Hlanlai ah Thangte timi a rak um. Amah cu mi duham, hrokhrawl le mai hlawknak ding lawng ruat ih hmakhua sial hmang a si. Tangka tampi ngah ding lawnglawng ruat ih tangka a ngahnak ding a si ahcun mi bum khal poi tinak zianghman a nei lo. Cun a neihmipawl hi midang hlawm khal a siang dah lo. A hnaṭuantu pawl khal hlawhman malte lawng a pe hai.
Ni khat cu dam sung daih a nunnak danglam tertu thil a zir ngah. Cucu hi ti bangtukin a si:
Veikhat cu Thangte ih tangka bawm a hlo. Cui a tangka bawm sungah tangka 50 a um. Cui a tangka bawm hlo cu a suk le so ah a hawl ciamco na’n a hmu thei lo. A innhnen le a rual pawl khal in an hawl pi rero na’n an hmu thei cuang lo.
Ni rei lo te hnu ah a tangka bawm cu nauhak nute pakhat in a sar ih a pai’ hnenah tangka bawm a sar thu a sim. A pa cu Thangte ih hnaṭuantu a si vekin cui tangka bawm cu Thangte ih ta a si ti thei in a pupa hnenah a hei keng ih a sugnah tangka 50 a um le um lo tla a cek ter. Thangte cun a tangka a ngah sal tikah a lung a awi nasa. Sikhalsehla a duham tuk ah hrawkhrawl suah tahrat in a hnaṭuantu pa hnenah cun “Ka tangka bawm sungah tangka 75 a um sisi, i pekmi cu 50 lawng a si, a kim lo, a dang khui ah na ret , na ruk a si hi” tiah thuphan a puh.
A hnaṭuantu cun cui thu a theih tikah a mangbang nasa. Cuti’n Thangte cun an thuhla cu thuṭhennak hmunah a thlen. An thu hla cu thuṭhentu hnenah an sim veve. Cutikah Thuṭhentu cun nauhak nute le a pa hnenah “nan sarmi tangka bawm sung um zat hi 50 a si ngaingai maw” tiah a sut ih an nih in tangka bawm sungih um mi cu 50 a si zia a sim. Cun thuṭhentu cun Thangte cu thu a sut ve ih a nih cun “tangka bawm sungah 75 a ret ih an pekmi cu 50 lawng a siih 25 an ruk a si ko” tiin a sim ve. Thuṭhentu cun Thangte hnenah “na tangka bawm ah 75 a um ti cu na fiang ko ti aw”, tiin a suh sal ih a nih in “ka fiang ko ve” tiah a ti thotho.
Cutikah Thuṭhentu cun hi bangtukin thutluknak a tuah:
Thangte ih tangka bawm hlo cu 75 a ummi a siih nauhak nute ih sarmi cu tangka 50 lawng a um ruangah nauhak nute ih sarmi tangka bawm hi Thangte ih ta siloin midang ih tlaumi a si ti a fiang. 75 a um mi tangka bawm sar a si tik le cucu Thangte ta a si ding. Tu tiangah tangka 50 hlo thu ka hnenih in simtu an um lo ruangah hi tangka bawm le a sungih 50 cu a sartu nauhak nute le a pa in an co pei tiah mi tluangtlam an sinak sunloih phahin thutluknak a tuah. Cuti cun Thangte cun a tangka bawm le a sungum 50 cu a duham le hrokhrolnak ih rungah a caan lan ta.
Tluangtlam takin nung aw la na hmakhua a ong ding. Hrokhrolnak
cu kanmah in siatsuahtu a si.
Pathian in zumtu pawl mi hrok hrawl le duham hmang kan si pang maw? Kan Baibal in siang zetin nung aw la na lian ding tiah in sim. Cun dingfel teih um hi kan Pathian duhmi a si ih zumtu pawl kan nun dan dingah Baibal ih in zirhmi khal a si.
Hminsin: Hi thuanthu hi English Stories andriod app
sung ihsin a remdan dan ih lehmi a si.
No comments:
Post a Comment