Calender

Calender

Calendar, thlahmin pawl hi Rome mi pawl ih bunmi a si ih Calendar hmaisabik cu BC 7 lai ah khan Numa Pompilius in a duang. Anih in a caan laiih Roman Calendar hmaisa, thla 10 tiang a ummi kha zoh sal in a ti
danglam ih thla hnih dang- January leh February a bet. Cucun kumkhat ah thla 12 a um ih tui ni tiang cu tin run hman peh vivo a si.

1.      January          : Rome mi pawl in an pathiannu,a rual in hmai lam leh dunglam hmu kop thei ih an ruahmi Janus hmin cawi ih an phuahmi a si.A thok ah ni 29 a um ih Julius in ni 31 ah a run thleng.

2.      February        : Rome mi pawl ih pathian, thihnak le thianhlimnak pathian Februus hmin cawi ih phuahmi a si. A thok ah ni 28 a um ih Numa in ni 23-24 ah a thleng sal hnuah Julius in ni 28 ah a run thleng sal ih kum 4 dan ah ni 1 bet in 29 a um. ( Kum 4 dan ih Feb. 29 a ummi kha Leap Year tiah kawh a si.)

3.      March : March hi Rome mi pawl in doawknak pathian Mars hmin cawi ih phuahmia si. Calender hmaisa bik ahcun thla 1 nak a sin an Rome pawl in thlathumnak ah an run ret.

4.      April   : April hi Calender hmaisa ah cun thla 2 nak ih ret a ih remthat hnu ahcun thla 4 nak ah an run ret. A hmin hi Rome mipawl ih an pathian a si mi,duhdawtnak leh hmelthatnak pathian hmin cawi ih phuahmi a si zum a um. Ni 30 a ummi kha Numa in ni 29 ah a thlengsal nan Julius in ni 30 ah a ret kir sal.

5.      May    : Rome calendar hmaisa ahcun thla 3 nak ih ret a si ih lehhnu ih remthat a si ah khan thla 5 nak ih ret a si. Rome pawl in an pathiannu Maia hmin cawi in Maista an ti.

6.      June    : Rome calendar hmaisa ahcun thla 4 nak si in ni 29 a nei. Julius in BC 46 ah ni 30 a neih ter. Rome pawl in neihawknak pathian leh nunau pawl hamthatnak thlentu pathiannu Juno hmin cawi ih sakmi a si.

7.      July     : A thok ahcun July thla hi Quintiles ti a si ih hi thla hi Lulius Ceaser suah thla a si.BC 44 kum ah Ceasar cu thah a si ih a mah cawimawinak hrangah ti in July tiah thleng a si.

8.      August            : Rome pawl cun Sextilis an ti ih a sullam cu 6 tinak a si vekin thla 6 nak ah ret a si. Asinan Julius bangin Rome emperor Augustus in a hmai hmin cawimawinak hrangah August ti’n a thleng.

9.      September      : Septem ti mi ihsin lakmi a si ih a sullam cu 7 nak tinak a si. A thok lam ahcun thla 7 nakih ret a sinan a nelam ah thla 9nak ah ret a si. A thok ah ni 30 a um ih Numa in ni 29 ah a thleng. Lehhnu ah Julius in ni 30 ah a ret kir sal.

10.  October          : Rom calendar hmaisa ah thla 8 nak a si. Rome emperor Augustus a lal lai ihsin ni 31 a si lan ta.

11.  November      : Rome calendar hmaisa ah thla 9 nak a si.Rome rorel pawl in Tiberus ram uktu ding Caesar hi thla 11 nak ah an hril theu.

12.  December       : Rome calendar hmaisa ah thla 10 nak a si. Tu ah cun thla 12 nak,thla netabik a si.BC 46 hlan ahcun December in ni 29  a si ih Julius in 2 a bet ih ni 31 ah a cang.

Hram ; Amazing Top 10 Facts