Ezekiel 14:14 Sungih Mi Pathum

Mi ṭhazet a rak si mi pathum-Noah, Daniel le Job khal um hman haisehla an ṭhatnak cun anmah ih nunnak lawng a hum thei ding,” a ti.

          Ezk.14 sung kan siar tikah Pathian in mi dingfel tiih a timi mi pathum an um. Cu pawl cu Noah, Daniel le Job pawl an si. Pathian minung tampi lakah mi dingfel tiih an hmin a runglang hi a sunglawi nasa. Zumtu tampi lakah kei teh pathian in ziang tin in ti ve ding timi i ruat ter. Ziangruangah Pathian in hi mi pathum pawl hi mi dingfeltiah a ko ti lam hi rel ka tum mi asilo ih an nunnak ihsin thu pakhat fingfing in thazang lak ding kha katum mi a si sawn.

1. Noah :Nun thiar fihlim awknak

            Noah cu mi ṭhazet a si ih acuih san ahcun amah pakhat lawnglawng Pathian ih lungkimmi a si. Pathian thawn a umtlangmi a si. Sikhalsehla midang hmuahhmuah cu Pathian ih mithmai ah an siavazet ih an siatnak cu khuazakip ah a zai vivo. Sem.6:9-11

            Noah san laiah minung hi an tamzet zo ih cumi lakah Noah pakhat lawng hi mi ṭha, Pathian ih lungkimmi a si. Hi san minung pawl hi Pathian ṭihzahnak khal an nei lo, Pathian thu khal an ngai lo, ei le in in an ṭhi aw in nuam an ceen, an thinlung khal ruahnak siava in a khat ṭheh (2 Pit. 2:5; 1 Pit. 3:20; Luk. 17:27; Sem.6:5). Noah cun a kiangkap ah Pathian ṭihzahtu hmuh ding  um lo khal sehla Pathian hmaiah rinum takin a um ih a kiangkap ih an tuahmi thil ṭha lo le nun dan ṭha lo pawl a zir zawng ve lo ih a thir fihlim aw sawn.

          Zumtu hrangah thil awl deuh mai cu: kan kiangkap ih mi an tuah vualvo mi a si ahcun Pathian duh lo zawng khal rak tuah ve mai hi a si, mi teh an tuah si, mi ti dan tlangpi a si ko sisi tiah kanmah te’n kan hnem aw ṭheu. Zumtu pawl cu Pathian duh lo zawng thil a si ahcun kan kiangkap pawl in tuah vualvo khal hai sehla cumi lak ihsin rak tiar fihlim aw ding kan si sawn. Pathian cun kan kiangkap ih um dan, tidan in thu in ṭhen zik loih A thu vekin thu in ṭhen ding ti hi kan theih ringring  a ṭul. Midang khalih an tuah cio mi a sisi tiah thil ṭha lo hi a ngai zam lo ding. Kan kiangkap ih mi nun dan vekih a nung ve mai tu si lo in Noah bangin thil ṭha lo lak ihsin rak thiar fihlim aw tu kan si ding a thupi.

          - Na kiangkap ih zuk hmawm an tham ṭheh khal le tham ve hlah.

          - Hlawknak dingah mi in hrokhrawl an suah khal le rak si ve hlah.

          - Beer cu zo khalih in mi a sisi tiin rak in vet u si hlah.

          - Diklo takih miin sum an hawl khal le rak cawng ve hlah.

          - Mi in thuphan rel an poisat lo khal le thuphan rel ngaizam hlah.

          - Miin khawm an daithlan vio khalle daithlang ve hlah.

          - Neih awk hlahih nupa sinak hman cu tulai ti dan si lawm ti ve hlah.

          Kan kiangkap ih um dan vekih rakum ve ding hi Pathian ih duhmi a si lo. Amah ṭihzah teih nun hmangin mi ih an tuah vualvo mi a va si khal hmanah Pathian duh zawng a si lo ahcun hrial in rak  thiar fihlim aw sawn ding kan si.

Sikhalsehla nang cu Pathian minung na si ruangah himi pawl hi hrial aw. Dingnak, thianhlimnak, zumnak, duhdawtnak, tuartheinak le lungnemnak pawl nei dingah napi in zuam aw. 1 Tim. 6:11

2. Daniel : Siangpahang thu hnakin Pathian Thu thluntu

          Daniel hi ziang tlukih mifel a si timi cu kan thei ṭheh cio ko ding. A hnaṭuanpi pawlin an halhsiik ih phiar duh  ah a sualnak le palhnak  an hawl nan an hmu lo, mifel rin tlak a siih thil sual le zum tlak lo thil a tuah dah lo (Dan.6:4,5). Daniel nunnak ih cawn tlak zet pakhat cu mi fel zet siangpahrang khalih duh zetmi asinan Pathian thu thawn a kalh awmi thil ahcun siangpahrang thu khal a el ngam. Daniel bung khatnak ah: Siangpahrangin ei le in dingah zu le sa thawthaw a pe nan an ei lo, thlai hnah, thlairah a dil. Ziangah tile Pathian in sa hmuahhmuah ei a sianglo, sa ei thianglo tla a tel thei ruangah a el. Cun bung ruknak ah kan hmuh theimi cu thlathum sung cu siangpahrang hnen siar lo ah  thlacammi le ngenmi nei lo ding tiih thusuah a um hmanah Daniel cun Jerusalem lam hoi in thla a cam thotho. Ziangah tile “keimah  siar lo Pathain dang be hlah” timi thawn a kalh aw ban. Daniel hi mi zawnlung te, mi fel, siangpahrang ṭihzahtu si khalsehla Pathian thu thawn a kalh awmi a um  a si ahcun siangpahrang thusuak khal a pah vivo mai.

          Zumtu pawl kan nunnak hi Daniel nunnak lamzin kan zawh ve ding hi a thupi nasa. A hleice in tui kan san hi san sia a si tikah Pathian thu thawn a kaih aw lomi cozah daan hi a um rero. Baibal in cozah thu thlundingin in zirh ko nan Pathianthu thawn a kaih aw lomi cozah in daan a tuah a si ahcun Pathian thu sawn ih kan din ngam a thupi zet. Tahthimnak pakhat in rel sehla, tu ah ram ṭhenkhat ah neih bang aw ṭhitawknak hi cozah in a siang, asinan Pathian thu in a siang lo. Hi vek thil a um tikah cozah daan kan do kalh duh hrimhrim ruangah si loin Pathian thu thawn a kalh awk ruang sawn ah pah ngamtu kan si ding hi a thupi zet. Kum 2012 ah Jack Phillips cun neih bang ṭhi aw dingmi in sang tuah an fial nan Pathian thu thawn a kaih awk lo ruangah a tuah sak duh lo ih harsatnak tla a tong ti kan thei. Cun June 25,2015 ih USA Supreme Court in neih bang aw ṭhit awknak a sian ṭum khalah zumtu ṭha ziang maw zat cu hi thil ih ruangah an hnaṭuannak ihsin an cawl. Cozah cun siang khal sehla Pathian thu  sawn ah a ding. Zumtu pawl hrangah cun kan nunnak lam in hruaitu hrangah Baibal hnakih thupi sawn an um lo. Leitlun cozah lam thlirnak cun a dik a si hmanah Pathian thu thawn a kaih aw lomi cu hrial vivo in Pathian ṭihzahnak thawn ding uh si. Pathian thu ah harsatnak kan parah a thlen khal le kan Pathian dai te’n a um lo ding.

3. Job : Satan in siatsuah a duhmi

          Job thuanthu khal hi kan theih lar zetmi a si, mi ṭha zet a si ih Pathian khalin Job hi a fellonak ih rungah a mawh thluk lo, a theihnak a mal zia lang ter dingih thu tampi a sut men. Job ih rualpi pawl hnenah Pathian in Job in thudik a rel nan ni in nan rel lo ruangah Job hnenah ran hei keng uhla thawinak pe uh, cun Job in thla lo cam sak seh tiah  a ti. Job hin Satan thik tlak ih hna a ṭuan ruangah satan khalin Job siatsuah ding a duh. Cu ti cun Satan in Pathian ih siannak in Job parah thil rapthlak tak a tuah. A neihmi hmuahhmuah a cem ral ṭheh ih tlun ah amai taksa parah natsia nasa zet a thlen ter. Job ih nunnak kan zoh tikah Job in Pathian thlawsuah a dong menlawng silo in nasa takin a cangvai ti kan hmu thei.

Mi farah an au tikah a bawm,

Hngakṭah bawmtu nei lopawl a zoh hai,

Nuhmei pawl khal a tuamhlawm,

Mit caw pawl hrangah mit a si,

Ke awl pawl hrangah ke a si,

Farah zonzai hrangah pa a si. (Job.29:12-16)

Hi lo a dang khal a um lai ding. Satan pa hin Job siahsuah ding hi a duh tuk. Ziangruangah ti le Pathian in thlawsuah ih midang hrangah a ṭangkai tuk. Satan pai duhmi cu Pathian le mi dang hrangah ṭangkainak nei lo ih kan um ding hi a si.

Zumtu pawlin kan nunnak ih kan buai ṭheumi cu: thei tawk in Pathian kan rian ih a hna kan ṭuan rero, a ram hrangah peknak in, tha zang in, thlacamnakin, harsa bomnak in kan cangvai rero fawn si harsatnak kan par ih a thleng  thotho hi a si. Pathian cun a hrangih ṭuantupawl hnenah ui lo in mal a sawm ṭheu ti cu thudik a si. Hmansehla khatlam kan thei ṭulmi cu Pathian hrangih a hmang aw tamih piang satan in nasa takin a dodal ve. Satan cun kan nunnak ah harsatnak thlen terih Pathian hna ṭuan theilo ih kan um ding hi a duhmi a si. Curuangah Satan in kan nunah harsatnak a thlen lemlo a si ahcun Pathian hrang kan hmang aw lotuk ruangah tla a si thei. Pathian hna ṭuan lo in dai te’n kan um asile Satan  khal daite’n a um ve. Nasa zetih Pathian hna a ṭuantu Paul in “…. Satan in ka lamzin in kham ṭheu” tiah a ti (1 Thes.2:18). Curuangah Satan cun Pathian hrang cangvai thei lo  dingah ziang simaw hmangin in kham ṭheu. Curuangah Pathian hna na ṭuan rero cingin na nunnak ih harsatnak a thleng asile Satanpa in Pathian hrang cangvai theilo dingih a lo phet rero nak a si thei ti theiin, Pathian lamah thazang la sal in hnget takih din theitu na si theinak dingah thlacam aw. Harsatnakih ruangah Pathian na dungtun a si ahcun Satan pa cun “ka hlawhtling riai ee” tiah lungawi in a um ding.

Noah cu mi ṭhazet …. amah pakhat lawnglawng Pathian ih lungkimmi a si. Sem.6:9

Daniel cu mifel rintlakzet a si ih thilsual le zumtlak lo thil zianghman a tuah lo. Dan.6:4

Job, Amah cu miṭhazet a si ih thil ṭha lo zianghman tuah a duh lo. Job.1:1

Noah, Daniel le Job vek rori kan si thei lo hmanah an nunnak cio ihsin thazang kan la thei.Pathian hrangih ṭha hnem sin ih ṭuantu le rinum kan si theinak dingah Pathian in lo thlawsuah cio hramseh.