Pathian be ron tam David

               David nunnak kan zoh tikah kan hmuh theimi cu tu le tu Pathian thu a ron, Pathian hnenah a thuhla a thlennak thu  hi a si. Thukam hlun ah anih tluk ih Pathian be-ron tam hi an um lo. Harsatnak  lole ral do ding a neih tikah Pathian ih duhnak ziang a si pei tiah Pathian hnenah a thlen ṭheu. Cu vek in Pathian khal a hnenah a phuang aw ih a harnak sut kian dan a sim ṭheu. Cathianghlim sungih nganmi pawl hi kanmah thu zirhnak hrangah an si vekin David ih nun ram kan zoh ding (Rom.15:4; 1 Kor. 10:6,11)

1. A unau sungkhat pawl thawn ( 1 Sam.22:3-5)

          David cu Sual in thah a tum ruangah ral a tlan ihAdullam khua kiang lungkua ih a um laiah a unau le sungkhat pawl kha a hnenah an ra. Cun David cu Moab siangpahrang hnenah a feh ih “Pathianin ka hrangih a tumtahnak fiangte ih ka theih hlan cu nan hnenah ka nu le ka pa ra um the ihram sehla” tiah zangafah a va dil. Cui hnuah Profet Gad hmangin ziang ti’n an um ding timi kha Pathian in a theih ter leh sal. Hi tawk ah David in a hrangih Bawipai tumtahnak a theih feng lo ahcun a mai thu in ziang hman a tuah lo zia kan hmu thei.

2. Keilah khua run thuah (1 Sam.23:1-5)

          Filistin pawlin Keilah khua an siim ih an thlai pawl antlan ru ciamco ti kha David in a theih tikah Bawipa hnenah “Filistin pawl ka va do pei maw” tiah a sut. Pathian in do dingin a sim ih nehnak a pe. Hi ṭum ah David ih ralkap pawlin  Keilah do ding cu a huphurh ngaingai. Asinan David cun a ralkappawl a kawk lo, Pathian hnenah a thuhla a thlen sal. Ral a donak ding khalah Pathian hnenah a thlen hmaisa, ral nehtu cu Pathian a si ti a thei fiang.

3. Sual in Keilah ih David a dawi ṭumah (1 sam.23:10-13)

          Keilah khua ah David a um ti kha Sual in a thieh tikah do a tum. Cui thu cu David in a theih tikah ah Bawipa’ hnenah “ Sual in Keilah khua hi a do ngaingai pei maw, a do asile Keilah pawl in Sual ih kut sungah in thlen oei maw?” tiah a sut. Cutikah Pathian cun Sual ina do ding thu le Keilah pawl in sual kut sungih an thlen ding thu a sim. Cu ve te’n David le a ralkap pawl cu hmun dangah an tlan. Bawipa thu a ron ih ruangah a parih siatnak thleng dingmi lak ihsin a fihlim thei.

4. Amalek do ding thu ah (1 Sam.30:8)

          Amalek pawlin Judah ram thlanglam kap an ram ih Ziklag khua an rak lak ih meisa in an ur. Cun nunau le nauhak pawl kha an kaih ih an hruai ṭheh. Hi hmun le ram ah David le a milai pawl an ra then tikah a milaipawl cun David kha den that a nuam, a san cu an nupi le fate pawl ral pawlin an hruai ṭheh ruangah a si. David, amai nupi pahnih rori khal hruaimi lakah an tel ve. Cui caanah David in “bawipa amalekmipawl hi ka dawi pei maw?” tiah Pathian thu a suh sal. Pathian in dawi dingin a sm ih cu tin nehnak an co lwng silo in an nupi fanau le ranrualpawl kha an ngah ṭheh sal. Bawipa a ron ih zarah ral kut sungih a thlengmi an nupi fanau pawl an ngah sal.

5. Judah Siangpahrang ah a cang (2 Sam.2:1-3)

          Siangpahrang Saul a thih tikah nasa zet in a ṭah. Cui hnu ah David in “ Judah ramih khua pakhatkhat ah ka feh pei maw?” tiah Bawipa a ron ih Bawipa in “feh aw” a ti hnuah “khui khua ah so ka feh ding?” tiah a ron sal ih Pathian in Hebron ih feh ding in a ti. Pathian ih sim vekin Hebron ah a feh tikah Judah Siangpahrangah hriak an rak culh. David cu a mah ralsan tu bik sual a thih hnu ah khal a fehnak ding Pathian a ron thotho. Harsatnak ih Pathian thuron hi kan thiam ding a thupi zet, cu rual in kan harsat lo caan khalah Pathian thuron hngih lo ding hi a thupi sinsin.

6. Filistin pawl in David kaih a tum (2 Sam.5:17-25)

          David kha Israel siangpahang a si zo ti kha Filistin pawl in an theih tikah amah kai ding in an pok. Cui thu kha dvid ina theih vete’n a ralkap cahnak a rinsan lo, “Filistin pawl hi ka do pei maw? ka do asile kan neh pei maw?” tiah Pathian thu a ron. Pathianin do dingn a ti ih David in nehnak a co. Filistin pawl cu a tlan ṭheh ih a nehhnu ah do dingin an ra sal. Cui ṭum khalah david cun ka neh cia pam ti loin Bawipa thu a ron sal thotho ih Bawipa in a do dan ding khal a sim ṭheh. Thingkung zim parih ke feh awn thawm a theih tik le do dingin Pathian in a sim. A sim vekin a tuah tikah nehnak a co sal. Kan rak hlawh tlin zo nak khalah Pathianthu ronthotho ding kan si zia in zirh duh nasa.  

7. Paam pi a thlen caan ah (2 Sam.21:1-2)

          Voi khat cu David ih lal sungah kum thum sung rori paampi a peh tikah harsa zet in an um. Cu tikah David cun Pathian thu a sut ih Pathian khalin paampi a tlenternak san kha ṭha te’n David a sim. Joshua san laiih that lo dingih thu an rak kammi Gibeon pawl kha Saul in a that ruangah a si thu kha David in a theih tikah Saul in cikuang pawl an va that ih cu tin paampi a reh. Harsatnak a thlen tik khalah ziang ruangah tiih Pathian thu sut ṭheu ding kan si. Bwipa in simduh le zirn duh in neihmi a um ruangah tla a si thei.

Pathian thu ron lo le a rahsuah:

1. Siangpahrang sual in Pathian thu a ronlo ruangah a thi. 1 San.10:14

2. Joshua in Pathian thu a ron lo ruangah bum a tong. Joshua 9:14

          David hi ziang vek thil khalah Pathian hnenih thuhla thlenmi a si ruangah thlacammi ti khalin kan theih zetmi a  siih Pathian khalin “ka thinlung tong, ka duhmi hmuahhmuah tuah ṭheh tu ding” a timi a si. Zumtu pawl in kan Pathian thukan rontam poh le kan hmakhua a eng ding ti mi hi David nunnak ihsin thazang la thar uh si.

Ref : tafj.org