Kan Bang Awk Lonak Hmangin Siahsuah Kan Si Pang Maw? : Kiosa le Caw 3

1 Pit.5:8 – Fimvar tein um uh! Ralring tein um uh! Nan ral Satan cu deh ding hawlah a huuk reromi kiosa bangin a tawi a vak zok rero a si.

 

         Kan ral Satan cu ziangtik haman ah kan ṭhat ding duhtu a si dah lo.  Zumtu pawl in siatsuah ding hi a hnaṭuan a si. Bul pak lawng si loin kawhhran le pawlkom zawng khalin in siatsuah ding hi a tum ringring. Hi thu thawn pehpar ih tahṭhim thu pakhat sim sehla.

 

Veikhat lai ah hramlak hramhring demdi a umnak hmunah caw dum, caw sen le caw rang an rak um. Cui caw pathum pawl cu an duhdaw aw zet ih hmun khatah an kual tlang huahhi ṭheu. Nikhat cu kiosa pakhat rilrawng zet cu deh ding hawl in an hnem lam panin a ra. Deh ding caw pathum a hmuh tikah kiosa cu a lung a awi zet. Asinan cui caw pawl cu an ṭangrual tuk tikah a deh thei lo. Curuangah kiosa cu lungpi phenah relh in caw pawl a dangdang ih a ṭhenṭhek awk ding cu thinsau tein a hngak. Hmansehla caw pawl cu an fim zet ih ‘hmun khawm teih kan ṭanrual sungah cun zohman in in siatsuah thei lo ding’ ti an thei. Kiosa cun ni hnih ni thum tiang a hngah hnu khalah caw pawl cu an ṭhenṭhek aw cuang lo. Cu tikah a thin hngiar a ṭeu thlang ih ti dan  ding a ruat thlang.

 

Caw pawl hnenah cun a va feh ih cibai a buk hai ih “Rual le pawl nan dam hai maw? Ka buai deuhih nan hnen ka ra thiam dah lo, tui sun cu nan hnenih ra dingin ka ruat fel aw ih a ra a si hi” tiah a va ti. Cutik ah caw sen cun “ bawipa tui sun kan hnen na ra cu lungawi a va um lawmmam ve” tiah a ti. Caw sen in Kiosa cu awka ṭha ih a rak biak an theih tikah “ ziangah caw sen cun kiosa ih awka ṭha cu a lunmai, kiosa pawl cun ramsa dang deh ding an hawl timi a thei lomaw si aw” tiah caw dum le caw rang cu an mang a bangih an riah a set zet.

 

Ni a liam vivo ih kiosa le caw sen cu an nel aw deuhdeuh thlang. Caw dang pa hnih cun kha vek ih um lo dingin an sim rero nan caw sen cun a thlun duh cuang lo.

 

Veikhat cu kiosa in caw sen hnenah “ Zoh hman!  nang le kei ih rong cu a thim lam a siih caw rang ih rong cu a tleu. A thim le a tleu cu a linglet aw mi a si. Curuangah caw rang hi deh sehla a ṭha ding, cule kan lakah danglam awknak a um nawn lo kei nuam zet in kan um tlang ding” tiah a ti. Caw sen cun Kiosa ih ruahnak pekmi cu a lungkim ih caw dum hnenah a feh ih a be buai ciamco. Caw rang cu a mah lawng a paak thlang tikah kiosa cun a deh ih a sa a ei.

 

Ni hnih thum a rei hnuah kiosa cu a ril a rawng sal ih caw sen hnenah a feh sal ih “ Zoh hnik nang le kai hi kan rong hi a bang aw cekci ih caw dum cu kanmai rong vek a si ve lo. Curuangah ka deh dingih cuticun rong bang aw cekci nangmah le keimah lawng hi hmun nuam zet ah kan um tlang ding” tiah a ti lala. Cu tikah Caw sen cu caw dum kiang ihsin a dang ah a ṭhawn ih “ Keimah pakhat lawng kiosa thawn kan rong a rak bang aw cu ka va van ṭha lawm mam ve” tiah lungawi zet in a um. Cuti cun kiosa cun caw dum cu a deh lala.

 

Ni reilo te hnuah kiosa cu a ril a rang sal ih “ Hey caw sen, khui ah na um” tiah a huuk dumdo thlang. Caw sen cun khur thlohthlo cing te’n “hinah a um” tiah a ti. Cutikah kiosa cun “tui sun cu nang ka lo deh caan si thlang, ralring aw” a ti. Caw sen cun “rualpi ṭha aw kan si kha, i fialmi hmuahhmuah ka tuah ṭheh kha, ziangah saw i deh tum?” tiah a ti. Kiosa cun kei rualpi ka nei lo pi, kiosa cun ziangtin saw caw cu rualpi thei ding? a ti. caw sen cun zangfan a dil rero nan zianghman a sawt cuang lo. A netnak ahcun caw sen in “ i deh hlah an tongnak caan I pe ta aw” a tiih kiosa cun “ sile zam rang in tong aw” a ti. Cutikah caw sun cu hi tiin a au ruang ro:

 

Caw rang deh a silai ah deh ka zi ve zo.

Caw dum deh a si laiah deh ka si ve zo.

Kiosa thawn rualpi kan si ni ah deh ka rak si zo. 

 

Cu tiih a au ṭheh veten kiosa cun a deh cih. Cuti’n kiosa cun a ṭang rual zetmi caw pawl cu an bang awk lonak cu remcang ah la in a thlem tikah a npathum in a deh thluh thei.

 

Hi thu ihsin kan zir dingih ka duhmi cu

 

Zumtu pawl khal hi kan ruah dan, duh dan, feh dan a bang aw thlepthlep thluh lo. Kawhhran le pawlkom tin khal bang awk lo nak tete kan nei cio. Cui kan bang awk lonak malte a ummi cu ralpa Satan in remcang ah hmang tahrat in khat le khat ṭangrual thei lo dingin in thlem ṭheu ti kan thei kei uh. kan bangawknak tamzet cu ret ṭha in kan bangawklonak malte sawn ruangah kan do aw ciamco pang asile Satan lungawi zawng a si. Kan bang awk lonak malte cu ret ṭha in kan bangawknak a tamsawn mi hmangin kut sih aw in Pathian kan rian tlang kei uh.

 

 

English stories andriod application sung ihta a remcan dan ih letmi a si.