Matt.2:1-12 sung thu kan zoh tikah
Jesuh suahnak thu ah mi phum thum kan hmu thei. Cu pawl cu 1) Ni suahnak lam
mifim Pawl 2) Herod le 3) sakhaw hruaitu pawl an si. Nisuah lam mifim pawl cu
arsi zohtiam an si ih Herod cu siangpahrang a sic un sakhaw hruaitu pawl hi
daan thiam le puithiam pawl an si. Hi a bang aw lo zetmi minung pawl hmangin
thazang kan la tlang ding.
1.
Nisuah lam mifim pawl
Nisuah lam mi fim pawl hi nasa zetih
Jesuh a hawltu an si ih Baibal ah an thuanthu hmun ding tam a um lo. Jesuh a
suah tikah a suah thu theitu hi an tam lo, Luka sungah cun tuu khal pawl in an
hmu ih tuu khal pawl cu mi fimthiam an si ve loih Pathian in vancungmi hmangin
Jesuh a suah thu fiang zet in a theih ter. Asinan mifim pawl cu vancungmi
hmangih sim an si ve lo ih arsi hmangih thiehter an si. Hi thu in a langtermi
cu Pathian in Amah kan ton theinak dingah hmanrua a hmang thei. Hi mifim pawl
hi arsi zohthiam an si vekin an thiamnak zawn te in Jesuh an ton theinak dingah
Pathian in arsi a hmang. Minung fimnak in Pathian kan hmu/thei thei tinak lam
si loin (1 Kor.1:21) an fim/thiamnak zawn ih Pathian an theih theinak dingah
ziangsi maw hmanrua a hmang thei ti sawn a si. Tahṭhimnak ah lei sung um lam zingzoi ih mi thiam pawl in
Pathian an theihtheinak dingah Pathian in lei sung um thil a hmang thei,
Scientist pawl in Pathian an theih theinak dingah Pathian in science lam thil a
hmang thei, ramsa lam mi thiam (zoologist) pawl in Pathian an theih theinak
dingah ramsa lam thil a hmang thei ti lam sawn hi sim duhmi a si. Hi mifim pawl
in an fimnak lawngin in Pathian an tong a si lo, an mah vekih mi thiam an um ve
ko nan Jesuh tong ngah thei dingah Pathian in an hnen lawng ah cui arsi ih
sullam theihtheinak a pek. Minung fimnak, thiamnak in a tong thei ti lam si lo
in Pathian in Amah kan thieh thei/ ton theinak dingah kan thiamnak zawn ah
ziang si maw a hmang thei tinak a si. Jesu’i Arsi cu suak khal sehla tuukhal
hrangah theihthiam ngaihnak a um lo ih arsi lam mi thiam hrangah umzia a nei
zet. Tuu khal pawl cu “Rundamtu a suak zo” tiih direct rori ih sim an ṭul lai
ah arsi zohthiam pawl cu Pathian in vancungmi hmangin sim lo in an thiamnak
zawn in arsi hmangin a sim.
Cun hi mifim pawl hi Judah mi an si lo ih Zential mi an si.
Mifim an si ih milian khal an si tihi an thilpek hmangin theih a theih. Hi mi
in Jesuh ah mifim mi aa, milian farah, Judah le Zential thleidannak a um lo zia
a lang ter. Jesuh tong dingah mifim kan si maw, mi aa kan si maw, milian kan si
maw, mifarah kan si ti a thu pi lo. Mifim pawl in Jesuh an ton vekin nauta pawl
khalin an tong ve. Cun mifim pawl cun Jesuh an ton ngah tikah an kenmi laksawng
sui, frankincense rimhmui le mura zihmui an pek. Hi thil an pekmi pawl hi man
neizetmi an si ih Josef in naute le a nu
Izipt ram ih a tlanpi tikah hi an laksawng donmi hi nunnak ih an hman mi bik a
si ding tiah Baibal thiam ṭhenkhat in an sim.
2. Herod
Herod cun “Judah mi pawl ih Siangpahrang a suak” ti thu a
theih tikah a thin a har ngaingai. Ziangahtile amah hi siangpahrang ṭuan rero
lai a si ih amah lawng siangpahrang si ringring sehla a duh, siangpahrang dang
a suak timi thu cu a hrangah cun thu duh um lo zet a si. mah lawnglawng BIK si duhnak thinlung hi Khrih
thinlung si loin Satan ih thinlung a si.
Cu tikah Herod cu dai te’n um lo in Jesuh a thah ngah theinak dingah Bethlehem
le a kiangkap ih nauhak kum hnih hnuailam pawl a that ṭheh. Herod cun Jesuh hi
a dodal ṭengṭeng. Hi thil umdan hi kan zoh asile Thukam hlun lam ihsin a rak
thok zo. Herod hi Esau ci thlah a si ih Jesuh cu Jakob ih cithlah a si ve. Esau
le Jakob cu kan zoh tikah phir an siih nui’ pum sung ihsin a eng tai aw reromi
an si (Sem.25:19-34). Curuangah Herod in
Jesuh a dodal hi khawvel mi le Pathian mi, thlarau lam le tisa lam doawknak
lang tertu a si. Tisa cun ziang tik lai khalah Thlarau lam thil a dodal ih
khawvelmi cun Pathian mi a do kalh ṭheu (Gal.5:17). Kan sungih Thlarau
thianghlim ih duhnak hi kan tisa hin a dodal ringring.
3. Sakhua
Hruaitu Pawl
Sakhua hruaitu pawl kan ti tikah daanthiam pawl le puithiam
upa pawl hi an si. Herod in Judah Siangpahrang a suah thu a theih tikah a thin
harin a um ih cui Siangpahrang cu khui ah a suak ding ti ta thei lo. Curuangah daanthiam
pawl le puithiam upa pawl a sut hai ih an nih in Judea ram Bethlehem khua ah a
suak ding tiah an let. Mifimpawl in khui ah a suak ding ti an thei lo, Herod
khalin a thei lo a theitu cu sakhua hruaitu pawl an si. Sihman sehla zianghman
ah an neih lo, Jesuh a suahnak hmun hi midang cu an sim thei nan an mah cu an
feh cuang lo ih biak khal an tum cuang lo.
Zumtu ti aw lakah hi sakhua hruaitu vek kan si ve pang ding
ti hi a phan um nasa. Cathianghlim thei zet si mah ih tuah duh cuang lo kan si
pang maw? Midang khih hmuh thei si mah hmuah ih tuah duh lo kan si pang ding ti
hi a phan um nasa.
- Thlacam ṭhat thu mi dang sim rero si mah hmuah cam cuang
lo.
- Rawl ulh thlacam ṭul zia sim rero si mah hmuah ul cuang
lo.
- Pek nak thu zirh rero si mah hmuah pe cuang lo.
- Pathian ṭihzah thu zirh rero si mah hmuah ih tuah cuang
lo.
- Mi dang bom thu zirh rero si mah hmuah ih bawm cuang lo
kan si pang maw?
Sakhua
hruaitu pawl ih an simmi hmunah mifim pawl cu an feh ih Jesuh an tong ngah nan
anmah cun an tong cuang lo vekin mahhmuah ih Khristian nun zirh rero si a tuah
cuang lo tu kan si ahcun kan zirhmi pawl sawn in in hleih ding tinak a si. Jeim 1:22 A thu kan theih taakah a tawk ko ti
meenin nanmah le nanmah bum aw hlah uh. Nan theihmi kha a tuahsuak tum uh. Paul in Korin mipawl
hnenih ca a kuatmi ah “Leh zuamawknak ah tel ciar uh tiahmidang ka sawm rero
hnuah keimah riangri hnonmi kan sipang ding, tip hang ah ka taksa cu ka hrem ih
ka uk a si” tiah a ti bangin zumtu cu a theitu lawng, a simtu lawng siloin kan
mah rori hi daithlang loih a tuahtu ding kan si.
Jesuh suahnak thu ah mi phun thum bang
aw lo taktak kan rel ih mifim pawl cun arsi an hmuh in Jesuh suahnak cu an hawl
ih an tong ngah, Herod cun Jesuh suah thu a theih tikah a thin a har ih mi
nunnak a lak sak, sakhua hruaitu pawl cun an thei nan ziang ah an rel lem lo.
Hi mi phun thum hmangih kan simmi hi Pathian in na nunnak hrangah thazang si
ter hram seh.
No comments:
Post a Comment