Thawhsal Hnu ah Jesuh Lawngfang Kheh In A Um Maw?

         Jesuh hi thinglamtah parih an khen tikah a thuamhnaw an hlih sak ih lawngfang kheh ih thlai a si. Cun thlan ihsin a thawhsal tikah thlen ih va fehtu pawl in thlansung an zoh tikah Jesuh cu a rak um nawn lo ih a ruaktuamnak puan nemte lawng an hmu. Cuti asile Jesuh hi thuamhnaw hru loin lawngfang kheh in maw a um ding? Lawngfang kheh in um bangta sehla mi ziangmaw zat hnenah a lang fawn ih an zoh ngam ding maw?

1.  Lawngfang kheh ih thlai a si.

          Jesuh hi thiglamtah parih thlai a si tikah lawngfang kheh ih thlai a si zia Baibal ah fiang takin kan hmu thei.

Matt.27:35 Jesuh cu thinglamtah ah an khen ih a hnipuan cu camcawhfung zuukin an zem aw.

Marka 15:24 Cuih hnuah thinglamtah ah an khen ih camcawhfung zuukin a hnipuan an zem aw.

Luka 23:34 Cule amah a thattu pawl cun camcawhfung zuukin a hnipuan cu an zem aw.

Johan 19:23 Ralkap pawl in Jesuh cu thinglamtah parih an khen ṭheh hnuah a hnipuan cu an lak ih pakhat ciar co dingah ṭhen li ah an ṭhen.

2. Phum a si tikah puan ih tuam a si.

Matt. 27:59-60 Cuticun Josef in Jesuh ruak cu a lak ih puan thar nemtein a tuam ih, amah ih thlaan dingih lungkhermi thlaan thar sungah a phum.

Marka 15:46 Josef in puan nemte a lei ih Jesuh ruak cu thinglamtah par ihsin a ṭhum ih puan in a tuam hnuah lungkhermi thlaan ah a phum.

Luka 23:53 Cule Jesuh ruak cu thinglamtah par ihsin a ṭhum ih puan neemte in a tuam hnuah zohman ih hman hrih lo, lung an khermi thlaan thar sungah a phum.

Johan 19:40 An pahnih in Jesuh ruak kha an lak ih Judah pawlih mithi phum daan vekin zihmui thawn puanrang nemtein an tuam.

3. An Tuamnak puan tan in a tho

                Luka 24:12 Asinain Piter cu a pok ih thlaanah cun a va tlan. Kuun tahratin a vun bih ih ruak tuamnak puan neemte lawng a hmu; a dang zianghman a hmu lo.

            Johan 20:5 Thlaan sung cu a vun bih ih ruak tuamnak puan nemte cu a hmu, a sinain a vung lut lo.

4. Thawhsal hnuah lawngfang kheh in a um maw?

Jesuh a thawhsal hnuah thuam hnaw a hruh thu ti fukfi cun hmuh ding a um lo. sihman sehla a thuanthu zoh tikah lawngfang khehih a um ding cu zum a um lo. Taksa in thosal khal sehla leitaksa men si nawn loin thosal taksa a siih thlang ruangah a thuam khal leithuam si nawn loin vanlam thuam a si thlang. awngfang kheh si loin thuam a hruh ko ding ti a fengnak pawl cu:

A pakhatnak ah Johan 20:14-16 ah Mari hnenah Jesuh a lung lang ih Mari khalin a hmu, asinan hmuankiltu ah a neih. Jesuh kha lawngfang khehin um bang ta sehla Mari in hmuankiltu ah a neih kher lo ding.

A pahnihnak ah cun Luk.24:13-35 sung kanzoh tikah, Emmaus lam ih thluangtlawng mi pahnih hnenah Jesuh a tel ve ih lam tluan ah pangai takih feh tlangin thu an rel hai. Cun Jesuh kha a hnenih caam ve dingah an sawm ih Jesuhkhal an hnenah a tel bet. Hi thu ahhin Jesuh hi minung pangai tak vekin a lang ti cu a fiang. Lawngfang kheh in um bangta sehla hi khawltlawng pahnih hin pangai te'n an feh pi thei lo ding.

A pathumnak ah Jesuh lawngfang kheh in a um lo ti a langnak cu: mi ziangmaw zat hnenah Jesuh a lar aw ih a thuam awk dan thuah mangbang an um lo. Lawngfang khehin lar aw bang ta sehla an mang a bang dingih, zo talin Jesuh thu an ngannak ah an ngan tel ko ding.

A palinak ah fiang zetih kan hmuh theimi cu van ih a kai so thluh hnu ah Johan hnenah a rung lang. Johan hnen ih a rung lak tik ah ziang vekin a lung lang tile 'A ke beu tiang korfual a hruh ih sui taikhap a ṭangah a khap' a ti (Thup.1:13), cucu Jesuh rori a si zia Thup.1:17-18 siar tikah fiante in a lang.

Aw le a tlun lam ih kan nganmi thawn pehpar in Jesuh hi a thawhsal hnuah thuamhnaw a hruh thu hmuh ding um lo khal sehla fangfang kheh in a um lo ding timi cu a fiang ko. Thlan ah an tuamnak puan a tannak san bik cu a nungmi a si zo ruangah mithi tuamnak puan a ṭul nawn lo, cun Lei taksa men siloin vanlam taksa (duh tiktik a lang aw ih hlo thei, inn khan sungkhalah sangkaa khar cingih lut thei) a si zo ruangah lei thuamhnaw si nawn loin vanlam thuam a hruh sawn a  si.