White House hi America President umnak inn le hna a ṭuannak hmun a si. A sungah President office - Oval Office a um cih. A umnak hi Washington DC khawpi sungih 1600 Pensylvania Avenue NW a si.
Kum 1791 ah America President hmaisa bik George Washington in hi hmun hi a hril ih hramṭohnak lung a phum. A sak dan ding ruang zingthiam (design) an hawl ih Irish architech James Hoban an hril. Kum 8 sung an sak hnuah ṭheh fel ciah loin 1800 kum ah US President pahnih nak John Adam le a nupi Abigail in an luah. Hmansehla 1814 kum ih British thawn an do awk laiah mei in an ur siat ṭheh ih an sak ṭhat sal hnuah 1817 ah President James Monroea in a luah sal ih a lehhnu khalah president hril tlinmi pawl in an run luah vivo. John Adam in hi innpi a rak hlannak thute hi hminsin a tlak zet: “Hi inn le a sungih umtu hmuahhmuah hrangah thluasuahnak ṭha bik pe dingah vanlam ka dil ih hi inn sungah hin mi rinum le mifim pawl lawng in lairel hai seh” tiin a hlan.
Nuam tete'n an sak bet vivo ih hmin dangdang an rak pe, 'President palace', 'President's House',' Executive Mansion' ti pawl in a hmin an rak sak. A inn phar lenglam hi rong rang lawnglawng an hnih ruangah 1901 kumah President Theodore Roosevelt in 'White House' tiin a hmin a thlengih tuisun ni tiang an run hmang lan ta.
White House ah room 132, bathroom 35 a um ih sangka 412, tukverh 147, mei hlum ainak hmun 28, kailawn 8, khaiso awknak (elevator) 3 a um. Cokaa ah mikhual 140 an um theiih a inn le a hmunram hi acre 18 tlukih kau a si. Hramhring diahdi hmun a siih a kawt ah President ih hman ding helipad a um.
Laknak hram : Dr.P.C Biaksiama ih nganmi TRUMP-A AMERICA
No comments:
Post a Comment