Khrih Thosalnak Um Lo Sehla

Khristian pawl kan ṭhumawknak hrampi bik cu Jesuh Khrih ih thawhsalnak a si. Cun sakhua dang pawl le Khristian biaknak a bangawk lonak bik khal Khrih ih thawhsalnak a si. Sakhua dang pawl ih zirhnak hi an ṭha zet ve ko. Khristian sakhua hi cu zirhnak ṭha men ih ṭhum aw asilo ih Khrih thawhsalnak ih hrambunmi a si. Sakhua dang pawl ih zirhnak pawl hi ṭha zet khal sehla an biakmi pathian hi thihnak ihsin thosal pathian an si ve lo. Curuangah Khrih thawhsalnak hi Khristian sakhua ih danglamnak le a hleicetnak bik a si. Tu-ah thawhsalnak hi um lo bangta sehla ziang kan cang ding ti pawl kan tar lang ding.

Jesuh Khrih hi thosal lo bang sehla:

1. Kan Thu Simmi Cu Zianghman Lo Men a Si Ding (1 Kor.15:14 CKJV)

         Jesuh Khrih le dungthluntu pawl dam lai ah thawhsalnak a um  zumlotu an um, cui zumnak cu a dik lo zia tarlang in Jesuh Khrih cun thihnak ihsin thawhsalnak thu a sim. Cun Paul in Jesuh Khrih hi thihnak ihsin a tho sal lo a si ahcun kan thu simmi cu zianghman lo, thu lolak men a si ding a ti. ‘Kan thusimmi’ a timi hi ziang thu a si pei? Pathian in in duhdawt tuk ruangah a Fapa neihsun in pe ih kan aiawh in thinglamtah parah a thi ih a thisen in kan sual beiba pawl hmuahhmuah in pek sak, cun thihnak nehin a thosal ih van ah kai in Pai’ vorhlam ah a ding, timi pawl le Pathian Fapa a sinak thu  pawl hmuahhmuah an si. Khrih thihnak ihsin a thosal lo a si ahcun cui thu pawl hmuahhmuah cu zianghman lo men an si ṭheh tinak a si. Himi in a fiang termi cu kan thusimmi le phuanmi pawl hmuahhmuah ih a ṭhum awknak hrampi cu Khrih ih thawhsalnak a si. Baibal version ṭhenkhat ahcun “Khrih thihnak ihsin thawhter lo a si ahcun thuthang phuan ding zianghman kan nei lo” tiin a ngan.

2. Kan Zumnak Cu Zianghman Lo  A Si Ding (1 Kor.15:14,17 CKJV)

Khrihtian le sakhua dang pawl kan bangawk lonak cu sakhua hrek khat ih zumnak cu minung ih tuahṭhatnak, zuamnak ah a ṭhum aw mi a si. Minung ih zuamnak in thilṭha kan tuah asile vanram (an mai sakhua zirhnak ih vanram) kan thleng thei ding, len hnu ah dinhmun ṭha kan co thei ding, ti a si. Khristian pawl ih kan zumnak cu thilṭha kan tuah le vanram kan thleng ding ti a si ve lo ih Pathian zangfahnak zarah zumnak in rundam kan si, Pathian fapa a zumtu cun kumkhua nunnak an co ih vancungram thlen theinak nun an nei.  Ziangbangtukih misual khal in Jesuh Khrih a zum ahcun vancungram a thleng ding. Jesuh Khrih hi thihnak ihsin a thosal lo a si ahcun cui kan zumnak cu phuphan lolak men a si ding. Curuangah Jesuh Khrih thawhsalnak cu kan zumnak hrampi bik a si.

3. Thuphan Per Kan Si Ding (1 Kor.15:15)

         Pathian ih thu ah thuphan per kan si ding timi hi Pathian ih theihpitu deu kan si ding ti khal a si. Ziangahtile kan sim rero mi cu Jesuh Khrih thihnak ihsin a thawhsalnak thu a si tikah a rak thosal lo a si ahcun thuphan per kan si. Dungthluntu pawl khalin an rak sim rero mi cu thihnak ihsin a thawhsalnak thu a si. Asinan thuphan pertu kan si maw kan ti ahcun kan si lamlam lo, ziangahtile Jesuh Khrih cu thihnak ihsin a tho sal taktak ti cu dungthluntu pawl lawng in an thei lo ih a thlan a kiltu Rom ralkap pawl rori khalin an thei. Asinan Puithiam upa pawl le Judah upa pawl in nawhthuh an pek ruangah an theihmi thu dik cu sim ngam lo in an um.

4. Sualnak Sungih A Tang Hrihmi Kan Si Ding (1 Kor.15:17)

         Mi zo khal sual ih sal kan rak si ṭheh (Rom.6:20), asinan sual sal ihsin Jesuh in in luat ter zo ruangah sual ih sal kan si nawn lo, a luatmi kan si zo. Jesuh Khrih thihnak ihsin tho sal lo bang sehla sual sal ih a tangmi kan si ruangah Pathian hmaiah mawhnak ih khat le felnak nei lo kan si hrih ding. Asinan a tu-ah cun mi luat, Pathian hmaiah mawh nei lo le mi thianghlim kan si zo. Curuangah hi thu ihsin kan hmuh theimi cu kan luatnak hrampi cu Kherih ih thawhsalnak hi a si.

5. Khrih ih A Itthat Mi Pawl An Hloral Ding (1 Kor.15:18)

         Khrih ih a itthat mi pawl timi cu zumtu a thi mi pawl relnak a si. Zumtu a thi mi pawl hi it that tiah Baibal in hmun dangdang ah a tarlang. It that a tinak san cu Jesuh Khrih a rat sal tikah thihnak ihsin kumkhua nunnak ah thawhter sal an si ding ruangah a si (1 Thes.4:16). Jesuh Khrih tho sal lo bang sehla thihnak ihsin thawhsalnak a um nawn lo ding ruangah Khrih ih a it thatmi pawl khal thosal nawn lo in an hlo ral lan ding tinak a si. Curuangah zumtu pawl in kan beisei zetmi thawhsalnak cu Khrih thawhsalnak ah hrambunmi a si.

         Jesuh Khrih ih thawhsalnak  hi zumtu hrangah cun kan ṭhumawknak hrampi bik a si zia cu kan tarlangmi pawl ihsin kan thei thei.  Khrih ih tawhsalnak cu: Kan thusimmi ih hrampi, kan zumnak ih hrampi, thudik hrampi, kan luatnak hrampi le kan ruahsannak hrampi a si.