Hannah Nun ihsin Zirnak

        Baibal singih nunau lakah Hannah hi kan theih zetmi lakah a tel ve mi a si. Kan theihnak bik cu a faapa Samuel Bawipai’ hrangih a peknak in a si. Hannah hi Elkanah ih nupi a si. Elkanah in nupi pa hnih a nei ih pakhat cu Hannah a siih a dang pakhat cu Peninnah a si. Hannah hi faa a  nei thei loih Peninnah cun faa a nei. Cu tikah Elkanah cun thaiwnak a pek tikah a neupi Peninnah le a faale pawl cu an covo ciar a pek hai, asinan Hannah cun faa neih ve lo ruangah covo pakhat lawng a pek. Cun faa nei lo a si ruangah Elkanah ih nupi pakhat deuh Peninnah cun a tisiat ih ningzak in a tuah ṭheu. Cutikah Hannah cu rawl hman ei lo in a ṭap ṭheu, ziangtluk in a har ding. Hivek dinhmun ih a dinnak a nunnak ihsin thazang lak ding kan hmuh theimi pawl kan tarlang ding.

1. Hannah ih Lamdannak

Nau nei thei lo Hannah ih danglamnak cu harsatnak a ton tikah Pathian hnenah a tlan lut. A lamdannak kan ti tikah amah vekih nau nei thei ve lo nunau dang pawl nun thawn tahṭhim duhmi a si. Hannah hlan ahhin naunei thei lo larsar zet minung pathum kan hmu thei. Cu pawl cu: Sarah, Rebekah le Rachel pawl an si. Sarah cun Pathian in Abraham hnenah nau nei dingih a sim mi kha a rak theih tikah a hni, Pathian in faa ka lo pe ding a ti kha thil cang thei in a thei lo (Sem.18:12). Rebekah cu faa nei lo nan faa a neih theinak dingah amah rori in Bawipai hnenah faa a dil ve lo, a pasal Isaak sawn in thla a cam (Sem. 25:21). Rachel cu faa neih ve lo tikah faa  a neitu Leah kha a nahsik ih a pasal Jakob hnenah “faa i pe ve aw,culole ka thei ding” tiah a ti. Pathian hnenah siloin a pasal hnen lamlam ah a harsatnak thuhla  thlen. Cutikah Jacok khal a thin a heng ih “Pathian ih ai cu ziang tin so ka awh thei ding” tiah a kawk hnge hnge (Sem. 30:1,2). Hannah cu fa neih lo ruangah hmuhsuam a tuar nan a hmuhsuamtu le a pasal hnenah ziang ti hman in a ti loih Bawipai’ hnenah a harsatnak a thlen sawn. Pathian hnenih a thinlung harnak a thlen tikah thinlung thungai thlakin reipi thla cam. Amah vekih faa a nei thei lo mipawl cu Pathian hnenih an tlan luh lo laiah Hannah cu anmah vek a si ve lo, Pathian hnen hnenah tlan lut in amah rorin in thla a cam.

Zumtu pawl kan nunnak zoh tikah harsatnakkan ton caan ah Pathian hnenah siloin kan rinsanmi,kan sungkhat, kan rualpi hnen ah kan tlan hmaisa ṭheu. Bawipai hnenah kan harsatnak thlen hmaisa bik ding kan si. Mi ṭhen khat cun kan harsatnak pawl cinfelnak dingah Bawipai hnenah tlan loin Bawipai’ duh lo zawng tuah in hlawknak kan zuan ṭheu. Zumtu in harsatnak kan ton tikah Pathian inh a hnenah thla kan cam maw timi a thlir ṭheu. Job.36:13 ahcun Pathian thei lo pawl cun harsatnak an ton tikah bomnak dil in thla an camlo tiah a ti. Isai.65:1 nakah “Bawipa in ka minung pawl ih thlacamnak let dingin ka tiar aw nain an nih in thla an cam lo” tiah a ti. Hannah nunnak ih zir tlak zet cu: amah rori in a harsatnak bawipai hnenah thlen in thla a cam. Harsatnak kan ton tikah kan mah rori hi Pathian hnenah thlacamtu ding kan si.

2. Bawipai’ Hrangah Fapate a Dil

A tlun lamih kan tarlan zo bangin Hannah cu faa a neih ve lo ruangah hmuhsuamnak a tong. Asinan a thlacamnak kan zoh tikah hmuhsuanak ih a luatnak ding menah thla a cam lo. Cun Peninnah hnakih covo ṭha a ngah duh ruang khalah thla a cam lo. Amah dodal tu siatnak hrangah le Peninnah hnakih dinhmun dang sawn ih a um theinak dingah thla cam lo, Bawipai amah riantu ding fapate a dil sawn (1 Sam.1:11). Pathian in a thlacamnak a theih sak ih fapate a pek ih a hminah Samuel an sak. Hannah cun bawipai hnenih a dil laiih a thukam a theih hngilh loih Samuel cu hnawi a thlah vete’n puithiam Eli hnenah a fehpi ih a nunsung Bawipai hna ṭuan dingin Pathian hnenah a pe.

Zumtu zo cio khalin Pathian hnenah dilmi cu kan nei cio ko ding. Pathian hnenih thil kan dil tikah ziang vek lungput kan nei ṭheu. Kanmai hlawknak hrang ri ngot ruat in kan dil maw? Kan beiseimi Pathian hnenah kan thlen ih  Pathian in hlawhtlinnak in pek tikah Pathian in covo a nei ve maw? Hlawhtlinnak in petu Pathian teh kan mang ngaih maw? Pathian thluasuah kan don dan hi  voi khat nasa ngaingai ih dong in leh hnu ah dong nawn lo teh kan si pang maw?

Siangpahrang Hezekiah ih nunnak ih kan hmuh theimi cu: Pathian in profet Isaiah hmangin a thih thlang ding thu a sim tikah Hezekiah cu a riah a sia ih Pathian hnenah damnak a dil. Pathian hnenih damnak a dil tikah ‘i nung ter hirh aw, damnak i pe hram aw’ tihi a thlacam dan a si lo. Ziangvekin a dil ti le “Maw Bawipa, na hrangah ka nung ding, na hrang lawngah nun ka duh. I dam ter awla in nungter hram aw.” tiin a dil (Isai.38:16). Nung men men dingah a dil loih bawipai hrang nung dingin a dil. Pathian hnenih thil kan dil tikah Bawipai hrang ṭhathnemnak nei ih kan dil ding hi a thupi zet.

3. Pek cu Tam Sin Ngahnak

Pathian in Hannah ih thlacamnak cu a theihsak ih fapate a neiih a hmin ah Samuel tiah an sak. Hnawi a thlah tikah a nu in Shiloh khua Bawipai inn ah a feh pi ih Bawipai hrangah a hlan. Cutin Puithiam Eli ih finkhawinak hnuai ah a ṭhang lian. Hannah cun Bawipai hnenih a thu tiam vekin a fapate cu  Bawipai hrangah a hlan (1 Sam.1:27,28). Hannah ih thuanthu kan siar tikah Samuel a neih lawngin a cem lo ih a leh hnu ah fapa pathum le panu pahnih a run nei bet. Faate nei thei lo cu faate unau ruk neitu nu ah a cang (1 Sam.2:21).

Pathian hnenih pek hi tamsin ngahnak a si zia hi Hannah nunnak ihsin fiang tak in kan hmu thei. Pek cu tamsin ngahnak a si kan ti vete’n ngah duh ruangah pek ding cu a si hrimhrim lo. Pathian hi pek tlak a si zia thei ih lungawinak thawn pe ding sawn kan si. Pathian hnen ihsin kan donmi hi amai hnenah kan thlen sal tikah thluasuah tam sinsin donnak a si. Pathian ‘hinu, hi pa thluasuah ka pek hi cu a man hla riai si’ a ti mi kan si ding hi a thupi nasa. Hannah in a fapa Pathian hrangih a pek tikah faate dang  ngah bet beisei ih a pekmi a si lo, Pathian hnenih a dil vekin a pe sawn.

Hannah thuanthu hi Baibal hmun dangah hmun ding a um ve lo nan a nunnak ihsin zir ding ṭha taktak kan nei. Pathian biakin thangṭhattu a  siih a nunnak ihsin Pathian in mi ih nehsawn mi a theih hngilh lo zia tla kan hmu thei. Tuiṭum ah thupi pathum kan tarlangmi pawl hmangin Pathian in thazang thar lope cio hramseh.