David le Mefibosheth – Zangafahnak Maksak (2 sam.9:1-13)

          David le Mefibosheth ih thuhla hi zok tikah Pathian ih in zangfahnak a langfiang ter nasa. Mefibosheth hi Sual ih fasuan, Jonathan ih  fapa a si. Kum 5 a si tikah raldonak ih a pa ih thihsan mi a si ih tlunah a ke hmih ih a zengmi a si (2 Sam.4:4). Pathian in David hi Siangpahrang ih a ret thlang ding tikah Sual le a fa pawl hi ral kut ah an thi. Cutin David cu siangpahrangah a run can tikah Jonathan hnenih a thukam bang tukin Sual le Jonathan ih sungkua pawl parah a ṭhatnak langter a tum (1Sam.20:12-17,42;24:21). Cu tiih ṭan a laknak ihsin Mefibosheth thawn tong aw an si. David in Mefibosheth parih zangfahnak a neihmi in Khrih thawngin Pathian ih in zangfahnak a pho lang zet. David ih hmin sullam cu “duhdawtmi tinak a si ih Jesuh khal Pathian ih duhdawt zetmi  fa a si thu  kan hmu thei (Matt.3:17; 17:5).

A. Mefibosheth ih Dinhmun

          A siatmi innsang : Mefibosheth hi Pathian ih a hnon, a duntung zomi siangpahrang Sual ih ih cithlah a si. Hlan ahcun a cak zetmi, a lian zetmi, a khohkhah zetmi innsang an sin an a tuah cun Pathian ih duntunmi, a siatmi innsang an si. Pathian in thah ṭheh ding a timi kha Sualin that ṭheh loin a a zuat ih amah te’n thawinak a peknak ihsin Pathian in a dungtunmi a si.

          Lei minung khal kan thuanthu kan zoh tikah hlan ahcun Pathian in dinhmun ṭha ih a rak retmikan si.Eden hmuan ih a retmi kan si ko nan thu lun lonak in sual ah tluknak ruangah Eden hmuan ihsin dawi suahmi kan siih  Pathian sunloihnak khal co ban nawn lo ah kan cang (Rom.3:23).

          Thih hmabak innsang : Sual ih ralkap pawl le David ih ralkap pawl hi an do aw ringring. Sual ih ralkappawl cu an ṭawnṭai vivo ih David ih ralkap pawl cu an cak deuhdeuh. Cutin Sualih sungkua pawl hmuahhmuah cu thah ṭheh ding dinhmun ah an ding thlang. Mefibosheth khal Sual ih cithlah a si vekin thah ve dingmi a si.

          Lei minung khal kan zate’n Pathian hmaika ah mi ha zohman an umlo ih kan hmabak cu sualman thihnak a si. Cui thihnak cu zohman a pumpulh thei kan um lo ih kan zatei’ ton dingmi a si. Sual man thihnak ihsina lut theitu kan um lo (Rom.6:23).

          Tlasammi innsang : Mefobosheth cu Lodebar khua, Makhir ih innah a um. Lodebar ticu ‘ram hninghno lo, hramhring um lonak hmun’ tinak a siih Makhir ti cu ‘zuar zo mi’ tinak a si. Curuangah Mefibosheth cu harsatnak hmun le tlaksamnak hmun ah a um ih amai dinhmun hrimhrim khalhi kezeng a si tikah zianghman mahte ih ti thei lo, neihmi zianghmannei lo, le finkhawi cop mi a si.

          Sual fate kan ni khal hi dinhmun ih ding ve kan si ih Pathian ih  camsiatmi kan si. Pathian umpinak tello nun cu nun ro, nun car, ruahsan ding zianghman um lo a si. Dinhmun se zetah um khal sehla Befibosheth bangih mante tal suak thei cuang lo kan si.

B. Zangfahnak Ni A Suak

          Mefibosheth cu dinhmun se zet, a hmai lam hrang zianghman khaw ong a um lo laiah David in Sual ih sungkhat pawl hrangah zangfahnak langter duhnak thinlung a nei. Cu tin Sual ih sungkhat lakah Mefibosheth a dammi a um lai ti kha David in a thei. Mefibosheth in zangafah a dil ruangah a si lo, anih cu David ih hmuh lo dingin a relh rero lam. David in zangfahnak langter duhnak thinlung a neih hi Mefobofheth hrangah cun dunglam sabarh rori a si. David cun zangfahnak lang ter a duh hi Jonathan ih ruangah a si, Kan ni in Pathian zangfahnak kan co ve hi cu a san le a ruang a um lo, in zangfahnak liolio a si. David in Mefibosheth a nungdamlai ti a theih tikih a tuahmi pawl vun tarlang vivo sehla.

          Hmu ngah dingin a zuam : David in Saul ih sungkua ah a nungdamlai an um ti a theih men ah a duh tawk lo, hmu ngah ding rori in a zuam (2 Sam.9:3,4). Misual a do ral hmu ngah duhtu rualṭha a um timi cu ziangtluk lungawiza thu a si. Nang le kei khal Pathian ih doral kan si ko nan in hawl suak dingah Pathian daite’n a um men lo. Pathian thawn nan tong aw a si ahcun nangmah in ṭanlaknak ruangah a si dah lo,amah ih ruangah a si ringring ding.

          Mi a thlah : Mefibosheth cu Makhir innah a um ti a theih tikah hruaisuak dingah mi a thlah. Mi a thlah ti thu ciah ngan a umlo nan ke zeng a si tikah amah hruaitu dingah thlahmi  a nei hrimhrim ding ti a fiang.

Mefibosheth hrangah cun David ih milai pawl thawn ton awk ding hi cu a hrangah ṭinnung za a si. David ih malai pawl a hneih an va thlen tikah ziang tina rak um ding timi cu vun mitthlam dan ahcun a khur rero ko ding. David ih hnenih hruai a si le phei tla cun a hrangah cun van a cim  a si ko. Asinan khai ni cu a thihnak, vanduai a tonnak ni si lo in a ruah ban lo piin a hrangah cun ni thar sunglawi tak a rak si. Pathian in a Fapa a run thlah hi nang le kei siahsuah dingah a si lo, thiam co ter ding sawn ah a si Haleluiah! Mefibosheth cu David do rerotu Sual ih sungkhat si khal sehla David cun a hrangah khawkhannak sia va zianghman a nei lo, a hrang ṭhatnak ding sawnah a si.

          A hminin a ko: Mefibosheth cu David hmaiih a thlen tikah David hmai ah a lu a kun. ‘Na duh dandan in i tuah thei’ ti bak lo cu a hrangah ziang ti theimi a um nawn lo. David hmaiih a thlen tikah uico thi cia hman tluk awn lo in a thei aw thlang.  Asinan David cun a hmin in a vun ko ih na thin phang hlah aw iah a ti. Hi kawhnak tluk ih sunglawi le thlum hi Mefibosheth hrangah a um thei nawn pei maw? David in Mefobosheth tiah a hmin a ko duh hi ziang tlum in a mak. Hi bang tukin Pathainin amai doral pawl duhdawt zangfahnak thawn kan hmin in in ko duh hi a va sunglawi ve. Jesuh in nah min in a lo ko duh tluk ih thil sunglawi na hrangah ziang dang a um? Pathian hi kan mah sawn in ko rero in in awih duh lo hman sehla thil awm a si laiah amah sawn in in ko hi a va sunglawi lawm mam ve.

          Dinhmun sangah a ret : David cun Mefibosheth hnenah sual le a sungkhat pawl ih neih mi hmuahhmuah a pek ṭheh ih Ziba ih sungkhat khal a hnenum ah an cang ih tlun ah Mefibosheth cu c dam sung David hnenah rawl a ei ringring. Siangpahrang cabuaiih rawl ei ban hi thil na men a si lo. Sual cun David a kawh tikah a nunnak derdai takin a tuah, David cun Mefibosheth a kawh tikah a nunnak a humhim. Kan ni khal Pathian in kan dinhmun sia lak ihsin a Fapa Jesuh Khrih hmangin in run dam ih ruahsan ding nei lopawl hnenah ruahsannak thar thawn dinhmun ṭha ah in khaisang, thlarau lam thlawsuah phunkim in pe (Efs,1:3-6). Vankhua le timi sinak kannei ih kan thlennak khal vancung Jerusalem a si (Heb.12:22). Tuah takin in a hnenah kan thleng hrih lo nan kumkhua in a hnenah kan um leh ding.