Pathian in Na Buainak A Cingfel Thei - Kalauk 17 le fapa 3

          Khua hlan laiah putar pakhat cu a pafa pathum thawn nelrawn ramcar kiang ih khua pakhat ah khua an sa. Cui putar cun kalauk 17 a nei ih cucu a sumpai lakluhnak bik a si. Cui a kalauk pawl cu ramcar ih thil phurhnak ah a hmanter ṭheu. Nikhat cu putar pa cu  a thi ih  a neihmipawl kha a fapa 3 pawl ih an zemawk dan ding ih a duh dan cu ca in a tan ta.

          Putar pa cu vui a siih tuah ṭulmi pawl tuah ṭheh a si hnuah a fapa pathum cun an pa ih ca a tantami cu an siar. Putar pa cun a neihmipawl cu ṭhentum ah ṭhen in hi bangtukin a zem hai. Upa pa bik in a neihmi kalauk 17 ihsin a hrekkhat a co ding. Fa lai in 17 sungin ṭhenthum ih ṭheh khat a co ding. Nauta bik in 17 sungin ṭhen 9 ih ṭhen khat  a co ding tiin a zem hai. Kalauk 17 cu ṭhen hnih siseh, ṭhen 3 ah siseh, ṭhen 9 ah siseh ṭhen theih a si lo tikah a zem awk dan dingah an buai zet. Ziang tiin kan tuah ding tiin khat le khat sut aw ih an khuaruah a har zet. Ziang tiin kan ṭhen aw pei ti ruat in ni tampi an hmang nain zo hman in a ti dan ding an ruatsuak thei lo.

          A netnak ah an thuhla cu an khua ih mifim pakhat hnenah feh in an va sim. Cui mifim pa cun an thuhla a theih tikah ziang tiih tuah ding a si ti a thei. Cutikah an kalauk 17 cu a hnenih rak hruai dingin a sim hai. Kalauk 17 cu an rak hruai ih mifim pa cun amai neihmi kalauk pakhat  a rak bet ih kalauk cu 18 ah an cang.

          Mifim pa cun upa bik cu ca a siar terih a pai duhnak vekin kalauk cu a hrek khat la dingin a fial ih upa bik cun kalauk 18 sung ihsin hrekkhat a lak tikah kalauk 9 a co.

           Cun fa lailak cu ca a siar ter ve ih a nih in a co dingmi cu a pai neihmi ṭhen 3 ih ṭheh khat a si. Fa lailak cun ṭhenthum ih ṭhenkhat (6+6+6=18) a la ve ih kalauk 6 a co. Upa bik in 9 a co ih fa lailak in 6 a co ih a zate kom cu 15 a si.

          Cuvekin nautabik khal in a pai neihmi ṭhen kua ih ṭhenkhat co ve ding a si vekin ṭhen kua ih ṭhenkhat (2+2+2+2+2+2+2+2+2=18) a lak tikah anih in kalauk 2 a co. Cutikah an co zat cu upabik in 9, falaiak in 6, nautabik in 2 a zate kom 17 cekci a si. Cutikah kalauk pakhat a hleimi cu a thawhtu mifim pa in a lakir sal. Cu tiin an pa ih neihmi kalauk cu ṭha te’n an zem aw thei.

          Mifim pa in a kalauk pakhat a rak thawh venak hmangin hi thu harsat zet hi awl ai zet in a rak cin fel sak a si.

           Hi thu ihsin an zir theimi cu harsat, buainak pawl hi a cinfel dan lamzin a um ṭheh. Pathian in tu ih na buainak hi olai zet in a lo cinfalsak thei. Bawipai’ hnenah na harsatnak thlen awla Anih ih a lo cinfel sak ding.

Hi thu hi English Stories andriod app sungih ta a remcan danih let in ngansuahmi a si.