Jesuh le a pa (Johan 5:17-37)

          Thumkom Pathian sungah mi pathum, Pa ,Fa, Thlarua thianghlim an um ih an pathum in a niam cuang le a te cuang ti um loin bangran an si. Kan thupi lam hoi ter in Jesuh (Fapa) le a Pa ih thuhla kan rel ding. Jesuh le a Pa kan ti tikah lei ih a suahnak Josef si loin Pa Pathian sawn kha kan rel dingmi a si. Pa le Fa an sinak hi lei ih Pa le Fa kan si dan thawn tahṭhim theih cu a si lo, ziangahtile lei ih fa le cu pa le ih hrimmi an si. Jesuh cu Pathian ih hrim, tuahmi a si ve lo. Pa le Fa dinhmun ih an pehtlaihawk ruangah a tum deuh le a fate deuh an um tinak a si lo, Pathian sinak ah a tluk aw mi an si. Jesuh kha Fapa a sinak zawn ah Pa ih thu lo cun zianghman a tuah lo ti kan hmu thei ih cumi in Fapa kha a dinhmun a niam sawn ti lam a sawh duhmi a si lo ih an pehtlaihawk dan a si sawn. Pa le Fa an sinak awn ih an pehtlaih awknak pawl hmangin thazang kan la tlang ding.

1. Jesuh cu a Pa ih sinak langsuahnak a si.

Pa in  a tu tiang hna a ṭuan ih, kei khalin ka ṭuan ve a si. (Johan 5:17)

          Jesuh cu a Pa ih sinak langtertu kan ti tikah Pa ih dinhmun si loin a hnaṭuannak sawn kha rel duhmi a  si. Pa hi tui tiang cawl loin hna a ṭuan bang in Fapa Jesuh khalin ṭuan ve. Fapa in hna a ṭuan rero tikah a Pa kha ziangvekmi a si tik kha a lang ter. Hi Baibal bung cang kan tarlangmi ah Pa hi ziang tluk in hna ṭuan ti a langter vekin Fapa khal hna a ṭuan ve zia a lang ter.

          Hi thu ah kan zir theimi cu Pa le Fapa Jesuh hi hnaṭuan an si ih tui sun ni tiang khal hna an ṭuan rero. Pa in hna a ṭuan ih Fapa khal ṭuan lo in a um ter lo, an pafa in an ṭuan. Cu bangin tuisun ih pa le fa khal teimak suahih hnaṭuan ding kan siih kan fa le khal ṭuan loih um ter ding a si lo. Hnaṭuan loih um hi Pathian thu leng a si ih sual a si. Hnaṭuan loih um huahhi men hi kan duh ṭheu nan teima takih hnaṭuan ding hi Baibal ih in zirh dan a si. Hnaṭuan ti ruangah cawl lo ih ṭuan hi sim duhmi asilo, Sersiamnak thu ah Pathiankhal a cawl ti thu kan hmuh kha. Taima takih ṭuan ding kan si vekin a colhnak cang khal thiam ding (Thuf.23:4). Thil ṭha lo le sualralnak kan tuah ciamco lo a si men thei, hnaṭuan loih kan um hin Pathian thu len ah kan um zo ti theih a ṭul. Dam lo le tar pawl cu ret ṭha sehla kan dam phot ahcun tui sun ih pa le fa pawl hi hnaṭuan tu ding kan si.

2. Pa in a Fapa a duhdawt ih a parah a lungkim

Pa in a Fapa kha a duhdawt ih a tuahmi hmuahhmuah kha a hmuh ṭheh.  

 (Johan 5:20)

          Thuthanṭha bu 4 kan siar tikah Pa in a Fapa kha “ka duhdawtmi ka fapa a si” a tinak vei 8 lai kan hmu thei (Matt.3:17; 12:18; 17:5; Mar.1:11; 9:7;12:6; Luk.3:22; 9:35). Pa in a fapa a duhdawtnak tu a phuansuah tikih “A/na parah ka ling a kim zet” timi a sim tel ṭheu. Pa in a Fapa a duhdawt ih ziang hmuah-hmuah a kut sungah a pek a tuahmi hmuahhmuah a hmuh ṭheh. (Johan 3:35) . Cun Amah Jesuh rori khalin Pa in a duhdawt thu a rel (Johan 10:17). Jesuh hi Pa ih duhdawtmi lawng  a si loih Pa ih lungkimmi lole a parah Pa a lung a awi.

         

          Hi tawk zawnah zir ding kan nei nasa, Pa le pawl in kan fa le hi kan duhdaw maw? duh tile duhdaw ti hi a bang aw lo. A caan caan ahcun kan fa le kan duh tuk nak ruangah an hrangih ṭha lo ding tiang hman an duh lo zawng a si ahcun kan dawn siang ṭheu lo. Fa duhdawt kan timi hi fa le duhnak zulh a si lo ih an ṭhatnak ding lamzin ih zirh le kaih hruai a si sawn. Fale kan duhdawt ngaingai a si ahcun a hmaisa bikah Khrih zumtu, nun thar neitu an si ding hi na duh sak hrimhrim ding. Fa le kan duhdawt ih ruangah kan tuah dingmi le ṭulmi a phunphun a um ko,cumi hmuahhmuah tluanah kumkhaw nunnak an co ngah ding hi a thupi bikmi a si. Lei le a sungum an co ṭheh hmanah an nunnak an sun ah sun zianghman a ṭha hnem lo. Kumkhaw nunnak cu kan ni in kan pe thei lo nan an co theinak dingah ṭuanvo tumpi kan nei. Phun 10 an ong lopang keiti kan phan tlukin kumkhua nunnak an nei lo pang kei tihi kan phang ve maw?

          Pa cu Fapa parah a lung a kim, a lung a awi zet bang in fale pawl tui ni kan nun dan ah kanpa le an lungkim in an lungawi ve cio pei maw? Pa in “ Amah cu ka duhdawt zetmi a si” a ti men lawnga siloin “a parah ka lungkim zet” a ti bet bangin kan pa le pawl hrangah an fa men lawng siloin an lungkim zetmi (an lom emem mi) kan si pei maw? Fa le pawl, pa le pawl ih lom emem mi, an lungkim zetmi fa si kan tum cio kei uh cucu Pathian thu ih in zirh dan khal a si. “Fapa fim cun a pai’ lung a awi ter” tiih nganmi kan hmuh thei kha (Thuf.10:1; 15:20). Zumtu nun ah hin hringtu pa lungawi ter loin Pathian lungawi ter hi a um thei pei maw? Lei tlun ah mi famkim dinhmun ah kan ding thei lo ti cu zo cio khalin kan theih awk ṭhehmi a si ko nan pa le pawl ih lommi dinhmun ih din g thei ṭheh kan si, cucu kan mai’ par aha ṭhum aw mi a si.

3. Pai’ duhnak ih tlukluhnak

..ziangah tile ka duhmi tuah ka tum lo, i thlahtu ih duhmi lawng tuah ka tum a si. (Johan 5:30)

          A tlun lamih kan simzo bangin Pathian sinak ah tum sawn le te sawn an um lo nan Pa le Fa an sinak ih an pehtlaih awknak zawn ah Jesuh in Pai’ duhnak kha thupi sawn ah a ret ringring. Misual pawl kut ih a pek a si hlan te khalah thla cam tikah amai duhnak kha Pa hnenah a thlen ve ko nan “asinan kan duh vekin si hlah seh, na duh vekin si ko seh” tiah a ti. Jesuh nun ih  kan hmuh theimi cu Pai hnenih tukluh awknak nun a si. Tukluh awknak nun nei lo in na duh bangin si ko seh ti a theih lo. Jesuh in dungthluntu pawl thlacam a zirhnak khalah “lei parah na duhnak tuah si ko seh” a ti thotho. Jesuh in Pa hnenah a tuar dingmi khuathai ihsin luat dingah a dil nan a dil vekin a thleng lo, asinan Pa hnenah a vuivai cuang lo.

          Tui sun ih fa la pawl in hi nun hi kan ṭul ve ko lo sawm? Jesuh in Pa hnenih a duhnak a tlen bangin tuisun ih fa le pawl in kan duhnak cu pa le hnenah thlen ding kan si ko, kan duhnak bangin in tuahsak maw timi cu  an kut sungah a um. Cun kan duhnak vekin a thlen lo khal asile Jesuh in Pa a vuihram cuanglo bangin vui hram ding kan si ve lo, an duhnak ih tlulut ding kan si sawn, ṭhat lo nak lamih in forhfial ahcun  thu hran siseh la. A caan caan ahcun fale pawl in pa le hi kan duhnak in tuah saktu ding an sinak lawng hi kan thei ṭheu ih kan mah fa le hi pa le duhnak tuahtu ding kan si ve ti hi kan theih hngilh ṭheu.

          Jesuh le a pa, an pehtlaih awknak pathum kan tarlangmi pawl hi tui sun ih pa le fa pawl karlak ih kan pehtlaih awknak ah ṭhathnemnak in petu si hramseh.

Ca siarmi : 10 Attributes Of Jesus’Relationship With His Father