1. Absalom cun fapa pathum le Tamar an timi fanu pakhat a nei (2
Sam.14:27).
2. Absalom cu a hmin sawngtu dingah fapa a nei lo (2Sam.18:18).
Hi Baibal cang pahnih kan tarlangmi hi an pahnih in 2 Samuel
sungta veve an si tikah a ngantu hi mi
pakhat a si fawn si, ziang ruangah bang aw lo in a ngan a si pei. Pakhat ah
fapa pathum a nei a ti ih a dang pakhat ah hmin sawngtu ding fapa a nei lo a ti
lala fawn, ziang ti thu a si pei?
Baibal hi a sual thei lo, a palh thei fawn si lo. Ziangah
amah le amah thu bang aw in a um thiam kan ti men thei. Hi mi thu kan sim hlan
ah Baibal thu kan theih ṭulmi a um. Cucu ziang a si tile, Baibal
ah hin thu hla an rak ngan khum tikah cipciar zetih an ngan khummi a um rual in
cipciar tak ih ngankhum lo mi khal an um ve. Adam san ihsin thil a cangmi hmuahhmuah
cipciar tak in ngan thluh ding sisehla ngan cawk a si lo ding. Curuangah Baibal
ih a ngan lo mi ah thil tampi a um ti hi kan theih a ṭul. Cu tiih kan ti tikah
Baibal hi a famkim tawk lo kan ti duhnak a si hrimhrim lo. Pathian in kan hrangih
ṭul le ṭha ti tawk Baibal ah ngankhum a
si.
Kan thupi: Absalom in fapa a
nei maw timi ah lut sal sehla. Absalom
in fapa pathum a nei timi cu 2 Sam.14:27 ah fiang takin kan hmu thei. An hmin
lawngte tarlang a si lo. Zianruangah 2 Sam.18:18 ah Absalom in hming sawngtu
ding fapa a nei lo a run ti sal ti asile a fapa pathum pawl kha a sentet, nauhak
laiah a thi ṭheh a si ding. An thih thu hi Baibal ah ngankhum a si lo men a si
ding timi hi Baibal thiam pawl khalih an zum dan bik a si.
No comments:
Post a Comment