Mi Thluasuak

Baibal sungah hin mi thluasuak timi hi hmuh ding a tam nasa. Thukam hlunkhalah tampi kan hmu thi ih Thukam thar khalah tampi kan hmu thei, Jesuh khalin tlangpar thuzirhnak khalah tampi a sim. Mi thluasuakkan timi hi zopawl an si pei? Sumpai tampi nei pawl, innṭha lo ṭha nei pawl, fanau nei tam pawl, fimthiamnak lam ih hlawhtling zet pawl, hnaṭuan ṭha ngah pawl …tvp an si men thei. Cuangkhal cu an si ko ee. Asinan Baibal kan zoh tikah hi vekih leidanih dinhmun ṭha a ngahmi pawl lawng hi mi thluasuak a timi a si lo. Baibal in mi thluasuak a timi ṭhenkhat pawl vun tarlang vivo sehla.

1.     Sualmawhnak ngaithiam a si mi (Sam.32:1)

A mawhnak ngaithiam a si mi le, A sualnak thlahsak a si mi cu mi thlawsuak a si.

Jesuh Khrih thisen ruangah na sualnak ngaithiam a si hi mi thluasuak ka si tiah an ruat aw dah maw? Ziang dang hmuahhmuah hnakin Pathian in in ngaithiamnak hi mi thluasuak kan si hleice nak a si. Leitlun sum le pai, innṭha lo ṭha kan neih mi pawl hi an sunglawi tuk ko nan re lo te hrangah lawng an si. Pathian ih in ngaithiamnak hi cu kumkhua tlaitluan ih kan nomnak ding bik a si. Farasi pawl vekih mifel hi si lawm Pathian in mi thluasuak ti sehla awm nan, an nih pawl hnakin misual ngaithiammi pawl hi mi thluasuak a ti sawn hi ziangtluk in a sunglawi. Ngaithiam nak timi hi ṭonghram ih a sawnmi pawl cu ‘lak hlo, hlapi ah thiar, phurrit laksak’ tinak a si. Sam.103:12 ah” nisuahnak cu ni tlaknak ihisn a hlat zet bangin, kan sualnak pawl cu kan hnenihsin hlat zetah a ret a si” timi kan hmu thei. Sualnak ka nei lo ti theitu cu zohman kan umlo ding. Asinan na sualnak in Vanram luhnak a lo dal nawn lo, Haleluiah. Ziangahtile Jesuh Khrih ih thinsen in na sualmawhnak hmuahhmuah a kholh fai ṭheh zo. Na sual ngaidamnak dingah sumpai na cem a ṭul lo, rannung na thah a ṭul lo, ziangsi maw na tuah bet a ṭul lo. ziang si maw tal na tuah lo le Pathian in a lo ngaidam lo ding vekih na ruahnak kha bumnak men a si. Na sual ngaithiamnak dignah Jesuh Khrih ih thisen hi a tawk, pathian in thil dang a beisei bet nawn lo. Ngaithiam mi na hi hi mi thluasuak ngaingai na si.

Saam 32 a hnuailam kan siar vivo a si ahcun David in Pathian hnenah sual a phuannak le Pathian in a ngaidamnak thu kan hmu thei. Vanramkankainak ding dal tu kan sual mawhnak hi cu khrih thisen in a kholfai ṭheh zo. Cumi tlun ah zumtu inkan theih ṭukmi cu zumtu kan si hnuih kan tuahsualnak pawl hi Pathian hnenah thlen in ngaithiam kan dil a ṭul. Pathian hnenah sual phuangin ngaithiam kan dil a si ahcun kan Pathian cu ngaithiam theitu Pathian  a si.

2.     Pathian in nun dan a zirhmi pawl (Sam.94:12)

Maw Bawipa, nangmah ih nun na zirh mi le, Na daan na zirhmi pawl cu mi thlawsuak an si.

Zumtu kan si tikah nun dan ding hi kan mah te’n kan thiam mai lo. A caan ah kan bah, Pathian duh lo zawngin kan nung, zin dik loih kan feh caan a um ṭheu. Nauhak khal feh dan ding kan zirh, kan sim, kan kaihhruai ṭheu. Tahṭhimnak ah nauhakhian feh thei hnuah stepih feh dan, zin nalih feh dan, hmun suk le hmun so ih feh dan, lungkhol lakih feh dan kan zirh ṭheu. Cubangin zumtukhal kan zumtu nunnak ih kan fehdan ding hi zirh le kaihhruai kan ṭul. Nun dan zirh timi ah hin nunsinak khal a tel. A caancaan ahcun kannundan a dik lo tikah kan nun zirhnak dingah Pathianin in hrem, in vua ṭheu. Cu vek kan ton tikah ning hang ding kan si lo, Bawipai’ nun zirhmi ka si hi ziangtluk mi thluasuak ka si ti aw sawn ding kan si. Ziangah tile Pathian fate kan sinak langtertu a si ve (Heb.12:7).  Pathian in nun dan in zirhnak a hrampi bik cu Baibal a siih cui tlun ah nunsimnak, hremnak khal a si.

3.     Hniksak harsatnak a tuar theitu (Jeim 1:12)

Hniksak harsatnak a tuar ih hngette ih a ding theitu cu mi thlawsuak a si.

Jeim 1:12 thu hi Baibal pakhat le pakhat a bang aw lo ih a ṭhen ah cun ‘sual forh’ timi ṭongfang a hmang ih a ṭhenah ‘hniksak’ timi ṭongfang a hmang. Hniksak le sual forh hi cu a thu a dang aw lellel fawn. Hniksak timi hi cu kan zumnak a ngai maw ngai lo, tluasuah pek tlak a si maw silo ti vekin Pathian in in hniksak ṭheu. Hniksaknak cu sual dingih hniksak a si cuanglo nan kan neh lo a siahcun sualnak ah kan hmang thei. Sual forh hi cu sual dingin thlemnak, thil ṭha lo tuah dingih forh awk hi a si. Pathian in mi a hniksak ṭheu ih Satan in sual mi a forh, mi a thlem  ṭheu. Greek ahcun ‘peirasmos’ timi ṭongfang a hmangih sual forh khal a si theiih hniksak khal a si thei ruangah a thu hnih ih kan huap te mai sehla. A thu a bang aw ti lam sisawn loin hniksaknak khal, sual forhnak khal a nehtu hi mi thluasuak an si ti duhnak sawn a si.

Pathian cun a cancan ah a mi pawl a hniksak ṭheu.  A mipawl hniksaknak dingah harsatnak si maw, ziangziang si maw a hmang ṭheu. Cui hniksaknak a tuar theitu pawl hi Pathian thu in mi thluasuak a timi pawl cu an si. Pathian ih hniksaknak tong hmaisa bik hi Abraham a si. Pathian in ziangvekin a hniksak tile a fapa neihsun kha meiur thawinak in pe dingin a ti. Abraham in Pathian ih hniksak cu a tuar thei vekin Pathian ih thluasuah tampia  ding ti kan hmu thei. Pathian in thlausuah petu maw ka thluasuahmi so an duh sawn tiah kannih khal hniksak kan ton caan a um ve ding.

 Zumtu pawl hi kan nun a can aw cio lo nasa. Curuangah thluasuahnak pe sehla i phat san pei maw tiih hniksak khal kan ṭul ih khatlam ah thluaka suah ih a lungawi zet si kawh ka pekmi laksakin harsatnak tuar ther sehla i dungtun pei maw tiih hniksak khal kan ṭul. Pathian in harsatnak hmangin mi a hniksak thu kan hmu thei (Dan.8:16). Cun David san laiah biakinn saknak ding peknak thu hmangin Pathian in mi thinlung a hniksak (1San.29:17; Thuf.17:3). Biakinn saknak dingin Israelpawl in an pek tikah lungawi tein an pe. Pathian hnenih kan pek tikah thinlung tluangtlam te’n kan pe maw ti thla hi a thupi zet. Pek lo mawi lo, mi the an pek si, a hminte tal in ti vekmen in Pathiana hnenah thil kan pe pang a si ahcun hniksaknak ah kan hlawhsam tinak a si.

Job in nunnak kan zoh tikah Pathian in Satan hmangin Job a hniksaknak rapthlak taktak kan hmu thei. Cui hniksaknakpawl cu Job in a pal tlang thei tikah thluasuah a let hnih in a ngah a si kha. Cun thlemnaklamkan zoh asile Josef in thlemnak nasa zet a tong ve ih a tuar thei vekin Pathian thluasuah ziangtluk a dong ti kan hmu thei. Pathian in mi a hniksak tikah umzia neilo in mi a hniksak dah lo.

Zumtu cio in kan nunnak ah hnisaknak kan ton caan a um ṭheu ding. Cui hniksaknak kan tonmi cu a bang aw cio lo dingih, bulpak nunnah hniksaknak phun dangdang khal a thleng ṭheu ding. Ziangvek hniksaknak a si hmanah hniksaknak a tuar theitu cu mi thluasuak an si. Jeim 1:12 sungah cun cu vek ih hniksaknak a nehtupawl cu ‘nunnak sui lukhuh’ a ngah ding tiah a ti.

4.     Mifarah Zawnruattu (Sam.41:1)

Mi farah pawl zawnruattu cu mi thlawsuak an si,

Pathian hi ziang tik laiah caan khalah mi farah thlauthla dah lo, ngaihsak ringirng tu a si. Sam.68:5,6 sungah Pathian in mi nauta a thlauthlak lo zia kan hmu thei, Pathian, a Biakinn thianghlim sungih a umtu cun, Nu le pa nei lo farah zawn a ruatih nuhmei pawl a hum a si. Inn nei lo lungleng vakvai pawl umnak innsaang a pek. Bawipa cua sangbik ah a um nain minauta pawl ih zawn a ruat (Sam.138:6). Cuvek in farah pawl zawn ruattu cu Pathianin a theih hngilh ve lo. Mi farah hmuahhmuah in zawn cu kan va ruat thluh thei lo ding nan,kan ban tawk,kan bawm thei ding aw,kan kiangkap, kan thlennak ih a um mipawl ih zawn hi kan ruat maw? Minung hi kan mah in bawn theitu dingihkan ruahmi pawl bom hi cu a awl zet nan in bawm thei sal lotu ding va bom hi cu kan harsat ṭheu. Kan Baibal cun mi farah pawl in zawn ruattu hi mi thluasauak a timi cazin aha telh ve mi a si. Ziangtin a ti, Mi fara ih zawn a ruattu cu an hasat caan ah Bawipa in a bawm ding tiah a ti. Mi farah, nangmah lo bawm sal thei dingih na ruah lomi va bawm aw,ka sung tiah ruat aw hlah, na ṭul caan te ah bawipa in a lo bawm ve ding. Pathian in in siar sak ṭheh a si.

5.     Pathian ruangih hremnak a tuartu pawl (Matt.5:11)

“Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si.

Pathian ruangih hremnaka tuartu pawl in thuhla kan thei ṭheu. Rapthlak taktak ih an hremnak tla kan hmu ṭheu. Cuang pawl cu mi thluasuak an va si ve kan ti thei dah maw? Cun kan mah the Khrih ruangah harsat kan ton caan ahhin mi thluasuak ka va si ve kan ti aw thei maw? Bawipai ruangih sunloihnak le cawimawinak dong hi cun Pathian a ṭha, thlasuah kan dong ti hi a nuamina awl nasa. Cu lawng cu Pathian in mi thluasuak a timi a si lo. Bawipai ruangih hremnak, hmuhsuamnak, thuphah a phunphun puhnak kan ton tikah ziangmi thinlung kan nei ṭheu? Cubang tuka tuartu pawl cu Pathian thu in mi thluasuak a timi pawl an si. Ziangahtile an hrangah tuarmantamtak vancung ah retsak a si. Pathian tuangih kan tuar hi cu reilo te a sinan kan hrangih retmi tuarman hi cu kumkhaw hrang a si ve thung. Bawipai’ ruangih kan tuar tikah dungsip mai kan duh maw? A hnaṭuan hi bansanmai kan duh maw? Bwipa in a hmin ruangih kan par ih thil a thlengmi hi in hminsin sak ṭheh, kan tuar lakmi hi pakhat hmana um lo ding. Curuangah a hna kan ṭunnak ih harsatnak kantontikah mi thluasuak, vanram ah tuarman co ding neitu ka si ti thei uh si.

Mi thluasuak timi pawl kantarlang ih kan tarlang lomi khal tampia um lai. Zumtu kan nunnak ah mi thluasuak kan si nak le, mi thluaksuak si vivo thei dingin kan nun hman a ṭul. A hleice in zumtu nun ahhin a ziang zawn talah mi thluasuak kan si thei ve ding hi a thupi zet. A nuam, a ṭha, a hlawklam lawng hi mi thluaksuak sinak a si loih mi thluasuak sinak ah harsatnak lam khal a tel ve.