Na Sunlawizia ( How Great Thou Art) timi hla thuanthu

Na Sunlawizia timi hla hi Khristian Hlabu No.41 nak ih um a siih zumtu pawlin kan sak duhzetmi hla a si. Hi hla hi Sweedish Pastor. Rev. Carl Gustov Boberg (1859-1940) ih phuahmi a si.  Amah hi Sweeden cozah ah kum hleinga lai Senator a rak si dah hngehnge. Hi hla a phuah dan hi ngainuam taka si. Veikhat cu Kronoback khua ih khawmnak ah a tel ve ih khawm an ṭiak tikah a rualpi pawl thawn an khua Monstera pan in an tlung. Cu tiih lamzin ih an feh rero laiah khua a ri, thli a hrang, nimthla a kau, ṭeek a tla ih ruah a rung sur serso. Asinan reilo teah nimthlakau le thilhrang cu an reh sal, inn a thlen tikah tukverh ongin khua a hun thlir tikah an khua ih thinghnah pawl le a hmuhmi pawl cu ni in a tlet hai ih  an tle sersi  ih an mawi zet, cun vate pawlih ai mawi taktak cua thei. Pathian ih kutneh mawi taktak a hmuh tikah Pathian hnenah lungawi thu simin khuk bil in thla a cam ih cutin hi hla mawitak hi 1885 ah a phuah suak a si. Hi hla hi a thoklam ahcun cang kua lai ih sau a rak si. A thu (poem) hi March ni 13, 1886 khan Monsteras News ah tlangzam a si. Hi hla thu hi April 16, 1891 ah Sanningswittnes ( The witness for the truth) ah ti suah a si. HI hla phuahtu hi hnangam takih cawl lan dingah kum 92 mi a si ah hi lei a suah san.

           Hi hla phuahtu in Pathian hi a sersiammi ihisn a phuansuah awknak thu in a thok ih a Fapa Jesuh Khrih ih a puansuah awknak le Lei hringmi pawl rundingah Thinglamtah parih a thihnak thu thuk le maksak a phuang. Pathian ropit zia famkim zetih ka hmuh ding caan thlirnakin a thu a khar.

          Hi hla hi German ṭong ihlet a siih Wei bist Du ti in thulu tar a si. Cui hnu kum nga hrawng a liam tikah Rev. Ivan S. Prokanoff in German ṭong ihsin Russia ṭong in a let sawng ve.  Swedish hla ‘O Store Gud’ timi ihisn mirang ṭong ih lettu hi mirang missionary Rev. Stuart K. Hine (1899) a si. Kum 1933 ahkhan Ukrain ah missionary hna ṭuan in ‘O Store Gud’ timi hla cu Russian ṭongin Ukraine mipawl ih an sakmi kha a thei. A thoklam ahcun mirang ṭongih let dunak thinlung a nei cuang lo. Len hnuah tumcianak khal um cuang lo in Russia tlang rammawitak, Capathian tlang an timi ihsin hi hla hi mirang ṭongin cang thum tiang hi mawi tak le ṭha takin an nupa in an let. 1939 ih doawknak ruangah lo theih lo in an ramih tlun a  ṭul, curuangah a cang linak hi England iha tlun hnu, doawknak a reh hnu lawngah an let sal.

1951, Long Island hmun ih stony Brook Bible Conference anneih ṭumah James Caldwell in a sak ih cucu America mipi in an theih thoknak a si. Cun Billy Graham Evangelistic team in London Crusade, Harringay Arena ih anneih ṭumah hi hla hi George Beverly shea le Cliff Barrows in thiam takin an sak ih cuicin cun hi hla hi leitlun pumpi ih theih ah a cang ta riai. Hi an crusade ṭum ah hin vei 99 an sak tiin George Beverly Shea cun a sim.

Laknak : Luaha rentlei,V.L.Kristian Hlabu, Hla le A phuahtute Bihchianna, pp 66-68