CA ṬHEN KHAT

Friday, January 11, 2019

Rundamnak Maksak Heb.2:3


         Kan thupi hi ‘rundamnak maksak’ ti a siih hi tawk ih a ‘maksak’ (great) timi ih a sawh khihmi cu  a tumlianmi, a nasazetmi, a ropi zet mi ti pawl an si. Hebru cabu hi ‘maksa cubu/ tumlian cabu (book of GREAT) kan ti thei. Ziangah tile bungtin deuh thaw ah maksak/tumlian timi hi hmuh ding a um. Cui maksaknak a relmi pawl hi Khrih ih maksaknak le a tuahmi pawlih maksaknak pawl an si. Cun thupi ih kan tarmi khal hi rundamnak timen siloin ‘Rundamnak Maksak’ ti a si.





A. Maksak

          Maksak, tumlian, cungnung timi ih a sullam cu thil zarran hnakih a cuanghmuar mi rel a si. Thil pakhat khat a rak um cia mi hnakih ṭha sawn, dinhmun sang sawn, a um cia mi hleih..tvp hi maksak timi ih a khih hmuh mi a si. Maksak (Great/greater) timi hi Hebru cabu sungah kan hmuh theimi pawl cu:

          1. Jesuh cu vancungmi hnakin a cungnung sawn. Heb.1:4
          2. Jesuh cu a tum cuangmi upat lungawinak pek a si. Heb.1:9
          3. Rundamnak maksak in tuahsak. Heb.2:3
          4. Moses hnakin upatnak tum sawn ngah tlak a si. Heb.3:3
          5. Jesuh cu puithiam sang maksak a si. Heb.4:14; 7; 8;10:21
          6. Jesuh ih hnaṭuannak puanthlam a tum sawn. Heb.9:11
          7. Kan hrang laksawng tumpi a um. Heb.10:35
          8. Theihpitu maksak. Heb.12:1
          9. Jesuh cu tuukhal tum a si. Heb.13:20

B. Rundamnak Maksak

          Rundamnak thu hi Baibal ah hmuh ding tampi a um ih rundamnak thu sim dan phun tampi khal kan hmu thei. Jesuh ih in rundamnak hi a maksakmi rundamnak kan ti lo thei lo, ziangah tile Pathian ih cohlam tlak rundamnak cu Jesuh ih rundamnak lawng a si. Hi rundamnak maksak cu a hnuailem vekin tawi tete’n tarlang sehla.

1. Pathian in a Fapa rori in pe

          Pathian hi kanmah lo khal ih nung thei, ziangkim nei, ziang kim thei, ziangkim ti thei a si. A Fapa hi leitlun ih run thlah hi Amai’ hrangah zianghman a ṭulnak a um lo. Amai ṭulnak ruangah A Fapa lei ah a thlah lo ih kanmai ṭulnak ruangah a thlah sawn. Ziang tluk duhdawtnak a si! Lei dan ah kan mai ṭulnak ruangih kan fa le thil pakhatkhat tuah dingih kan thlah hi cu thil awm zet a si laiah kan mai ṭul si lo, kan sungkhat ṭul khal si lo mi dang hrang liolio ih thlah hi thil awl a si lo. Pekawknak liolio a si. Pathian in a hrangah a Fapa in pe lo, kan hrangh ah a si sawn tihi theih hngilh hlah uh si. Kan mai hrangah A Fapa neihsun a run thlah ih kan nih in ziang siar lo ih kan um pang maw? Jn.3:16

2. Ramri a um lo

          A caan caan ah kan nun in ṭawnṭem ṭheutu hi kan sualnak a si. Kan til ṭha lo tuahmi in in nun ah puhrun awknak le ningzahnak le thil dangdangin in ṭawnṭem ih Biakinn lam khal feh huam lo, zumtu pawllakih tlan len khal huam lo in in tuah ṭheu. Cumi in kan nunnak cu suallam ah in hnuk lut vivo ṭheu. Kan theih dingmi cu Kan ṭha ruangah Pathian in  a Fapa in pe a silo, hi vek in misual kan si ruangah sawn ah a si.

Na sualnak le ṭhat lonak in Pathian lam hoi ding lo dal hlah she, na sual le ṭhat lo ruang sawn ah a Fapa a lo pe ti thei aw. Ziang bang tuk ih misual khal Pathian cun a lawm mam tuk aw timi a nei lo, a ngaithiam thei lo ding khop ih sual thei zo hman kan um lo. A rundamnak sungih tlemlo dingkhop ih misual kan um lo. Pathian ih in lainat duhdawtnak le zangfahnak hi kan sualnak thawn tahṭhim ahcun kan sualnak cu fate takte lawng a si. (Sam.86:13)

3. Adam le Khrih

          Minung hmaisa bik a simi Adam ih sual ruangah mi hmuahhmuah misual ah kan cang ih kan parih thuṭhennak cu “Nan mawh” ti a si. Pathian hmaiah kan zaten mawknak neimi kan si ih cui mawhnak ihsin mawh nei lo kan si theinak dingah kan mah lam ih ṭanlak thei ziang hman a um lo. Asinan Jesuh khrih ih in rundamnak ruangah kan hlawh lo cingih kan comi laksawng cu “Nan mawh lo” ti a si. Laksawng timi cu kan hlawh a si lo mi kan comi liolio a si. Mawhnak ih a khatmi kan si  ko nan a Fapa ih ruangah mawh nei ah kan cang. Mi pakhat thu ngailonak ruangih misual a simi kha mi pakhat, Jesuh ih thu ngainak thawngin Pathian thawn rualremnak kan co. (Rom.5:15-19)

4. A thih lo nak dingah a thi

          Thinglamtah kan timi hi mi fel, mi ṭha hrangah a si ve lo. Misual pawl thahnak ding ih tuah a si. Thinglamtah ih an thahmi mi ṭha an um lo, nung dign thlakih an ruah lo mi pawl thahnak a si. Sihman sehla Jesuh thihnak thuhla ahcun thinglamtah cu a thuanthu a ling let. Misual lawnglawng an thahnak ah sual nei lo a thi ti riai. Jesuh hi sual nei lo a si ih amah ah thianglam tah ih a thihnak ding san a um lo. Thinglamtah cu misual thihnak ding a si ih anih sualnei lo thihnak ding a si ve lo. Ziangruangah a thi kan mai ruangah a si. A thihlonak dingah a thi timi cu kanmai thihnak dingah a thi tinak a si.

5. Hell ihsin Van ah

          Hi lei hringmi ah zohman in pathian sunloihnak kan co ban lo. Kan co dingmi cu hrem hmun meipi a si. Kum khua amit dah lomi meipi, ṭah le hacang rialnak hmun hi kan co dingmi a si. Sihmansehla Jesuh Khrih ih in rundamnak ruangah kan kan co dingmi cu hell si nawn lo in Vanram a si. Van ram hi kan ni ih lei theih le hlawh theih khal a si lo, hmansehla tu ah cun kan co dingmi, kan umnak ding hmun a si ta riai, ziangah tile Jesuh khrih ih in rundamnak ruangah a si.

          A tlun ih kan tarlangmi bakah Rundamnak hi a maksa zia rel ding tampi a um ko. Kan Baibal ih a muril bik le a hmuitinmi khal Jesuh ih in rundamnak a si. Thinglamtah ah kan thuanthu hlun pawl hmuahhmuah cem ter a si zo ih thuanthu thar kan nunah a thlen ter. Satan fa a simi cu Pathian fa ah, mawh neimi cu mawh nei nawn lo ah, Pathian doral cu Pathian thawn rualremnak ah, sua ihkhat cu mi thianghlim dinhmun ah in ding ter.

Hi rundamnak maksak thu ah ziang a sim hrih ti le Amah Jesuh rori in a sim, Tirhthlah pawl in an nemhnget ih Pathian in mangbangza thawn a thiehpimi a si (Jesuh in sim- Tirhthlah in nemhnget- Pathianin theih pi). Curuangah ziangtin a ti? Hi tlukih rundamnak maksak hi kan nih in zianghman ih kan siar lo ahcun ziantin so hremnak ihsinkan luat thei ding? Tiah a ti ih a sannak um luat theinak a umlo ti a si mai. Pathian in hi tluk a maksakmi intuah sak hnuah zianghman ihkan siar lo ahcun luatnak ding lamzin dang a um nawn lo. A netnak ah hi thu hi ka cah duh

          1. Pathian ih in duhdawtnak ziang siar loin um hlah.
          2. Pathian ih in ngaithiamnak ziang siar loin um hlah.
          3. Khrih thiseh ih thawinak ziang siar loin um hlah.
          4. Pathian ih laksawng pekmi ziang siar loin um hlah.
          5. Pathian ih thindaihnak thu ziang siar loin um hlah.
          6. Rundamnak maksak hi ziang siar loin um hlah.


No comments:

Post a Comment