Pathian Thu Thlun Ṭhatnak Rah (Luk.11:28)

         Baibal kan siar tikah Pathian thu tlun ih a rahsuah le thlun lo ih rah suah pawl hi  Semtirnak ihsin Thuphuan tiang ah kan hmu thei. A hleice in Thukam hlun kan siar tikahhmuh ding a tam cuang. Pathian thu a thluntu pawl nun ah Pathian ih thilṭha tampi a pek vekin a thu thlun lotu pawl  khal Pathian in a zohliam men lo. Zumtu tampi nunnak kan zoh tikah Pathian duhtu cu kan tamzet nain a thu ngaina le a thu thlun ngetngotu hi cu zumtu kan tam ruah in kan tam lemlo nasa. Pathian ih lungawinak le thinhengnak hi a thu kan thlun le thlun lo ah tampi a ṭhum aw. Zumtu kan nunnak ah ih a thupi bik tuk mi cu  Pathian thu thlun a si. Thla kan cam tikah a thu thawn mil aw ih kan cam a ṭul, a thu thawn a mil awk lo cun Farasi pawl thlacam ih lungawi cuanglo Pathian a si. Thil kan pek tikah a thu thawn mil aw ih kan pek a ṭul, a thu thawn mil lo ih pekmi ah Pathian a lungawi cuang lo. Thil ziangkim ah Pathian in tahfung ih a hmanmi cu a mai thu  hi a si. Thla ka cam si ti men theih a si lo, a thu vekin thla kan cam maw? Ka pek si ti men a ngah lo a thu vekin ka pe maw ti zoh a ṭul.

1. Pathian thu thlun

Pathian thu thlun timi hi ziang a si? Pathian thu thlun timi cu hmur kaa lawngih aw, si ee, aw le ti men a si lo. Pathian thu thlun cu tuahnak thawn kan nun ih lang dingmi a si. Matt.21:28-32 ah Jesuh in tahṭhimthu a sim mi ah ‘ pa pakhat in a fapa upa sawn hnenah sabit hmuah ah va feh aw la hna va ṭuan aw a ti tikah ka duh lo tikah a el nan, a sir aw ih a feh sak. Cun a fapa nauta sawn hnenah sabit hmuanah va feh aw a tiih “Elaw” a ti nan a feh cuang lo. A el nan a fehtu sawn kha thulungtu cu a si. Jesuh khal thulung a sinak cu Pa ih fialmi a tuah thluhnak kha a si. Pathian thu thlun in a langtermi cu thu neitu hnenih pekluh awknak a si, kan thu hnakin amai thu thupi sawn ih ruah a si. Mah lam cu tan aw tahrat ih amai thu ih pek awk hi thu thlun cu a si.

2. Pathian thu kan thlunnak ding san

Ziangruangah Pathian thu kan thlun ding ti asile thuneihtu bik hi amah a si ruangah a si. Lei dan ih thuneitu pawl ih thu hman kan thlun a si ahcun lei le va ih thuneitu bik ih thu cu ziangtluk ih thlun sinsin ding kan si. Tulai kan leitlun nundan kan zoh tikah ‘mai thuthu te sawh’ ti nun hi a sang nasa. Mai thuthu te sawn kan ti sung ahcun Pathian thu in  kanmah ah lalnak a co lo nasa tiknak a si. Kan Pathian hi amai thu leng ihsin ti lungawi theih a si lo ti khal hi zumtu pawl in kan theih a ṭul nasa.

Pathian in a thu thlun dingih in ti tikah thlun enmen ding hi in duhsakmi a si lo. A thluntu pawl parah thlunman Pathian in a pe ringring. Curuangah Pathian thu kan thlun tikah kan thlun lam men lamlam lo, a thuthluntu pawl Pathain in ziang tik hmanah a thlahthlam dah lo. A thu thlunlotu hnakin a thuthluntu pawl parah Pathian ih thluasuah cu a nasa ngaingai. Thlun man um lo cu si sehla Pathian thu kan thlun lo hmanah dem awk lo khalle a zia um deuh dingah ruat sehla, thlun lak men siloin thlun man Pathian in pe rori cingih kan thlun lo a si ahcun kan mai mawh rori a si.

3. Pathian thu thlun ih a rahsuahmi pawl

Pathian thu thlunnak ih a rahsuah hi rel thluh ding sehla rel ding a tam zet ding. Tampi sung ihsin kan hmuh theimi ṭhenkhat pawl tar lang vivo sehla.

(a) Hlawhtlinnak a si. (Luk.5:1-7)

Piter ih sur sep thuhla hi kan thei zet cio vekin, Piter le a rualpi pawl cu zanvar ten sur an sep nan pakhat te hman kai lo in khua an vang. An sur khal an kholh rero zo, ngai kaih ding hi cu beisei ding a um nawn lo lawlaw tinak a si. Zanvar sur sep tahrat ih an hlawhsam hnuah Jesuh in Piter cu ti thuknak lamih a sur sep dingin a fial. Jesuh ih fial vekin an sep tikah nga tampi an awk ngah. Hi ṭum ah Piter in Jesuh thu thlun loin sur sep lo sehla an hlawhsam lanta der ding. Zumtu pawl hna kan ṭuan rero ih hlawhtlinnak cu Bawipa ta a si ti kan sim ṭheu nan hlawhtlinnak ngah dingin a thuthlun hicu kan huam ṭheu lo. Minung zuamnak in teima takih ṭuan cing in kan hlawhsam zo nak ah Pathian thu thlunnak in hlawhtlinnak kan hmu thei lehsal timi Piter ih nunram ihsin fiangtakin kan thei thei.

(b)  Damnak a si. 2 Siang. 5:9-14

Naaman hi ralbawi hmin thang zet a siih siangpahrang khalih uar zetmi a si. Asinan pharnat tuar ngelcel khaw a nunnak cu a zinfe nawn ding. An hnenum nute ih ruangah a damnak theinak ding thuhla theiin profet Elisha hnenah a va feh. Elisha hnen a va thlen tikah a nih cun Jodan tiva ih hnim aw dingin a rak fial, Naaman in a beisei dan thawn a kaih aw lo tukih thinheng in kir a tum. Asinan a hnenum pawl in an hei naih ih profet in “thil harsa tuah ding a lo fial si lo, ziangah saw Jordan tiva ahcun na hnim awk mai lo” ti hai khaw Jordan tiva ahcun a va hnim aw ih a phaarnat a dam viarviar. Pathian in kan tuah ṭul riai lo khalin damnak in pe thei tuk ko, copcilh rori ih a ti dammi khal tampi an um ko. Asinan cu vek lawngin mi a dam ter lo, a thu thlunnak khalin damnakmi a pe ṭheu.

(c)   Thluasuah donnak a si. (Sem.22:18)

Abraham ih thuanthu kan hmuhnak hmaisa bik cu Sem.12 ah a si. A thuanthu  a lang thoknak ah Pathian thu thlunnak in a thok cih hngal. Zumbakih ka pa a si vekin Pathian thuthlunnak lam khalah kan zohthim ding mi a si ve. Sem.12:4 nakah “Abram cu kum 75 a ti tikah, Bawipa ih fial vekin Harankhua cun a suak.” A tik tikah Pathain fial vekih a tuahnak kha pathian thu a thlunnak langtertu a si. Cun Sem.22:17-18 kan siar tikah Pathian in “Na tesinfa pawl cu ka karhzaiter ding ih vanih arsi zat in le tifinriat vunnel zat in an tam ding a si. Na tesinfa pawl in an ral pawl cu an neh thluh ding. Cun annih ka thlawsuah bangtuk in leilung tlunih miphun kip in thlawsuah in dil ding. Hi thil hmuahhmuah cu keimah ih thu na ngai ruangah a si,” tiah a ti.

(d) Nehnak a um. (Joshua 6)

Jerikho khua hi thuah hnih rori in hnget zet ih kulh mi a si. Minung cahnak men cun ti siat ding ci rual a rak si lo. Asinan Israel pawl in hi tluk ih a hngetmi  khua an lak tikah hi khua kulh ti cimnak dingah hriamhrei an hmang lo. An khua kulh cimnak cu Pathian thu an thlunnak a si. ni khat ah vei khat an hel ih ni sarih nakah vei sarih an hel ih tawtawrawt an tum ihmipi an au tikah minung cahnak ih cim ter rual lo cu Bawipai’ kut cak in a cim ter. Pathian in a thu an thlunnak ah a kutcak a lang ter ṭheu.

Kan ram zumtu nunnak zoh tikah hmurkaa cun Bawipa, Bawipa ti rero si a thuthlun si lo zumtu tiaw hi mi ziangzat meng kan um pei? Jesuh in a ti mi cu “Ziangah so ‘Bawipa, Bawipa,’ tiah in ti ih ka lo sim mi cu nan tuah fawn lo?” (Luk.6:46) ti hi a si. Kan hmurkaa ih Bawipa titu si lo in kannunnak ih Bawipa titu kan si ding hi a thupi nasa. Lei dan khalah thusim tikah ‘si ee,si ee’ mi ti rero si simmi vekih um cuanglo minung pawl hi huat thla la bik pawl an si. Kan Pathian khalin amai thu hlun hi a duh biktu Pathian a si. Samuel in siangpahrang Saul thu a sim tikah “thawinak hnakin pathian cun a thu thlun a duh sawn” tiah a ti. Pathian thu thluntu ding kan siih a thu thlunnak ah thluasuah a um ti thei in a thu thlunnak ah kan nun ṭhanglian vivo hramseh.