Saturday, December 29, 2018

Saam 16


          Saam 16 nak hi siangpahrang David ih nganmi a si ih himi sungah hin David hrangah Pathian hi ziang tluk in a thupi ih a sunglawi timi a lang ter. Pathian hi a hrangah a ziangkim a si zia hi a lang fiang  nasa. Saam 16 sung ih David ih ṭongkam ihsin thazang lak ding tampi a um cu pawl cu a tawi zawng tete in tarlang sehla.


1. Nangmah cu ka beunak (cang 1)

          Beunak timi cu thil pakhat khat a thlen caan ih himnak hmun hi a sawh duhmi a si. Beunak hmun a man neihnak hi thil pakhtklhat a thlen lawngah kan thei ṭheu. Tahṭhimnak ah ruah a sur lo ahcun beu thlam manhlatnak kan tep ngah lo, ruah a sur tikah cun beu thlam hi a sunglawi nasa. Cuvek in David in “Nangmah cu ka beunak na si” a ti tikah a nunnak ah Bawipa hi beunak ah a hmang ti hi fiang zetin a lang. Kan nunnak ah ruahpi a sur caan ah maw thilsia a hran caan ah maw harnak pakhat khat a thlen tikah Bawipa hi kan beunak, kan himnak a si zia a tak in a lang suak ṭheu. Ruahpi a sur tikah beunak hmun ih kan thlan ṭheu bangin harsatnak hi Bawipa, himnak beunak hmun ih in tlan tertu an si ṭheu.

2. Nangmah cu ka Bawipa na si (cang 2)

          Hi cang ah hin David in Pathian hi a nunnak ih thunei tu ih a ret zia a lang ter. Pathian  hi kan parih thuneitu ah kan ret maw timi a langfengnak cu kan hmurka ih Bawipa kan ti hnak hnakin a thu vekin kan nung maw, kan tuah maw tiah a si sawn. Luk.6:46 ah Jesuh in, “Ziangah so ‘Bawipa, Bawipa,’ tiah in ti ih ka lo sim mi cu nan tuah fawn lo? tiih Jesuh simmi kan hmu thei. David in Pathian hi a Bawipa ih a ret ruangah thil a tuah ding tikah tu le tu Pathian thu a ron hmaisa ṭheu ( Siar : Pathian be ron tam David). Cun a peh hrihmi cu “Nangmah locun ṭhatnak ka nei lo” a ti. A um zia cu Bawipa tello cun kan ṭha thei lo ih Bawipa thawnlawngin kan ṭha thei tinak a si. Mi ṭha lo taktak kan timi pawl khalin Jesuh an neih ngah tikah mi dang zetzet ah an cang thei. Nu le pa hman ih beidong zo mi pawl khal Bawipa ih ruangah mi ṭha taktak ah an suak ṭheu. Bawipa tello cun kan ṭha thei lo, Bawipa thawngin kan ṭha thei tihi zumtu in kan theih dingah a thupi zet. A ṭha kan timi khal hi Bawipa hnen ihsin a ra mi a si lo ahcun a ṭha an rak si lo ṭheu.

3. Pathian ih mithiang pawl a ngaina (cang 3,4)

          David in Pathian a ngaina ti a langnak cu Pathian ih mithiang pawl a ngainatnak in a si. Pathian a ngaina mipawl in Pathian mipawl an ngaina ṭheu. Kan zumtupi hman kan ngainat lo ahcun Pathian ka ngaina kan ti thei pei maw? Hi tawk ih mithiang a timi pawl hi zo bik an si ding theih a har zet, Pathian a riantu pawl, Bawipa a ṭihzahtu pawl, Biaknak lamih anmi pawimawh pawl khal an si thei tiin a kau zawngin ruat sehla, khawvelmi relnak a si lo ti cu a fiang ko. David in cui mithiang pawl thawn umtlan cu ka lungawinak bik a si tiah a ti. A lungawinak hi khawvel thil ah a si lo zia khal a langfiang nasa.

          David cu Pathian ih mithiang pawl hnen ih a um thu lawng si lo in khawvelmi pawl in an pathian hnenih thawinak nak an peknak hmun khal a tel lo, an pathian pawl ih hmin khal a sal dah lo. Curuangah khawvelmi pawl thawn a nun a fihlim, a colh kalh awk ruri lo zia kan hmu thei. Pathian a ṭihzah lo tu pawl hi cu ka pawl khal pawl hlah uh tiah Paul khalin zumtu pawl a forh nasa (Rom.10:17; Efs.5:7; 2 Thes.3:14). Zumlo tu pawl kan hrial ding ti lam si loin zumtu ti aw si Pathian ziang ih siar lo pawl kha a ti duhsan mi a si sawn. 1 Kor. 5:9-11 ah “…mi sualral pawl thawn kom aw hlah uh, tiah ka lo sim zo. Cuti ka lo ti hai tikah khawvel mi: mi sualral pawl, hamṭam pawl, rukru pawl le milem bia pawl kha kom hlah uh, ka ti duhmi a si lo….Zokhal zumtu ti aw sii ih nupa sualnak tuahtu pawl, hamṭam pawl, milem bia pawl, mi thangsiat duh pawl, zuri pawl le rukru pawl ka ti duhnak a si. Cubangtuk mi sualral pawl thawn cun rawl ei dingah a to hman to tlang hlah uh.” tiin kan hmu thei.

4. Nangmah cu ka ro  le  ka covo na si (cang 5,6)

          David in Bawipa cu a ro le a cavo a si zia a fiangih a hna ngam pi zet. Cun a neihmi pawl khal Pathian hnen ihsin a ngah mi a si zia a fiang. Lei hlawnthial tamzet nei si ih Pathian kan neih si lo ahcun mi farah kan si (Luk.12:13-21), a thlawsuah lawm vio ding a petu ziangih rel si lo cu mi sual a si.David cun lei thil hnakin Pathian sawn hi a nunnak ah thupi bik ah a ret. Lei dan ahcun neihmi nei mumal lo hi mi farah kan tiih hman sehla  a ngaingai ahcun Pathian kan neih a si ahcun mi farah kan si lo timi hi kan nunnak ih kan theih a ṭul.

5. Rem i ruat saktu Bawipa (cang 7,8)

          David in Pathian hi remruat saktu a si zia a feng ih a nun a hahdam vekin zumtu pawl in rem in ruahsak tu hi Bawipa a si ti kan theih tikah kan nunah colh hahdamnak kan ngah ṭheu. Bawipa n rem in ruah sak dan hi kan duh zawng cu a si lo men thei nan kan hrang ṭhatnak ding a si ringring. Kan hmuh banlo le kan theih ben lomi hmutu le theitu a si ruangah Bawipa rem in ruah saktu ah kan nun ṭhum sehla phur rit a kiang ṭheu.

          Cun David in Pathian hi remsuak saktu a sinak ih a ṭhum awk ruangah cang 8 nakah “Bawipa cu ka hmai ah ka ret ringring”(KJV) tiah a ti. Bawipa a hmai ih a ret ti umzia cu ziang vek thil khalah Bawipai thu suak a hngak hmaisa ṭheu, Bawipa in ziang tuah ter I duh, ziang tiih tuah a duh tiin Bawipai aan a ngai ṭheu.

          Aw le David in Bawipa hi a ziang a si ti a tarlang nasa ih kan nih nunnah the Bawipa hi kan ziang a si ve? Bawipa ih ṭhum awmi nun hi a hnget, a mawi, a zangkhai, thlawsuah a um, a hmuingil ih lam a tluang a si.
         

         

No comments:

Post a Comment