Christian Robawm

USA hi  leitlun ah ram lian bik le cak bik a si. USA thuanthu hi kum 225 lawngih upa a si nan leitlun ah thluasuah co bik miphun a si. Ziangruangah lian bik le cak bik ih a si thei timi zirzoinak ah kum 40 luan caan ka hmang.  Ka hmuh suahmi cu kan ram rak dintu kan pa le pawl hi Jesuh zumin Bible ih ṭhum awkmi an si ruangah a si.

USA hnakih ram kau sawn, lei ram suak le khur sung suak thil nei ṭha sawn, mipum tam sawn, ram upa sawn an um ko nan USA hnakin an farah sawn ih an cak lo sawn. USA danglamnak te cu ziang a si ti le USA cu Bible ih hramphummi a sinak a si. USA mi ṭhenkhat pawl ih a tongkam suak vun tarlang sehla.

“Pathian le Bible tello in leilungpi dik takih uk ding cu thil cang thei lo a si.” (George Washington – 1^st President of the USA)

“Leilungpi ih ngaihven phu cabu um sun cu Bible lawng a si. Kum tampi sung kumtin Bible ka siar suak ringring. Zingtin ihkhun ihsin ka thawh veten Bible bung 4\5 ka siar ringring.” (John Q. Adam – 2^nd President of the USA)

Bible hi kan rampi kaihhruaiawknak pi a ṭhumawknak lungpi a si. (Andrew Jackson – 7^th President of the USA)

“Bible hi kan zalennak thirkawn vek a si. Na thinlung sungah a simmi ngan aw la a tak in na nunnak ah tuah suak aw.” (Ulysses S. Grant – 18^th President of USA)

“Bible hi minung pawl hnenah Pathian ih laksawng a pekmi ṭha bik a si ti ka zum.” (Abraham Lincoln – 16^th President of USA)

“Bible hi ka nun sullam, Pathian sinak, thlarau lamthu le minung ṭulmi pawl langsuahnak hrampi a si.” (Woodrow Wilson – 28^th President of USA)

“Fimthiamnak hi Bible tello cun santlai lo men a si”. (Noah Webster – Founder of Webster Dictionary)

Culawng si loin Hruaitu hmaisa pawl in Bible ih an ṭhumawk zia a langnak pakhat cu nitin hmanmi tangka ah “Pathian kan rinsan” ti rori in an ngan lang. Hiti vekin Pathian an rak rinsan ih Bible ih an ṭhum awk ruangah Pathian in USA hi ram lian bik le cak bik ah a thluasuah a si.

By Henry Syn – Systematic Theology, pp 70-72

            Veikhat cu Dr. Torrey hnenah mi Dr. Congdon a rai h hitin a ra ti. “Baibal hi ka siar rero nan zianghman hlawknak le ṭhathnemnak ka ngah lo, a ro in a ro. Curuangah umzia nei dingin ziangtin Bible ka siar ding timi in sim aw” tiah a ra ti. Cutiah Dr. Torrey cun:

            “Siar aw” a tiih anih in “ka siar ko si” tiah a let. Dr.Torrey cun “siar bet aw” a tiih a nih in”ziangtin” a ti sal. “bu khat kha nikhat ah vei 12 siar aw, cutin thlakhat sung ti leh aw” ti’n Dr.Torrey cun a ti sal ih Dr. Congdon cun “hnaṭuan tul thawn a ziang bu saw cutluk tam cu Nikhat ah ka siar thei ding” tiin a sawn sal. Anetnak ahcun Dr.Torrey cun “2 Piter kha siar aw” a ti.

            Tikcu a rung liam vivo tikah  Dr.Congdon cun hi tin thil um dan a run rel. “Kei le ka nupi cun  2 Piter hi zingah vei 3 lole 4, Sun ah vei 2 lole 3, tlai zanriah ei hrawng ah vei 2 lole 3 tiin kan siar. Cui hnu rei lo te cun ka tonmi pohpoh hnenah 2 Piter thu hla lawnglawng ka relpi thlang. Cungvan ih si-ar pawl khal in 2 Piter hi hla in an sak ringring vek khi a si. Bible cuka khuk parah ret in 2 Piter cu ka siar, thu ṭhen khat pawl ka hminsinnakah ka facung in ka rin. Cui ka rinmi parah ka mitthli a vung tlak tikah ka siarmi cahmai cu mithli le cati rawi awk miin a maan ih a bal ṭheh. Cutikah ka nupi hnenah “zoh hnik, ka Bible cahmai hi ka ti siat ngah thluh hi” tikah a ti. A nupi cun “A singai hi, asinan cahmai cu dum ṭheh hmanseh na nunnak cu a eng ngah ve thung sisi” tiin a let.

Ref. Nelson’s Complete Book of Stories, Illustrations, and Quotes

Veikhat cu zan ṭim laiah uico a bo ciamco ih inn neitu pa cu a hung tho ih “ziang si maw na bo” a tiih uico cu a bo a cawl. Inntek pa cun an hmuan le kiangkap cu a zoh kual vivo ih hmuhmi zianghman a nei lo. Cutik ah inntek pa cun an uico cu a kawk ih, “a ziangah saw zianghman um lo cu na bo ciamco, mi ih thah hmuah na hrulhhram ter thluh, um zia nei lo tuk in bo rero aw hlah” tiah a ti ih inn sungah cun a lut ih a it sal. 

A ngaingai te tiah cun, Inntek pa in an hmuan a bih kual ih zianghman hmuhmi a neih lonak kha ui co a bo ruangah an inn ih rukru dingih ra in a thei ih a tlan kha a rak si. Inntek pa in “um zia nei lo ih bo rero” tiih uica a kawk kha a theih lo ruangah a si. Ui co bo in umzia a rak nei tuk sawn ruangah rukru cu hmuh ding khal um loin a rak tlan kha a si sawn. Uico kha minung vekin ṭong thei siseh la “Ka Pu, ka bo ruangah hokhaw zianghman hmuhmi na neih lo, rak bo loin um sehla na thil ziangtal a la ngah ding” a ti ko ding.

A cancan ahcun umzia nei lemlo ih kan ruahmi khi kanmah sawn in a umzia neihzia kan rak thei ngah lo sawn a rak si ṭheu. Cun ṭhathnemnak nei lo ih kan ruah ṭheumi khal ṭhathnemnak an nei lo taktak si loin an ṭhathnemnak kan hmuh ngah ṭheu lo sawn a si thei. Kanmah lala khal kan ṭhathnemnak le umzia kan neihnak zawn hi miin kan hmuhpi ngah lo can a um ve ṭheu. Umzia nei lo, ṭha hnem lo tiin mi va tilawk mai lo dingin ralrin a ṭul.

1904 laiah Walse ram ah Pathian thu ih ṭhangharhnak nasa zetin a thleng. Cumi ṭhangharhnak cun Missionary ziang maw ti zat a hring suak ih, missionary ṭhen khat cu India ram an ra thleng. Assam hmunram pakhat ahcun ‘mi lu lak hmang pawl’ (head-hungters) tiih theihmi hrinhnam an rak um. Cuihmun ih ra thleng missionary pakhat cun Nokseng timi pa le a innsang hnenah thuthangṭha a sim ih an sungza in Jesuh zumtu ah an cang ih namah ih thawngin midang khal Khrih zumtu ah an rung cang. Cumi thu cu an khaw bawipa in a theih tikah a thinheng tukih khawmi pawl hmaiah cu te innsang cu a ko.

Mipi hmuh hngan ah Nokseng cu a zumnak bansan dingin a fial, a ban san lo asile thah a tuar ding. Pathian Thlarau in a umpi thawn in Nokseng cun “Jesuh dungthlun dingin thu ka thencat so, dung kir thei ka sin awn lo – I have decided to fallow Jesus, no turning back” tiah a let. Cop le cilh in a fate pahnih cu a hmuh hngan rori ah sun that an si hngal. Khaw bawipa cun “na nupi na nunnak zuah na duh asile na zumnak bansan aw” a tis al ih Nokseng cun “Mi zo hmanin in telpi lo khal sehla A dung ka thlun hrih ding, dung ka kir lo ding - Though no one joins me, still I will follow. No turning back” tiah a ti sal. A nupi cu copcilh in an that lala. Khaw bawipa cun a netnak ah ‘tu ah na zumnak na bansan ding maw na thi sawn ding” ti ah a ti sal. Nokseng cun aipuang zetin “Leilung cu ka dungah a umih, Thinglamtah cu ka hmai ah, kir sal thei ka si lo - The cross before me, the world behind me. No turning back,” tiin a let thotho ih cutin a nih khal a sungkua pawl vekin an that cih.

Hi thihnak cu an khua in ṭhangharhnak thlentu ah a rung cang. Ziangtintile, Nokseng tei innsang in an zunak ruangih le,kum 2000 lai a liamzomi an bawipa hrangih an nunnak an pek ngam kha mak a tituk ih an zumnak vek zumnak neih hiarnak a run nei. Cuntin Thlarau Thianghlim ih hnaṭuannak thawn in Jesuh Khrih zumtu ah a rung cang ih “Kei khal Jesuh Khrih ih ta ka si zo” tiah a zumnak a phuang suak. Cumi cu khuami pawl in an theih tikah an lung a awi zet ih an khua mi zate’n Jesuh zumtu ah an rung cang ṭheh.

Hi thil a thlengmi thawn pehpar in an thah zik zawngih Neksong in a ṭongsuakmi pawl cu hlafang ah canter in an thluk an run tuah ih tui ni tiangah hla nung le mipi duhmi hla ah a rung cang lan ta.

            I have decided to follow Jesus;

I have decided to follow Jesus;
I have decided to follow Jesus;
No turning back, no turning back.

The world behind me, the cross before me;
The world behind me, the cross before me;
The world behind me, the cross before me;
No turning back, no turning back.

Though none go with me, still I will follow;
Though none go with me, still I will follow;
Though none go with me, still I will follow;
No turning back, no turning back.

My cross I’ll carry, till I see Jesus;
My cross I’ll carry, till I see Jesus;
My cross I’ll carry, till I see Jesus;
No turning back, no turning back.

Will you decide now to follow Jesus?
Will you decide now to follow Jesus?
Will you decide now to follow Jesus?
No turning back, no turning back.

attr. to S. Sundar Singh

cf - https://www.christianlearning.com/true-story-behind-the-hymn-i-have-decided-to-follow-jesus/

Semtirnak 1-11 hi mi ṭhenkhat in thil a taktak ih a thlengmi si loin, Laimi in tenglam thuanthu kan neih vekih thuanthu phuahcopmi men ih a ruattu an um. Asinan Semtirnak 1-11 hi thuanthu phuah copmi men si lo in a taktak ih thil a cangmi a si zia kan Bible lala in a langfiang ter. Ziangtin ti le Thukamthar minung pawlin , Jesuh Khrih rori tellin, Semtirnak 1-11 hi thil a taktak ih a cangmi a si ruangah zirhawknak ah vei tampi an rak hmang. A hnuailam ih Baibal cang pawl hi Thukamthar bacu pawl in Semtirnak 1-11 karlak thu hmangin an ngan le an simmi pawl an si. Himi in Semternak 1-11 hi ṭhumawknak tlak, a taktak thil an si zia a hnget ter.

Matt.19:4 - Sem.1:27

Jesuh in, “A hramthokah Seemsuahtu in nu le pa a tuah, ti kha Ca Thianghlim sungah nan siar dah lo maw? 

Matt.19:5 - Sem. 2:24

Cutawkah Pathian in ‘Cu a si ruangah mipa in a nu le a pa a taanta pei ih a nupi thawn an kom aw ding; cuti cun annih pahnih cu pakhat ah an cang pei,’ a ti. 

Matt.23:35 - Sem.4:8

Mawh nei lo Abel ihsin thokin Biakinn le biakṭheng karlakih nan thahmi Berakhiah ih fapa Zekhariah tiang, an thisen a suah man cu nan parah a tla ṭheh ding a si.'

Matt.24:37-38 - Sem. 6:12

Noah san laiih thil a cangmi vekin Milai Fapa ratnak caanah cun a cang ve ding.Tilik a tlun hlanah cun minung pawl cun an ei an in ih nupi an ṭhi, pasal an nei; Noah lawng sung a lut ni tiang nuam zetin an um. 

Rom.5:14 - Sem. 3:6

Adam san thok ihsin Moses ih san tiang mi hmuahhmuah cu thihnak in a uk ṭheh; Adam in Pathian thupekmi a thlun loih a sual bangtuk ih an sual ve lo hmanah thihnak cun a uk thotho hai.

1 Kor. 11:8 - Sem. 2:21

Ziangahtile mipa cu nunau ihsin tuahmi a si lo, nunau sawn kha mipa ihsin tuahmi a si. 

1 Kor.11:9 - Sem.2:18

Mipa cu nunau hrangih tuahmi a si lo, nunau sawn kha mipa hrangih tuahmi a si.

1 Kor. 15:47 - Sem.2:7

Leilung ih tuahmi Adam hmaisa cu leilung ihsin a ra; asinain Adam neta cu van ihsin a ra.

2 Kor.4:6 - Sem.1:3

“Khawthim sung ihsin tleunak suak seh,” tiah a titu Pathian....

2 Kor.11:3 - Sem.3:13

Ka phan mi cu: rulpi in a depdetnak in Evi a thlem ngah bangin nan thinlung ṭhat lonak in a lo thlem ding ih kimzet le thiang zetih Khrih nan thlunnak hi nan tanta pang ding tihi a si. 

Efe.5:31 - Sem. 2:24

Ca Thianghlim in, “Hi thu ruangah mipa in a nu le a pa a taanta ding, a nupi a kom ding ih annih cu pumkhat an si ding,” a ti.

1 Tim.2:13 - Sem.2:22

Ziangahtile a hmaisa bikih siammi cu Adam a si; neh hnuah Evi a si.

1 Tim.2:14 - Sem.3:14

Cule bum a tongtu cu Adam a si lo, Evi a si ih Pathian daan a buartu khal nunau a si.

Heb.11:4 - Sem.4:4

Abel in Pathian a zum ruangah Pathian hnenih a pekmi raithawinak cu Kain ih raithawinak hnakin a ṭha deuhmi a si. A zumnak ruangah Pathian lunghmuinak a co ih miding ah cosaan a si, ziangahtile a laksawng pawl cu Pathian in a co sak. Abel cu a thi zo naón a zumnak sungin mi hnenah thu a sim lai rero.

Heb.11:5 - Sem.5:24

Enok kha thi loin Pathian hnenih cawiso a sinak cu a zumnak ruangah a si. Zohman in a ruangpi an hmu lo, ziangahtile Pathian in a cawi hlo a si. Ca Thianghlim sungah, “Pathian hnenih cawi hlo a si hlanah Enok in Pathian lung a awiter,” tiin a um.

Heb.11:7 - Sem.7:1

Noah kha hmailam thu-ah Pathian in ralrinnak a pekmi a theih theinak cu a zumnak ruangah a si. Pathian thu a ngai ih lawng a tuah ih cuih lawng sungah amah le a innsang himte in an luat.

1 Pit.3:20 - Sem.7:13

Hitiih thu a simmi thlarau pawl cu Noah ih lawng a rak tuah laiah Pathian in thinsau in a hngak naón a thu a ngai duh lotu an si. Long sungih a lutmi cu mi malte, an zatein minung pariat lawng an si; annih cu ti sung ihsin runsuakmi an si. 

2 Pet.2:5 - Sem.7:13

Khuahlan sanih leilung khal Pathian in a rak zuah cuang lo. Pathian ṭihzahnak a nei lo leitlun miphun parah tilik a tlunter ih a runsuakmi cu dingnak thu a simtu Noah le midang pasarih lawng an si.

2 Pit.3:5 - Sem.7:18-19

Hlanlaipi ah Pathian in a thu in lei le van hi a tuah a si ti an thei naón a thei lo vekin an um ding. Leilung cu tidai sung ihsin le tidai thawn tuahmi a si. 

2 Pet.3:6 - Sem.7:20-21

Cule tidai thotho, tilik tidai in leilung hlun cu a siatsuah a si.

1 Johan 3:12 - Sem.4:8

Kain bangtuk si hlah uh; amah cu Satan fa ah a cang ih a nau Abel a that a si. Ziangah so Kain in Abel cu a thah? Ziangahtile a thil tuahmi a dik lo ih a naupa ih tuahmi cu a dik ruangah a si.

Juda 11 - Sem.4:3-5

An thlunmi cu Kain ih a rak thlunmi lamzin a si.

Veikhat cu George Muller cun 1844 ihsin mi panga pawl an piantharnak an co theinak dingah thla a cam. A dam can, dam lo can, lei parah siseh, tipi parih a umlai caan khalah an hrangah nikhat te hman pelh lo in thla a camsak ringring. Kumkhat le a hrek (thla 18) thla a cam hnu ah mi pa nga lak ihsin mi pakhat in nuntharnak a co. Pathian hnenah lungawi thu a sim ih a dang mi pa li hrangah a cam peh. Kum nga a rung liam tikah a dang pakhat (mi pahnihnak) in piantharnak a run co ve ih lungawi thu a sim hnuah a dang mi pathum hrangah thlacam a peh hrih. Nitin ten an hrangah thla a cam sak rero ih kum ruk a rung kim tikah a pathumnak in rundamnak a run co sal. Muller cun rundamnak a cotu mi pathum ruangah Pathian hnenah lungawi thu a sim ih a tanglaimi a dang mi pahnih hrangah teimak suah in a cam peh vivo. Cui a tang hrihmi mi pahnih cu amah Muller ih rualpi ih fapa an si. Kum 36 a liam hnu  khalah cumi te pahnih cu anmah kelte an si hrih, zianghman thleng danglamawknak an nei lo. Asinan Muller cun

“Pathian ah beiseinak ka nei, thla ka cam hrih ding, ka thlacam lehnak khal ka hmu lai ding. Piantharnak an co hrih lo nan, an co leh ding” tiah a ti.

Kum 52 a liam hnu, 1897 cun an hrangah nasa sin in thla a camsak hai. An hrangah kum 60 sung thla a camnak hnu khalah piantharnak co lo an si hrih lai. A thih caan a nai thlang tikah mi pakhat in

“kum reipi thla na camsak hnu khalah zianghman na thlacam letnak a um si loih, ziang ruangah an hrangah thla na cam hrih lai?” tiah thu a sut.

George Muller in cun

“Pathian in hi te phahnih hi rundamnak coter a tum lo si bang sehla tui ni tiang an hrangah thla I cam ter hi na zum maw?” tiah a let.

 Cutin an hrangah thla a camsak peh vivo, cutin Muller a thih tiangah himi pahnih cu piantharnak an co hrih cuang lo.  A netnak ah cun anmah thla a cam saktu Muller cu a thi, asinan a thih hnu ah an pahnih in rundamnak an co sal.

Pathian hnenih thla kan cam tikah beidong mai loih thlacam ding kan si.

Source: George Muller Persistent Prayer for 5 Individuals

California Thingkung sen (California Redwood) timi hi United State rampi sung, California saklam tipi tluan le Oregon thlanglam tluan ih a um mi a si. Hi thingkung pawl hi leitlun ah thingkung sang bik pawl lakih a telmi an siih, a san lamah pi 300 luan an sang thei. Cun kum 2000 lai a nung theimi thingkung an si. Hi California Thingkung sen ih a danglamnak cu, kha tluk ih a sangmi thingkung a si ko nan leilung sungah thuk pi'n  hram an thla lo. Cutluk ih a sangmi thingkung ih hram cu leilung sungah a thuk lam sa lut cin cu pi 6 ihsin 12 fangte lawng a si. Thingkung sangpi si cingin a hram a puan a si ahcun thli a hran tikah ding hnget thei loin tlu ding khi a bang. Asinan hi thingkung sen hi cu a hram a puan zet nan a tlu maimai lo. Thingkung sangpi, hram puante lawng sisi in ziangruangah tlu mai loin kum rei pipi tiang a ding hnget thei? A hram a puante ko nan tlu sawn mai loih a din theinak san cu:

-        A hram hi a thuk lam ah si lo in a phei lam zawng in hlapi tiang a feh ih pi 100 tiang lai a thleng thei.

-        A phei lam ah a feh men siloin thingkung pakhat le pakhat ih hram kha an kai -awk aw ih an ngerh aw.

Cu tiih pakhat le pakhat an kai-awk ton awknak hi tlu sawn lo in an din hnget theinak thazang a si. Kai awk aw lo in a pakpak in ding hai sehla thli a hran tikah tlu sawn thei mai an si. Khat le khat an kaih awk awknak hi an cahnak, hnget takih an din theinak a si.

Zumtu kan nunnak ah fimnak, thiamnak, neihnak lamah kan hram a thuk lo tla a si men thei. Asinan, Khrih ih pumkhat kan sinak thei ih zumtu kan unau pawl thawn kut kai aw ih kan ding tlang a si ahcun kan hram thuk lo cingin hnget zetin kan ding thei.

Source: 11 Facts About Coast Redwoods, the Tallest Trees in the World  

          Kum zabi 16 nakih Kawhhran remṭhat hna ṭuantu lakih kan theih zetmi cu Martin Luther a si. 31 Oct. 1517 kum ah Wittenberg ih Castle biakinn sangkaa ih Thesis 95 a rak tar. A nupi hi Katharina von Bora (Katie tiih kawhmi) a si. Luther cun a nupi Katie cu Pathian thu in a kaihruaiih naza zetin thazang a pe ṭheu. A nupi Katie khal mi teima le mi khawhuam zet a siih Luther khalin a duhdawt zet. Anupi Katie cu zing ngaingai ah tho in a hnaṭuan a thok ṭheu ruangah Luther cun “Wittenberg ih Zinglam Arsi” tiah a ko hngehnge.

            A nupi Katie khalin Luther cu a duhdawt zetih taksa lam khalah a mah tuamhlawm tu ṭha le a tha nau caan khalah thazang petu a si. Martin Luther hi Kawhhran remṭhatnak ah nasa zetih ṭuantu a si bangin vei tampi cu a tonmi harsatnak ih tuangah thinbang le thanau in a um caan a tam. Vekhat cu thinnau zetin a um laiah a nupi Katie cu thuamhnaw dum ih thuam aw in Luther hnenah a ra. A pasal luther in a hmuh tikah mangbang in a nupi cu “mithi vuinak ah na feh zik maw si” tiah a sut. Cutikah a Katie cun “na um dan ngiongio hi na bei a dong hmel lutuk ih Pathian a thi ah ka neih” tiah a let. A nupi ih thiltimi ih rungah Luther cun thazang nasa zetin a ngah sal ih, tuih buainak a tonmi pawl sin awn loin Pathian lam sawn ah a hoi sal ih cutin harsatnak tampi pahtlang in Kawhhran remṭhatnak ih pa bik dinhmunih theih lammi mi pakhat ah a cang lanta.

            Lei hringnun ah harsatnak le buainak in in ciim caan a um ṭheu ding. Himi caan ah beidong le thanau ih kuun cuahco men ding kan si lo. Ziangvek harsatnak khal thleng seh, A nungmi Pathian kan nei, kan Pathian hi a thi lo ti thei, tho in ke kar ding kan si.

Hminsin: Cahram laknak ih a ngan dan vekih letmi si loin sirhsan ah hmangin nganmi a si.

Source: Women of the Reformation: Katie Luther

Download

Vei khat laiah thil tuah thiam zet mi pakhat in zohman ih an duh nawn lomi motor bike sia, rop riamriam pi, mi ih an duh nawn lo ih an hlonmi cu a lak. A hmuhtu pawl cun ‘a khai bike sepi cu a ziang hrang ah a hai’ tiah an ti rero. Cupa cu thil thiam zet a si vekin, cui ziang hrang hmanih ṭha nawn lo bike sepi cu nuam tete’n a hun rem, a hun tuah rero ih a netnak ahcun Bike ṭha ngaingai, hman theih, sor bawk talk takah a hun tuah. Cu tikah cun a hmutu pawl cu a mang a bang tukih ‘hi tluk thilsia pi rori, hi bangtuk ih ṭha ih hun cang ter thei cu aw!’ tiah a tuahtu pa cu an lawm rero. Hi hnakih mangbang za a si mi sawn cu……

Nang le kei misual, ṭhatnak zianghman nei lo, mi borhhlawh, Pathian do ral, Satan fa, dinhmun se bik ih a um zo mi rori Pathian in: mi thianghlim, Pathian fa, a rualpi, unau le ro cotu dinhmun ih in ret sal hi a si.

-        Ngaikaitu misual khal minung kaitu ah a tuah. Luke. 5:10

-        Misual bik cazin ih retmi siahkhongtu khal a dungthluntu ah a tuah. Matt.9:9

-        Hlawhhlang Rahap khal Pathian mi runsuaktu a siter. Joshua 2

-        Kawhhran hremtu Paul khal kawhhran karh tertu ah a tuah.

Tuih hlanah cun na hrangah santlaihnak zianghman a nei lo. Sikhalsehla atu cu nangmah le keimah ih hrangah santlai zet a si thlang (Fil.1:11).

v Tu ih zianghman ih ṭhathnemnak nei lo ih na hmuhmi kha nautat hlah, Pathian in mi ṭangkai takah a cang ter thei.

v Tu ih misual tukih  na hmuhmi kha nau tat hlah, Pathian in na hnakih ṭha sawn ah a tuah thei.

v Tu ih mi farah tuk kha nautat hlah Pathian in milian a sit er thei.

Leivut lak ihsin in in khaisang theitu cu Pathian a si.

Santlai ihsin mi ṭhangkai zet in siter theitu cu Pathian a si.

Dinhmun niam te ihsin dinhmun sang ih in ret theitu cu Pathian a si.

Lal Nei Khup

Vei khat cu rual vah hnihte khual an tlawng tlang. Cu tiih an feh rero laiah ṭongkam an el aw phah vivo. Hmun pakhat an thlen tikah pakhat deuh in a rualpa ih hmai ah a beng thlukthli ih na a ti zet. Cu tikah beng a tuartu pa cu zianghman tong loin a umih vun nel parah hi tiin ca a ngan 

“ tuini cu ka rualpi ṭha bikin ka hmaiah i beng” tiin.

An feh vivo ih tili umnak hmun pakhat an thleng tikah tidai bual dingin an um. Cirhdup a rak siih an bualawk zik tikah beng a rak tuartu pa cu cirhduup ah a tangih a bangcau hnephnep. Cu tiih mangbang ih a um laiah a rualpa cun a ra run suak. Cupa cu a bangcauh a hung zia um ngahin lungto pakhat parah cun 

“Tuini cu ka rualpi ṭha bikin in run suak” tiah a ngan. 

Cutikah a rualpa cun mangbang zetin “Ka lo beng tikah vunnel parah ca na ngan, A tu ka lo run tikah lungto parah ca na ngan lala, ziang ti thu saw?” tiah thu a sut. Cu tikah a bengmi le a runmi a rualpa cun

         “Miin in ti nat tikah vunnel parah kan ngan dingih thli a ra hran tikah a malh hlo mai ding. Asinan miin kan parih thilṭha an tuah tikah cun lungto parah kan ngan ding, cucun thli khal in a hran malh thei lo ding” tiah a sim fiang.

Khuimi deuh kan cingkeng sawn ṭheu? Midang siatnak maw an ṭhatnak?

Source – Internet - https://bit.ly/2kmlVFW

Kan pipu ṭongfim in “Nun lai sing lawm, thih ah kungtlung” a tiih, a um zia cu nundam cah lai, ṭhat lai, parmawi lai, neihnun lai ah cun ṭhian le rual, duhdawttu, ngaihsaktu le in pantu an tam theizet, asinan harsat, vansan, mangbangnak le vansiat, vanduainak le thihhlohnak vun ton taktak ahcun kan sungkhat rualpi lak ihsin in duhdaw taktaktu lawngin in ngaihsak in in dinpi ṭheu. Curuangah duhdawtnak taktak hi cu harsat, vansan, bangbangnak in an lang fiang ter ṭheu. Kan ṭhat lai caan ih in pawl in kawm dumdo rero nan vansan mangbang kan ton caan ah thei lo bangih in um santu pawl hi duhdawttu diktak an si dah lo.

Innsang din ih kut kan sih caan khalah thu kam awknak ih kan tuahmi cu ‘ṭhat caan le siat caan khalah thlahthlam awk lo ding hi a si’. Lennak duh men ih nupi le pasal ih nei aw pawl cun siatnak an ton caan ah an tlansan aw sal ṭheu. Asinan duhdawtnak thawn innsang a dintu pawl hi cun harsatnak a thlen caanah duhdawtnak thlum zia an lang ter ṭheu sawn.

Cubangin, Pathian le kan karlak khalah a si thotho. Pathian in in duhdawt ih harsat vansan kan ton lai caan khalah in thlathlam dah lo, kan hnenah a um, in fehsan dah lo, kan hrangah a rinum ringring. Zumtu pawl kan nunnak kan cek aw ve hnik uh si. Harsat mangbangnak a thlen caan ah Pathian kan pehtlaihnak a ṭunghmun maw? Ziang a bang? Tluan caan le hlawhtlin caan lawngah Pathian thangṭhat ih harsatnak a thlen vete’n Pathian ziangih siar nawn lo, duntun hngal mai zumtu kan si pang maw? Cu bangtuk zumtu kan si ahcun Pathian duhdawtnak taktak kan nei loih a ṭhatnak co duhtu, ceen duhtu fang lawng kan si tiknak a si.

Hlan zumtu pawl cun thihnak le ti duhdahnak, thawnginn sung khalah Pathian an thangṭhat. Harsatnak ih ruangah an biakmi Pathian an phatsan in dung an tun san mai lo. A malsawm kan don caan, kan tluan le kan hlawhtlin caan ih Pathian thangṭhat lawng hi Pathian ih hmuh duhmi a si lo. Harsat mangbangnak lak khalih Amah kaihnget ih kan rinumnak hi si hmuh tel a duhmi cu. Cumi hmuh ding beisei in hniksaknak khal kan parah a thlen ter ṭheu. Daniel 3:18 “In hum lo a va si hmanah siangpahrang bawipa , na khawzing pawlcu kan bia lo dingih na sui milem tuahmi hmai khalah kan kun lo ding,ti cu in theihsak cia aw tiah an ti”.  Shadrak, Meshak le Abednego pawl vekih ‘..meipi sung ihsin in run suak lo a va si hman ah..’ tiih Amah kan duhdawtnak hi kan rinumnak ih langter ding hi si kan Pathian in kan nunnak ih hmuh a duhmi cu. Harsatnak kan nunnak ih a thlen ruangih Pathian thlathlamtu kan si ahcun Amah kan dawtdawt kan ti cu kan mah hmanih kan lun lo ding mi a si. Curuangah ziangvek thil khal thleng sehla Amah pawk hngettu, Amah kai hnget fefe thotho tu zumtu kan si ding a thupi zet. Cucu Pathian kan duhdawt zia a langnak diktak khal a si.

Ui co cu a pupa parah a rin uh ih zawte hi cun hmuihmer umnak a zuan mai ṭheu an rak ti ṭheu. Zawhte hluan zumtu si pang hlah uh si. Pathian kan duhdawt a si ahcun a hrangah rinum ding kan si, Mi rinum cun a duhdawtmi hnenah harsatnak a thlen caan ah a duhdawtnak a thlum zia a langter ṭheu. Ziangvek dinhmun khalah Pathian duhdawt ih Amah kai hngettu si thei vivo dingah Pathian in cahnak lo pe cio hramseh.

YouTube 👉 https://bit.ly/3xw5mJe

Cat lo in nan lungawi uh; thlacam ringring uh. Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si.
1 Thesalon 5:16-18

Ziang thuhla hmanah donhar in um hlah uh; thla nan cam tin tein nan ṭulmi cu Pathian hnenah dil uhla lungawi aipuang tein dil uh. Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah him tein a kilkhawi ding.
Filipi 4:6-7

Kannih cu Pathian hmaiah ralṭhatnak kan nei, ziangahtile amah ih duhnak thawn mil aw in kan dil ahcun kan dilnak kha in theih sak ṭheh a si, tihi fiang tein kan thei. Amah kan dil tinten in theih sak; cule in theih sak ti kan theih ruangah kan dilmi hmuahhmuah in pe a si, ti khal kan thei.
1 Johan 5:14-15

Taimak in thlacam uh; thla nan cam tikah, Pathian hnenih lungawi thu sim phahin thinlung fim tein cam uh. Cuti nan cam tikah Khrih thuthup phuan theinak caan ṭha Pathian hnen ihsin kan ngah theinak dingah kannih hrang tla ah in cam sak ve uh. Atu thawng sungih ka umnak khal hi cuih thu ka phuan ruangah a si. Curuangah Khrih Thuthang ka phuan tikah fiangzet in le ka sim ding hrimhrim a simi vekih ka phuan theinak dingah thla in cam sak uh.
Kolose 4:2-4

Curuangah hitiin ka lo sim: Thla nan cam ih thil pakhatkhat nan dil tikah ka ngah zo tiin zum uhla nan dilmi hmuahhmuah cu nan ngah ko ding. Cun thlacam dingih nan din tikah mi pakhatkhat parih duh lonak nan neihmi kha va ngaithiam uh; cutikah vancung ih a ummi nan Pa in nan sualnak kha a lo ngaithiam ve ding,” tiah a ti.
Marka 11:24-25

Cutikah keimah in ko ding. Ka hnenah ra in thla nan cam tikah ka lo theih sak ding.
Jeremiah 29:12

Nan beiseinak in nan lung lo awiter seh; harsatnak nan ton tikah thinsau in um uh; cat lo in thlacam uh.
Rom 12:12

Bawipa cu amah a kotu ih kiangah a um ringring; Thinlung tak tein a kotu ih kiang ah a um ringring a si. Amah a ṭihzahtu pawl ih poihai mi cu a pe, An aunak a thei ih a run hai a si.
Saam Hlabu 145:18-19

“I ko awla ka lo let ding. Na theih lomi thil khawruahhar le mangbangza ka lo sim ding.
Jeremiah 33:3

“Thla nan cam tikah Pathian thei lomi pawl ih sullam nei tuk lomi ṭong tampi an ṭong vekin va tuah hlah uh. Annih cun reipi thla an cam tikah Pathian in a thei cuang ding tiah an ruat. Anmah vek va si hlah uh. Nan ṭulmi cu nan dil hlan ihsin nan Pa in a thei cia zo.
Matthai 6:7-8

“A dang ka lo sim hrih ding: Leitlun ah thlacam in nan dilmi thu ah mi pahnih nan lungkim tlang in thla nan cam a si ahcun vancung ih a ummi ka Pa in a lo tuah sak ding. Ziangahtile ka hmin in mi pahnih siseh, pathum siseh, nan pumkhawm tikah nan hnenah ka um ve a si,” tiah a ti.
Matthai 18:19-20

Zanṭim hrawngah Paul le Silas cu thla an cam ih Pathian thangṭhatnak hla an sak; cule thawngtla dang pawl in an rak ngai. Rinlopi ah nasa zet in ling a hnin ih thawnginn cu a tawhram tiangin a hnin ṭheh. Hmakhat teah sangka pawl an ong aw ṭheh ih thawngtla pawl hmuahhmuah ih kut khihnak thir cikcin cu an phoih aw ṭheh.
Tirhthlah 16:25-26

Harsat ka ton lai ah Bawipa cu ka ko; I bawm dingah ka Pathian cu ka ko a si. A biakinn ihsin ka aw a thei; Ka aunak aw a hna sungah a lut.
Saam Hlabu 18:6

Kannih cu Pathian hmaiah ralṭhatnak kan nei, ziangahtile amah ih duhnak thawn mil aw in kan dil ahcun kan dilnak kha in theih sak ṭheh a si, tihi fiang tein kan thei. Amah kan dil tinten in theih sak; cule in theih sak ti kan theih ruangah kan dilmi hmuahhmuah in pe a si, ti khal kan thei.
1 Johan 5:14-15

Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangahtile zo hnen khalah Pathian cun siang zet le zangfahnak thawn a pe a si. Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semmi tifinriat tisuar bangtuk a si.
Jeim 1:5-6

Cutiin a si ruangah nan sualnak cu pakhat le pakhat hnenah phuang ton aw uhla thlacam ton aw uh; cutiin harhdamnak nan ngah ding. Mi dingih thlacamnak cu a cak zet ih hmual a nei a si. Elijah cu kanmah bangtuk milai a si ko. Sikhalsehla ruah sur lo dingin taimak suah in thla a cam ih an ram ah kum thum le a hrek sung ruah a sur lo. Cuih hnuah thla a camsal ih ruah a sursal. Cutiin leilung in ti le rawl a suahsal.
Jeim 5:16-18

Nannih in, in hril lo; keimah in ka lo hril hai ih kumkhua ih a hmunmi rah nan va rah theinak dingah ka lo fial a si. Ka hmin in Pa hnenih nan dilmi hmuahhmuah cu a lo pe ding.
Johan 15:16

Ziang hmuahhmuah hrangah a netnak tikcu caan a naizet zo. Curuangah ṭha teih thla nan cam theinak dingah suupawknak nei in thinlung fimvartein um uh.
1 Piter 4:7

A hnenah bomnak dil in ka au. Hla in ka thangṭhat. Ka sualnak hi zianghman poisa lo in um ningla, Bawipa in ka thlacamnak a ngai lo ding. Asinan Pathian in i thei zo; Ka thlacamnak a ngai zo a si. Ka thlacamnak a hnong lo ih a hmunmi a duhdawtnak khal ka hnen ihsin a lakkir lo ruangah Pathian cu ka thangṭhat a si.
Saam Hlabu 66:17-20


Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuah sak ding. Ka hmin in nan dilmi pohpoh cu ka tuah ding a si,” tiah a ti.
Johan 14:13-14

Hmun khatih thlacam tlang dingah an tongkhawm ṭheu ih nunau pawl le Jesuh ih nu Mari le Jesuh ih naule pawl tla an tel.
Tirhthlah 1:14

“Sikhalsehla ka thu a theitu nannih pawl: Nan ral duhdaw uh; a lo huatu pawl parah ṭhatnak tuah uh; a lo camtu pawl khi thluasuah pe uhla a lo hremtu pawl hrangah thlacam uh.
Luka 6:27-28

Thil pakhatkhat nan duh ih nan co thei fawn lo tikah mi thah khal nan ngam thlang; nan dawt zetmi thil a um ih nan ngah thei lo ruangah nan to aw ih nan sual aw. Nan duhmi cu Pathian hnen ihsin nan dil lo ruangah nan ngah lo. Cule nan dil tik khalah nan ngah lo, ziangahtile nan thinlung a ṭha lo; nan tisa nomnak hrang lawngah nan dil a si.
Jeim 4:2-3

Kei cu ziangtik hmanah nan hrangih thlacam ka cawl lo ding; ka cawl asile Bawipa ih hmaiah misual ka si ding. A ṭhami le a dikmi pawl tuah dingah ka lo zirh sawn ding.
1 Samuel 12:23

Sikhalsehla kei cun, Bawipa, na hnenah thla ka cam ding; Maw Pathian, na duhnak tikcu ah i let aw; Ziangahtile na duhdawtnak cu a tum ih, mi run dingih na thukamnak cu na kimter.
Saam Hlabu 69:13

“Ziangbangtuk ih miphun tum an si khalle Bawipa kan Pathian vekih kan kawh tin tein, in naihtu Pathian cu an nei cuang lo ding. Bom dingih kan kawh tin tein, in thei a si.
Daan Peksalnak 4:7

Himi pawl nan tuah tikah thlacam phahin tuah uhla Pathian hnenah bomnak dil uh. Thlarau ih a lo hruainak bangtukin ziangtik caan poh ah thlacam uh. Hi ruangah ralring cia in um uhla nan beidong hlah uh. Pathian minung pawl hrangah cat lo in thlacam uh. Cun kei khal thusim dingih ka timtuah awk tikah Pathian in ka sim dingmi thu i pe dingah le ralṭha zet in ka sim ih Thuthangṭha ih thuthup kha ka phuansuak theinak dingah thla i cam sak ve uh.
Efesa 6:18-19


Miṭha pawl thla an cam tikah Bawipa a lung a awi; Asinan miṭha lo pawl ih an kenmi raithawinak cu a fih.
Thufim 15:8

Maw Pathian, thla ka cam tikah Nang cun i run let ringring. Atu khalah na hna i tun awla Ka thu hi i theih sak aw. Maw in Runtu, na duhdawtnak mangbangza cu run langter hram aw. Na kiangih a um hmuahhmuah cu ral pawl ih kut in an him a si. Na mitmu na kilven vekin i kilveng hram aw; Na thladem hnuai ah i thup hram aw;
Saam Hlabu 17:6-8

Maw Bawipa, nangmah ka lo ko; Atu ah i bawm hram aw. Ka lo kawh tikah i ngai hram aw. Ka thlacamnak cu, Rimhmui ai ah i co sak awla, Ka kut ka thlir mi cu, zanlam thawinak ai ah i san sak hram aw. Maw Bawipa, ka kaa ah kiltu re awla, Ka hmur ih sangka ah vengtu re hram aw. Thilsual tuah duh lotu si dingah i bawm awla, Miṭha lo pawl ih ṭhat lonak ah tel lo dingin i kham aw. An puai tuahnak khalah tel hram hlah ning law!
Saam Hlabu 141:1-4

“Dil uh, nan ngah ding; hawl uh, nan hmu ding; king uh, nan hrangah sangka on a si ding. Ziangahtile a diltu hmuahhmuah cun an ngah ding, a hawltu hmuahhmuah cun an hmu dingih a kingtu hmuahhmuah hrangah sangka cu on sak an si ding. Nan faate pawl in sang an lo dil asile, nannih pale pawl in lungto nan pe ding maw? Miṭha lo zet nan si nain nan faate pawl hrangah cun a ṭhami thil pek nan thiam a si ahcun vancung ih a ummi nan Pa in a diltu hnen ahcun ziangtinso thil ṭha pek lo in a um ding.
Matthai 7:7-9, 11

Jesuh in a dungthlun pawl kha thinnau lo ih thla an cam ringring a ṭul zia zirh duh ah tahṭhimnak pakhat a sim. An hnen ahcun, “Khua pakhat ah Pathian a ṭih lo ih milai khal a hmaizah lotu thuṭhentu pakhat a um. Cuih khua thotho ah nuhmeinu pakhat a um ih nuhmeinu cun, ‘I raltu thawn thu kan neihmi ahhin i bawm hram aw,’ tiah atu le atu a ra dil ringring. Thuṭhentu in cuih thu cu caan reipi relsak duh lo in a um; asinain a netabik ahcun ‘Pathian ka ṭih lo ih mi khal ka hmaizah lo nain, hi nuhmeinu in i hnaihnok ringring ruangah a thu cu ka relsak pei. Ka relsak lo a si ahcun catbang lo in a ra ringring dingih a netnak ahcun keimah lehlam thinlung baangin i tuah ding,’ tiah a ruat,” tiah a sim. Cule an Bawipa cun an hnenah, “Hi a dik lomi thuṭhentu ih ṭongkam cu nan thei! Cuti a si ahcun Pathian in amah ih bomnak dilin sun zan a au rerotu a minung pawl cu an thu ṭhen sak lo in a um pei maw? Anmah bawm dingah a khul a fung pei maw? Fiang tein ka lo sim: Zamrang zet in a relsak dingih thuding a coter ding a si. Sikhalsehla Milai Fapa hi leilung ih a rat tikah zumnak neitu a hmu pei maw?” tiah a ti.
Luka 18:1-8


Cutivek ṭhiamṭhiam in kannih cu a ṭawnṭaimi kan si ruangah kanmah bawm dingah Thlarau a ra. Ziangtinso thla kan cam ding ti hman kan theih lo lai ah, hmurka hman in simsuak thei lomi hrum-ainak thawn Thlarau in kan hrangah Pathian hnenah in dil sak. Cule kan thinlung a hmutu Pathian in Thlarau ih ruahmi cu ziang a si, ti a thei; ziangtintile Pathian duh zawng in a mithiang pawl hrangah Thlarau in Pathian hnenah in dil sak a si.
Rom 8:26-27

Keimah sungah nan um ih ka thu hi nan sungih a um ve ahcun nan duhmi pohpoh nan dil tikah nan ngah ding.
Johan 15:7

Sualforhnak sungih tla lo dingin itthat lo in thlacam uh. Thinlung cun a duh nain taksa cu a thazang a der a si!” tiah a ti. Jesuh cu a fehsal ih thla a cam lala. “Ka Pa, hi khuathai hin luat a theih lo ih ka in tengteng a ṭul a si ahcun na duh vekin si ko seh,” a ti.
Matthai 26:41-42

Cule Job in a rualpi pathum hrangih thla a cam hnuah, Bawipa in amah cu a tungdingsal ih a hlanih a neihmi hmuahhmuah ih lethnih tam in a pek.
Job 42:10

ka hmin in kawhmi ka minung pawl in ka hnenah lungsiir in thla an cam ih ka mithmai an hawl ih an thil ṭha lo tuahnak ihsin an kirsal a si ahcun van in an thlacamnak ka thei dingih an sualnak ka ngaithiam dingih an ram cu ka damter ding.
2 Sansiarnak 7:14

Curuangah rawl kan ul ih in humhim dingah Pathian hnenah thla kan cam; cule kan thlacamnak cu in theih sak a si.
Ezr 8:23


Zingtin ka thlacamnak cu na thei, Ni a suah tikah ka thuhla cu na hnenah ka thlenter; Cule na thulehnak hngak in ka um.
Saam Hlabu 5:3


Leilung tlunih a um lai ahkhan Jesuh in thihnak ihsin amah a runsuak theitu Pathian hnenah ring zet in a au ih mitthli tla-in thla a cam. Mi lungnem le pum pe aw mi a si ruangah Pathian in a theih sak.
Hebru 5:7

Ka harsat lai ah Bawipa cu ka ko; Ka kawhnak a thei ih luatnak i pek.
Saam Hlabu 118:5

Maw Pathian, in run ngai hram aw. In run zoh awla harnak kan ton zia le na hmin a kengtu khuapi in harsatnak a ton zia hi run hmu hram aw. Thildik kan tuah ruangah si lo in nang cu mi zangfahtu na si ruangah na hnenah thla kan cam. Bawipa, in run thei aw. Bawipa in ngaidam aw. Bawipa in run ngai awla in tuah sak hram aw! Mi hmuahhmuah in Pathian na si zia hi an theihnak dingah rei nawn hlah! Hi khuapi le hi minung pawl hi na ta an si ko,” ka ti.
Daniel 9:18-19
 
a hnen ihsin kan dilmi pohpoh kan ngah, ziangahtile a thupekmi kan thlun ih a lungawimi kan tuah ruangah a si.
1 Johan 3:22

Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding.
Johan 16:24

Bawipa cu ka duh; Ka thlacamnak le zangfah ka dilnak a theih ruangah. Ka kawh tinte ka aw a thei.

 Saam 116:1-2
 

Thingkung 3 ih Beiseinak

YouTube👉 https://bit.ly/38Ps3j1

        Veikhat laiah hramlakah thingkung pathum an rak um ih an saduhthah le lungthlitum pawl an ruah aw rero hai. A pakhatnak thingkung cun a saduhthah a hun rel ih “Ni nikhat ahcun hlawnthil ṭha retnak bawm ka si lai ding. Ka sungah sui, ngun le hlawnthil ṭha ṭha an ret ding. Cutin mawi zet ih thuammawi in ka um dingih mitin in ka mawinak an hmu ding” tiah a ti.

        A pahnihnak thingkung in a saduhthah a hung rel ve ih “Ni nikhat ahcun lawng tumpi ka si lai ding. Ka parah singpahrawng pawl le Siangpahrang bawinu pawl an to dingih leitlun hmun tin ah khual an tlawng ding. Mitin in hi lawng parih to cu a nuam in a him tuk rori tiah an ti ding” tiah a ti ve.

        A netnak ah, a pathumnak thing cun a sunmang a hun rel ve ih “Kei cu ka ṭhang vivo dingih hramlak thingkung sangbik ka si lai ding. Tlang zimah ka um dingih miin in hmuh tikah kan hngeṭek pawl thlir phahin hi thingkung san dan lawm mam cu van le Pathian a dai ban zik ual an ti ding. Thingkung tum le sangbik ka si ringring dingih miih theih ringring mi thingkung ka si ding” tiah a ti.

        Cutin an saduhthah le tumtah vek ih thil a thlen theinak dingah kum tawkfang thla an cam hnuah, vei khat cu an umnak ah thinghautu pawl an ra thleng. A pakhatnak thingkung kiangah thinghautu pakhat a ra ih “Ee, hi thing cu thingṭha phun a sisi, ka hau peiih kutzungthiam (letama) hnenah ka zuar pei” a tiih a hau. Cui thing cun a thinlung te’n “Ka saduhthat a kim thlang ding a si hi, kutzungthiam hnenah ka thleng thlang dingih robawm mawite ah in tuah thlang ding” tiin a ruatih a lung a awi ngaingai.

        Thinghautu cun thingkung pahnihnak a zoh sal ih “Hi thing khal hi thing ṭha phun a si hi, ka hau peiih lawng tuahnak hmunpi ah ka zuar pei” a ti tikah thing kung cu a lung a awi zet ih “Tu cun ka saduhthah bangin lawng tumpi tuahnak ah hman ka si thlang ding a si hi” ti ah a lung a hmui zet.

        Thingkung pathumnak zawnih thinghautu a ra thlen tikah thingkung cu a thin a phang zet ziangahtile hau a si ve pang ahcun a tumtah a kim thei nawn lo ding ti a thei. Thinghautu lakih pakhat cun a zoh ih “Hi thing hi ka ṭultuk ciamconak a um hran lo, ka hau mai pei” a tiih a hau.

        A pakhatnak zanthing cu kutzungthiam hnen a thlen tikah a nihcun rannung rawl peknak khuang ah a rak salh hnuah rawl seekkhawlnak innpi sungah a retih cui kuang sungah fangpaw (cangpawl) a ret. A thlacam vekin thil a thleng lo nasa. Thingkung pahnihnak cu lawng tuahtu in a hun salh thok ve ih, lawngtumpi si a beisei laiah lawng fate, vokkuang lawng fangah a salh. A pathumnak thing cu a salhtu pa in ban ih hman leh awkah tiin a salh ih thim lakah a ret men. Ni le can a liam vivo ih a sunmang pawl cu zanmang vek menah an cang a si bik.

        Veikhat ah nupa tuakkhat cu rawl seekkhawmnak inn sungah an rung riakih cu laiah naute an nei ih naute cu rannung rawl peknak kuang sungah an hlum. Cui kuang cu a pakhatnak thingkung ih tuahmi kuang kha a si. Cu tikah cui thing cun ro hmuahhmuah lakih ro sunglawi bik cawi ngah vekin a thei aw. Ziangah tile a sungih an hlumi cu naute danglam zet a si.

        Kum can a liam vivo ih veikhat cu mibur khual tlawng pawl in a pahnihnak thingkung ih tuahmi lawng cu khualtlawnnak ah an hmang. An lakih mi pakhat cu a bang tuk ih lang parah cun a rak it that. Culaiah thlisia hrangin tisuar an tho ciamco ih lawng cun cui thli le tisuar lakah a miphurhmi pawl himte’n a run thei a zum aw lo. Lawng parih a it that mipa an ṭhang tikah a nih cun tisuar pawl cu a kawk ih “dai te’n um uh” a ti veten tisuar le thlisia an dai khupkhi ih anzate’n an him ṭheh. Cutikahcun hi lawng ih salh a simi thing cun, ‘aw siangpahrang hmuahhmuah lakih Siangpahrang” ka phur ngah a si hi’ ti a thei aw.

        Kum a rung rei vivo ih, veikhat cu thim lakih an retmi an rung thiar ih mi pakhat an put ter ih a putu pa cu mipi in lam tluan an camriam phah vivo. Tlang par an hung thlen tikah cui thing a putu pa rori cu a parah thi dingin an kheng ih mikip hmuh dingah an tun. Nipi ni a hung thlen tikah cui thing cun ‘aw, saduh ka rak thahmi a kim ngah zo, tlang zim ah dingin Pathian ka tongtham ngah a si hi’ ti a thei aw.  Ziangahtile a parih an thlaimi cu Rundamtu Jesuh a rak si.

        Hi thuanthu ih in zirh duhmi cu, kan suangtuah dan vekin thil hi a thlen lo can a um thei. Asinan Pathian in kan hrangah tumtahnak a nei ti hi kan theih hngilh lo a ṭul. Hi thing pawl hin an suangtuah vekin an cang lo nan an beiseimi an ngah ṭheh. A pakhatnak thing hi ro bawm mawite ah tuah a si lo nan,a beisei mi ro hmuahhmuah lakih ro sunglawi bik naute Jesuh a cawi ngah. A pahnihnak zanthing khal lawng tumpi ah tuah a si lo nan a beisei vekin siangpahrang hmuahhmuah lakih Siangpahrang Jesuh a phur ngah. A pathumnak thingkung khal tlang parah ṭhang vivo in thingkung sangbik ah a cang lo nan mi kip hmuh ah tlang zim ah dingin rundamtu Pathian Jesuh a tongtham ngah. An suangtuah vek in an cang lo nan an hnenih Jesuh a thlen veten an lung di a riam ih an hna a ngam. Kan beisei vek kan thlen lo khalle Jesuh kan neih ahcun hnangamnak in kan khat ih lung diriamnak kan nei a si.

        Bawipa in “Ka ruahnak cu nan ruahnak bangtuk a si lo. Ka lamzin le nan lamzin cu a dang aw a si. Van tla khi leilung hnakih a sang bangtukin Ka ruahnak le ka lamzin cu nan ruahnak le nan lamzin hnakin a sng sawn a si. Isai.55:8-9

(Hminsin: A cekci ih letmi si loin a semrem deuh dan ih letmi a si).

Hram: English Stories App