Bible Thu Sawn Aw

                          Bible Thu Sawn Aw

Pathian thangthat kankhawm tikah Kawhhran pakhat le pakhat kan bang aw lo. Kawhhran thenkhat ah cun Khristian Hlabu sung ih Bible thu sawn hi hi a hmang kan um. Cumi cu Kawhhran then khat cun Bulletine ah si maw ngan duh kan um ding tiah ruahnak ka nei. Cu vek ih ih ngan duh hrang ah awl ai te ih kan ngan thei ding ruahsannak thawn nganmi a si. Bible thar ih ta lak sawnmi a si ruangah Khristian hlabu ih ta thawn tongfang feh dan malte bang aw lo deuh cu a um thei men. Asinan a thu cu danglamnak pakhat hmana um lo a si. Bible Thu Sawn Aw 52 cu a hnuailam ah famkim ten tarlang a si.

                                                                 Bible Thu  Sawn Aw

1. Kum Thar Thu

( New Year )

KHB. No. 494

Ka duhdawtmi ka u le ka nau pawl, ka lo ngaizet hai a si. Nannih cu i hnemtu nan si ih ka hmaihngalnak ka sui lukhuh khal nan si. Ka duhdawtmi unau pawl, hi bangtuk in Bawipa sungih nan nunnak ahcun hnget zetin ding ringring uh.Fil..4:1

Tlasam ih nundaan ka thiam ih neinung zetih um khal ka thiam zo. Cutiih umdaan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka riilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo.Fil.4:12

Cahnak i petu Khrih sungin ziangkim ka ti thei.Fil.4:13

Bawipa thawn nan pehzom awknak ah hin nan lung awi ringring hram uh; ka nolh sal hrih ding: nan lung awi hram uh!Fil.4:4

Ziang thuhla hmanah donhar in um hlah uh; thla nan cam tinte in nan ṭulmi cu Pathian hnenah dil uhla lungawi aipuang tein dil uh.Fil.4:6

Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding. Fil.4:7

Ka u le ka nau pawl, cumicu ka co ngah zo, tiin ka ruat hrimhrim lo. Ka tuahmi cu pakhat lawng a si: ka dunglamih a luan ciami thil kha hngilhsan tahratin ka hmailamih a ummi kha ban dingah ka dawh aw rero a si. Fil.3:13

Curuangah hmuitinmi lamah zuam man ngah dingin dingtein ka tlan. Cuih zuam man cu Pathian in Khrih Jesuh sung ihsin kumkhua nung dingah in run kawhnak kha a si. Fil.3:14

Thunetnak ah, ka u le ka nau pawl, a ṭhami, porhtlak a si mi, a taktak a si mi, upat tlak a si mi, a dikmi, a thianghlimmi, duhnungza a si mi le hminṭhatnak a petu thil pawl thawn nan thinlung cu khatter uh. Fil.4:8

Ka hnen ihsin nan ngahmi le nan zirmi vekin thlun tum uh. Ka ṭongkam in siseh, ka tuahnak in siseh, ka lo hmuhmi cu thlun uh. Cutiin daihnak in petu Pathian cu nan hnenah a um ding. Fil.4:9

....................................................................................................................................................                                                       

2.Pathian Ih Umpinak

( God’s Presence )

KHB.No.195

Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding. Jn.14:26

Nan hnenah hnangamnak ka lo tanta. Keimah ih hnangamnak ka lo pek a si. Leilung mi ih pek vekin ka lo pe a si lo. Donhar le vansaang in um hlah uh; nan thin khal phang hlah uh.Jn.14:27

Nan hnenah, ‘Ka feh ding, a si nain ka ra kir sal ding,’ tiih ka timi nan thei. In duh ngaingai a si ahcun Pa hnenih ka feh ding hi nan lung a awi ding; ziangah tile Amah cu keimah hnakin a tum sawn.Jn.1:28

Ka sim vekin a hung can ngaingai tikah nan zum theinak dingah atu a can hlan ihsin ka lo sim cia a si.Jn.14:29

Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.Matt.18:19-20

....................................................................................................................................................

3.Siirnak In Pathian Betu Pawl

( Contrite Worshipers)

KHB.No.495

Jesuh in, “Ziangah so miṭha, tiah i ti? Pathian pakhat siarlo miṭha dang zohman an um lo.LK.18:19

Farasi pa cu hlat nawnah amah lawng a ding ih hiti in thla a cam. ‘Maw Pathian, kei cu midang vekin ka duhham lo, thuphan ka per lo ih ṭaangṭawm sualnak tla ka tuah lo ruangah ka lo thangṭhat. Khi tawkih a ummi siahkhongtu vek ka si lo ruangah ka lo lawm. Zarhkhat ah voihnih rawl ka ul, ka ngahmi hmuahhmuah sungin ṭhenhra ih ṭhenkhat ka lo pek,’ a ti. Luk.18:11-12

Sikhalsehla siahkhongtu pa cu a hlat nawn ah a ding ih vanlam hman hoih ngam loin a ṭaang a cuum aw ih ‘Maw Pathian, i zaangfah hram aw; kei cu misual ka si,’ tiah a ti.  Luk.18:13

Fiangtein ka lo sim: Farasi mi pa si loin siahkhongtu pa sawn kha innih a tlun tikah Pathian hmaiah thuding cotu a si. Ziangah tile zokhal amah le amah a khaisaang awtu cu namthlak a si ding ih tangdortu cu khaisaan a si ding,” tiah a ti. Luk.18:14

Pathian cu Thlarau a si ih a biatu pawl in thlarau le thutak in an biak ding,” tiah a ti. Hn.4:24

Sikhalsehla Pathian Thlarau hruainak thawngin Pathian a bia taktaktu in Pa cu thlarau le thutak thawn an biak caan a ra thleng ding; a si, cuih caan cu atu-ah a ra thleng zo. Cutiih biak cu Pathian in a duhmi a si. Jn.4:23

“Dil uh, nan ngah ding; hawl uh, nan hmu ding; king uh, nan hrangah saangka on a si ding. Matt.7:7

....................................................................................................................................................

4.Pathian Inn

( God’s House )

KHB.No.496

Jesuh cu Biakinn sungah a lut ih cutawkih thil a zuartu le a leitu pawl kha a dawi ṭheh. Tangka thlengtu pawlih cabuai pawl le laileng zuartu pawlih tokham pawl cu a linglet ṭheh. Matt.21:12

Cule an hnenah, “Ca Thianghlim sungah Pathian in, ‘Ka Inn cu thlacamnak inn ti a si ding,’ tiah a ti. Asinain nannih cun fifir relhnak kua ah nan tuah,” tiah a ti. Matt.21:13

Jesuh cu a rak tuallennak hmun Nazareth khua ah a feh ih amah ih daan vekin Sabbath ni ah sinakok ah a feh.

            Ca Thianghlim siar dingah a ding ih, profet Isaiah cazual kha an pek.

Cuih cazual cu a pharh ih:

“Bawipa ih Thlarau cu ka parah a um, Ziangah tile mifarah hnenih Thuthang ṭha sim dingah hriakculh in i hriil zo. Sal taangmi pawl hnenih luatnak thu sim dingah le Mitcaw in khua an hmuh thei salnak dingah i thlah. Hremmi pawl luatter dingah le, Bawipa in a minung pawl a runnak ding tikcu a ra thleng zo, ti than dingah i thlah a si,” tiih ngannak hmun kha a siar. LK. 4:16-19

Cule anih in, “Ka siarmi nan rak theih vekin hi Ca Thianghlim sungih nganmi cu tuihsun ah a kim a si,” tiah a ti. LK.4:21

Hmualnei zet ih a ṭongmi kha an theih tikah an thinlung ah a lutzet ih mak an ti ngaingai. “Hi pa hi Josef fapa a si lo maw si?” an ti.  LK.21:22

.....................................................................................................................................................

5. Unau Hrinkhat Fa Sinak

( Race Ralations )

KHB.No.497

Paul cu an khua Khonsil Areopagas timi upa hmaiah cun a ding ih an hnenah, “Nannih Athens mi pawl hi biaknak lam pohpoh ahcun nan taimazet ti ka hmu. Ziangah tile nan khawpi sungih ka toihvah tikah Pathian nan biaknak hmun pawl tla ka zoh ih biakṭheng pakhat parah ‘Kan Theih Lomi Pathian Hnenah,’ tiih nan nganmi ka hmu.

Cutiin nan thei lo na-cingih nan biakmi Pathian cu atu nan hnenih ka phuanmi hi a si.

Leilung le a sungih a ummi hmuahhmuah a tuahtu Pathian cu lei le vanih Bawi a si ih milai kutih sakmi biakinn sungah a um lo.

Cuih tlunah Pathian cu mi hmuahhmuah hnenah nunnak le thaw le thildang hmuahhmuah a petu Pathian a si ruangah milai in a hrangih kan tuahmi kha a ṭulmi zianghman a um lo.

Minung pakhat sung ihsin leilung miphun hmuahhmuah a tuah ih leilung pumpuluk ah a umter ṭheh. Amah ih sungah kan nung, kan tlangleng ih khua kan sa.  Tirh.17:22-28

Curuangah Judah mi le Zentail mi tiah thleidannak a um nawn lo; sal le miluat karlakah siseh, nunau le mipa karlak khalah siseh, thleidannak a um nawn lo.

Nan zatein Khrih Jesuh thawn nan pehzom awknak sungah pakhat nan si. Gal.3:28

Zokhal Pathian ka duhdaw ticing in a unau a huatu cu thuphanper a si.

Ziangah tile a mit in a hmuhmi a unau hman a duhdawt lo a si ahcun a hmuh lomi Pathian cu a duhdaw thei hrimhrim lo ding.

Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding. 1 Jn.4:20-21

....................................................................................................................................................

6.Thlacamnak

( Prayer )

KHB.No.198

Sikhalsehla nannih cu thla nan cam tikah nan innkhaan sungah lut uhla saangka nan khar hnuah mithmuh lomi nan Pa hnenah thla cam uh.

Cule a thupte ih nan tuahmi a hmutu nan Pa in nan ṭhatman a lo pe ding.

“Thla nan cam tikah Pathian thei lomi pawlih sullam nei tuk lomi ṭong tampi an ṭong vekin va tuah hlah uh.

Annih cun reipi thla an cam tikah Pathian in a thei cuang ding tiah an ruat. Anmah vek va si hlah uh. Nan ṭulmi cu nan dil hlan ihsin nan Pa in a thei cia zo.

Curuangah hi bangtuk in thla nan cam pei:

‘Vancung ih a ummi kan Pa, na hmin thianghlim cu upat si ko seh; Na Uknak thleng hram seh; Vancung i na duhnak tuah a si bangin leitlun khalah tuah si ve seh. Nitin kan ṭulmi rawl in pe aw. Mi in kan parah sualnak an tuah ih kan ngaidam bangtuk in, Kanmah ih sualnak khal in ngaidam ve aw. A harmi hniksaknak tuarter loin, siatnak ihsin in hum hram aw.’Ziangah tile uknak le huham le sunlawinak cu kumkhua in na ta an si, Amen.   Matt.6:6-13

Jesuh in hi thu a sim ṭheh hnuah vanlam a zoh ih,

“Ka Pa, a tikcu a ra thleng zo. Fapa in sunlawinak a lo pek theinak dingah na Fapa hnenah hin sunlawinak run pe hram aw. Fapa hnenih na pek zomi mi hmuahhmuah hnenih kumkhua nunnak a pek theinak dingah leilung tlun miphun hmuahhmuahih tlunah thuneihnak na pek zo. Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si.  Jn.17:1-3

.....................................................................................................................................................

7.Ram Hmarngainak

(Patriotism )

KHB.No.499

Nangmah le nangmah bum aw hlah. Zokhal in Pathian an dekcok thei lo. Milai cun an tuhmi vek cekci in an khawm ding.

Tisa duhnakih a tuhtu cun thihnak a khawm ding; Thlarau duhnakih a tuhtu cun kumkhua nunnak a khawm ding.

Curuangah thil ṭha tuah hi ning hlah uhsi; ning lo teih kan ṭuan ahcun a caan a kim tikah rawl kan khawm ding a si.

Curuangah a remcaan tik poh-ah zo hnen khalah thil ṭha cu tuah uhsi. A hleice in zumnak lamih kan sungte hnenah tuah uhsi.

A netnak ah, Bawipa thawn nan pehzom awknak le amah ih cahnak ruangah nan thazaang cu cakter sin uh.

Satan bumsiatnak do thei dingah Pathian ih a lo pekmi ralthuam kha hruk uh.

Ziangah tile kan domi pawl cu milai an si lo, vanih a ummi thlarau sia cahnak pawl, uktu pawl, thuneitu pawl, le hi a thimmi leikhawvel pumpi uktu pawl an si. ¹³Curuangah atu ihsin Pathian ralthuam kha hruk uhla caansia a thlen tikah nan ral pawl cu nan do thei ding ih a net tiang nan do hnuah nan ṭanhmun cu nan hum ngah ding.

Curuangah khoh zetin ding cia uh: taaikhap ai-ah thutak kha nan taai ah khap uh; ṭaangphaw ai-ah dingnak kha nan ṭaangah song uh; ¹⁵kedam ai-ah daihnak Thuthang ṭha phuan hiarnak kha hruk uh. ¹⁶Catbaang loin thirphaw ai-ah zumnak kha keng ringring uh; ziangah tile Satan in meiling bangtuk a si mi thal in a lo kah tikah cuih phaw cun nan mit thei ding.

Cule lukhum ai-ah rundamnak kha lak uhla Thlarau ih a lo pekmi ralnam ai-ah Pathian ṭongkam kha keng uh.

Himi pawl nan tuah tikah thlacam phah in tuah uhla Pathian hnenah bomnak dil uh. Thlarau ih a lo hruainak bangtuk in ziangtik caan pohah thlacam uh. Hi ruangah ralring ciain um uhla nan beidong hlah uh. Pathian minung pawl hrangah cat loin thlacam uh.   Gal.6:7-10, Efe. 6:10-18

...................................................................................................................................................

8.Mino Hrangah

( Youth )

KHB.No.500

Ka fapa, nang cu Khrih Jesuh thawn kan pehzom awknak le kan comi a zaangfahnak ruangah hngetkhoh-in um aw.

Theihpitu tampi hmaiih ka lo zirhmi thu tla cu midang a zirhsin theitu ding rinsantlak pawl hnenah va ap aw.

Mino na si ruangah zohman in lo nautat hlah haiseh. Sikhalsehla na hmurka na ṭong daan, na umtlan na ziaza, duhdawtnak le zumnak le thianhlimnak khalah zumtu dang pawlih zohṭhim dingin nung aw.

A hnaṭuan a zahpi lotu le Pathian thutak Thuthang ṭha cu dik zetih a simfiangtu si dingah Pathian lungkimnak ngah dingin zuam aw.

Jesuh cu khual tlawng dingih a pawh zawng ah mi pakhat a hnenah a ra tlan ih a khuk bilh tahrat in, “Zirhtu ṭha, kumkhua nunnak ka co theinak dingah ziangso ka tuah ding?” tiah a sut.

Jesuh in, “Ziangah so zirhtu ṭha i ti? Pathian siar lo zohman mi ṭha an um lo.

Thukham pawl cu na thei a sisi. ‘Mi that hlah; ṭaangṭawm sualnak tuah hlah; rukru hlah; a dik loin midang sual puh hlah; mi va bum hlah; na nu le na pa upat aw,’ ti an si kha,” tiah a ti.

Cupa cun, “Sayapa, hi thukham pawl cu ka nauhak lai ihsin ka thlun ṭheh ciami an si,” tiah a ti.

Jesuh in cupa cu duhdawtnak thawn a zoh hliah ih,

“Thil pakhat na sam lai. Va feh awla na neihmi hmuahhmuah zuar in tangka na ngah mi kha mifarah va pe awla vancung ah hlawnthil tampi na nei ding. Cuih hnuah i ra thlun aw,” tiah a ti.   2 Tim.2:1-2,15, 1 Tim.4:12, MK.10:17-22

....................................................................................................................................................

9.Pathian Thu Zaiternak

( World Mission )

KHB.No.500

Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo.

Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh.

Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.

Hi tuurual sungih a tel lomi tuu dang ka nei. Annih khal ka finkhawm ve hai ding.

Ka aw an thei ding ih tuukhaal pakhat hnuai-ah tuuruun pakhat ah an cang ding!

An hnenah, “An nganmi cu hihi a si: Messiah cu a tuar pei ih a thih hnu ni thumnak ah a tho sal ding. Cule Jerusalem ihsin thokin miphun hmuahhmuah hnenah amah hmin ih sualsirnak le sualngaidamnak thuthang cu phuan a si ding.

Nannih cu hi thil cangmi pawlih thutheitu nan si.

Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti.

Amah cu an biak ih lungawi zetin Jerusalem ah an kir. An tikcu hmuahhmuah cu Biakinn sungah Pathian thangṭhatnak ah an hmang. Matt.28:18-20, Jn.10:16; LK.24:46-48; 52-53; Tirh.1:8

.....................................................................................................................................................

10.Hniksaknak

( Temptation )

KHB.No.501

Cule Jesuh cu Satan ih hniksak dingah Thlarau in ramṭhing ah a fehpi.

Ni sawmli le zan sawmli rawl loih a um hnuah Jesuh cu a riil a rawng ngaingai.

Cutikah Satan a hnenah a ra ih, “Pathian Fapa ngaingai na si ahcun hi lungto pawl hi saang ah cang dingin thu pe aw,” tiah a ti.

Asinain Jesuh cun, “Ca Thianghlim in ‘Milai nunnak cu rawl lawngin a si lo. Pathian hmurka in a suakmi ṭongkam in a si sawn,’ a ti,” * tiah a let.

Cule Satan in Jesuh cu Jerusalem Khawpi Thianghlim ih Biakinn zim ah a fehpi ih,

a hnenah, “Pathian Fapa na si ahcun hitawk ihsin dawp aw, ziangah tile Ca Thianghlim ah, ‘Pathian in na kiangih a ummi vancungmi pawl thu a pe ding, An kut in an lo dom ding ih na ke cu lungto thawn a khawng aw lo ding,’ tin a um,” * tiah a ti.

Asinain Jesuh cun, “Ca Thianghlim in ‘Bawipa na Pathian cu na hniksak lo pei,’ a ti a si,” * tiah a let.

Cule Satan in Jesuh kha tlang saangpi parah a fehpi ih leilung tlun ram hmuahhmuah kha an maksaknak thawn a hmuh ṭheh.

Cuih hnuah Satan cun, “Na khuk bilh tahratin i biak ahcun hi hmuahhmuah hi ka lo pe ding,” tiah a ti.

Cutikah Jesuh in, “Satan, tlan aw, ziangah tile Ca Thianghlim in ‘Bawipa na Pathian na biak pei ih amah lawng na rian pei,’ a ti a si,” * tiah a let.   

Matt.4:1-10

....................................................................................................................................................

11.Pathian Uknak

( The Kingdom of God )

KHB.No.502

Johan kha thawngih an thlak hnuah Jesuh cu Galilee ah a feh ih Pathian ih Thuthang ṭha a sim. “Tikcu a kim zo ih Pathian Uknak a nai zo.

            Nan sualnak pawl sir uhla Thuthang ṭha cu zum uh,” tiah a ti.

Jesuh in tahṭhimnak dang pakhat a sim sal.

“Vancung Uknak cu hi bangtuk a si. Mi pakhat in anṭam ci a lak ih a lo sungah a vorh.

Thlaici hmuahhmuah lakah a fate bikmi thlaici a si.

Asinain a kho ih a ṭhan tikah cun rawl kung lakah a tum bikmi a si. Thingkung bangtuk a si ih vate pawl tla an ra ih a hnge lakah bu an sak,” tiah a ti.

Jesuh in tahṭhimnak pakhat an hnenah a sim sal.

“Vancung Uknak cu nunau pakhat in thilnu malte a lak ih sangphut reel khat sungih a rawimi bangtuk a si. Cuih thilnu malte cun saang bawm khat cu a zatein a thoter ṭheh a si,” tiah a ti.

Jesuh in, “Kei ka uknak ram cu hi leilung tlunah a si lo;

hi leilung tlunah sisehla Judah mi hotu pawl kut sungih thleng lo dingin ka dungthluntu pawl in an do ding.

Ka uknak ram cu hi leilungah a si lo,” tiah a ti.

Cutikah Pilat in, “Siangpahrang cu na si ngai maw?” tiah a sut. Jesuh in, “Nang cun Siangpahrang na si i ti.

Leilung ih ka suahsanmi le ka ratsanmi cu thu pakhat lawng a si: cumi cu thutak sim ding hi a si.   MK.1:14-15, Mt. 13:31-33, Jn. 18:36-37

....................................................................................................................................................

12.Nunnak Sang

( Bread of Life )

KHB.No.503

Jesuh in, “Thungaite in ka lo sim: Moses ih a lo pekmi cu vancung saang ngaingai a si lo. Ka Pa in vancung saang ngaingai cu a lo pek a si.

Ziangahtile Pathian ih a pekmi saang cu vancung ihsin a rungṭum ih leilung mi nunnak a petu pa hi a si,” tiah a ti.

Annih in, “Bawipa, cuih saang cu in pe ringring aw,” tiah an dil.

Jesuh in an hnenah cun, “Keimah hi nunnak saang ka si.

Ka hnenih a rami cu a riil a rawng dah lo ding; keimah i zumtu cu a ti a haal dah lo ding.

Cule i thlahtu ih duhmi cu hihi a si: I pekmi hmuahhmuah kha pakhat hman hloter loin, ni neta bik ni-ah an zate ih ka thawhter sal ṭheh ding kha a si.

Ziang hrangah tile ka Pa ih duhmi cu Fapa kha a hmu ih a zumtu hmuahhmuah cu kumkhua nunnak an ngahnak ding kha a si.

Cule ni neta bikah nunnak ah ka thoter ding a si,” tiah a ti.

Keimah hi vancung ihsin a rung ṭummi saang nung ka si.

Hi saang a eitu cu kumkhua in a nung ding. Ka pek dingmi saang cu hi leilung in nunnak a ngah theinak dingih ka pekmi ka taksa hi a si,” tiah a ti.

Kei cu nunnak an ngah ih tlamtling zetih an neihnak dingah ka ra a si.

Zokhal ka taksa a ei ih ka thisen a intu cu ka sungah a nung; cule keimah khal a sungah ka nung a si.  Johan 6:32-56, 10:10

.....................................................................................................................................................

13.Rinsannak

( Confidence )

KHB.No.503

Ka zawn in ruahnak cu caan reipi hnuah nan hun langter sal ih kan Bawipa thawn kan pehzom awknak ruangah ka lung a awi ngaingai.

Hitiih ka ti tikah ka zawn in ruat nawn lo, ka ti duhnak a si lo; a langternak caan nan ngah lo ruangah a si sawn. ¹¹In dungtun zo a si hi, tiih ka ruah ruangah ka simmi a si fawn lo.

Thungai ti ahcun ka neih zatte thawn lungkim zetih um ding ka thiam zo.

Tlasam ih nundaan ka thiam ih neinung zetih um khal ka thiam zo.

Cutiih umdaan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka riilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo.

Cahnak i petu Khrih sungin ziangkim ka ti thei.

Tlap le nget ih a siatsuah theinak le rukru pawl in an bauh ih an ruk theinak hi leitlun ah nan sumsaw khawl hlah uh.

Tlap le nget ih a siatsuah thei lonak le rukru pawl in an bauh ih an ruk thei lonak vancung ah nan sumsaw cu khawl sawn uh.

Ziangah tile nan sumsaw umnak ah nan thinlung khal a um ve ding.

Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh.

Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.

Curuangah thaisun hrangah donhar in um hlah uh; thaisun in donharnak amah tawkin a nei ve ding.

Ni ni khat ih a phurhmi harsatnak tlunah a dang beetcih ding a si lo. Mtt.6:19-21,25,33-34, Fil.4:10-13

.....................................................................................................................................................

14.Tumkau Nipini

( Palm Sunday )

KHB.No.304

A thaisun ah Lantak Puai ih a rami miburpi in Jesuh cu Jerusalem ah a ra ding, ti kha an thei. Cuhrangah tuum hnah an lak ih amah hmuak dingah feh phah in,

“Pathian cu thangṭhat uh! Bawipa ih hminin a ratu cu Pathian in thlawsuahnak pe hramseh! Pathian in Israel Siangpahrang cu malsawm hram seh!” tiah an au ciamco.

Jesuh cu Jerusalem khawsungih a luh tikah a khua pumpuluk in an au celcel ih, “Hi pa hi zoso a si?” tiah khua mi pawl in an sut.

Cutikah miseenpi pawl cun, “Hi pa cu Galilee ram Nazareth khuami profet Jesuh a si,” tiah an ti.

Jesuh cu Biakinn sungah a lut ih cutawkih thil a zuartu le a leitu pawl kha a dawi ṭheh.

Tangka thlengtu pawlih cabuai pawl le laileng zuartu pawlih tokham pawl cu a linglet ṭheh.

Cule an hnenah, “Ca Thianghlim sungah Pathian in, ‘Ka Inn cu thlacamnak inn ti a si ding,’ tiah a ti. Asinain nannih cun fifir relhnak kua ah nan tuah,” tiah a ti.

Cuih puai ih Pathian be dingah Jerusalem ih a hung fehtu mi tampi lakah cun Grik mi tla an tel ve. Filip hnenah an feh ih, “Sayapa, Jesuh hmuh kan duh,” tiah an va ti.

Jesuh in an hnenah, “Milai Fapa in sunlawinak a ngahnak caan a ra thleng zo.

Thungaite in ka lo sim: sangvut ci fangkhat cu lei lung sungah tuh ih a thihta lo ahcun amah keel in a taang ringring. A thihta hnu lawngah ci tampi a suahter.

.....................................................................................................................................................

15.Thawhsal Ni

( Easter Sunday )

KHB.No.505

Sabbath ni a liam ih a thaizing zingthlapit ah Mari Magdalene le a dang Mari cu thlaan zoh dingah an feh.

Hmakhatteah nasa zet in ling a hnin. Bawipa ih vancungmi pakhat cu vancung ihsin a rung ṭum ih thlaan saangka khar lungphengpi cu a ṭhawn ih a parah a to.

Vancungmi cun nunau pawl hnenah, “ṭih hlah uh; thinglamtah parih an thahmi Jesuh nan hawl ti ka thei. Hinah a um lo, a rak simcia bangtuk in thihnak ihsin thawhter sal a si zo. An phumnak hmun hi ra zohhnik uh.

Zamrang in va feh uhla a dungthluntu pawl kha ‘Thihnak ihsin thawhter a si zo; nan hmaiah Galilee ah a feh ding ih cutawkah nan hmu ding!’ tiah va sim uh. Ka lo simmi hi hngilh hlah uh,” tiah a ti.

Curuangah zamrang zetin thlaan ihsin an tlung; an ṭih phah, an lung a awi phah, cuticun dungthluntu pawl sim dingah an tlan.

Sikhalsehla thudik cu hiti in a si: Khrih cu thihnak ihsin thawhtersal a si zo ih a thi ciami pawl thawhter an si ve ding ti theihnak ah rah hmaisa bik aamahkhan a si.

Mi pakhat ruangah thihnak a um bangtuk in mi pakhat thawngin thawhsalnak a thleng ve.

Jesuh in a hnenah, “Kei cu thawhsalnak le nunnak ka si. Zokhal keimah i zumtu cu thi hmansehla an nung ding. Zokhal keimah sungah a nungmi le i zumtu cu an thi nawn lo ding. Himi hi na zum maw?” tiah a sut.        Matt.28:1-8; 1Kor.15:20-21;  Jon.11:25-26

....................................................................................................................................................

16.Khrih Thawn Pawlkmnak

( Fellowship With Christ )

KHB.No.506

Nannih cu nunnak ah Khrih thawn thawhter nan si zo ruangah Pathian vorhlam kap Khrih tonak vancung khuaih thil ah khin nan thinlung bun uh.

Leilung tlun thil pawl ruat loin vancung thil pawl khi ruat sawn uh.

Ziangah tile nan thi zo ih nan nunnak taktak cu Khrih thawn Pathian sungah thuh-in a um a si.

Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo.

Nan nun hlun nuncan ziaza cu nan phuak zo ruangah pakhat le pakhat bum aw nawn hlah uh; ¹⁰cule nun thar ziaza nan hruk aw zo ih cuih nun thar cu a siamtu Pathian in amah ih hmuihmel keng sinsin vivo dingin cat loin a tharter ringring. Cutiih a tharternak cu amah famkim zetih nan theihsuaknak ding hrangah a si.

Cuti a si ruangah, Zentail mi le Judah mi tiin siseh, serhtan le tanlo ti in siseh, mi aa phun tile ziangthu hman thei lo ramsa phun, sal pawl tile miluat pawl tiih thleidan awknak a um nawn lo; Khrih lawng hi ziangzongza a si ih ziang hmuahhmuah sungah a um a si.

Nannih cu Pathian ih minung nan si; a lo duhdawt hai ih amah ih hrangah a lo hriilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh.

Pakhat le pakhat karah thinlung hmuh-awk lonak le phunzainak a um ahcun pakhat le pakhat zawi-awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw ve uh.

Cule hibangtuk ziaza ṭha nan neihmi tlunah duhdawtnak beetcih uh; ziangah tile duhdawtnak cu ziangtinkim famkim zetih a finkhawmtu le rem ṭhepṭhep ih a tuahtu a si.

Khrih ih a lo pekmi daihnak cu thu nan ruah nan relcatnak kipah a lo hotu-ah tuah uh; ziangah tile hi daihnak sungih um dingah Pathian in taksa ruang pakhat sungah a lo kawhmi nan si. Cule lungawi aipuang in um uh. Kol.3:1-3;

2 Kor.5:17; Kol.3:9-15

.....................................................................................................................................................

17.Dungthluntu Si Theinak

( Discipleship )

KHB.507

Cutiih a feh vivo laiah mi pakhat in Jesuh cu, “Na fehnak kipah ka lo thlun ding,” a ti.

Jesuh in, “Cinghnia pawl in kua an nei ih vate tla in bu an nei; sikhalsehla Milai Fapa cun riahnak le lu hngauhsannak hmun khal a nei lo,” tiah a ti.

Mi pakhat hnenah Jesuh in, “I thlun aw,” a ti.

Asinain cupa cun, “Bawipa, ka pa ka va phumta hmaisa pei,” tiah a ti.

Jesuh in, “Mithi cu mithi pawl in phum ko haiseh. Nang cu feh awla Pathian Uknak thu phuang sawn aw,” a ti.

A dang pakhat in, “Bawipa, ka lo thlun ding; a sinain hmaisa bikah ka sungte pawl ka va biakta pei,” a ti.

Jesuh in a hnenah, “Zokhal dunglet hoi phah ih lei a lettu cu Pathian Uknak hrangah santlai lo a si,” tiah a ti.

“Zokhal sisehla, keimah hnakin a nu le a pa a duh sawntu cu i thluntu dingah a tlak lo.

Keimah hnakin a fanu siseh, a fapa siseh, a duh sawntu cu i thluntu dingah a tlak lo.

Zokhal sisehla amah ih thinglamtah phur tahratin ka dungih i thlun lotu cu ka minung si dingah a tlak lo. ³⁹Amah ih nunnak hum a tumtu cu a nunnak a sung ding, a sinain keimah ruangih a nunnak a liamtu cu a nunnak a hum ngah ding.

LK.9:57-62; Mt.10:37-39

......................................................................................................................................................

18.Raalthatnak

( Courage )

KHB.No.507

Cuti a si ahcun zo in so Khrih ih duhdawtnak cun in ṭhen thei ding? Harsatnak siseh, tuarnak siseh, hremnak siseh, riilrawnnak siseh, hnipuan neilo farahnak in siseh, ṭihphannak le thihnak khal siseh, cupawl in in ṭhen thei ding maw?

Ṭhen thei hlah! kannih in duhdawtu ih thawngin hi thil hmuahhmuah tlunah nehtu kan si.

Ziangah tile amah ih in duhdawtnak ihsi cun zianghman in in ṭhensuak thei lo ding, tihi fiangtein ka zum a si.

Thihnak in siseh, nunnak in siseh, vancungih a ummi vanmi le uktu le huham neitu pawl in siseh, atu san in siseh, hmailam san in siseh, thuneitu ³⁹leitlun ummi in siseh, leihnuai ummi in siseh, sersiammi thil hmuahhmuah in siseh, in ṭhen thei lo ding.

Kan Bawipa Khrih Jesuh sungin kan ta a si mi Pathian ih duhdawtnak ihsi cun in ṭhen theitu ding zianghman a um lo.

Nan thinlung put daan cu Khrih Jesuh ih thinlung put daan vekin siseh.

Khrih cu Pathian sinak a nei ringring; Asinain Pathian bang dingah hranhram in a tum dah lo.

Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang.

Tangdornak thinlung a nei ih, Pathian thu thlun in, Thinglamtah thihnak tiangin a tuar.

Curuangah a saang bik hmunah Pathian in a cawisaang ih, Hmin hmuahhmuah lakih cungnung bik hmin a pek.

Cuti a si ruangah, Jesuh hmin upatnak pekin, Vancung ih a ummi hmuahhmuah in siseh, Leitlun le leihnuai ih a ummi hmuahhmuah khalin siseh,an khuk an bilh ding ih, Jesuh Khrih cu Bawi a si, tiah Pa Pathian sunlawinak ah an zate in an phuang ding.Rom.8:35ff; Fil.2:5-11

.....................................................................................................................................................

19.Nu Ni

( Mothar’s Day )

KHB.No.508

A ni thumnak ah Biakinn sungah an hmu. Judah mi zirhtu saya pawl an tokhawm ih an thu ngai phah in thu khal a sut phah rero.

Thu a theih daan le fim zetih a thu leh daan an hmuh tikah a theitu pawl cu an mang a bangzet.

A nu le a pa in cutawkih Jesuh an hmuh tikah an lau an khuaruah a har ngaingai ih a nu in, “Ka fapa, ziangah so hi bangtuk hin in tuah? Na pa thawn awloksong in kan lo hawl rero!” tiah a ti.

Jesuh in, “Ziangah so in hawl duh rero? Ka Pa ih inn ah um ding ka si, ti nan thei lo maw?” tiah a ti.

Cuih hnuah Jesuh cu a nu le a pa thawn Nazareth ah an kir ih an thu ngai in a um. A nu in hi thuhla hmuahhmuah cu a thinlung ah feltein a ciing ringring.

Jesuh cu taksa in siseh, fimnak in siseh a ṭhang vivo ih Pathian hmai le minung hmaiah mithmai ṭha a ngah.

Jesuh ih thinglamtah kiangah cun a nu le a nu ih naunu le Klopas nupi Mari le Mari Magdalene pawl an ding.

Jesuh in a nu le a duhdawtmi dungthluntu pa cutawkih an din kha a hmu ih a nu hnenah cun, “Amah kha na fapa a si,” tiah a ti.

Cule a dungthluntu pa hnenah cun, “Anih kha na nu a si,” tiah a vun ti.

Cuihsin thokin dungthluntu pa in Jesuh ih nu cu a innah a umter.

Lk.2:46-52; Johan 19:25-27

......................................................................................................................................................

20.Duhdawtnak

( Love )

KHB.No.509

Milai ṭong a phunphun le vancungmi ṭong khal thiam hman ningla duhdawtnak ka neih lo ahcun

ka ṭong cu a ring meenmi darkhuang le a awn rurimi darsumsel bangtuk a si.

Profet thusim thiamnak laksawng siseh, fimthiamnak a phunphun le thuthuuk a phunphun theih theinak khal siseh, tlang ṭhawn thei zumnak tiang khal nei hman ningla duhdawtnak ka neih lo ahcun

            zianghman ka si lo.

Ka neih hmuahhmuah mi pe ṭheh in ka ruangpi hi meisa ih ur dingah pe hman ningla duhdawtnak ka neih lo ahcun

ka hrangah zianghman a ṭhahnem lo.

Duhdawtnak cu a thin a sau ih mi zaangfah a thiam; duhdawtnak cu mi a iksiik lo, tluang a khawng lo ih a puarthau fawn lo.

Duhdawtnak cu nun hel-hlong in a nung lo, amah ih zawn lawng a ruat lo, a thin a tawi lo, cule tisual mi parah thinciin a nei lo.

Duhdawtnak cu thil ṭha lo parah a lung a awi lo, a sinain thutak parah a lung a awi.

Duhdawtnak cu a bei a dong dah lo; ziangkim a zum, ziangkim a beisei ih ziangkim a tuar thei.

Duhdawtnak cu cem ni a nei lo. Sikhalsehla profet thusim thiamnak pawl cu a reh ding; theih lo ṭong ih ṭong theinak khal a cem ding. Thiamnak le theihnak tla an hloral ding.

A hmun ringringmi thil pathum an um ih zumnak, ruahsannak le duhdawtnak an si; himi lakah a tum bikmi cu duhdawtnak a si.  1 Kor.13

.....................................................................................................................................................

21.Hngilhlonak

( In Memoriam )

KHB.No.510

Cuti a si ruangah ka u le ka nau tla, a tam zetmi Pathian ih in zaangfahnak ruangah hin nan ruangpumpi cu a thiangmi le cohlan tlak raithawinak bangtuk in Pathian hnenah pe uh, tiah ka lo dil. Cumi cu Pathian hnenih nan pek dingmi biaknak taktak cu a si.

Hi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei ding ih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding.

Cuih hnuah ka hun zoh ih mipi tamzet ka hmu; zohmanih siarcawk lo miruunpi an si. Annih cu phun kip, hnam kip, le hrin kip ṭong kip ihsin a rami an si ih

bawi tokham le Tuufa hmaiah an ding; puan raang an hruk ih an kut in ṭhulhfau hnah an keng fingfing. ¹⁰“Rundamnak cu bawi tokham parih a totu kan Pathian le Tuufa hnen ihsin a ra,” tiah ring zetin an au.

Upa kul hluanli lakih pakhat in, “Hi puan raang a sintu pawl hi zoso an si? Khuitawk in so an ra?” tiah i sut.

“Bawipa, ka thei lo. Nang na thei sawn ding,” tiah ka ti.

Cule anih in, ‘,Himi pawl cu hremnak nasazet sung ihsin himdam in a ra suakmi an si.

An puan cu Tuufa thisen sungah an sawp ih an vaar ter zo.

Curuangah Pathian ih bawi tokham hmaiah an ding ih biakinn sungah a hnaṭuan cu a sun a zan in an ṭuan.             Thup.7:9,13-15; Rom.12:1-2

22.Nauhak Ni

( Children’s Day )

KHB.No.510

Cuih caanah dungthluntu pawl cu Jesuh hnenah an ra ih, “Vancung Uknak ah zoso a tum bik?” tiah an sut.

Cutikah Jesuh in nauhakte pakhat a ko ih an hmaiah a dinter hnuah,

“Fiangtein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding.

Mi tangah a dor ih hi nauhak bangtuk a si mi cu vancung Uknak sungah a tum bikmi a si.

Cun ka hmin in hi bangtuk nauhakte a cohlangtu cu keimah a cohlangtu a si.

“Zokhal in hi nauhakte pakhat khat keimah i zumnak ihsin a pialtertu cu

a hngawng ah fangcang rialnak lungtum thlaih tahratin tifinriat sungah thlak sisehla amah ih hrangah a ṭha sawn” tiah a ti.

Mi ṭhenkhat in an faate pawl kha Jesuh in thlawsuah pe dingah an rak hruai.

Asinain cu pawl cu a dungthluntu pawl in an rak kawk. ¹⁴Cuih thu cu Jesuh ih a theih tikah a thin a heng ih a dungthluntu pawl hnenah, “Nauhak pawl cu ka hnenah ra haiseh, dawn hlah uh.

Ziangah tile Pathian Uknak cu hi bangtuk nauhak pawl hrangah a si.

nauhak pawl cu a pom ih an parah a kut a suang fingfing ih thlawsuah a pek.

Naute cu a ṭhang vivo ih a cak ngaingai. Amah cu fimnak in a khat ih Pathian thlawsuahnak a parah a um.  Mt.18:1-6; MK.10:13-16; LK.2:40

....................................................................................................................................................

23.Pentikos Ni

( Whit Sunday )

KHB.No.511

Pentikos ni a thlen tikah zumtu hmuahhmuah cu hmun khatah an um.

Hmakhatte-ah van ihsin thlipi hrang bangin thawmvang a rung ih an tonak khaan cu a khat ṭheh.

Cule lei bangtuk a si mi meisa hliau an rungsuak zohzo ih cuih khaan sung ummi hmuahhmuah cuih meisa hliau cun a run dai fingfing.

An zatein Thlarau Thianghlim in an khat ih Thlarau in ṭong theinak a pek vekin ṭong dangdang in an ṭong ciamco.

Mangbang le khuaruahhar in, “Hitiih a ṭong reromi pawl hi Galilee mi an si ko lo maw?

            Ziangtin so kanmah ih ṭong cio ih ṭong in kan theih thei? tiah an ti.

Cule Piter cu a dang tirhthlah hleikhat hnenah a ding ih aw ring zetin miseenpi hnenah thu a sim.

“Ka phunpi Judah mi le Jerusalem ih a ummi pawl, nan zatein in ngai uhla, hi thil ih a tican ka lo sim hai ding.

Profet Joel ih sim ciami cu, ‘Pathian in, ni netnak lamah cun hiti in ka tuah ding; Mi hmuah-hmuah parah ka Thlarau ka burh ding;

Nan fapa pawl le nan fanu pawl in ka thu an phuang ding. Ca Thianghlim in, “Zokhal Bawipa ih hmin a kotu hmuah in rundamnak an ngah ding,” a timi a kim a si.  Tirh.2:1-8,14-17 Rom. 10:13

.....................................................................................................................................................

24.Khristian Hmunkhat Theinak

( Christian Unity )

KHB.No.512

Bawipa ih hnaṭuannak ruangih thawng a tlami keimah in Pathian kawhmi nan si bangtuk in nan nunnak ah amah ih kawhmi nan sinak kha langter uh, tiah ka lo forh.

Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawi-eet thei awknak in langter uh.

Thlarau in a lo pekmi pumkhat sinak kha ṭunghmun dingah hmun khatih a lo ṭemkhawmtu ih remnak in hmunter uh.

Pathian in a lo kawh tikah a lo kawh sanmi ruahsannak cu pakhat a si vekin ruangpum pakhat a um ih Thlarau khal pakhat a um.

Bawi pakhat a um, rinnak pakhat a um, baptisma pakhat a um. Pathian pakhat a um ih mi hmuahhmuah ih Pa a si. Amah cu ziang hmuahhmuah ih tlunah Bawi a si; ziang hmuah-hmuah sungin hna a ṭuan ih ziang hmuahhmuah sungah a um.

Ka u le ka nau tla, nan lakih ṭhenṭheknak a um lonak dingah nan thinlung rual awtein um hram uh tiah kan Bawipa Jesuh Khrih hmin in ka lo dil a si.

Rualrem zetin, thinlung khat le tumtahnak bangrep in um uh.

Thinlung sungih mi huatnak le ral awknak, taksa hiarnak le thinhengnak pawl kha cem ter uh.Pakhat le Pakhat huatnak thinlung malte hman nein awn hlah uh.

Cu pawl aiah pakhat le pakhat zangfah thinnemnak nei aw ton uh la, Khrih thawngin Pathian in a lo ngaidam bangin pakhat le pakhat ngaidam aw uh.

Khrih in in duhdawtih a nunnak kan hrangah Pathian lungawi tertu rimhmui peknak le raithawinak a pek awk vekin, nan nunnak cu duhdawtnak in lo uk seh.                                    Efi.4:1-5; 1 Kor.1:19f

.....................................................................................................................................................

25.Nun Tharnak

( New Life )

KHB.No.512

Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo.

Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; Sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding.

Keimah cu Sabit hri ka si ih nannih cu a hnge nan si.

Zokhal ka sungah a um ih kei khal a sungih ka umcilh mi cun rah tampi a rah ding. 

ziangah tile keimah tel lo cun zianghman nan tuah theimi a um lo.

Zokhal keimah sungih a um lomi cu Sabit hnge an hlon ih a carmi bangtuk a si ding. Cubangtuk hnge pawl cu an khawm ih meisa sungah an hlon ih a kang ṭheh.

Keimah sungah nan um ih ka thu hi nan sungih a um ve ahcun nan duhmi pohpoh nan dil tikah nan ngah ding.

Rah tampi nan rahnak hin ka Pa ih sunlawinak nan langter ih cuti cun ka dungthluntu nan can theinak a si.

Pa ih thukham ka thlun ih cuti cun amah ih duhdawtnak sungih ka um vekin ka thukham nan thlun a si ahcun ka duhdawtnak sungah nan um ve ding.

Keimah ih ka lo duhdawt vek hin nannih khal pakhat le pakhat duhdaw aw ve uh! Mi pakhat in a rualpi pawl hrangah duhdawtnak tum bik a neihmi cu an hrangih a nunnak pek hi a si.                    2 Kor.5:17; Jn.15:5-13

......................................................................................................................................................

26.Suupnak

( Temperance )

KHB.No. 513

Curuangah nan nundaanah hin ralring uh. Mi aa bangin nung hlah uh; a fimmi bangin nung uh. Caan ṭha nan neih-mi kip kha man nei zetin hmang uh; ziangah tile kan san hi sansia a si.

Mi aa si hlah uh; Bawipa in tuahter a lo duhmi kha hawl tum sawn uh.

Zu ri hlah uh; zu cu a lo siatsuahtu lawng a si. Cuhnakin Thlarau in khat sawn uh.

Thlarau in nan nunzia a uk a si ahcun minung tisa hiarnak cu a di nan riamter lo pei.

Ziangah tile minung tisa duhnak le Thlarau duhnak cu an ral aw. Minung tisa ih duhmi kha Thlarau in a hua ih Thlarau ih duhmi kha tisa in a hua ve.

Hi te pahnih cu an hua aw. Curuangah a si na duhmi kha na tuah thei lo.

Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak,

mi zaangfahnak, ṭhatnak, rintlak sinak, nunnem tangdornak le suup theinak tla an si. Cubangtuk rah umnak ahcun daan cu a ṭul nawn lo.

Khrih ih ta a si mi pawl cun an taksa hurnak le hiarnak pawl cu thinglamtah ah an khenthat zo.

Thlarau in nunnak in pek zo ruangah kan nunnak khal hi Thlarau amah in a uk ding a si.

Nannih cu Pathian biakinn nan si ih a Thlarau nan sungih a um kha nan thei lo maw? Curuangah zokhal hih Pathian biakinn a siatsuahtu cu Pathian in a siatsuah ve ding.

Ziangah tile Pathian biakinn cu a thianghlim ih a biakinn cu nanmah hi nan si.

            Efe.5; Kal.5; 1 Kor.3

.....................................................................................................................................................

27.Mante Uknak

( Independence )

KHB.No.514

Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si.

Cubangtuk zumnak an neih ruangah khuahlan minung pawl in Pathian ih lungkimnak an co ngah.

Abraham cu Pathian in ka lo pe ding tiih a tiammi ram feh dingih kawh a si tikah Pathian duhnak a thlun theinak cu a zumnak ruangah a si. Khuitawk ramah ka feh ding ti hman thei loin a khua le a ram cu a fehsan.

Moses cu a hung upat hnuah Ezipt siangpahrang fanu ih fapa tiih kawh a duh lonak cu a zumnak ruangah a si.

Caan tawite sung sualnak sungah nunnuamih um hnakin Pathian minung pawl thawn harsatnak tuar a hriil sawn.

umnak thawngin Israel mi pawl in Tipi Sen cu leiro vekin an tan thei;

Ka sim vivo hrih ding maw? Gideon, Barak, Samson, Jefthah, David, Samuel le profet pawlih thuhla sim ding tampi an um nain simnak tikcu caan a um lo.

Zumnak thawn ram tampi an do ih an neh. A dikmi an tuah ih Pathian thutiammi an co. Kiosa pawlih kaa an ciipter.

Mi hrek cu hmuhsuam le vuak an tong; mi hrek cu thir cikcin in an khit ih thawngah an thlak.

Zumnak an neih ruangah himi pawl hmuahhmuah hi ziangtluk porh tlak so an si! Asinain Pathian ih a tiam ciami pawl an ngah hrih lo, ziangah tile Pathian in kan hrangah khawkhanmi ṭha deuh a neih ruangah a si. A tumtah ngaingaimi cu kanmah thawn kan hmunkhat hnu lawngah famkimnak an ngah ding tihi a si.

.....................................................................................................................................................

28.Senpi Felnak

( Social Justice )

KHB.515

Duhdawtnak kan ti tikah thinlung taktak thawn duhdawt ding a si. A ṭha lomi cu hua uhla a ṭhami kha kai hnget uh. ¹⁰Khristian unau nan si ruangah pakhat le pakhat sunsak awzet tein duhdaw aw ton uh. Pakhat le pakhat hmaizah awknak thiam uh.

A lo hremtu pawl hrangah camriamnak si loin thlawsuahnak kha Pathian hnenah dilsak sawn uh.

Lungawimi pawl thawn lungawi tlang uhla a ṭapmi pawl thawn ṭap tlang uh.

Nanmah ih zawn nan ruat vekin midang zawn khal ruat ve uh. Keimah ka si bik, tiin ruat aw hlah uh; hnaṭuan ṭukṭak tete ṭuan duhnak thinlung nei uh. Ka fim a si tiah ruat aw hlah uh.

Mi pakhat khat in nan parah ṭhat lonak an tuah tikah an parah ṭhat lonak thawn leh-rul hlah uh. Zozo khalih a ṭha a mawi an timi kha tuah zuam uh.

Mi hmuahhmuah thawn remte ih um ding kha a cangthei tawkin zuam uh.

Cule Ca Thianghlim in, “Na ral a riil a rawng a sile rawl pe aw; a ti a haal a sile tidai pe aw;

cutiih na tuah a sile a lu-thlungah meiling na ret a si ding,” a ti.

Ṭhat lonak in lo neh hlah seh; ṭhat lonak kha ṭhatnak in neh sawn aw.

Zohnen hmanah baakmi nei hlah uh. Nan baakmi cu pakhat le pakhat duhdawt awknak lawng kha siseh. Duhdawtnak a neitu cu Daan thluntu a si.

Thukham pekmi, “ṭaangṭawm sualnak tuah hlah; mi that hlah; rukru hlah; mi ih thil va daw hlah,” timi pawl le

a dang thukham pawl hmuahhmuah cu, “Nangmah le nangmah na duhdawt awk bangin na innhnen khal duhdaw aw,” timi thukham sungah a kim ṭheh. Rom.12,13

.....................................................................................................................................................

29.Kawhhran Vangtlang

( Church Universal )

KHB.No.516

Jesuh in, “Nannih in teh! Kei hi zo a si in ti so?” tiah a sut. Simon Piter in, “Nang cu a nungmi Pathian ih Fapa Messiah na si,” tiah a ti.

Cutikah Jesuh in, “Johan fapa Simon, mi vannei na si! Ziangah tile hi thu cu minung hnen ihsin na ngahmi a si lo, vancung i a um ka Pa in na hnenih a phuanmi a si.

Ka lo sim Piter, nang cu lungto na si; hi lungpi parah hin ka kawhhran ka din ding ih thihnak hman in a neh thei dah lo ding.

Vancung Uknak tawhfung ka lo pe ding ih leilung tlunih na khammi cu vancungah kham a si ve ding ih leilung tlunih na onmi cu vancung khalah on a si ve ding,” tiah a ti.

Cule Khawpi Thianghlim Jerusalem thar cu, a pasal dingmi tong dingah cei-aw in a timtuah awmi monu vekin Pathian hnen vancung ihsin a rung ṭum kha ka hmu.

Bawi tokham ihsin aw ringzet ka thei ih, “Pathian umnak inn cu minung hnenah a si zo. Amah cu an hnenah a um ding ih annih tla cu amah ih minung an si ding. Pathian Amah rori an hnenah a um ding ih an Pathian a si ding.

An mitthli hmuahhmuah a hnul sak ding. Thih a um nawn lo ding; ninghang riahsiat, aihram ṭahnak le natnak a um nawn lo ding. Ziangah tile thil hlun pawl cu an hlo ṭheh zo,” tiah a ti.

Thlarau le Mo cun, “Ra aw,” an ti. Hi thu a theitu hmuahhmuah in, “Ra aw,” tiah ti ciar haiseh. Ti haal mi hmuahhmuah in ra uh; nunnak tidai a duhtu hmuahhmuah in man pek loin ra in uh.             Mt.16:15-19; Thup.21,22

....................................................................................................................................................

30.Sunglam Thianhlimnak

( Inner Purity )

KHB.No.516

Jesuh in mipi a hmuh tikah tlangpar ah a hung kai; cutawkah cun a to ih a dungthluntu pawl a hnenah an ra. Cule a kam a kau ih hiti in thu a zirh:

“Thlarau lamah ka farah ti a thei awtu pawl cu mi thluasuak an si; Ziangah tile vancung Uknak cu anmah ih ta a si.

Ninghang lungsia pawl cu mi thluasuak an si; Ziangahtile Pathian in a hneem hai ding.

Lungnemmi pawl cu mi thluasuak an si; Ziangah tile Pathian ih kam ciami an co ding.

Pathian ih duhnak tuah dingih a hiarhaaltu pawl cu mi thluasuak an si; Ziangah tile Pathian in an lung di a riamter ding.

Mi zaangfah thiamtu pawl cu mi thluasuak an si; Ziangah tile Pathian in anmah a zaangfah ve ding.

Thinlung a thiangmi pawl cu mi thluasuak an si; Ziangah tile Pathian an hmu ding.

Remnak a tuahtu pawl cu mi thluasuak an si; Ziangah tile Pathian ih fahniang tiah kawh an si ding.

Pathian duhnak tuah ruangih hremnak a tuartu pawl cu mi thluasuak an si; Ziangah tile vancung Uknak cu anmah ih ta a si.

“Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si. ¹²Nan lungawi in nan aipuang uh, ziangah tile nan hrangah tuarman tampi vancung ah ret a si. Nan hlanih profet pawl khal cu bangtuk in hrem an tuar zo.

“Nannih cu leilung pumpi hrangah tleunak nan si.

Tlangpar ih tohmi khua cu thuh a theih lo.

Zohman in mei-inn an van tikah khengkuum an khuh dah lo. Mei-inn vannak tung parah an vang. Cutiin inn sungih a ummi zate hrangah tleunak a si.

Cubangtuk in nan tleunak cu mi hmaiah tleuter ding nan si. Cuticun thil ṭha nan tuahmi cu mi in an hmu ding ih vanih a ummi nan Pa kha an thangṭhat ding. Mt.5

....................................................................................................................................................

31.Pathian Rinsannak

( Trust in God )

KHB.No.517

Hi thlun dingmi le thuzirhnak pawl hi sim awla zirh aw. Mino na si ruangah zohman in lo nautat hlah haiseh.

Sikhalsehla na hmurka na ṭong daan, na umtlan na ziaza, duhdawtnak le zumnak le thianhlimnak khalah zumtu dang pawlih zohṭhim dingin nung aw.

Na hnen ka ra thlen hlan sung cu miseenpi hnenah Ca Thianghlim siar awla, thusimnak le thuzirhnak in na tikcu le na thazaang rak hmang aw.

Profet pawl in thu an phuang ih upa pawl in na lu tlunih an kut an suan zawng ih na ngahmi thlarau laksawng kha thlahthlam hlah.

Na ṭhanso zia kha mi hmuahhmuah ih an hmuhnak dingah himi pawl hi na tikcu le na thazaang pe in hmang aw.

Na nundaan ralring awla na zirhmi tla ralring aw.

Himi pawl hi cat loin tuah aw. Na tuah ringring thei a si ahcun nangmah le na thusimmi a theitu pawl kha na rundam ngah ding a si.

Kan Bawipa in pakhat le pakhat nan duhdawt awknak le mi hmuahhmuah nan duhdawtnak cu karhter sehla nanmah kan lo duhdawtnak a tum vekin tumter ve hramseh.

Cuticun amah in nan thazaang a khohter ding ih kan Bawipa Jesuh a mithiang pawl thawn a ratsal tikah kan Pathian hmaiah mi famkim le mi thianghlim nan si ding.

Daihnak in petu Pathian amah in famkim zetin lo thianghlimter sehla, kan Bawi Jesuh Khrih a ratsal tikah nan thlarau, nan thinlung le nan taksa, nan ziangzongza in mawhnak nei lo ah lo tuah hramseh. 1 Tim.4:11-16; 1 Thes.3:12-13; 5:23

.....................................................................................................................................................

32.Nunnak Reiawh

( Enduring Life )

KHB.No.518

“Moses in nelrawn ah fung parih dar rul a thlai bangtuk in Milai Fapa khal thlai a si ve ding;

cuti cun amah a zumtu hmuahhmuah cu kumkhua nunnak an ngah ding.

Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding.

Ziangah tile leilung tlunah Pathian in a Fapa a run thlah tikah leilung thuṭhentu dingah a thlah lo, leilung runtu dingah a thlah a si.

Zokhal Fapa a zumtu cu thuṭhennak a tong lo ding; sikhalsehla a zum lotu cu Pathian ih Fapa neihsun a zum lo ruangah thuṭhennak a tong zo.

Jesuh in, “Na ṭapa cu a nung sal ding,” tiah Martha cu a ti.

Martha in, “A si, ni neta bikah cun a tho sal leh ding ti cu ka thei,” tiah a let.

Jesuh in a hnenah, “Kei cu thawhsalnak le nunnak ka si. Zokhal keimah i zumtu cu thi hmansehla an nung ding. Zokhal keimah sungah a nungmi le i zumtu cu an thi nawn lo ding. Himi hi na zum maw?” tiah a sut.

²⁷Martha in, “A si Bawipa, nang cu leilung ah a ra dingmi Pathian ih Fapa Messiah na si ti ka lo zum,” tiah a ti.   Jn.3:14-18; 11:23-27

.....................................................................................................................................................

33.Pathian Hahsannak

( Longing for God )

KHB.No.519

Jesuh in, “Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo. Atu-ah cun zo ka si, ti in thei zo ih ka Pa khal nan thei ding; atu ihsin amah cu nan thei ih a hmuh khal nan hmu zo,” tiah a ti.

Filip in Jesuh hnenah, “Bawipa, na Pa cu in hmuh aw; cule kan lung a kim ding,” a ti.

Jesuh in, “Nan hnenah caan reipi ka um zo nain atu tiang in thei hrih lo maw, Filip? Zokhal keimah i hmutu cu ka Pa a hmu zo.

Ziangtin so ‘Na Pa in hmuh aw,’ tiah i sut hrih. Filip, keimah hi ka Pa sungah ka um ih ka Pa khal ka sungah a um, tihi na zum lo maw?

Nan hnenih ka ṭongmi hi keimah palung in a suakmi a si lo; ka sungih a ummi ka Pa ih hnaṭuannak in a si.

Keimah hi ka Pa sungah ka um ih ka Pa khal keimah ih sung ah a um, tiih ka timi hi zum uh. Cumi nan zum thei lo a sile thil ka tuahmi ruang tal in zum uh.

Thungaite in ka lo sim: Keimah i zumtu cun ka tuahmi hi a tuah ve ding.

A si, ka Pa hnenih ka feh ding ruangah hi hnakih thil mak sawn hman a tuah ding a si.

Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuahsak ding. ¹⁴Ka hmin in nan dilmi pohpoh cu ka tuah ding a si,” tiah a ti.

Zokhal ka thukham pawl a pom ih a thluntu cu i duhdawtu a si.

Keimah i duhdawtu poh cu ka Pa in a duhdawt ding; keimah khal in ka duhdawt ding ih a hnenah ka lang ding,” tiah a ti.           Jn.14:6-14,21

.....................................................................................................................................................

34.Pehzom Awknak

( Friendship )

KHB.No.519

Ka Pa ih thukham ka thlun ih cuti cun amah ih duhdawtnak sungih ka um vekin ka thukham nan thlun a si ahcun ka duhdawtnak sungah nan um ve ding.

Ka lungawinak cu nan sungah a um ih nan lungawinak cu lungawi famkim a sinak dingah hi thu hi ka lo sim.

Ka thukham cu hihi a si: Keimah ih ka lo duhdawt vek hin nannih khal pakhat le pakhat duhdaw aw ve uh!

Mi pakhat in a rualpi pawl hrangah duhdawtnak tum bik a neihmi cu an hrangih a nunnak pek hi a si.

Cule ka thupekmi nan tuah ahcun ka rualpi nan si. Nannih tla cu hnen-um tiah ka lo ti nawn lo, ziangah tile hnen-um cun a bawipa ih tuahmi kha a thei lo.

‘Hnen-um,’ ti nawn loin ‘Rualpi,’ tiah ka lo ko: ziangah tile ka Pa hnen ihsin ka theihmi hmuahhmuah cu ka lo sim ṭheh zo a si.

Nannih in in hriil lo; keimah in ka lo hriil hai ih kumkhuaih a hmunmi rah nan va rah theinak dingah ka lo fial a si.

Ka hmin in Pa hnenih nan dilmi hmuahhmuah cu a lo pe ding.

Nanmah lakah pakhat in a tum bik si a duh ahcun nan zate riantu a si pei. Nanmah lakah pakhatnak si a duhtu cun nan zate sal a si pei. Ziangah tile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si,” tiah a ti. Jn.15:10-20; MK.10:43-45

.....................................................................................................................................................

35.Hnatuannak Ni

( Labour Day )

KHB.No.520

Ṭongṭhimnak ah ‘Thla li hnuah rawl khawm caan,’ tiah nan ti. Sikhalsehla thungai in ka lo sim: lo sung khi hei zohhnik uh! Lorawl an thar zo ih rawl lak caan a cu zo a si.

Rawl a latu pa cu a hlawhman kha pek a si ih rawl cu kumkhua a nunnak hrangah a khawm. Cuticun thlaici a tuhtu le rawl a latu cu hmun khatah an lung a awi tlang ding.

 ‘Mi pakhat in a tuh; a dang pakhat in a at,’ timi cu a dikzet a si.

Nan rak ṭuan dah lonak lo sungah fang at dingin ka lo thlah hai. Cutawkah midang ih an rak ṭuan cianak ihsin midang hnaṭuan ruangah a miat nan ngah a si,” tiah a ti.

Kan tuahmi vekih tuah ding cu nan thei fiang a si. Nan hnenih kan um laiah khan zaangzel in kan um lo.

A man pek loin kan lakmi zianghman a um lo. Kanmah rori in kan ṭuan, kan cangvai ih zo hrang hmanih thilrit si lo dingin a sunzan in kan ṭuan a si.

Nan hnenih kan um laiah khan, “Hna a ṭuan duh lotu cu rawl khal ei hlahseh,” tiah kan lo sim ṭheu.

Hitiih kan lo simnak cu nanmah sungah mi hrekkhat zaangzel in an um ih hnaṭuan zianghman zuam loin midang hnaihnawh lawng an thiam.

Sun a si sung ahcun i thlahtu ih hna kan ṭuan rero a ṭul. Zan a ra thleng cing ding ih zohman hna an ṭuan thei nawn lo ding.

Curuangah thil ṭha tuah hi ning hlah uhsi; ning lo teih kan ṭuan ahcun a caan a kim tikah rawl kan khawm ding a si.       Jn.4:35-38; 2 Thes.3:7-11; Jn.9:4; Gal.6:9

......................................................................................................................................................

36.Bawipa Ni

( The Lord’s Day )

KHB.No.521

Sabbath ni-ah cun an Daan ih a fial vekin an cawl. Nipi ni zing thlapit ah nunau pawl cu an timtuah ciami rimhmui pawl kengin thlaan ah an feh.

Thlankhar lung phengpi a rak ṭhawn aw zo kha an hmu; ³cu hrangah an vung lut, a sinain Bawipa Jesuh ih ruak cu an hmu lo.

Cule an hnenah cun, “Nan hnen ka um laiah ka sim reromi cu hi thil pawl hi sokhaw an si: Moses Daan cabu sung, profet pawlih nganmi cabu sung le Saam cabu sungih keimah ih thu an rak nganmi pawl cu a kim ṭheh a ṭul a si,” tiah a ti.

Cun an thinlung mit a vaangter ih Ca Thianghlim ih simmi kha an thei thei.

An hnenah, “An nganmi cu hihi a si: Messiah cu a tuar pei ih a thih hnu ni thumnak ah a tho sal ding.

Cule Jerusalem ihsin thokin miphun hmuahhmuah hnenah amah hmin ih sualsirnak le sualngaidamnak thuthang cu phuan a si ding.

Bawipa Ni ah Thlarau in i zeel ih ka dunglam ihsin tawtawrawt vekin a ring zetmi aw thawm ka thei.

“Na hmuhmi hi ca sungah ngan awla khua pasarih ih a ummi Kawhhran pasarih hnenah kuat aw,” tiah i ti.

Amah ka hmuh tikah mithi bangin a kehram ah ka riil.

A vorhlam kut in i run tham ih, “ṭih hlah aw! Keimah cu a hmaisa bik le a neta bik ka si. A nungmi khal ka si.

Ka rak thi nain atu-ah kumkhua hrangin ka nung sal zo. Thihnak le mithi khua tlunah thuneitu ka si.

Curuangah na hmuhmi thil pawl, atuih a ummi le hmailamih a um lai dingmi thil pawl hi ngan aw.            Lk.23:56; 24:1-3; 44-47; Thup.1:10-19

.....................................................................................................................................................

37.Fimnak

( Wisdom )

KHB.No.522

Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangah tile zo hnen khalah Pathian cun siangzet le zaangfahnak thawn a pe a si.

Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semmi tifinriat tisuar bangtuk a si.

Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si.

Ruah napi in a sur, ti a lian ih thlipi in a nuai ciamco nain lungpi parih sakmi inn a si ruangah a sawn lo.

“Sikhalsehla hi ka ṭongmi a thei nain a thlun lotu cu vunnel parih inn saktu mi-aa bangtuk a si.

Ruah napi in a sur, ti a lian ih thlipi in a nuai tikah a sawn mai; a tlu ih a siatbal thluh a si,” tiah a ti.

‘Bawipa, Bawipa,’ tiih i kotu hmuahhmuah in vancung Uknak an thleng thluh lo ding; vancungih a ummi ka Pa ih duhnak a tuahtu lawnglawng an thleng ding a si, tiah a ti.

James 1:5-8; Matt.7:21-27

.....................................................................................................................................................

39.Lennak Ngaingai

( True Riches )

KHB.No.522

Cutikah Jesuh in a dungthluntu pawl hnenah, “Fiangtein ka lo sim: milian hrangah vancung Uknak sungih luh cu a har ngaingai a si.

Ka lo sim sal: Kalauk pakhat ṭhim hnakua sungih luh hnakin milian pakhat Pathian Uknak sungih luh a har sawn,” tiah a ti.

Cumi cu dungthluntu pawl in an theih tikah an mang a bang ngaingai ih, “Cuti a sile zoso runnak a ngah thei ding,” tiah an sut.

Jesuh cun hmaitontein a zoh hai ih an hnenah, “Himi hi minung hrangah cun a si thei lomi a si, sikhalsehla Pathian hrangah cun ziang hmuahhmuah a cang thei,” tiah a ti.

Jesuh in, “A si, thungai in ka lo sim: zokhal sisehla a inn siseh, a lo siseh, a unau siseh, a farnu siseh, a nu le a pa siseh, a faate pawl siseh, keimah le Thuthang ṭha ruangah a tlansantu cu,

tuihsan hrimhrim ah hin tam sinsin a ngah ding. Inn siseh, lo siseh, unau siseh, farnu siseh, nu siseh, faate siseh, a let zakhat in a ngah ding;

Tlap le nget ih a siatsuah theinak le rukru pawl in an bauh ih an ruk theinak hi leitlun ah nan sumsaw khawl hlah uh.

Ziangah tile nan sumsaw umnak ah nan thinlung khal a um ve ding.

Kan Bawipa Jesuh Khrih ih mi a zaangfah zia cu nan thei: Amah cu a lianzet nain nanmah ih ruangah mi farah ah a cang; cuticun a farahnak thawng in milian ih nan cannak dingah a si.

            Mt.19:23-26; Mk.10:29-30; Mt.6:19=21; 2 Kor.8:9

.....................................................................................................................................................

39.Himdamnak

( Security )

KHB.No.523

Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding.

Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding.

Ziangah tile keiih kawn phurh cu a nuam ih ka thil khal a zaang a si,” tiah a ti.

Khrih Jesuh thawn a pehzom awmi hrangah cun sual thuṭhennak in an luat zo.

Ziangah tile Khrih Jesuh thawn pehzomnak thawngin nunnak in petu Thlarau ih daan in sualnak le thihnak daan sung ihsin in luatter zo.

Pathian ih Thlarau cu nan sungih a um taktak a si ahcun Thlarau ih fialmi vekin nan nung sawn a si.

Zokhal Khrih ih Thlarau a nei lotu cu Khrih ta a si lo.

Khrih nan sungih a nun ahcun Thlarau cu nan hrangah nunnak a si; ziangah tile sualnak ruangah nan ruangpi cu a thi ding nain nannih cu Pathian thawn remtermi nan si zo.

Curuangah ka u le ka nau tla, minung kan sinak daanih duhzawng in nung ding kan si lo.

Minung nan sinak daan duhzawng ih nan nun a sile nan thi ding.

Pathian Thlarau ih hruaimi pawl cu Pathian ih fa an si.

Cuih Thlarau cun Pathian ih fa ah a lo canter ih Pathian hnenah, “Abba, Ka Pa,” tiih kan au theinak thazaang in petu khal cu Thlarau a si. Hitiih kan au ahhin Pathian ih Thlarau in kan thlarau a pehzom ih Pathian ih fa kan sinak kha a fiangter.  Mt.11:28-30; Rom.8

.....................................................................................................................................................

40.Khristian Hnatuannak

( Christian Ministry )

KHB.No.524

Ca Thianghlim in, “Zokhal Bawipa ih hmin a kotu hmuah in rundamnak an ngah ding,” a timi a kim a si.

An zum lomi cu ziangtinso a hmin an hlam thei ding? A thuhla an theih lo ahcun ziangtinso an zum thei ding?

A thu phuan a si lo ahcun ziangtinso an theih ding? ¹⁵Palai thlahmi an um lo ahcun ziangtinso thu an phuan thei ding?

Ca Thianghlim in, “Thuthang ṭha a phuangtu pawlih ke cu ziang tlukin so a mawi!” a ti.

zumnak cu thuthang theihnak ihsin a ra ih thuthang cu Khrih kan phuannak ihsin a ra.

Thinglamtah parih Khrih thihnak thu hi a hloral cuahcomi pawl hrangah cun aat-hna meen a si; sikhalsehla rundam lai reromi kannih hrangah cun Pathian ih cahnak hmual a si.

Thuthang ṭha hi ka zahpi hrimhrim lo: ziangah tile a zumtu hmuahhmuah rundamnak an ngahnak dingah Pathian ih huham a si. A hmaisa ah Judah mi hrangah a si ih Zentail mi hrang khalah a si ve.

Ziangtiin a si tile, Pathian in Amah le minung karlakah remnak ziang bangtuk in a tuah, ti kha a langter: cumi cu a hramthok ihsin a netnak tiang zumnak thawngin a si. Ca Thianghlim khalin, “Zumnak thawngih thiamcotermi cu an nung ding,” a ti.

kannih cun thinglamtah i an khenmi Khrih kan phuang ih cuih thu cu Judah mi pawl hrangah riilhbah-nak a si ih Grik mi hrangah cun aat-hna a si.

Sikhalsehla Pathian ih a kawh ciami pawl hrangah cun Judah mi siseh Zentail mi khal sisehla, cuti kan phuan mi cu Khrih a si ih Khrih cu Pathian cahnak le Pathian fimnak a si.      Rom.10:13-17; 1:16-17; 1 Kor.1:18-24

......................................................................................................................................................

41.Pathian Sumsaw Kengtu

( Stewardship )

KHB.No.525

Curuangah laksawng phun dangdang kan ngahmi cu Pathian zaangfahnak kan cozat ciarin hmang uhsi.

Kan ngahmi laksawng cu Pathian thu phuan ding a si ahcun zumnak kan comi zat in phuang uhsi; ⁷cubangtuk ṭhiamṭhiam in midang riantu ding kan si ahcun rian uhsi; zirhtu ding kan si ahcun zirh uhsi.

Midang thazaang petu ding kan si ahcun pe uhsi.

Kan neihmi thilri kha midang hlawm ding kan si ahcun siang zetin hlawm uhsi.

Hotu ding kan si ahcun taimazet in ṭuan uhsi;

Midang hnenah zaangfahnak langtertu ding kan si ahcun lungawi soparte in langter uhsi.

Thlaici malte a vorhtu in rawl malte a khawm ding; tampi a vorhtu in tampi a khawm ve ding,

Zozo khal a thinlung a ṭhencat ngah hnuah pe seh; sir awknak thawn pe hlah seh; ka ṭuanvo a si, ti khalin pe hlah seh. Lungawi aipuangte ih a petu lawng Pathian in a duh a si.

Zumtu pawl cu thinlung le ruahnak rual aw zetin an umtlang. Zohman in a neihmi thilri kha, ‘Ka bulta a si,’ a ti lo; an neihmi hmuahhmuah kha pakhat le pakhat an ṭawm aw.

Lo a neitu le inn a neitu pawl in an lo le an inn pawl cu an zuar ih an ngahmi tangka cu, tirhthlah pawl kutah an rak pek. Cule cuih tangka cu a ṭulnak vekin an zem vivo.       Rom.12:6-8; 2 Kor.9:6-7; Tirh.4:32-35

......................................................................................................................................................

42.Pakhat le Pakhat Duhdawt Awknak

( Love for One Another )

KHB.No.525

A hramthok ihsin nan rak theih ringring mi thuthang cu pakhat le pakhat duhdaw aw uh ti a si.

Ka duhdawt mi tla, pakhat le pakhat duhdaw uh si, ziangah tile duhdawtnak cu Pathian hnen ihsin a ra mi a si.Mi a duhdawtu cu Pathian fa a si ih Pathian theitu a si.

Mi a duhdaw lotu cu Pathian an thei lo, ziangah tile Pathian cu duhdawtnak a si.

Zokhal Pathian ka duhdawt ti cingin a unau a huatu cu thuphan per a si.

Ziangah tile a mit in a hmuh mi a unau hman a duhdawt lo a si ahcun a hmun lomi Pathian cu a duhdaw thei hrimhrim lo ding.

Hi leilun gleh a sungih thilri hi duh hlah uh; hi leilung hi nan duh a si le Pathian duhdawtnak nan nei lo a si.

Curuangah u le nau tla, leilung mi in a lo huat a si le nan mangbang hlah uh.

Kan nih cu thihnak kan suahsan zo ih nunnak sungah kan lut zo, ti kan thei. Cu ti kan theihnak cu kan unau kan duhdawt ruangah a si. Duhdawtnak a nei lo mi cu thihnak sungah a tang lai hrihmi a si.

Mi pakhat in a rualpi pawl hrangih duhdawtnak tumbik a neihmi cu a nunnak pek hi a si.

Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei.                 1 Jn.2,3,4, Jn.13:34

......................................................................................................................................................

43.Lungawinak

( Gratitude )

KHB.No.526

Khua pakhat a va thleng ih cuih khawsungih phaarnat in a nami pahra in an rak tong.

Lamhlat nawnah an ding ih, ¹³“Maw Jesuh, Bawipa, in zaangfah hram aw,” tiah an au.

Anmah lakih pakhat pa in a dam ṭheh zo ti kha a hmuh awk tikah a kirsal ih aw ring zetin Pathian a thangṭhat.

An feh laifangah cun an dam ṭheh.

Hmakhatteah Jesuh kehram leilungah cun a bok ih Jesuh hnenah lungawi thu a sim. Cupa cu Samaria mi pa a si. Jesuh in, “Damnak a ngahtu cu mi pahra an si. Pakua teh khui-ah so an si? ¹⁸Ziangah so hi ramdang mi pakhat lawng Pathian hnenih lungawinak pe dingah a rat?” a ti.

Cule Jesuh in, “Tho awla feh aw. Na zumnak in a lo damter zo,” tiah a ti.

“Dil uh, nan ngah ding; hawl uh, nan hmu ding; king uh, nan hrangah saangka on a si ding.

Ziangah tile a diltu hmuahhmuah cun an ngah ding, a hawltu hmuahhmuah cun an hmu ding ih a kingtu hmuahhmuah hrangah saangka cu on sak an si ding.

Mi ṭha lo zet nan si nain nan faate pawl hrangah cun a ṭhami thil pek nan thiam a si ahcun vancungih a ummi nan Pa in a diltu hnenah cun ziangtinso thil ṭha pek loin a um ding.

                        LK.17; Mt.7

.....................................................................................................................................................

44.Dinpitu ( Tetti )

( All Saints )

KHB.No.527

Kannih pawl cu kankiangkap ah dinpitu ( tetti) tampi kan nei.

Kan hmaiih a ummi tlanzuamnak ah taimak suah in tlan uhsi. ²Kan zumnak a thoktu le a famkimtertu Jesuh kha cat loin zoh uhsi.

Pathian Thlarau ih hruaimi pawl cu Pathian ih fa an si.

Pathian ih Thlarau in kan thlarau a pehzom ih Pathian ih fa kan sinak kha a fiangter. Fa kan si ruangah Pathian in a minung hrangih a retciami thlawsuah a cotu ding kan si; cule Pathian in Khrih hrangih a retciami khal Khrih thawn kan co tlang ding.

Cuih hnuah ka hun zoh ih mipi tamzet ka hmu; zohmanih siarcawk lo miruunpi an si.

Annih cu phun kip, hnam kip, le hrin kip ṭong kip ihsin a rami an si ih bawi tokham le Tuufa hmaiah an ding; puan raang an hruk ih an kut in ṭhulhfau hnah an keng fingfing.

 Himi pawl cu hremnak nasazet sung ihsin himdam in a ra suakmi an si. An puan cu Tuufa thisen sungah an sawp ih an vaar ter zo.

Curuangah Pathian ih bawi tokham hmaiah an ding ih biakinn sungah a hnaṭuan cu a sun a zan in an ṭuan.

An riil a rawng nawn lo ding ih an ti khal a haal nawn lo ding;

Ziangah tile bawi tokham laifangih a ummi Tuufa cu anmah khaaltu a si ding ih nunnak petu cerhti umnak ah a hruai hai ding. Cule an mitthli hmuahhmuah cu Pathian in a hnul sak ṭheh ding a si,” tiah a ti.      Heb.12; Rom.8; Thup.7

.....................................................................................................................................................

45.Daihnak

( Peace )

KHB.No.527

Daanthiam saya pakhat a ra ih a sualnak hawl dingin Jesuh hnenah, “Sayapa, kumkhua nunnak ka ngah theinak dingah ziangso ka tuah ding?” tiah a sut.

Cupa cun, “Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah

le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei, a ti,” tiah a ti.

“Mit ai ah mit, ha ai ah ha, tiih an simmi cu nan thei. ³⁹Sikhalsehla kei cun hiti in ka lo sim. A lo tisiattu parah phulei va sam hlah uh;

mi pakhat khat in na vorhlam biang ah a lo beeng a sile na kehlam biang khal tun lawlaw aw.

Nan rualpi nan duhdawt pei ih nan ral pawl nan hua pei,” timi cu nan thei zo.

Asinainkei cun hiti in ka lo sim: nan ral pawl duhdaw uhla a lo hremtu pawl hrangah thla cam uh;

cuticun vancungih a ummi nan Pa ih fa nan si ding.

Cutikah Jesuh in “ Na nam cu a kawm ah khum sal aw.Ralnam a hmangtu cu ralnam in an thi ve ding.

Cule Jesuh in a dungthluntu pawl hnenah, “ zokhal keimah thlun a duhtu cu a mai duhnak kha taan in a thinglamtah phur in i thlun seh.

Mi pakhat in leilung pumpuluk co khal sehla a nunnak a hloh ahcun ziang thathnemnak so a um?

Amai nunnak  humhim a tumtu cu a nunnak a sung ding.      Lk.10,Mt.5,10,16

.....................................................................................................................................................

46.Lungawi Lomnak

( Thanksgiving )

KHB.No.528

Cat loin nan lungawi uh; thlacam ringring uh. Nan parih ziangvek thil a thlen khalle nan lungawi uh, Khrih Jesuh thawn a pehzom awmi nan nunnak ah cu bangtuk ih nung dingah Pathian in a duh a si.

Pakhat le pakhat Saam Hla, hlan awknak hla, thangṭhatnak hla, le hla thiang in bia aw uh. Bawipa cu ap awknak hla le thangṭhatnak hla thawn nan thinlung taktein cawimawi uh.

Ziang hmuahhmuah hrangah kan Bawipa Jesuh Khrih hminin Pa Pathian cu thangthat ringring uh.

Nanmai ruangah Pathian cat loin kan thangthat ih kan thlacamnak in kan lo cing ringring a si.

Ziangti in a si tile nan zumnak nitin nannuncan daan ih a langnak thu, duhdawtnak nan neih ruangah nasa zetin hna nan tuannak thu le kan Bawipa Jesuh Khrih sungih ruahsannak nan neihmi a hngeh daan pawl thu thlacamnak in kan Pa Pathian hnenah kan sim ringring.

Cuihhrangah a man ihtuah cawk lo lawksawng in pekmi ruangah Pathian cu thangthat cio uh.

Kan Bawi Jesuh Khrih thawn, nehnak in petu Pathian lomnak cu um hramseh.

Khrih ih pekmi remnak cu nan thinlung ah thuthentu ding a si;ziangah tile, a hih remnak ah hin pumkhat si dingah Pathian in a lo kokhawm thluh zo.Cui ruangah lom ding z ain um uh.

Khrih ih thucahmi a lennak hmuahhmuah zatein nan thinlung sungah um hramseh.Fimnak in khat le khat zirh aw uh, fial aw uh.Saam hla leh hla thiang khal sak uh; mam thinlung sungih lomnak thawn Pathian cu hla in sunloih uh.

Bawi Jesuh Khrih thawn Pa Pathian cu nan lom bangin, ziang tinkim nan tuahmi le nan simmi hmuahhmuah ah, Jesuh Khrih hmin in tuah thluh uh.

1 Thes.1,5, Kal.3 Efe.5

......................................................................................................................................................

47.Ramnai Hnatuannak

( Home Mission )

KHB.No.529

Daanthiam pa cun amah le amah thiam coter awk a duh ruangah Jesuh kha, “Zoso ka innhnen cu a si?” tiah a sut.

Cutikah Jesuh in, “Voikhat ah mi pakhat cu Jerusalem ihsin Jerikho ah a vung feh. Cutiih a feh laiah suamhmang pawl in an kai ih a hnipuan an hliit hnuah thizikte in an thawi ih an tlansan.

Culai ah puithiam pakhat cu cuih lamzin ah a vung feh ngelcel; a sinain cupa a hmuh tikah khatlam kam in a hrial ih a fehsan.

Asinain Samaria mi pakhat cu cutawk lamzin ah khual a tlawng ve ih cuih mina pa hnen a thleng ih a hmuh tikah a zaangfah ngaingai. A hei fuuk ih a hma cu siti le Sabitti a hnih ih ṭhatein a tuam sak.

Cule a hruaimi rannung parah toter in khualbuk ah a fehpi ih cunah ṭhatein a tuamhlawm.

A thaisun ah ngun tangka fanghnih a suah ih riahbuk kiltupa cu a pek ih, ‘Hi pa hi ṭhatein run tuamhlawm awla hi lam ih ka ra kir sal tikah hi pa na zohnak hrangih na cemmi hmuahhmuah cu ka lo ruul sal thluh ding,’ a ti,” tiah a sim.

Cuih hnuah Jesuh in, “Suamhmang ih an kaih mipa ih innhnen cu himi pathum lakah hin zo hi so a si, tiah na ruat?” tiah a sut.

Daan zirhtu saya in, “Amah a zaangfahtu pa hi a si,” tiah a let.

( Zate Siar Ding )

Jesuh in, “Feh awla cubangtuk in va tuah ve aw,” tiah a ti. “Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei.          Lk. 10:27-37

.....................................................................................................................................................

48.Pathian Tongkam ( Thu )

( God’s Word )

KHB.No.530

Mithi le minung an thuhla a ṭhentu Khrih Jesuh hmai le Pathian hmaiah a tanglam pawl hi tuah dingah napi in ka lo forh; ziangah tile Khrih cu Siangpahrang bangin uktu si dingah a rasal ding.Curuangah Thuthang ṭha phuang aw,.

Tikcu a rem khalah siseh, rem lo khalah siseh, phuang tengteng aw; an lung fiang ding in sim awla kawk a ṭul ahcun kawk awla forh a ṭul ahcun forh aw; cule thinsau in zirh aw.

Mi in a dikmi zirhnak kha thlun duh loin anmah ih duhmi sawn an thlun caan a ra thleng ding. Cule theih an duhmi lawng phuang dingah zirhtu saya tampi anmah ih hrangah an la ding.

Thutak kha ngai duh nawn loin an dungtun ding ih a dik lomi thuanthu menmen sawn an ngai duh ding.

Sikhalsehla nang cu ziang bangtuk hmun le tikcu khalah thusau ruatin uk awk thei zuam aw. Harnak tuar thei zuam awla

Thuthang ṭha a phuangtu ih hnaṭuan kha ṭuan aw. Cule Pathian hnaṭuantu na si vekin na ṭuanvo kha kimtein ṭuan thluh aw.

Ca Thianghlim hmuahhmuah hi Pathian ih thawkhummi a si * ih thutak zirhnak, zirhsual simhrinnak, a sualmi remsaalnak ah le dingteih nitin nunnak ih zirh awknak ah a ṭha.

Cutiih Pathian hna a ṭuantu cu mi tlamtling a si ding ih thil ṭha phunzakip tuah dingah thuam famkim neimi a si ding.

zuamnak ah ka ti thei patawp in ka tlan zo; tlan zuamnak a netnak tiang ka tlan zo ih ka zumnak khal thlauthla lo tein ka pom hnget zo.

Atu cu ka Bawipa, a dingmi thuṭhentu Bawi in cuih Ni ih i pek dingmi nehnak laksawng ka hrangih in ret sakmi in i hngak. Cuih laksawng cu dingnak sui lukhuh a si ih keimah ih hrang lawngah a si lo; duhdawtnak thawn amah a langnak ding a hngaktu hmuahhmuah hrang khalah a si.          

2 Tim.3:16-17; 4:1-8

.....................................................................................................................................................

49.Jesuh Suahnak Thu

( The Advent of Jesuh )

KHB.No.531

Elizabeth ih favun a thlaruknak ah Pathian in vancungmi Gabriel cu Galilee ram Nazareth an timi khua ah a thlah.

Vancungmi cu Mari  hnenah a ra ih, “Na parah daihnak um koseh! Bawipa na hnenah a um ih thlawsuahnak tampi a lo pek a si, Cule vancungmi in, “Mari, ṭih hlah! Pathian mithmai ṭha na co a si.

Fa na vun ding ih fapa na hring ding. A hmin ah Jesuh na sak ding.

Mi maksak a si ding ih Cungnungbik Pathian ih Fapa tiah kawh a si ding.

A uknak cu a cem dah lo ding,” tiah a ti.

Mari in, “Ka thinlung in Bawipa cu a thangṭhat; Pathian i Runtu parah ka nunnak cu a lung a kimzet; Ziangah tile mi nauta a salnu hi hngilh loin i thei ringring a si.

Atu thokin mi hmuahhmuah in mi thluasuak in ti ding,

Ziangkimtithei Pathian in ka hrangih thil maksak a tuah zo ruangah hin.

A baan thacak a hawi ih mi puarthau pawl cu an tumtahnak thawn a ṭhekdarh ṭheh. mi nauta pawl a khaisaang a si.

Kan pupa pawl hnenih a thukamnak cu a kimter ih, a siahhlawh Israel bawm dingah a ra zo a si.Abraham le a tesinfa pawl parah a kumkhua in zaangfah dingah a ciing ringring!” tiah a ti.             Luka.1:26-55

......................................................................................................................................................

50.Khrismas Thu

( Christmas )

( KHB.No.531

Jesuh cu Herod in Judea ram ah siangpahrang a ṭuan laiah, Judea ram Bethlehem khua ah a suak.

A rei hlanah nisuahnak lam ihsin arsi zohthiam pawl Jerusalem khawpi ah an ra ih, Judah mi pawlih Siangpahrang dingah a suakmi naute khuiah so a um? Nisuahnak lamah a arsi kan hmu ih amah biak dingah kan ra a si,” tiah an ti.

Cuih thu cu siangpahrang Herod in a theih tikah a thin a har ngaingai. Jerusalem khua ih a ummi midang hmuahhmuah khal an thin a har ve.

Curuangah Herod in puithiam upa pawl le Daanthiam pawl a kokhawm ih, “Messiah cu khuiah so a suah ding?” tiah a sut.

Cutikah annih in, “Judea ram Bethlehem khua ah a suak ding,” tiah an let.

Profet ih ngantami cu: Judah ram sungih a ummi Bethlehem, Judah ram khawpi pawl lakah hin a fate bik cu na si hrimhrim lo.

Ziangah tile na sung ihsin hruaitu pakhat a suak ding ih, Ka minung Israel mi pawl

a hruai ding,” ti a si.

Inn sungah an vung lut ih naute cu a nu Mari thawn an vung hmuh tikah khukbil in an biak.

An laksawng kenmi sui, frankincense rimhmui le mura zihmui an suah ih an pek.

Israel ih Pathian Bawipa cu thangṭhat uhsi; A minung pawl bawm dingah le, luatter dingah a ra zo. Kan hrangah a mak zetmi Runtu a suakter zo.

Matt.2:1-11; Luka 1:68-69

.....................................................................................................................................................

51.Leitlunmi Runtu Bawipa

( The Saviour of  the World )

KHB.532

A cak Pathian in thil tumpipi tla a tuahnak hrangah a si. Amah ih hmin cu a thianghlim fawn.

Fa na vun ding ih fapa na hring ding. A hmin ah Jesuh na sak pei, ziangah tile a minung pawl kha an sualnak ihsin a run suak ding a si tiah a ti.

Moses in nelrawn ah fung parih dar rul a thlai bangtuk in Milai Fapa khal thlai a si ve ding.

Cuti cun amah a zumtu hmuahhmuah cu kumkhua nunnak an ngah ding.

Ziangah tile leilung tlunah Pathian in a Fapa a run thlah tikah leilung thuṭhentu dingah a thlah lo, leilung runtu dingah a thlah a si.

Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding.

Rukru cu ru ding, that ding le siatsuah ding lawnglawngah a ra. Kei cu nunnak an ngah ih tlamtling zetih an neihnak dingah ka ra a si.

Ziangah tile, Milai Fapa cu a hlomi pawl hawl dingah le, run dingah a rami a si sawn.

An hnenah, “ An nganmi cu hihi a si: Messiah cu a tuar peiih a thih hnu nithumnakah a thosal ding.

Cule Jerusalem ihsin thokin miphun hmuahhmuah hnenah amah hmin ih sualsirnak le sualngaidamnak thuthang cu phuan a si ding.

Lk.1, Jn,3,10,Lk.24

.....................................................................................................................................................

52.Thlawsuah Nunnak

( The Blessed Life )

Khb.No.533

A ṭeekdarhmi zumtu pawl cu khuazakipah an thleng ih an thlennak hmunkipah Thuthang ṭha an sim.

Filip cu Samaria khawpi ah a feh ih cuih khuami hnenah Messiah ih thuhla a sim.

Mi tampi in a thusimmi cu ṭhatein an ngai ih hmuhsaknak a tuahmi tla an hmu.

Miburpi sung ihsin khawsia pawl ringpi ih au phah in an suak ih mizeng le ke-awl pawl tla an dam.

Curuangah cuih khawpi sungah lungawinak tampi a um.

Himi ruang rori ahhin nan zumnak parah thatnak bet hrih uh; nan that parah theihnak bet tum uh.

nan theihnak parah suup awk theinak bet hrih uh; cule suup awk theinak parah tuar theinak bet uhla nan tuar theinak parah Pathian ṭihzahnak bet uh.

Pathian ṭihzahnak nan neihmi parah unau tlaihsannak bet uh; cule Khristian unau tlaihsannak parah duhdawtnak bet uh.

Hi ṭhatnak pawl hi nan ṭul zetmi an si ih famkimin nan neih a si ahcun kan Bawipa Jesuh Khrih nan theihnak ah hin a lo caktertu le hmual a lo neihtertu an si ding.

Sikhalsehla hi ṭhatnak pawl a nei lotu cu mitmalmi a si ih naite lawng a hmu theitu a si; hlanih a sualnak ihsin thianfaiter zomi a si hman kha a thei aw nawn lo.

Hiti a si ruangah u le nau pawl, Pathian ih a lo kawhnak le a lo hriilnak hi kumkhua ih fek dingah zuam sinsin uh.

Cuticun kan Bawipa le in Runtu Jesuh Khrih ih kumkhua uknak sungah luh theinak thu nan ngah ding.    Tirh.8; 2 Pit.1

By. Lal Nei Khup