Saturday, September 10, 2016

Saam 73



SAAM 73
            Saam 73 nak hi Asaf ih nganmi a si ih Asaf cu Levi mi a si bang tuk in siangpahrang David san lai ah Biakinn ah hlaruaitu, awmmawi lam ih tuanvo neitu a si. A tawi zawngin kan sim a si len mai innsang hna tuan lo, Pathian hnatuan, Biakinn ih Pathian riantu a si. Cui Pathian rennak ih a tikcu a hmang rero tu Asaf in a nunnak ih a tontehmi cu Saam 73 nak ah a run tarlang ih cumi hmangin thazang kan la tlang ding. Saam 73 hi then thum ah then in kan zoh tlang ding.


            1.      Tluknak/ Dungtolh Tumnak

                        Saam 73: 1- 6 Pathian cu Israel mi hnenah le thinlung thiang a neimi pawl  hnenah a ṭha a si. 2Asinain kei cu ka tlu zik thlang; Ka ke pawl an naal zik thlang a si. 3Ziangahtile mi hngal pawl khi ka iksiik ih, Mi ṭha lo pawl mi lian ih an can khi ka  hmu thei lo. 4Annih pawl cu natnak zianghman an tuar lo; An harhdam zetih an cak  zet fawn. 5Midang tuar zat in an tuar lo; Harsatnak khal midang tlukin an tong fawn lo.
                        Asaf in ka tlu zik thlang a ti mi in a rel suhmi cu Pathian a rennak ihsin a tluk zik thlang thu a relnak a si. A tluk ziknak san cu :

a.       Mi hngal/mi thalo pawl an lian
b.      An  harhdam sawn
c.       Harsatnak an tong mal sawn

Pathian riantu sawn hi hivek dinhmun ah ding sawn sehla Asaf nun hi a buai lo ding.Amai nunnak le mi thalo pawl nunnak a zoh tikah anih Pathian riantu hnakin Pathian ziang siarlo pawl an lian sawn kha a hmuh tikah Pathian kan rian man teh ziang a va si lo em, khawvelmi bangin um lawlaw sehla a tha sawn lo ding maw ti thinlung a nei thlang tinak a si.
                        Zumtu tampi khal hi dinhmun ih kan din caan a um theu ko ding. Pathian duh, Farah harsa bawmtu pawl, mi zawn ruat theitu pawl hi an lian sinsin khal le poi kan ti    lem lo, thlawsuah dong tlak an si kan ti ih kanlung awi pi sawn. Asinan Kan nih hnak    ih Pathian Pathian ziangih siar lemlo pawl anlian sawn,an tluang sawn,an thangso sawn hmuh tikah Pathian mawhthluknak le khawvelmi bangih um ve mai duhnak hi a um thei nasa.
            Zumtu unau nang teh hi din hmun ah na ding dah maw? Kan mah hnak ih Pathian  ngaihsak lo pawl an tluangih, an thang so sawn ih in hleih theh tikah ziang vek in kan um? Pathian thu thlun hi a thathnemnak a um lo a si lo sawm tiin kan ruat dah maw? Pathian rian rero tu Asaf khal hi dinhmun ah a ding.Asinan ziang ti’n a um ti kan vun zoh ding.

2.      Theithiam Dingih Zuamnak

16Curuangah hi thu cu thu harzet sihmansehla, Theihthiam ding napi in ka zuam. 17Cule na Biakinn sungah ka feh, Cutik lawngah mi ṭha lo parah Ziangvek thil a thleng ding, ti ka thei ngah a si.

            Asaf cun cu ti vekih a nunnak ih thu harsa a ton tikah ziangtin a tuah? Amah ten a tal mai lo ih Pathian biakinn ah a fehih a thu harsa hmuahhmuah Pathian hnenah a tlen. Hi thute hi a va mawi lawmmam ve. Kan nunnak ih harsa kan timi pawl hi kan mah ten kan phurh ahcun beidon thlak tak a si. Pathian hnenih kan thlen tikah cun kan buainak a kiam theu.Asaf hi Pathian hnenih thla a cam veten a lian a si lo.Asinan theih ngahmi a nei ih cui a theihmi in a nun ih thu harsa kha a hlo ter.

            Zumtu in kan nunnak ih harnak kan tonmi tete hi a bang aw cio lo ding. Harnak ton lo khal kan um lo ding. Cui tik caan ah ziang kan tuah? Ziang ti’n kan um? Mi dang hnenih thutlantu si lo in Pathian hnenih kan harnak thlentu kan si ding hi a va thupi ve. Pathian cun kan harnak pawl hmuahhmuah hi a ti ngaihnak a thei theh.

3.      Nun Hnget/ Nun Diriamnak

                        Cang 25 Vancung ah nangmah siar lo ziangso ka neih? Nangmah ka lo neih hnu ahcun Leilung tlunah ziangso ka hai? 28Asinain Pathian kiangih ka um hi ziangtlukin so a ṭhat! A thil tuahmi hmuahhmuah sim le rel dingah, Bawipa Pathian cu ka   beunak ah ka tuah zo. 

                        Saam 73 a thoknak ahcun Asaf ih nun cauhnak kan hmu nan a net kharnak  ahcun ziangtluk in a nun a hnget ti a lang sal. Mi umdan / mi sinak/ midang dinhmun    in a nunnak a hnin ter thei nawn lo. Mi hngal pawl cu a len len khan rak lian hai ko seh, an thansoh dandan khan rak thang so hai seh, ka buai nawn lo. An nih vekih ka thansoh lo khal a si le kei ka hrangah cun Pathian naih hi a tha bik ti nun a nei thlang. Asaf in Pathian naih a timi hi ziang a si pei? Amai dinhmun ahcun Pathian Biakinn ih  hna a tuan pawl kha a rel duhnak a si. A hnak ih mi lian, neinung pawl a daw nawn lo, a iksik nawn lo ih cu vek mi pawl hnak in Pathian naih ( Amai hnate tuan kha ) tha  a ti bik sawn a si.

                        Zumtu kan nun zohawk salnak ah hi thu hi sut aw ve sehla.
1.      Na  hnakih Pathian ngaihsak lo ih na ruahmi pawl an thansoh sawn tikah na nun a hnin ve maw?
2.      Mi dang an lian sawn ruangah na khawruah a har dah maw?
3.      Mi neih vek neih lo ruangah Pathian hnatuan bansan duhnak na nei maw?
4.      Khawvelmi pawl an tluan ruangah khawvelmi vekih um ve mai na duh ve maw?
5.      Midang an thansoh sawn ruangah Pathian ren rero hi a sawtnak um lo vek in na ruat dah maw?

                        Pathian in in hruaidan ah amah naih sehla cucu zumtui’ hrangah a tha bikmi a  si. Vancung ah nangmah siar lo ziangso ka neih? Nangmah ka lo neih hnu ahcun    Leilung tlunah ziangso ka hai tihi kan nunnak a tak in thleng ve hram seh.




No comments:

Post a Comment