Thursday, May 7, 2020

Maakah hi zo ih fanu deuh a si?


(A) 2 San.11:20 Cuih hnuah Absalom fanu Maakah a áš­hi ih fapa pa li a nei. (1 Siang.15:2)
(B) 2 San.13:2 ..A nu cu Gibeah khuami Eriel ih fanu Mikaiah a si.

  (Note: Maakah le Mikaiah cu mi pakhat ih hmin a si ih Abijah ih nu a si. 2 San.11:20; 13:2; 1 Siang.15:2)

Thusuhnak

1. Maakah hi Absalom ih fanu maw Uriel ih fanu sawn a si?
2. Absalom le Eriel hi nupa an si maw?
3. Abishalom ih fanu ti tla in Baibal áš­henkhat ah a lang fawn ih Abishalom hi teh mi dang a si thei pei maw? (1 Siang.15:10)

         A hmaisabik ah 1 Siang.15:10 ih ‘Abishalom ih fanu’ tiih a langmi hi cu Baibal version dangah ‘Absalom ih fanu’ tiih a langnak a um thotho ruangah thu harsa ah ret lem lo in Absalom ih fanu timi sawn hi fehpi mai sehla. Cun Absalom le Uriel hi nupa an si maw timi thu ahcun nupa an si lo, mipa veve an si. Curuangah Maakah hi Absalom ih fa maw, Uriel ih fa deuh a si timi hi ruah ding a um.

         Maacah hi Absalom ih fanu a si thei maw timi zoh hmaisa hrih sehla. A tawi zawngih kan sim a sile ‘A si thei lo’. Maakah hi Absalom ih fanu a si thei lo. Ziangahtile Absalom cun fanu pakhat lawng a nei ih a hmin cu Tamar a si (2 Sam.14:27), Absalom ih fanu neihsun Tamar cu Absalom in a duhdawt zetmi a farnu Tamar hmin cawi ih sakmi a si a zum um (2Sam.13:20). Absalom ih Tamar timi fanu pakhat lawng a neih a si ahcun Maacah cu Uriel ih fanu a si ti a fiang.

         Asile ziangruangah Baibal ah Maakah cu Absalom ih fanu tiih a ti thiam? Hi thu thawn pehpar aw in ‘fapa’ le ‘fanu’ timi Baibal sungih an hman dan kan theih áš­ulmi a um. A hnuailam ah tarlang sehla.

(1) Maakpa hi fapa tiih kawhnak a um
David hi Sual ih maakpa (Saul fanu ih pasal) a si (1Sam.18:27). Asinan Saul in David cu ka maakpa tiin ko lo in ‘Ka fapa’ tiah a ko (1 Sam.24:16).

(2) Tu (Kan fate ih fa pawl) hi fapa tiih kawhnak a um
         Nahor ih fapa cu Bethuel a si (Sem.22:22). Bethuel ih fapa cu Laban a si (Sem.24:24,29), Laban le Rebekkah cu unau an si. Laban cu Nahor ih tu (fasin) a si ko nan ‘Nahor ih fapa Laban’ tiah kawh a si (Sem.29:5).

         Mefibosheth hi Jonathan ih fa a si (2 Sam.4:4). Jonathan cu Sual ih fapa a si. Mefibosheth cu Saul ih tu  a si ko na’n Sual ih fapa tiih kawh a si. (2 Sam.19:24 CKJV)

(3) Cithlah hi fapa tiih kawhhnak a um
         Jesuh hi David ih hrinmi fa a si lo, David ih cithlah a si. Asinan David fapa tiih kawh a si (Matt.1:1; 9:27;15:22)

(4) Mo hi fanu tiih kawhnak a um
Ruth hi Nomi ih mo (Nomi fapa ih nupi) a si. Asinan Nomi in ka fanu tiah a ko (Ruth.2:2).

(5) Cithlah hi fanu tiih kawhnak a um
         Jesuh san ih nunau pakhat cu Abraham ih fanu tiih  a si (Luk.13:16 CKJV).


A tlun ih kan tarlangmi pawl ihsin kan theih theimi cu ‘fapa’ le ‘fanu’ timi hi kau zet ih hman a si zia Baibal sungah kan hmu thei. Aw le kan thupi ah kan kir sal hrih ding.


A tlun ah Maacah hi Absalom ih fanu a si lo thu kan tar lang zo. Cuti asile ziangruangah Absalom ih fanu Maakah tiih kawh a si thiam? Zumdan tlangpi ahcun hi tiin a si. Maakah ih pa Uriel ih nupi hi Absalom ih fanu Tamar a si ding. Cucun Maakah cu Absalom ih tu a si, asinan a tlun lamih kan ngan bang khan ‘tu’ tiah ti loin ‘Absalom ih fanu Maakah’ ti sawn in kawh a si sawn a si ding.


Sirhsanmi pawl:

1. Keil and Delitzsch Commentary on the Old Testament
2. Adam Clarke’s Commentary)






No comments:

Post a Comment