Nupi 4
YouTube 👉 https://bit.ly/3PJAywE
Vei khat ah sumdawng milian pakhat a rak um ih nupi pali a nei. A nupi pawl lakah a palinak hi a duhbik ih thuamhnaw ṭhaṭha thawn zoh mawi zetin a thuam ih a ṭha thei bikin a finkhawi.
A nupi pathumnak khal hi a duhdawt zetih a suang zet fawn, a rualpi pawl hnen khalah a hruai ṭheu. Asinan, cui a nupi in midang mipa hnenah a tlan san ding cu a phang zet.
A nupi pahnihnak khal a duhdawt ve ko. Anih hi mi ruat thei zet le thinsau zet a si vekin a pasal khalin a rinsan zet. Harsat buainak a ton tinte’n hi a nupi pahnihnak hnenah sim ringring ih a nupi pahnihnak khalin a harsatnak pawl a rak bawm ringring.
A nupi pakhatnak hi mi thupi zet ih an innsang neihnun lennak pawl hrangah mi ṭangkai bik a si. Hi a nupi palinak in a duhdawtzet nan a pasal cun a duhdawt ve lemlo ih a ngaihsak tuk lemlo.
Nikhat cu a dam lo ih bese zetin a tuar hnuah rei dam nawn lo in ka thi mai ding ti a thei aw. Cu tikah nun nuam zetih a rak um lai caan pawl ruat phah in “tu hi ka thi mai ding si khawh, tuih ka kiangih um, ka nupi pawl ka fehsan dingih keimah te in maw pialral ka kai ding” ti ruatin a thin a bang zet.
Cuti’n a nupi palinak cu a ko ih a hnenah “nang hi ka lo duh bikmi le ka lo zohṭhat bikmi na siih ka thih tikah i thlun pei maw?” tiah a sut. A nupi palinak cun “nai sai lo” a tiih ṭong bet nawn loin a fehsan. An nui’ thulehnak cun a thin namte sun bangin a nat ter.
A nupi pathumnak hnenah cun “ka lo duhdawtzet mi na siih, tu ah ka thi thlang ding, i thlun pei maw” tiah a sut ve. A nih khal in “ka lo thlun lo ding, nun hi a nuam ih na thih hnuah pasal dang ka run nei ding” tiah a let ve ih a thinnat a luar sinsin.
A nupi pahnihnak hnenah cun beiseinak sangpi thawn a sut sal ih “Nang hi harsatnak ka ton tinte’n ka lo sim tikah i bawm ringring tu na si. Tu ah na bomnak ka ṭul sal. Ka thi thlang dingih i thlun pei maw” tiah a ti. Cu tikah a nupi pahnihnak cun “Poi ka ti tuk, ka lo tlun thei lo ding. Ṭha te in thlanmual ah ka lo thlah ding, cucu na hrang ka tuah theimi a si” tiah a let. Amah bawm ringring tu bik hmanin cu ti men ih a let tikah milianpa cu a tha a nau sualso.
Cu tiih thanau zet ih a um laiah “keimah ka lo thlun ding, khui hmun na feh khalah ka lo thlun ding” timi aw a thei. A hun zoh tikah a nupi pakhatnak cu a kiangah ṭawl ṭenṭi te’n a din kha a hun hmu. Cutikah sumdawng mipian pa cu siarawknak lungthin thawn “ Ai law, ka dam laiah nangmah hi si nan maw ṭha bik ih ka rak lo zohṭhat dingmi diktak cu na si nan” tiah thinlung kekkuai in a hun ṭong suak.
Thungai te tiah cun kan zate in kan nunnak ah nupi pali kan nei cio.
a) Kan nupi palinak cu kan taksa hi a si. Kan dam laiah ziang tluk ṭha ih kan tuamhlawm ih kan sunsak khalle kan thih tikah zianghman ṭhat hnemnak a nei nawn lo.
b) Kan nupi pathumnak cu kan neih ro sum le pai an si. Kan thih tik ahcun midang hnenah in tlansan thluh sal ding.
c) Kan nupi pahnihnak cu kan sungkua pawl le kan ṭhianrual pawl an si. Kan dam laiah ziangtluk kan hrangih bawmtu ṭha an si khal le kan thih tikah cun thlan ah in thlah vialvo dingih cu lawng a si.
d) Kan nupi pakhatnak cu kan thlarau a si. Kan thlarau hi kumkhua hloral loih kan mah sinak neitu diktak neitu cu a si. Asinan kan thlahthlam bikmi le kan ngaihsak lo bikmi a rak si ṭheu.
Thubet
Kan nupi 2,3,4 nak pawl hi an thupi ve ṭheh ko. Asinan kan thupi bik cu kan thlarau hi a si. Jesuh in Lazarus le Milian pa ih thu a simmi ah, milian pa hluanin kumkhua hell meipi kan thlen hnu ih “a poi tuk aw” tiih kan sir awk lonak dingah kan thlarau hrang hi a thupi bikah ret in nun hmang thiam uh si.
(Note: Siarnuam dingin a remcang dan in letmi a si)
Ca laknak hram: English Stories (Mobile App)
No comments:
Post a Comment