1.
Jesuh Hrangih Siannak
Jesuh
Jerusalem ih a luh ding tikah a dungthlun mi pahnih hnenah “ nan hmaiih khua ah
va feh uhla zohman ih to hrih lomi laak note nan hmu ding, ka hnenah rak hruai
uh, ‘ ziangah so nan phoih’ an lo ti asile ‘Bawipa in a hai, a lo khirhsal cing
ding’ ti ah va ti uh” a ti. a fial vek cun ziangkim an tuah. Hi laak note neitu
hi zo a si ti Baibal ah lang lo hmansehla fiangzet ih kan hmuh theimi cu a
neitu in Jesuh hrangah siangzetin a hmangter ti hi a si. Jesuh leitlun ih a len laiah mi dang neihmi a
hmansak caan a um ṭheu. Mi dang ih haimi a ti famkim sak thu cu a tam zet nan amai haimi ihmidang ta a hmannak thu cu a lang tam lo.
Tui sun
ni khalah Pathian hi ziangkim ti thei le ziangkim neitu a si ko nan a mi le fa
pawl ih kan neihmi hman hi Bawipa in a duh ṭheu. Hlan zumtu pawl nun dan kan
zoh tikah a nundan ihsin zir tlak zetmi cu Bawipa'i ruangih an siannak hi a si.
Bawipa'i hrangih an ui lo zia a langnak cu an zumtupi, unau hnenah a neih thil
ziangkim an hlawm. Pathian cun a duh ahcun hmanrua ding hi cu a tla sam lo, hman
dingmi tampi a nei, cumi ah zumtu kan nunnak ih kan zoh awk a ṭulmi cu kan mai
ta a hman duh caan ah kan siang ve maw ti hi a si. Bawipa in a hai caan te ih rak siangtu hi mi vannei an si ṭheu.
Cun laak note hruai ding in a dungthlun a fiak ṭum ah Jesuh ih ṭongkam kan hmuh theimi cu “ … a lo khirh sal cing ding” ti a si. A
khirhsal thu ciah hi a lang sal nawn lo nan a khirh rori ding ti zum a um, a ṭongkam
pelh dah lo a si. Jesuh in midang thil a hmansak tikah hlawknak nasa zet a
thleng ṭheu. Piter ih lawng a hman sak ih nga tamzet an kai, nauhak pate ih
sang panga le nga pum hnih a hman sak ih a ei ṭheh hnuah bawm hleihnih a hlei
ti kan hmu thei. Pathian in kan neihmi in hmansak a si ahcun sun lak, heu lak
ti a um dah lo ih man nei zetah a cang ṭheu.
2.
Laak Note Parah a To
Jesuh
san laiah laak hi hman ṭangkai zetmi a si ih siangpahrang pawl khal in an hmang
nasa. Jesuh in Jerusalem ih lut dingah laak no te kher a hman hin umzia a nei.
Ziangruangah rang, kalauk ti pawl hmang loin laak note, zohman ih to hrih lo mi
kher a hman ti le:
( a) Siangpahrang a sinak a lang ter: Laak hi siangpahrang pawl ih an to ṭheumi a si vekin
Jesuh khal in a siangpahrang sinak langternak dingah laak note a hmang. Jesuh
hi siangpahrang hmuahhmuah ih Siangpahrang, Bawi hmuahhmuah ih Bawi bik a si.
( b) Remdaihnak tuahtu a sinak a langter: Siangpahrang pawl in
um zia nei ih rannung par an to ṭheu. Ral an tho ding ah si maw ral
nehnak ihsin an ra tlun asile rangcang an to ih remnak tuah ding an si le laak
an to ṭheu. Cu bangin Jesuh khal remnak tuahtu a sinak langter nakah laak note
a to. Lei le van doral cang zo, Pathian le minung ral si zo kha remnak in
tuahsaktu a si zia a tak in a rung lang (Rom.5:10). Remdaihnak Siangpahrang a si
zia hi Thukam hlun lam ihsin phuan ciami a si ( Isai.9:6). Cun laak note a to
timi cun lungnemnak thawn a rami a si
zia khal a langter. Jesuh hi mi lungnemmi a si zia Amah rori in a relnak
kan hmu thei ( Matt.11:28).
( c) Riantu sinak a langter: Laak hi ṭangkai takih an hman lehnak cu thir phur tu
ah a si ih curuangah phurrit sawngtu khal kan ti thei. Jesuh hi Siangpahrang a si
rual in kan phur rit in sawngtu khal a si. Amah khal in mi ih ren dingah si lo
in midang riantu dingah ka ra a ti. Cun “Phurrit a phurmi leh zonzaih a tuarmi
pawl ka hnenah ra uh” a ti kha. Curuangah kan phur rit hmuahhmuah in sawng ṭheh
tu Siangpa hrang a si.
( d) Pathian hrang serhmi a sinak a langter: Zo hman ih to hrih lo mi laak tote kher a hril hin
Pathian hrang liolio a sinak a lang ter. Pathian hrang, biaknak lam ih thil
thupi hrangah hin zo hman ih dai hrih lo mi an hmang ṭheu Mip.19:2; Daan.21:3;
1 Sam.6:3. Pathian in leilung rundamtu dingah a thlahmi, hriak a thihmi,
Messiah a sinak langtertu a si.
3.
Duhtu Zahra Huatu Zahra
Jesuh cu Jerusalem ih a luh tikah mipi in a fehnak ding ah an puan,
tuumkau an rak phah ih “ Bawipa’i hmin in a rami siangpahrang parah Pathian
thlawsuahnak um hramseh” tiah an au. Hi ṭum hi leitlun ih a um sungah mipi ih
sunlawihnak a co nasat bik ṭum a si hial ding. Cu tluk in mipi in Jesuh cu an
sunloih in an au rero lai ah farasi ṭhenkhat pawl cun Jesuh hnenah “ na
dungthluntu pawl daite’n um hai seh, sim aw!” tiah an ti. Farasi pawl in Jesuh
an lom ve lo zia leh an huat zia a lang nasa.
Pathian
hna kan ṭuan tikah mi hmuahhmuah in in lawm dingah hin kan rak ruat pang ṭheu,
lole mi tin ih lommi dingah kan rak neih aw ṭheu. Kan theih ding mi cu Pathian
hna kan ṭuan tikah khalah mi tamzet in in lawm ih in fak zet laiah mi huatu
khal bolo tihi a si. Cun in huatu an um ruangah than au ding khal kan si lo ih
Pathian in in duhdawtu le lainat ih in sunsak zettu mi ziangmaw zat in pe ti hi
kan thazang laknak ding a si.
Cabu siarmi pawl:
1. Hrekio Commentary Series, Thukam thar simfiangnak, Luka
2. Rev. Dr. Vanlalchawna Khiangte, Chanchinṭha Marka ziak
3. The Preacher's Outline & Sermon Bible
