Jabez ih hmin sullam hi ‘a na’ tinak a si ih a nu ih a hrin
tikah na tuar zetih a hrinmi a si ruangah Jabez tiin a nu in a sak mi a si.
Amah hi Judah tesinfa a si. Jabez ih thuhla hi Baibal hmun dang ah a lang ve lo
ih 1 Sansiarnak 4:9-10 sung lawngah a hmin vei thum a lang ih cu lawng a si. A
nunnak hi harnakin a thok nan a harnak cu Pathian vuihramnak ah siloin Pathian
lamih tlukluhnak sawn ah a hmang thiamtu a si. Hminpi dang khal zohman a nei ve
loih khua hmin ah pakhat cu kan hmu thei (1 San. 2:55). A thuanthu a lang mal
zet nan kan hmuh thei sun ah hin zir ding ṭha zet kan nei.
1.
Harsa Zetih Hrinmi A Si (1 San.4:9)
Thuhmaihruai
ih tarlang zo bang tukin Jabez hi a nu in a hrin tikah harsa/ na tuar zet ih a
hrinmi a si. Minung sinak ah nau neih har lo timi hi cu a um dah lo nan hi tawk
ih har a timi cu nau neih ciocio khal na tuar dan pangai hnakin a tuar cuang a
si thei; culole a pasal thu hla hi Baibal ah a lang ve loih nau a neih hlan ah
a pasal in a thih san tla a si thei. Ziangvek natnak a tuar timi a fiang lo nan
ni dangih fa a neih dah hnakih a sa sawn in a tuar timi cu a fiang. Baibal
ahhin hi vek deuh pakhat kan hmuh thei lehmi cu Rachel ih nau neihnak ah a si.
Efrath khua an thlen hlan deuhte ah Rachel cun nau a neiih a nauneih pumnat a
besiat tuk ruangah a fa hmin ah Ben-oni tiah hmin a sak; a sullam cu
riahsiatnak fapa tinak a sak. Hmin a sak ngah tikah Rachel cu a thi ih a pasal
Jakon in Banjamin, lungawinak fapa tiah a hmin a thleng sal. Jabez khal hi
hringtu a nu in a hrin natnak a roh tuk ruangah cumi suangih a hmin a sak mi a
si.
Hi thu
ihsin kan nunnak hrangah thlarau lamih sengluh ding ka duhmi cu: ‘Kan ni zumtu
pawl khal hi tuarnak nasa zet thawn hrinmi kan si’ timi a si. Rulhrin a simi pawl
Pathian faate ih kan can theinak dingah Jesuh Khrih in harsatnak, thihnak tiang
tuar ih hrin mi fa kan si. Tuarnak nasa zet fehtlang ih hrinsuahmi ti theih
tikah Pathian fate kan sinak a sunlawi zia le a man khun zia nunnak ah a fiang
sinsin. Ol ai takih Pathian ih fa si theinak kan ngah mi a si lo, a nasa zet mi
Jesuh ih tuarnak ruangah a si ti thei in na nun hi a hrang pe ve aw.
2.
Hmin Hnakin Nun A Thupi (1 San.4:9)
A tlun ih
kan sim zo bangin Jabez cu a nu in a nauhrin nat tuarmi a nasa tuk ruangih a nu
in a sakmi hmin a si. Jabez timi hmin hi cu hmin ṭha a si lem lo, tuarnak hmin, riahsiatnak hmin a si.
Jabez hi a hmin sullam cu ‘a na, natnak’ ti asinan a nunnak kan zoh tikah Pathian
thluasuah a don zia kan hmu thei. A hmin a ṭha lo nan a nun a ṭha ih cumi in
Pathian thluasuah a parah a thlen ter.
Hmin thu
hla ah mi tampi in fa le hmin ah harsatnak hmin, buainak hmin, farahnak hmin
tivek a se lamih hminsak hi an duh lem lo; duh lo ding khalah a awm ve ko, hmin
mawi hmin ṭha neih cu duh sawn ding a awm hrimhrim. Mi ṭhen khat tla cun an
tluan thei lonak hi an hmin ṭhat lo ruangah a si ding ti ruahnak an neih ih
ruangah an hmin an thleng sal ṭheu. Hmin mawi neihhi cu duh a um sawn ko nan mi
ṭhenkhat ih ruahnak ih a um mi; ‘hmin sia sak awk tikah kan hmin vek in kan
parah a thleng’ timi hi cu Baibal thawn a kaih aw mi a si lo. Jabez khal a hmin
cu ‘a na/ natnak’ ti a si nan Pathian thluasuah tampi a dawng thotho. Kan hmin
hi a ṭha maw ṭha lo ti hnak in kan nun hi a ṭha maw ṭha lo ti a thu pi sawn. Kan
tluan le tluan lo, kan hlawhtlin le tlinlo hi kan hmin ih ṭhum aw a si loih kan
nun ah a ṭhum aw sawn. Ziangvek hmin sia kan va put hman ah Pathian ṭihzah nun
kan neih ahcun kan nun cu thluasuah in a
um thotho ding. Hmin ṭha taktak nei ko nan mi tlaung lo tampi an um vekih hmin
sia pu ko nan mi tluang an um ve. Kan hmin hnakin kan nun hi uluk sawn ding a
si.
3.
Upat Bik Mi A Si (1 San 4:9)
Jabez hi a
thuanthu tam hmuh ding um lo khal sehla mi ṭha a si ti a feng emem nak cu a
unau pawl hnak in upat bikmi/ upat tlak mi a si timi kan hmu thei. A unau pawl
hi an ṭha lo, upat tlak an si lo ti lam a si lo ih a unau pawl hnakin upat a
tlak sawn ti sawn a si. A unau pawl khal upat tlak taktak an si thei ko, an nih
hnak in Jabez hi upat a tlak cuang tinak a si. Hi tawk zawn ah midang hnakih a
hleicetnak, a cuangcetnak kan hmu thei. Mi dang hnakih an kum a upat ruangah ih
upat tlak timi a si lo, a nun can le Pathian lam ih a pekawknak a nasat ruangah
a si sawn.
Jabez ih
nunnak zoh tikah zumtu pawl in zir ding ṭha kan va nei em! Zumtu si men ih duh
tawk ding kan si lo nasa. Kan zumtu pi hnakih Pathian duh hlei ce, Pathian naih
hlei ce, Baibal siar hlei ce, thlacam tam hleice, Nun can mawi hleice mi si
ding a ṭul nasa. Zumtu kan si zo, vanram cu ka ta timen ahkan nun hi cawl ter
lamlam hlah uh si. Paul in Timote ca a kuat tikah “..zumtu dang pawl ih zohṭhim
dingin nung aw” tiah a ti. Zumtu unau midang pawl lawng hleice thei dingah ruat
hlah uh si. Nangmah hi mi dang hnakin na hleice thei ve, mi dang hnakin na
tenau cuang lo ti thei aw,hlei ce cia ih suak zohman kan um lo. Midang hnakih
upat tlak, cawimawi tlak si thei dingin zuam cio uh si. Kum upat ruangih zawte
upat ih upat co men mi si loin kan nun dan ih a zir ruangih upat tlak kan si
ding a thupi tuk.
4.
Thlacam Mi A Si
(1 San. 4:10)
Jabez thu
hla hi Baibal cang hnih ciah ah hmuh ding a um; cang 9 nak ah upat bikmi a
sinak hmuh ding a um ih cang 10 nakah a thlacamnak kan hmu thei. Baibal sungih
Pathian mi pawl nunnak kan zoh tikah an thlacamnak hi hmuh ding a um ringring.
Jabez ih thlacamnak kan zoh tikah mai hrang thlacamnak a si. Pathian hnenah ram
kaupi a dil, Pathian ih umpitnak le Pathian ih humkim kilvennak a dil. A nunnak
ih Pathian kut sungah ziang hmuahhmuah a um, a tello cun zianghman ka si lo ih
thilṭha lo lak ihsin keimah ten kan humhim aw thei lo ti a theih feng ruangah Pathian
hnenah a dil.
Thlacamnak
hi zumtu hmuahhmuah ih kan tuah dingmi a si. Baibal sungah talent thu hla le Thlarau
laksawng Pathian in zumtu pawl in pek
thuhla hmuh ding a um. Cumi pawl kan zoh
tikah thlacam talent le thlacam laksawng pek tivek Baibal ah a um lo. Tlacamnak
cu zumtu hmuahhmuah ih kan tuah dingmi a si ti lang tertu a si. Pathain hnaṭuantu
saya le mipi, Pastor le Evanelist, missionary, hlasaktu…kan zate’n lo theih lo
ih kan tuah dingmi a si. Thlacam talent co pawl ih cam dingah ruat pang hlah,
thlacam talent dong le thlacam laksawng co zohman an um lo, nang khalin co co
loih na tuah dingmi a si.
Thlacamnak
cun zo hmuahhmuah a huam ṭheh, midang hrang ah thlacam ding kan si ih kanmai
hrang khalah thlacam ding kan si. Mai hrang Pathian hnenih thluasuah dil hi a
sual lo ih mai hrang lawnglawng ih thlacamtu kan si lo ding lawng te ralrin a ṭul.
Mi dang lawnglawng thlacam ding kan si mai hrang thlacam ding kan si lo timi
ruahnak khal a sual. Baibal sungah mai hrang thlacamnak le midang hrang
thlacamnak hi hmuh ding a um veve. Cunmi ṭhen khat cu mah ih thlacam huam loih
saya pawl hnenah sumpai pe tahrat ih ‘kan innsang, nupi, fanau, cumi khami
hrangah thla in cam sak uh’ ti vekih mi dang kut sung ih ap thluh hmang khal
kan um men thei. Midang thlacam dil cu a ṭha ko ee, asinan mah ih cam ṭul lo
tlukih ruat ih midang lawng kan ring a si ahcun Pathian in a phi in pe lo
hrimhrim ding. A thupi bikmi cu kan mah roriih thla kan cam ding kha a si. Zumtu
si si in thlacam daithlang mi kan si pang maw? Thla kan cam lo a si ahcun
Pathian kan hai lo ti tluk a si. Thlacam caan nei lo khop in kan buai a si
ahcun kan nun cu a tluk ngah lellel tinak a si.
Jabez ih
thlacamnak neta bikah “Thil ṭha lo lak ihsin i kilkhawi hram aw” tiah a dil
(CKJV). Hi tiih thla a cam tikah a parah thilṭha lo thleng lo dingih a dilnak
lawng siloin amah khal in mi dang parah thil ṭha lo va tuah ve lo ding khal a
huam tel. Mi in kan parih siatnak an tuah ding kan phan vekin kanmah khalin
midang parih siatnak va tuah ngah ding hi kan phan dingmi a si.
Pathian in
hi lei parah nunhmang thei dingah nunnak pakhat in pe cio. Tu ih ka nunnak a
cem khal le pakhat ka nei lai pam ti vek a um thei lo. Hi kan nun a cem cun cu
hmuah a si ko. Curuangah Pathian in nunnak in pekmi hi sunglawi tak le man nei
tak in zabez bangin hmang ngah tu kan si ding a thu pi zet. Harnak in kan nun a
thok hman ah Pathian thangsiattu si loin Pathian lam hoi sawn ding kan si zia
khal Jabez nunnak in kan zir thei.Thuahthu saupi neitu men siloin thuanthu ṭha
neitu si a duhum sawn.
Cabu hmanmi pawl:
1.
Holman
Study Bible NKJV Edition
2.
The
Applied Old Testament Commentary
3.
NKJV
Apply The Word Study Bible
No comments:
Post a Comment