Paul le Thuthangṭha

          Paul hi zo khalin kan theih larmi le kan uar zetmi a si. Asan cu Thukam thar kan zoh tikah cakuat ngan tam bik le Khrih Thuthangṭha hrangah nasa zetih hmang aw mi le tuartu a si. Thuthangṭha fehpi ih a nun hmang liamtu a si vekin Paul le Thuthangṭha hi ṭhen theih lo rori in a thuanthu a um. Tu ah Paul le Thuthangṭha an peh tlaih awk dan hmangin thazang kan la tlang ding.

1. Thuthangṭha dodaltu a rak si.

          Paul hi nasa zetih thuthangṭha fehpi tu a si hlah ah nasa zetih Thuthangṭha dodal tu a rak si dah. Stefen kha lungto ih den thah a si ṭum khal ah lungkim tu ah a tel ve (Tirh.8:1). Cu tin amah rori in zumtu pawl inn khat hnu innkhat hawl in a kai ih thawng ah a thlak hai (Tirh.8:3) . Asinan Thuthangṭha cun ziam lam a pan cuang lo, a karh zai deuh deuh ih amah Paul rori khal Thuthangṭha phuang tu ah a rung cang. A nunnak a thleng tikah cun fiang zetih a hmuhmi cu Thuthangṭha phuangtu pawl hi kai in thir cikcin in khih si hman khal hai sehla Pathian thu cu thir cikcin in khih theih a si lo (2 Tim.2:9) . Paul hi Zumtu pawl kaitu a rak si dah nan a tuah cun Thuthangṭha ruangah amah riangri thir cikcin ih khih a tong (Tirh.22:5; 2 Tim.2:9). Thuthangṭha phurtu pawl hi kaih le khih theih si khal sehla Thuthangṭha cu khih theih a si lo.

2. Thinlung hmuahhmuah in Thuthangṭha a sim (Rom.1:9)

          Paul ih san lai ah mi ti buai zawngih Thuthangṭha simtu an um ti cu kan theihmi a si. Paul cun Thuthangṭha  sim tikah Thinlung thu ngai thlak roriin a sim. A thinlung hi Thuthangṭha ah nasa takin a pe tinak a si. Pathian in a fial vekin a hmin men in a phuang lo, cun midang duhsaknak taktak thawn a sim ih Thuthangṭha phuan khal a hiar (Rom.1:15).

          Zumtu kan nunnak cio ah Pathian in tuah ter duhmi, fialmi in nei cio ko ding. Pathian hna kan ṭuan tikah thinlung pe zetin kan ṭuan maw timi hi a thupi zet. A hminte men ih ṭuan hi a um ih thungai thlak thinlung pe ih ṭuan hi a um. Curuangah kan ṭuan dan khal cek awk a ṭul. Paul cun Thuthangṭha hi a thinlung tak rori a phuan vekin Thuthangṭha phuan khal a hiar in a hiar.

3. Thuthangṭha a zahpi lo (Rom.1:16)

          Ziang ruangah Paul in Thuthangṭha hi ka zahpi hrimhrim lo tiah a ti? Thuthangṭha cu zahpi ding a um rengreng maw si ti ah thu kan sut aw men thei. Hi lai can hi Rome lal lai a si ih Rome in mi hmin thang mi thiamsang tam zet a nei. Cun Khristian si khal thil harsa zet a si. Ziangahtile Khristian pawl hi hmuhsuam mi le hremmi an si. Jesuh Khrih khal misual tiih khen that mi a si fawn. Cun khailai san zumtu pawl hi mi farah rual an siih a ṭhen le phei cu sal an si ih mi ṭhen cu harsatnak hnuai ih um an si hai. Curuangah leilung ih hmuh dan ah cun Khristian si cu ningzah za a si. Asinan Pual cun mithiam sang sikhalsehla Thuthangṭha cu ka zahpi hrimhrim lo tiah hnget zetin Thuthangṭha a dinpi.

4. Thuthangṭha simtu a ngai na (Rom.10:15).

          Isai.52:7 ih ta la in Paul in Thuthangṭha a phuangtu pawl ih ke cu ziang tlukin a mawi! tiah a ti. amah hi Thuthangṭha phuangtu a si vekin Thuthangṭha phuangtu pawl a ngai na. Paul in ziang tluk in Thuthangṭha le a phuangtu a ngai ti le Fil. 1:17-18 ah “Mi hrekkhat pawl cu thinlung tluang zetin Khrih thu sim loin anmah hamṭam zawnruahnak thinlung thawn an sim. Thawng ih a um laiah hin harsatnak betcih vivo uhsi tiin an ruat. Zianghman a poi lo. Ka lung a awizet ko; thinlung ṭha lo thawn an simah siseh, thinlung tluangih an sim khalah siseh, Khrih thu an sim poh ahcun ka lung a awi thotho ko ding.” tiah a ti. Paul hi thusimtu larzet a si ih thusimtu lakah Paul halhsik ih Khrih Thuthangṭha sim ve tho siin Paul dodal, Paul thlak niam ih anmah dinhmun sang ih ret aw duh an um. Khrih Thuthangṭha an sim ve nan Khrih sunlawinak hrangah si lo in mai ṭanghmai hai ih ṭuantu pawl an si. Paul cun cu ti vek minung khal Khrih ih thu an sim ahcun ka lung a awi ko a ti thei.

          Hi tawk ah Paul ih lungput hi a uar um nasa in ka thei. Khrih thu an phuan phot ah cun a lungawi pi thei. Zumtu kan nunnak ah zir ding kan nei nasa. Kanmai phuan dan vek si lo deuh le kan ha zawh zawng silo thusim cu zianghman ah kan rel lo ṭheu. Cu lole kan mah in do kalh deuhtu pawl tla khi cu kan hua ṭheu. Kan mah thawn kan bang ciah lo hmanah Khrih ih thu an sim ahcun kan lungawi pi thei maw timi hi kan nunnak ah zoh fiang aw sal uh si. Paul cun Thuthangṭha phuan suah a si ding hi thupi tuk ih a ret ruangah thilung ṭha lo thawn an sim ah siseh, thinlung tluangih an sim ah siseh ka lung a awi tiah a ti.

          Paul le Thuthangṭha peh tlai awknak hi Baibal sungah rel ding tampi a um. Paul in Thuthangṭha a ngai nat zia le a thupit zia, a sunsak zia hi a nunnak ah kan hmu thei. Kan Bawipa Jesuh Khrih  rat sal tiang Thuthangṭha ngaina ih dinpi ti kan si theinak dingah Pathian in lo thlasuah cio hramseh.