Tuesday, July 31, 2018

PATHIAN DEKCOKTU PAWL LE AN PARIH THIL THLENG

Nangmah le nangmah bum aw hlah. Zo khalin Pathian an dekcok thei lo. Milai cun an tuhmi vek cekci in an khawm ding (Gal 6:7)

(1) JOHN LENNON
Leitlun hminthang hlasak thiam John Winston Ono Lennon hi 1940 October 9 ni ah Liverpool ah a suak ih, 1980 December 8 ni ah a thi. Amah hi hlaphuah thiam, hlasak thiam le remdaihnak lam khalih nasa zet ih cangvaitu pakhat a si. Cun Awnmawi khawvel ih a lar zetmi Beatles Band dintu tla a si. Beatles Band hi anmai' san lai ahcun mipi thinlung an neh ngaingai. 1966 kum ah John Lennon in, "Beatles group hi Jesuh Khrih hnakin a hmin a thang sawn," tin uarawknak thinlung thawn a aupi. Cuih hnu rei lo te sungah Beatles Band cu an ṭhen aw ṭheh. Amah John Lennon khal zo ti theih lomi mi pakhat in meithal thawn vei ruk rori in a kap ih a thi.


(2) TANCREDO NEVES
Tancredo Neves (March 4, 1910 - April 21, 1985) hi Brazil rampi ih President ṭuan dingih mipi hril tlinmi pakhat a si. Amah hi naingnganzi thiam tak, sihni le pumsumnak thiam tak milian zet pakhat tla a si. President ṭuan thei dingih thusimnak thawn vote hawl ih a vah rero lai ah, "Keimah i duhtu mi ting-5 an um ahcun Pathian rori khalin i dirtla thei lo ding," tin a aupi. A sim vekin vote a ngah taktak ih Brazil rampi ih president ṭuantu dingah mipi in an hriltling tariai. Asinan Brazil rampi President a ṭuannak ding zarh khat lawng duh ah 1985 April ni ah a nunnak a cem.

(3) MARILYN MONROE 
Marilyn Monroe  hi leitlun hminthang American mintami, model le hlasak thiam zet a si. Billy Graham in thuthangṭha a simnak ah ra ve dingin a sawm nan Marilyn Monroe in, "Nang ih Jesuh ka ṭul lo," (I don't need your Jesus) tin a rak let. Cuihhnu zarh khat a rei ah amai' khaan sungah a thi cia in an hmu. Tui ni tiangah Marilyn Monroe hi ziangruangah a thi? Zo in a that? ti khal an thei thei hrih cuang lo. 1926 June 1 ni ah a suak ih 1962 August 5 ni ah a thi. 

(4) CAZUZA
Cazuza hi Brazil mi a si ih, hlaphuah thiam le hlasak thiam zet pakhat a si. A hmin ngai cu Agenor de Miranda Araújo Neto ti a si ih, 4 April 1958 kum ah Rio de Janerio khawpi ah a suak. Canecio Show ah hlasaknak thawn mipi an awih rero lai ah a fawhmi kuakbel kha, "Khah...Pathian, himi kuakbel hi rak fawp aw," tin thli lakah a vun hlon. Pathian a hmuhsuam ruangah kum note kum 32 mi si in thin khensa (cancer) thawn 1990 July 7 ni ah a thi.

(5) CAMPINAS
2005 kum ah Campinas cu a rualpi pawl thawn picnic feh dingin mawṭaw sungih an to lai ah hringtu a nu in, "Ka fanu, Pathian thawn feh tlang aw maw. Pathian in lo kilhim hram seh," tin a vun auh. Asinan a fanute in, "Pathian cu mawṭaw dunglam khaan sungih thilri pawl rehnak ah um men seh. Cutawk ihsin in rak thlun men seh. Kan tonak kiangah hmun-lawng a um nawn lo," tin capo le hmuhsuam phah in a vun ti. Cutin mawṭaw thawn an pok hnu nazi pakhat hrawng a rei tikah mawṭaw pahawknak ruangah pakhatte hman nungdam in a luat um lo in, an zate in an thi ṭheh. An mawṭaw cu ṭuanvoneitu pawl in an vun zoh tikah palik hotu pakhat in, "Mawṭaw dunglam cu ziang ti hman a cang lo. A siatmi tla a um lo. Ar-ti pumkhat hman a kuai lo," tin a sim.

(6) CHRISTINE HEWITT
Christine Hewitt hi Jamica thuthang suahtu le phuangtu a si. "Cabu hmuahhmuah lakah Bible sungih Pathian ṭongkam hi a sia bik," (Word of God was the worst book ever wirtten) tin tonsuhnak an tuahnak ah a sim. Cuih hnu rei lo 2006 June 29 ni ah a mawṭaw meisa kangnak ah a thi cia in a ruang an hmu.

(7) JOSEPH BELL
Joseph Bell hi 1861 March 12 ah a suak ih 1912 April 15 ni ah a thi. Amah hi Titanic Lawngpi tuahnak ah Engineer hotu bik a si. Titanic lawngpi tuahnak ah hotu bik a si ih, Lawngpi hi ziangtluk khohkhah in an tuah ti langter duhnak ruangah "Titanic lawngpi hi Pathian hman in a pilter thei lo ding (Not even God can sink it). Pathian ih siatbal theih lo ding khop tiangin a khohkhah a si," tin Pathian congiar/cozuam (challenge) phah in a rak sim.
- 1912 April 10 ni ah Southampton ihsin New York khawpi lam pan in a feh.
- Runhimnak lawng fate a phurhmi hi mi 1178 hrang lawng a si.
- Titanic Lawngpi totu hi mipum 2224 hrawng an si.
- Mi 1500 lenglo an thi ih, mi 705 hrawng nungdam in an um.
- April 14 ni (peng 375 an feh hnu) zaan lam nazi 11:40pm ah tipi hnuai ih vur-tlangpi a ṭaih.
- April 15 ni zing lam nazi 2:20am ah Titanic Lawngpi a siat, cutin tipi sungah a pil murmo.
- A pilnak ti thuknak hi pi 12,415 (3,784) a si.
- 1985 kum ah Titanic Lawngpi siatmi an hmu.
- Titanic Lawngpi pil lai ih um le rak luattu le nungdam rei bik Millvina Dean cu kum 97 mi si in 2009 kum ah a thi.

(8) Comedian NIKKI GLASER

January 5, 2025, Beverly Hilton in Beverly Hills, California ih a vei 82 nak  Film le TV lamih ti ṭha hleice pawl laksawng an peknak (Golden Globe Award) ṭum ah, caan hruaitu (host) Nikki Glaser in mipi pawl hlimnak dingah hnihsuak a siah. Cui a hnihsuah siahnak ah Pathian ziang rel lo takin "tuiṭum ih lungawi thu simtu pawl in lei le van sersiamtu Pathian cu veikhathman an sal lang riai lo.  Pathian umlonak/ Pathian thupi lonak khawipi (godless town) a si vekin mang bang ding khal zianghman a um lo tiah, Pathian cu hnihsuahsaihnak ah a rak hmang. Cui program a cem hnu (Nazi 48 hnu ah ) ni hnih, January 7 2025 ah Carlifornia cu ah kangmei nasa tak a suak ih inn thawng tampi a kang ziam thluh.

Hram:
- https://www.bing.com/search?q=john+lennon&FORM=HDRSC1
- https://en.wikipedia.org/wiki/Tancredo_Neves
- https://en.wikipedia.org/wiki/Marilyn_Monroe
- https://en.wikipedia.org/wiki/Cazuza
- http://jamescameronstitanic.wikia.com/wiki/Joseph_Bell

Lairawn Meifar
(116/2018)