Jesuh Suahnak le Lungput Phun Thum (Matt.2:1-12)

 Jesuh Khrih suahnak thuhla ah a bang aw lo zetmi lungput phun thum kan hmuh thei mi an um ih cu pawl cu: Nisuahnak lam ih arsi zohthiam, sakhua hruaitu pawl le Herod pawl ih lungput an si. An za te in mi thupi taktak hril an si, mifim pawl khal arsi zohtiam an si vekin ziangtluk an thupi ding, cun puithiam upa le daan thiam pawl khal biaknak lam ah mi thupi tak an si ve, Herod asile uktu a si vekin dinhmun sangtak a si. Jesuh Khrih suahnak thuhla ah mi thupi taktak rual an tong aw khawm hai, asinan an thinlung put cu dang aw tak an si.

1.  Pathian thu ziang siar lo thinlung put

Jesuh Khrih a suah tikah nisuahnak lam mifim pawl cun a arsi an hmu ih cui arsi thlun in a feh ih Jerusalem an thlen tikah “Judah mi pawl Siangpahrang dingah a suakmi naute cu khui ah so a um?” tiah an ti. Cui thu cu Herod in a theih tikah puithiam upa pawl le daanthiam pawl a ko hai ih thu a sut hai. Cu tikah an nih pawl cun “Judea ram Bethlehem ah a suak ding” tiah an ti. Sakhua hruaitu pawl hi thu an thei tuk, Jesuh suahnak ding hmun thuhla ah an thinlung a ai hal lo lawlaw,ol zet in a suahnak ding hmun an sim thei mai. Asinan hi thu thei zet hruaitu pawl in Jesuh hmu dingin a ke kar khat hman an kar cuang lo. Pathian thu cu an thei zet nan an nunnak ah Pathian duhnak ngaingai a um lo. Leh hnu khal ah puithiam upa pawl le daanthiam pawl hi Jesuh dodal tu an si thotho. Pathian thu cu an thei tuk nan an theihmi Pathian thu kha ziang ah an siar lem lo.

Tui san zumtu lak ah the Pathian thu thei zet siin Pathian thu ziang ih siar lem lo, a theih lawng thei zet nunnak ngaingai ih thupit lo, Pathian duhnak ngaingai khal nei lo hi mi ziangzat hmen um kei maw! Pathian thu lam khalah thiamnak hi a thupi tuk ko nan nuntharnak nei si loih thiamnak lawng neitu kan si pang ding hi a phan um zet. Kan ram Kawhhran dinhmnun kan zoh tik khal ah kan hnak in dohtu pakhat ah hi thil hi a tel ve ka zum. Leitlun nuntu khawsaknak a sang vivo ih thiamnak a sang vivo tikah Kawhhran hruaitu ding khalah thiamnak a nei mi, zirnak lamih thleng sang hi kan dap vivo. Thil ṭul zet a si ko. Asinan zirthiamnak lam lawng kan thlir tuk asile Pathian mi ngaingai sawn hi hnonmi ah an cang ding ih Pathian duhnak ngaingai nei lo mi thiam pawl lawngin in hruai pang ding ti cu a phan um nasa. Curuangah zumin nasa takin thla kan cam a ṭul. Kawhhran hruaitu dingah mithiam an si khal le nuntharnak ngaingai a neitu le Pathian duhtu taktak hruaitu kan neih ngah ding hi a thupi zet. Number one ih a thupi bik mi sawn cu Kawhhran hruaitu dingah cun Pathian mi, nuntharnak co felfel mi sawn hi an si. A tlun ih kan tarlangmi vekin, thiamnak lawng nei mi in Kawhhran an hruai asile Pathian thu ngaingai hi an nunnak ah thupi ih an ret lo ding ruangah a tuartu ding cu Kawhhran thotho a si.

Cun pakhat leh ah, ziangah Jesuh suahnak Bethlehem ah an feh lo ti asile Herod ih mit hmaiṭha ngah an duh, lole lungawi ter an duh, an parah a thinheng ding an phang. Ziangahtile Judah Siangpahrang a suak timi Herod in a theih tikah a thinheng zia le a lungawi lo zia an thei. Judah Siangpahrang a suak ti an theih tikah lungawi zet um hai sehla Herod ih mithmai ṭha an co nawn lo ding. Himi in Pathian mi ngaingai an si lo zia a lang ter. Pathian mi ngaingai cun minung mithmai hnakin Pathian mithmai an zoh ih minung lungawinak hnakin Pathian lungawinak an hawl sawn. Zumtu pawl kan nunnak ah mi ih mithmai ṭha ngah duh men ruangah minung (milian,thiltithei) kan tlon hmang kan si pang maw? Minung ih mithmai ṭha kan ngah hmanah Pathian mithmai ṭha kan ngah cuang lo ahcun kan lam a tluang cuang lo ding. Minung mithmai kan ngah lo hmanah Pathian ih mithmai ṭha kan ngah a si ahcun cucu kan hmuingilnak a si sawn.

2.  Khrih Siangpahrang dodalnak thinlung put

Khrih Siangpahrang dodalnak thinlung put cu Herod ih nunnak ihsin kan hmu thei. Judah Siangpahrang a suak timi thu theih hi cu Herod hrang ahcun thusia a si. An san laiah Rome lal san a si vekin thuneihnak nasa takin an hmang. Culai lakih Siangpahrang dang a suak timi thu theih hi cu a lungawi lo lawlaw. Midang siangpahrang an si ding hi a duh lo lawlaw. Curuangah Bethlehem le a kiangkap khua ih mipa nauhak kum hnih hnuai lam hmuahhmuah a that ṭheh. Ziang tluk in a rap thlak. Mi that ciocio khalah pitling thah hnakin ziang sualnak tuah lo hauhak vun thah curco cu a rakthlak cuang. Cucu ziangruangah a tuah tile Siangpahrang dang an suah ding a duh lo ruangah a si.

Hi thuanthu hi kan siar tikah zo cio khalin Herod hi a va sual ve kan ti ko ding ah a zum um. Tui sun ah kan nih cun Herod vekin mi nunnak kan lak ding hi cu a zum um lo, sihmansehla Herod vek thotho in kan nunnak ah Jesuh hi Siangpahrang ih ret thei lo cu kan um ko ding. Kan nunnak cio zoh sal sehla Jesuh hi kan mai bulpak nunnak ah siangpahrang ah kan ret  ngaingai maw? Jesuh thu maw lal deuh kan mai thu? Siangpahrang ih kan ret a si ahcun a thu kan ngai ding a si. Zumtu kan nunnak kan zoh tikah kan mai duhnak hi voi tam kan thlun sawn caan a um ko lo maw? Cucun kan nih khalin Jesuh hi kan nunnak ih Siangpahrang ah kan ret thei lo tinak a si. Jesuh hi kan nunnak ah Siangpahrang a si ve maw? Herod hi sual vio ih kan ruah laiah kan mah khal Herod thinlung vek kan pu ve pang maw?

3.  Jesuh biak duhnak thinlung put

Nisuahnak lam mifim pawl cun Bethlehem ah a suak ti an theih vete’n Bethlehem pan in an pok ih a arsi khal an hmu sal ih an lung a awi ngaingai. Bethlehem an thlen tikah innsung ah an lut ih naute Jesuh cu a nu Mari thawn an hmu ih ziang an tuah tile an khuk an bil ih an biak. Hi mifim pawl hi minung sinak ah mifim an si vekin dinhmun sang tak, sinak sang tak a nei mi, mi cungcuang an si tihi kan theih a ṭha. Cun an sinak le an laksawng ihsin mi farah an si lo ti khal kan thei a ṭha. Hi mifim pawl hi dinhmun sang zet an si nan KEIMAH timi thinlung an nei lo. Phah niam aw in an khuk an bil ih naute Jesuh an biak a si khal.

Pathian biak kan timi cu phahniam awknak thawn biak hi a si. Keimah ka si bik, kan kawhhran, kan khua cu keimah um lo sehla ziang an bang pei tivek duhawknak thinlung pu cingin hi hin Pathian kan biak kan ti ahcun kan ṭhelh lellel, Pathian khalin KEIMAH ti thinlung duhawknak thawi biaknak hi a cohlan zawng a si lo. Mah le mah situk ih ruah awknak nei cingin Pathian thawn feh tlang a theih lo. Pathian in a huat zetmi cu mi puarthau, mi hngalhngawng, mi ti aw ter pawl an si. Kan neihnun ruangah maw, kan thiamnak ruangah maw, kan tuah ṭhatmi ruangah maw duhawknak thinlung kan nei a si ahcun cui lungput thawn Pathian biak a theih lo tihi kan theih a ṭha. Pathian cu mah le mah sang aw ter pawl thla niamtu le mi tangdor pawl khaisangtu a si.

Mifim pawl cun naute an upatnak lang ter in khukbil in an biak lawng siloin an ken mi thil sunglawi: Sui, frankincense rimhmui le mura rimhmui an pawl an suah ih an pek. Khristian tam sawn in kan mah rundam dingah Jesuh a suahnak sunsakin Christmas hi kan hmang. Christmas hi kan neihmi suah ih pek caan a si. Hi Christmas ni sunglawi hi ni hleice kan hmang ta cangmang cu nidang hnakin Pathian hrangah hleice zet ih kan pek caan, kan hman awk caan le hleice ih thilṭha kan tuah caan ah hmang thiam ding a thupi zet.

A tlun ih kan tarlang mi lungput pathum pawl lakah kan ni the ziangmi lungput kan nei ve ti hi kan nunnak cio ah zoh fiang sehla. Kan nunnak ih a thupi zetmi cu kan thinlung put a si. Sakhua hruaitu pawl cu Bethlehem thawn a nai aw zetmi Jerusalem ah an um nan Jesuh an hmu ngah cuang lo, ziangahtile Pathian thu kha ziang ah a siar lemlo, a theih lawng an theih ruangah a si. Nisuahnak lam mifim pawl ve thung cu hmnun hla sawn ih um an si ko nan Jesuh an tong ngah, ziangah tile amah biakduhnak taktak thinlung an put ruangah a si. Mi ih hmuhnak lawngah Pathian duh tak vek ih lang si duh ngaingai si lo hnakin sung muril te ih duhnak taktak neih hi Bawipai duhmi a si sawn. Mifim pawl bangin fim si, lian si, Bawipai hrang siang si zumtu kan si ahcun ziang tlukin a sung lawi.

Casiarmi

https://globalchristiancenter.com/sermons/sermon-resources/31450-christmas-sermon-outline