Beel le Beel Tuahtu

  

          Beel le beel tuahtu thu hi Baibal sungah hmuh ding a um hnuai hni. Thukam hlun lam kan zoh tikah Pathian in Israel pawl nun a simnak thuah Beel le beel tuahtu thu a hmang ṭheu. Thukam thar lam khalah Thukam hlun ta la sawng in ngan lang a si. Beel le a tuahtu thawn pehpar in thazang la tlang sehla.

1. Beel tuahtu ropi kuat suak (Isai.64:8; Jer.18:6; Sem.2:7)

          Beel tuahtu hi zo dang si lo in Amah Pathian a siih  A tuahmi beel hi minung kan si. Curuangah cungnung bik Pathian ih kut suak rori kan si. Thil hi man a neihnak hi a tuah parah tampi a ṭhum aw. Lei dan khalah company hmin a neimi ih thil tuahmi cu a man a khung ih kan ngaisang ṭheu. Cu lo le mihmin thang pakhat in thil a tuah tikah a thil tuahmi cu mankhung zet khalin an lei duh ṭheu. A thilri cu bang aw khal sehla mi menmen ih tuahmi cu a man pangai in lei a si ṭheu ih mi hminthang pawlih tuahmi cu aman pangai lo tak, man khung zetin an lei aw ṭheu. Cucu a tuahtu ih ruangah man a nei, a sunglawi. Kan ni khal menmen ih ra um kan si lo ih cungnung bik Pathian ih kut suak kan si hi ziangtluk sunglawi a si na ruat dah maw? Cungnung bik Pathian ih dinmi, semsuahmi kan si (Sam.139:13,15).

2. Leilung men ihsin bungbel dinhmun ah (Rom.9:21; 2 Tim.2:20,21)

          A tlun ih kan tarlang zo bangin beel tuahtu cu Pathian a siih beel cu minung kan si. Beel cu ziang ihsin tuahmi a si kan tile leilung ihsin tuahmi a si. Leilung menmen dinhmun ihsin a tuahtu ih beel dinhmun ah a tuah. Phun dangin kan sim asile asi nak hnakih dinhmun sang ah a tuah tinak a si. Leilung menmen a sinak hnakih sang sawn, ṭangkai sawn, thupi sawn ah a tuahtu in a tuah. Curuangah beel in amah ah tluangkhawn ding zianghman a nei lo,a tuahtu lawng hi sunloih ding a si. Pathian in kan ni khal leivut men ihsin hman dingmi bungbeel ah in tuah, ziangtluk in a sung lawi. Pathian in ni sunglawi ih hman dingah le ni  tin hman dingah in tuahmi kan si. A caan caan ahcun in tuahtu ih in tuahsankan theih ṭheu lo ruangah hman theih lo khop in kan um ṭheu. In tuahtu Pathian hrangaih hman theih lo kan si ahcun kan si dan ding kan ṭhleh lellel tinak a si.

2 Tim.2:21-22 ih a lang dan vek asile hnaṭuan sunglawi ih hman kan si theinak dingah thil ṭha lo hrial ih thianghlim te ih kan um a ṭul. Tisa hiarnak pawl khal kantlansan a ṭul. Bawipa in hman theihmi dinhmun ah in ret ih kan ni khalin hnaṭuan sunglawi ih hman kan si theinak dingah nitin kan nunnak ah nun thianghlimnak lamzin kanzawh a ṭul tinak a si.

3. Beel tuahtu ih thuneihnak

(Jer.18:6; Isai. 29:16; 45:9; Rom.9:20-21; 2 Kor. 4:7)

          Beel le a tuahtu thuhla kan zoh tikah kan hmuh tam bikmi cu a tuahtu ih thuneihnak a neih zia hi a si. Beel tuahtu in a tuah dan thu ah thu a nei ih a hmannak khal ah thu a nei. Beel in a tuahtu hnenah ziang ah saw? Ziang ruangah saw? Tiah thu a sut thei lo. Beel tuahtu in a tuahmi beel parah ziang tlukin thu a nei ti kantheih feng asile Pathian parih vuivainak kan neih ṭheumi hi kan nei nawn lo ding. A caan caan ahcun zumtu in Pathian hi kan duh dan vekih um ter kan tum ṭheu. Kan duh dan ti hlawhtlingtu ding fangah Pathian hi kan hai ṭheu. Kn duhdan vekih  thil a tlen lole kan vuivai ṭheu hi beel le a tuah tui dinhmun kan theih lo ruangah a si. A duh dan vekih kan um ahcun Pathian in kan duh dan cu in theih sak ko ee, el ding ciamco cu a si lo. Cu mi hnakih thupi sawn le hmaisa sawn ding cu amai duh dan sawn a si. Kan ni in Pathian hi kan duhdan in kan um ter ding asi lo ih amah sawn in a duhdan in in hmang ding a si sawn.

4. Vuak kuai mi bel  (Jer.13:14; 19:10-11)

          Thukam hlun ahcun Israel pawl hi Pathian ih hril cemi miphun an si ih Pathianin a hmang, a ṭan, thlua a suah, a cawm hai. Asinan an duntun ih thil ṭha lo an tuah tikah cun Pathian in a hrem ṭheu. Cucu Pathian in beel, kom theih nawn lo ding khop ih vuak kuai dingmi dinhmun in a rel. Tlak beel hi sunglawiin ṭang kai zet khal sehla vuak kuai awlte a si ringring. Zumtu kan nunnak ah ralrin ṭul zetmi kan nei. Pathian ih kuatsuak, a hmanmi beel kan si ih Pathian kan lamah a ṭan ahcun zohman ih neh theih lo kansi laiah Pathian duh lo zawngih kan nun ahcun in vuak kuai thei. Pathain ih in vuak kuai ahcun zohman ih rem theih kan si nawn lo ding. Bawipa in in hman tikah cun a sunglawi zetmi kan si laiah in vuak kuai cin ahcun zohman in inhai nawn lo ding. Pathian in ṭangkai takih hman dingah in tuah vekin in vuak kuai tikah cun ṭangkainak ziang hman nei nawn lo, hman tlak lo kan si ding.

          Aw le beel le beel tuahtui’ dinhmun kan relmi hi zumtu pawl ih kan dinhmun a si. Lei beel menmen kan nak le in tuahtui ruangih sunglawi kan sinak pawl le a kuai theimi kan sinak pawl in kan nunnak hrangah ralrin thiamnak in pe hramseh.