Aquila le Prisilla Ih Nun

          Aquila le Prisilla hi nupa an siih Baibal ah a hmin a lang ve phahphah, asinan an thuanthu cu tam a lang lemlo. An thuanthu lang sun te kan zoh tikah an nun hi a mawi in uar an um zet. Pathian zumtu le Pathian hrangah thei tawk ih a hmangaw ve mi an si. Baibal sungah bulpak ih Pathian hrangih hmang aw cu rel ding an tam zet nan nupa rori, a kop ih Pathian hrangih hmang aw hi hmun ding a tam lo. An thuanthu kanhmuh thei sun ihsin thazang la tlang sehla.

1. Harnak sungih Pathian rian

          Apuila le Prisilla tei nupa hi  Italy ih um an si, asinan Rom siangpahrang Klaudius ih Judah mi hmuahhmuah Rom khua ihsin a dawi tlan ṭheh ruangah Korin khua ah an ra thlan (Tirh.18:1-2). Khristian an si ruangah harsatnak tong thei ringring dinhmun ih ding an siih ruangah hmun dangdang ah an ṭhawn aw ṭheu. Cuvekih an ṭhawn awk tikah an thlennak ih piangah Pathian hnaṭuan in Thuthangṭha darhzai tertu ah an ṭang (Rom.16:3). Korin khua ihsin Paul a poksal tik khalah Efesa khua tiang an feh tlang (Tirh.18:19). An maipum cawmnak  ah taimak suah in hna ṭuan phah in thei tawk in Pathian hna  an ṭuan. Paun thlam tuah ih pum cawm aw an siih Paul khal anmah vekin puanthlam tuan in pum a cawm aw ve (Tirh.18:3).

          Aquila le Prisilla tei pahnih ih thuhla  a lang hmaisabik nak hi Tirh.18 nak a siih, an thuhla a lang hmaisa biknak ah raltlan an si thu in a thok. Asinan raltlan men kan si  aw tiin dai ten an um men lo, an ral tlannak hmunkhalah Pathian rian ih na an ṭuan. An parih harsatnak rung thlengmi kha Pathian rennak rem cang ah an hmang. Zumtu pawl kan nunnak ah harsatnak kan ton ve cio ko ding. Kan parah ziang harnak  a tleng timi hi a thupi bik lo, kan parih thil thlengmi hi ziang tin kan hmang, ziang kan tuah ti a thupi sawn. Aquila tei nupa in an parih harsatnak thleng hi Pathian naihnak ah le Pathian rennak ih an hman bang tukin kan parih thleng harsatnak hi thilṭha ruahsuah ternak ih kan hman thiam a poimawh.

2. Midang hrang an nunnak an hlan ngam

          Paul hi Aquila tei nupa hnen ih um a si vekin an thuhla hi a thei fiang zet dingah zum a um. Paul ih ṭongkam kan hmuh theimi cu “Annih cu ka hrangih thih a ngamtu an si” tiah a ti (Rom.16:4). Pathian thu ih rungah Paul thawn hmunkhatih rak umtlang ṭheu an siih a ṭan khal an ṭan. Paul hrangih thih a ngamnak hi ziang thu ah a si ti cu fiang te’n a lang lo nan ziang zawn ah si maw harsatnak a tonnak ah an rak ṭan zet ding ti cu theih a theih. Hi te nupa in Paul hi an ṭan men a siloih Pathian hna a ṭuannak ah theitawkina  bawmtu an si.

          Pathian kan duhdawtnak le kan ṭannak zia a langsuahnak ding pakhat ih a tel vemi cu a mi pawl kan duhdawt le kan ṭannak in a si. Ṭan kan ti tikah a sual mawhnak lam khalih va ṭan lam siloin Pathain ih rungih harsatnak an tonnak ih va ṭan ngam lam sawn a si. Prisilla tei innsang hi duh an nung zet, Pathian mi pawl ṭan ih thei tawk ih ṭanpitu an si. Innsang zawngin thlir sehla, kan nih innsang teh Pathian mi pawl ngaina ih ṭantu maw kan si, asilole ziang ih siar lemlo tu sawn kan si? Kan mah in Pathian hna kan ṭuanmi tlunah midang thawn Pathian hna ṭuan tlang theitu si tla hi a thupi ngaingai.

3. Kawhhran ngaina mi an si.

          Aquila le Prisilla tei nupa in Kawhhran an ngaina ti a langnak cu an inn hi Kawhhran pawl khawmawknak ah an hmang (1 Kor.16:19; Rom.16:5). An san laiah tu lai vekin Zumtu pawl in biakinn an nei hrih lo, a san cu zumtu um thok pekte a si ih hremnak kar lakih um an si vekin biakinn nei thei dinhmun an si hrih lo ruangah inn ah an khawm aw. An san lai ah zumtupawl lungkua sungih an khawm awk ṭheu kan theih ṭheh kha. Zumtu pawl tonkhawm awknak ding hrangah an inn hi kau pi’n an ong. Paul in Korin kawhhran pawl ca a kuat tikah Aquila le Prisilla in cibai an buk ve thu a ngan, kawhhran an ngainat zia lang tertu a si.

          Tulai kan san kan zoh tikah biakinn can aiih inn hmang hi kan um phah lai nan malte lawng kan si thlang. Khawmawknak dingah biakinn kan nei ṭhepṭhep. Aquila tei nupa cun anmai inn rori hi Kawhhran khawmawknak dingah siang takin an ong. Tu lai ahcun kan inn kan on lo cu rel lo biakinn ih kan mah va khawm hman huam nawnlo zumtu kan va tam thlang ve. Pathian Kawhhran ngaina mi kan si zia langnak kanmah ah hmuh ding a um ve maw ti cek aw cio uh si. Pathian Kawhhran hrangah ziangtal cangvaihnak kan nei ve maw? Hi te nupa cu Kawhhran ah an va khawm ti men a silo Kawhhran khawmawknak ah an inn an hmang, a va sunglawi em! Pathian Kawhhran ah peknak in, thlacamnak in, ṭuannak tivekin kan cangvai thei lo a va sihmanah Pathian thangṭhat khawmnak talah cang thei tawk in tel uh si.

4. Midang Zirhtu an si.

          Aquila le Prisilla hi dungthluntu pawl vekih Pathian thuthangṭha au suahpitu mi langsar an si lo nan anmah le tawk zawn in midang an sim in an zirh ve (Tirh.18:26). Prisila hi Pathian thu khal midang sim sawng thei dingin a thei tihi a fiangih uar a um zet. Pathian thu sim le zirh hi saya ih kan ruahmi pawl lawngih sim le zirh dingih ret ding a si lo. Cun biakiin pulpit le mipi ton khawmawknak hmun lawng hi zirh awknak ding a si lo. Zumtu kan nunnak ih thil thupi zetmi cu kan zumtupi, kan rualpi in Pathian thu ih aihalnak an neih ṭheumi pawl sim thei hi a si. Mipakhat in a nunnak ih harsatnak a neihmi hi saya hnenih va thlen dingih rem ciah lo thil hi a um thei zet. Himi zawn ah rualpi kan thupi zet ih saya pawl ih an ti remcang lomi hi rualpi le rualpiih sim aw hi a rem cang zetih hmual tla a nei thei zet. Curuangahmi pakhat nunnak ih harsatnak sut kiang dingah sayalawng siloin zumtu kan za te’n kan thupi a si.

          Aquila le Prisilla tei nupa nun kan zoh tikah zir ding nasa zet a um. Paul  in Rom khua ih Kawhhran, Korin Kawhhran le Timote hnenih ca a kuat tikah hite nupa thu hi a ngan lang. Himi in hite nupa hi Bawipai’ hrangih an cangvaih (active) zia a lang ter (Rom.16:3; 1 Kor.16:19; 2 Tim.4:19). Zumtu menmen siloin Bawipai’ hrangih a cangvai mi zumtu kan si cio ding hi a thupi zet. Sim zo bangin mi vakvai an si vekin hmun dangdang ah an ṭhawn rero, cui an ṭhawnnak kip ah Kawhhran hrangah theitawp an suah vivo. Kan thlennak hmunkip ah Pathian kawhhran hrangih theitawk suahtu ding kan si in zirh a si.