungthlun pawlkhal in an hmang lo, phuahcop a si ih ruangah Christmas hi kan hman ding  a si lo.

b.      Milem be pawl ih puai sunglawizet rori Pathain thu ih ramlaknak ruangah Khristian puai ah a cang hi cu Milem biaknak parah Pathian thu in Nehnak a co zia langnak rori a si.

2.      Midang relsia hlah ( Rom.14:1-12 )

·         Mi pakhat in ziang hmuahhmuah ei theih a si, tiah a zum.

·         Mi pakhat in hanghnah hangrah lawng a ei.

-Paul in ziang hmuahhmuah a ei tu in hanghnah/rah lawng a ei tu kha nautat hlah seh la hanghnah hangrah lawng a eitu in ziang hmuahhmuah eitu kha soisel hlah seh a ti. Ziangruangah ti le an pahnih in Pathian Upatnak ih an tuah veve mi a si.

·         Mi pakhat in ni dang tampi lakah ni ni khat cu thupibik ah a ruat.

·         Mi pakhat in ni hmuahhmuah an bang aw theh tiah a ruat.

-Paul in anmah le thinlung ah fiangter ta haiseh, ni nikhat kha sunglawi ce ih a ruah ahcun cumi cu Bawipa upatnak ih a tuahmi a si a ti. Kan tuannak thu cu Pathian hmaiah kan simciar leh ding a ti.

            Hi mi thu thawn pehpar in Christmas cungcang ah kan ruah dan:

·         Mi pakhat in Christmas ti vek Bible ah a um lo ti zumnak thawn a hmang lo a si ahcun Patian upatnak ih a tuah a si ahcun ka upat .

·         Mi pakhat in Pathian upatnak thawn Christmas hi ni sunglawi ce ih a hmang a si ahcun ka upat.

·         Mi pakhat ih Christmas a hman lo kha thlaraumi tuk cuang ah ruat aw tahrat ih  a hmang pawl a soiselnak ih a hmang a si ahcun ka uar lo lawlaw.

·         Mi pakhat in Christmas a hman hi a hmang lo pawl setenak ah le ti tha hlei cuang ih a ruat awk a si ahcun ka uar lo lawlaw.

·         Christmas cu kan hmang/hmanglo a si khal le Bawipa upatnak ih tuahmi a si ahcun ka upat veve. Bawipa upatnak le sunlawinak a si lo ahcun a hmang khal hmang lo khal tha ka ti lo veve.
Christmas hmang hi mi tampi an um vekin a hmang lokhal tampi an um ve ih ziangti'n kan um khal le Pathian Upatnak thawn si hramseh.

            1 Kor.10:31 ah ziangkim nan tuahmi cu Pathian sunlawinak hrangah tuah uh a ti bang tuk in thil ziangkim ah hin a hmangtu minung kan mah kan thupi. Kan hman dan ih zir in Pathian a sunglawi thei ih a sunglawi lo thei. Kan ton rero mi thil pawl hi Bible ah ti fukfi ih hmuh ding umlo thil tampi a um tikah a hman le a do thuhla ah kan fimkhur a tul zet in ka thei.

·         Bible ih a fial fukfi lo mi  thil hi Pathian thu cei ih cei ciam co tuk hi a tihnung.

·         Bile ih a kham fukfi lo mi tong do ih rak do khal ti sual a awl.

Tirt.5:38-39 Gamaliel ih ruahnak hi kan hman ve mi a si ding hi tha ka ti zet.

Atuih thu khalah hin fiangtein ka lo sim,

himi pawl tlunah hin zianghman tuah hlah uh.

Umsan meen uh!

An tumtahmi le an tuahmi hi

milai ih thokmi a si ahcun a hloral ko ding.

³⁹Sikhalsehla Pathian ih tuahmi a si ahcun

nan neh thei cuang lo ding.

Pathian dodaltu riangri ah nan cang thei,” tiah a ti.

Curuangah Khonsil upa pawl cun Gamaliel ih ruahnak pekmi cu an thlun.