Saturday, June 1, 2019

SAAM 103 : Pathian Sinak Pawl


Saam 103 ngantu hi David a si ih Pathian thangṭhatnak hla a si. A hmaisa bik ah amah le amah Pathian thangṭhat dingin a sawm aw ih  cang 21 nakah vancungmi pawl in thangṭhat uh a tiih a netnak ah semsuahmi pawl in thangṭhat uh tiah a ti. Pathian thangṭhatnak ih a thokih Pathian thangṭhatnak ih a net a khar.  Pathian thangṭhat hi lo theih lo ih a ṭul ruangih thangṭhat ding siloin thangṭhat tlak a si ruangih thangṭhat ding a si zia tamtak a tar lang. Saam 103 sungah Pathian hi ziangvek Pathian a si ih kan hrangah ziang tluk ih sunglawi Pathian a si ti a nganlang.

1. Kan Hrang ha Pathian ( Cang 2)
          (..A hatnak hmuahhmuah hngilh hlah aw.)

          Pathian ih ṭhatnak hi ziangvek a si ti le Amah kha a ṭha ti men a si lo kan hrangah a ṭhatnak a lang, a luangliam a si. Leitlun ah thilṭha tampi a um nan cui thilṭha pawl kha kan parah ṭhatnak rahsuah cuanglo tampi a um. Pathian cu Amah a ṭha ti lawng a silo a ṭhatnak hi kan parah tampi a lang. Curuangah David cun a ṭhatnak hmuahhmuah hngilh hlah aw a ti vekin kan parih A ṭhatnak kan hngilh lo ding hi a thu pi zet. Minung hi midang ṭhatnak hngilh hmang kan si, mi pakhat inkan parah ṭhatnak tampi a tuah hmanah ṭhatlonak a neihmi pakhat ruangah a ṭhatnak hmuahhmuah hngilh hmang minung kan si. Curuangah Pathian in a mipawl hnenah cing ringring uh, hngilh hlah uh tiah voi tampi thu a cah ṭheu.

“A ṭhatnak hmuahhmuah” a ti tikah kan parih a ṭhatnak tamzia a ti lang, a ngantu David cun a hnuai lamah a parih a ṭhatnak pawl a run tarlang vivo. Pathian cu kan theih feng deuhdeuh asile kan hrangih a ṭhat zia le a maksak zia kan thei deuhdeuh, theih tam deuhdeuh le kan hrang a ṭhatnak hmuh deuhdeuh a si. Minung cu kan theih feng/tam awk deuhdeuh tikah hivek homaw a rak si tiih kan sambaunak hmuh awk ding a tam deuhdeuh ṭheu. Pathian cu theih hliah dawl Pathian a si.

2. Ngaithiamtu le Damtertu Pathian ( Cang 3)
          (Amah in ka sualnak … i ngaithiam ih, Ka natnak hmuahhmuah i damter.)

          Leitlun ih minung hmuahhmuah hi kan zaten ngaithiam ṭul hlir kan si. Ngaithiam ṭul lo ding khopih sualnak lakih fihlim thei kan um lo. Pathian hi ngaithiam theitu a rak si hi ziangtluk mi van nei kan si. Pathian hi kan (Misual) Pathian ding hrimhrim a si. Minung zo cio khal ṭhatnak kannei cio nan midang ṭhatlonak ngaithiam harsa minung kan si laiah Pathian cu ṭhatlonak a nei lo ngaithiam theitu a si. A va sunglawi em! Minung cunmi kan ngaithiam tikah ngaithiam thei cin a um ringring, Pathian ih mi ngaithiam theinak cu ramri a nei lo, ziangvek sualnak khal ngai thiam thei, Amah khenbettu khal ngaithiam thei a si. Ziangtluk na sual, ziangtluk tam ṭhatlonak na tuah, nung tlak lo tiangih theihawknak na nei pang maw? Na ṭhatlonak a tamtuk ruangah na minung pi pawl in an lo hnong in an lo iai maw? Pathian cun na sualnak zaten a lo ngaithiam thei theih ti awnghman siloin a lo ngai thiam zo hokhaw. Cang 12 nakah  Nisuahnak cu nitlaknak ihsin, A hlatzet bangin, Kan sualnak pawl cu kan hnen ihsin hlatzet ah a ret a si.
            Pathian cu sualnak hmuahhmuah ngaithiamtu lawng siloin natnak hmuahhmuah khal damtertu Pathian a si. Pathian hi damtertu a sinak zawnah taksa natnak lawng siloin thlarau lam natnak khal damtertu a si. Minung cu natnak ih nehmi kan siih Pathian cu natnak hmuahhmuah neh thluhtu a si. Natnak ih neh ve lo, natnnak hmuahhmuah neh thluhtu cu kan Pathian a si.

3. Runsuaktu Pathian (Cang 4)
          (A thukmi thlaan ihsin i suah ih)

          David in “a thukmi thlaan ihsin i suah” a ti tikah thlaan a thleng ngaingai tinak siloin thih theinak dinhmun lak ihsin Bawipa in a runsuahnak sawn hi a simmi ih a sawh duhmi a si ti a thuanthu in kan thei thei. Tuu a khalhnak ah sahrang, kiosa le Savom lak ihsin, Goliath ralnam ihsin, Sual ih feipi le ralnam ihsin le ral kut lak ihsin Pathian in a run suak. Israel pawl thuanthu hrimhrim khalah Pathian hi runsuaktu a sinak felfai takin kan hmu thei. Izip ram ih sal an tannak ihsin Pathian in a runsuak hai. Tui sun ih nang le kei khal hi Pathian ih runsuahmi kan si, sual man thihnak lak ihsin, hremhmun mei lipi ihsin in runsuaktu cu Pathian a si. Tui caan kan nunnak khal siatnak lak ihsin in runsuak, in runsuahnak lakah hremhmun mipi ihsin in runsuahnak hia sunglawi bikmi a si.

4. Kan Nun Thil ha ih Khattertu (Cang 5)
          (Ka nunnak cu thil ha in a khahter ih)

            Hi tawk zawn ah hin Baibal version pakhat le pakhat a bang aw lo zet. Thulu ih kan tar vekin rel sehla, David in “ka nunnak hi thilṭha in a khat ter’ a ti tikah David in harsatnak a tong lo thla tinak lam a si lo, harnak tampi a tong ve ko. Sihmansehla a nunnak hi zoh tikah ziangtlukin Pathian in ṭhatnak lam ih a hruai ti hi cu kan hmu thei. Pathian in kan nunnak ah thilṭha lo hi a thun lut dah lo. Tahṭhimnak ah Mi hrokhrawl pawl ih hnawiti sungih tidai le hriak cu tidai thawi rawiih an thunkhat vek a si lo. Hi thu in Pathian in ziangtluk in kan zawn in ruat tu a lang ter. Pathian in David ih nunnak thil ṭha ih a khat ter ih muvanlai bangin cak le no in a um ter.
5. A Dikmi Pathian ( Cang 6)
(An co ding mawi a coter hai)

          Pathian cu a dikmi Pathian a siih dik lo takin mi parah thil a ti dah lo. Diklo takih lairel khal a hua, neh sawh thil ti -  mi farah, nauta an si ruangih an cungthu ṭha te rel sak lo ti vek khal a hua. Pathian hi a dikmi Pathian asi ruangah dik lo tak cingih kan nunnak ah kan co ding awm in co ter ih kan diknak zawn khalah kan co ding awm in co tertu Pathian, nehsawh, nam thlak, namnuai hmang Pathian a si lo.

6. Zangfah Lainatnak Nei Pathian (Cang 8)
          (Bawipa cu zaangfahnak le lainatnak a nei )

          Kan Baibal kan zoh tikah Pathian ih zangfahnak le lainatnak hi hmuh ding tam pawl tak a si. Cui in zangfah lainatnak cu ziang vekin a rung lang ti asile cang 10 nakah Kan tuar ding zat in in tuarter siang lo ih, Kan sualnak le kan mawhnak man zat in in cawh lo tiah a ti. Pathian in kan sualnak ruangah in tuartermi a um ko. Hmansehla kan theih dingmi cu kan sualnak thawn ṭhim tikah kan tuar ding zat in in tuar ter lo ih Kan sual le mawh thlukin in cawh lo. Pathian teh hi vek lawm mam mi tuar ter tiah kan ti ṭheu men thei, asinan kan tuar ding zat hman in tuar ter tsiang lo sawn a si ti theiin Pathian hnenah lungawi thu sim ding kan si. Kan sual le mawh bangin in tuar ter sehla tui sun ah nung dam ding khal kan um nawnlo ding. Cucu a zangafah lainatnak langtertu a si.

          Saam 103 siar tikah David in a parih Pathian ṭhatnnak pawl nasa takin a phuansuannak kan hmu thei. Pathian hi David hrangih a ṭhat vekin kan parah a ṭha ih tui sun ni khalah A ṭhatnak fate hman a kiam cuang lo. Kan mahle kan nunnak cio zoh sehla Pathian ih ṭhatnak ziangtluk rel ding kan nei ve pei? David in a nunnak ih Bawipai ṭhatnnak pawl a hmuh feng tikah “ Maw ka nunnak Bawipa cu thangṭhat aw” a ti lo thei lo vekin kan nih khal kan nunnak ih Pathian ih ṭhatnak pawl kan hmu fiang a si ahcun Pathian thangṭhat loih um thei ding kan si lo.


Ca siarmi pawl :





         


         

No comments:

Post a Comment