Nausen Jesuh Hmu Ngahtu Pawl

Baibal sungah a hleice ih nausen Jesuh a hmu ngahtu pawl an um ih cu pawl in Jesuh an ton tikah nun lungawinak, nun diriamnak an ngah zia kan hmu thei. Jesuh hi mi menmen a si lo vekin a suah thlak ihsin a tongngahtu pawl in nun ah thil danglam a thleng ṭheu. Nausen Jesuh tong ngahtu pawl vun zoh sehla.

1. Johan (Luk.1:41)

          Jesuh thawn tong aw ngahtu lakah Johan hi a hmaisa bik a si. Ziangah tile nui pum sung ihsin an suah hlanah an tong aw zo. Jesuh paitu Mary in Elizabeth a va ton tikah Elizabeth pum sungih naute a cang, cui naute Johan a si. Johan hi Jesuh hnakin thla ruk ih upa a si ih Jesuh lamzin rak sial ciatu dingih Pathian ih hrilmi a si. An pahnih in vanlamih paitermi veve an si. Nui pum sungih a um mi Johan cun a ren dingmi, a lamzin a sial sak dingmi Jesuh a hnen ih a thlen tikah a um men thei nawn lo, a cang tiah kan hmu thei. Hi tawk ih ‘a cang’ timi hi  The Wiersbe Bible Commentary ih a ngan dan ahcun ‘lungawi cang’ a si tiah a ti. Johan cun a ren dingmi a hnenih a ra thlen tikah a lung a awi tinak a si.

          Mi zo khal Jesuh tong ngah, hmu ngahtu pawl hi an nunnak ah lungawinak, kaa ih sim thiam lomi lungawinak an  nei ṭheu. Jesuh tong ngahtu kan ti tikah tong menmen hi sim duhmi a si lo. Jesuh tong ciocio khalah umzia nei ih tongngahtu an um, cu pawl relnak a si. Nan nunnak in Jesuh a tong ngah a si ahcun lungawinak na nei hrimhrim ding.

2. Tuukhal pawl ( Luk.2:20)

          Tuukhal pawl cu an tuu khalhnak  hmun ih an um laiah Vancungmi cu an hnenah zanlai ah a rung lang ih Jesuh a suah thu a rung sim hai. Cui thu an theih tikah zamrang zetin an feh ih vancungmi ih sim bang tukin puan ih tuammi nausen Jesuh cu an va hmu.Cun Mary hnenah vancungmi in an hnenih thu a sim mi pawl an sim sawng hai ih anmang a bang zet. Tuukhal pawl cu an hmuhmi le an theihmi ih ruangah Pathian thangṭhatnak hla sak phah in an tlung sal.

          Jesuh tong ngahtu pawl in Pathian hi an thangṭhat ṭheu. Pathian thangṭhat kan ti tikah Biak inn lawngah a si lo. Tuukhal pawl khalin an tlun phahlam tluan ah Pathian an thangṭhat. Biakinn lawng hi Pathian thangṭhatnak dingih a ruattu pawl cun hmundang an um tikah duhduh in an nung ṭheu. Jesuh tong ngahtu taktak pawl cun khui hmun khalah Pathian an thangṭhat ṭheu.

3. Mifim pawl (Matt.2:11)

          Nisuah lam mifim pawl hi Zentail mi an si ih Jesuh hi Israel hrang le Zential hrang khal ih rundamtu a si zia a langtertu a si. A suahnak ih Jesuh tong ngahtu khalah Zentail mi an tel ve. Hi mifim pawl hi arsi zohthiam an si ih Jesuh ih arsi an hmu tikah Jesuh tong dingah hmun hla zet ihsin an ra. Bethlehem khua ih Jesuh an va hmuh tikah khuk bil in an biak ih an kenmi sui, Frankincense rimhmui le mura zihmui an pek. An thil pekmi pawl hi thil man khung zetzet an si ih milian an si ko ding tiah zum a um. Naute Jesuh an an hmuh tikah kut lawng men ih tong loin laksawng sunglawi tak an pek. Baibal thiam ṭhen khatin hitin an sim: “ Josef kha Izipt ram ih a tlan tikah ah mifimpawl ih laksawng an pekmi hi nuntu khawsaknak hrangih an hmanmi bik a si ding” an ti.

          Hi mifim pawl ih nunnak ihsin Pathian hrangih pek siannak thu hi kan hmu thei. Hi nausen Jesuh hi leimi si loin vanlam in leitlun hrangih in pekmi a si ti an thei ih a hrangah laksawng an pek ve. Zumtu, Pathian ih in pekmi a thei fiangtu pawl cun Pathian hrangah an neihmi thil an pe ve ṭheu.  Pathianin siang zetin a fapa in pek ti hmu fiang ngahtu in Pathian hrangah siannak thinlung an nei ve.

4. Simeon (Luk.2:28-35)

          Simeon hi Israel pawl in hnemnak an ngahnak ding rak hngaktu a si.  Messiah a hmuh hlan sung cu a thih lo ding thu kha theihter a si. Josef le Mary in Jesuh hlan dingih an rat tikah Simeon cun naute cu a cawi ih Pathian a thangṭhat. A ṭongkam ih kan hmuhtheimi cu Simeon inJesuh a hmuh tikah a nun dia riam ih thih khal poi a ti awn lo thu kan hmu. Jesuh a neitu pawl in nun diriamnak an co ṭheu. Leitlun ahcun ziangvek ih milian le mifim an si hmanah nun diriamnak timi a um thei lo, Jesuh lawng hi nun diriamnak in pe theitu a si. Cun Jesuh hi Zentialle Israel mi pawl hrang a si thu a sim. Zentialpawl in Pathian lamah covo an nei dah lo Jesuh zarah vanlam ah covo an nei thei ve.

          Simeon cun hmailam thuhla a sim peh vivo ih Jesuh cu Israelpawl hrangah bahnak a si ding thu le mi tampi tungdingtu a si ding thu a sim. A sim vekin Jesuh hi mi tampi hrangah tluknak/ rilhbahnak a si. Ziangrungah tlukbahnak a si tile an zumlonak rungah a si (Is.8:14; Rom.9:23; 1 Kor. 1:23; 1 Pit. 2:8). Cun simeon in a sim peh mi cu Jesuh le a nu in tuarnak nasa zet an ton ding thu a si. Himi in fiangzet ih a langtermi cu zumtu pawl ih lamzin cu tuarnak lamzin a si zia a si.

5. Anna (Luk.2:36-38)

          Anna hi nunau profet, Pathian ṭihzah le a tikcu thlacamnak ih hmangtu a si. Josef le Mary in Simeon hnenah ih Jesuh an rak thlengpi ṭum ah a rak um ve ih fiangzetin Jesuh a hmuh ngah vetu a si. Jesuh a hmuh ngah tikah Pathian a thangṭhat ih Jesuh ih thuhla cu mi tampi hnenah a sim. Jesuh ih thuthangṭha sim hi zumtu pawl ih kan ṭuanvo a si zia langtertu a si. Jesuh thihnak ihisn a thawhsal tikah tirhthlah pawl in thuthangṭha an sim, a suahnak khalah hi thu a rak hmuciatu Anna in thuthangṭha  a tlang au pi ve. Thuthangṭha sim hi zumtu pawl ih kan hna, kan ṭuan dingmi a si. Jesuh a rat hlan sung hi leitlun ah cui thuthangṭha cu sim vivo tu ding kan si.

          A tlun ih tharlangmi nausen Jesuh a tongngahtu pawl nunnak kan zoh tikah kan hmuh theimi a khaikhawmtu bik cu  Pathian thangṭhat hi a si. Tuu khal pawl in Jesuh a hmuh tikah Pathain an thangṭhat, Simeon in Jesuh a hmuh tikah Pathian a thangṭhat, Anna in Jesuh a hmuh tikah Pathian a thangṭhat, mifim pawl in Jesuh an hmuh tikah khukbil in an biak, Johan in Jesuh a ton tikah a lungawi thu kan hmu, vancungmi khalin Pathian an thangṭhat. Zumtu hi Pathian thangṭhattu ding kan si zia a lang fiang nasa.