Fa Upa Sawn Vek Si Hlah Uh

          Luka bung 15  sungah fapa hlo, tuu hlo, le fapa hlo, Jesuh in tahṭhimthu a simmi hi kan thei cio. Hi tanṭhimnak in a langter duh bikmi cu Jesuh hi a hlomi hawl dingih runṭum a sinak le mihlo hawl hmuh an si tikah ziangtlukin lungawinak a um ti hi a si bik. Fapa hlo thu ah dinhmun pathum kan hmuh theimi cu (1) fapa nauta sawn cu apai inn ihsin hla zetah a tlan (2) a pa cun a fapa ra kir sal ding duhdawtnak thawn a rak thlir (3) fa nauta sawn a ra kir tikah fa u sawn cu riahsia in a um, ti pawl an si. Fa u sawn hin Farasi (sakhua minung) pawl dinhmun hi a thailang zetin ka thei. Jesuh leitlun ih a len lai ah misual, mi ṭhalo pawl in a hnen ih lungawinak an hmuh tikah lungawi lo ih rak um ṭheu pawl hi farasi pawl an si ṭheu. Tui ṭumah zumtu pawl cu cui fa u sawn vek kan si lonak dingah thazang la tlang uh si.

1. Lungawi caan ih thinhengnak (Luk.15:28)

          Fa nau sawn hi pai inn ih a ra kir sal caan ah fa u sawn cu a pa’i lo ah hna ṭuan in a rak um. A hnaṭuannak hmun ihsin inn lam pan in a ra tlung ih inn a thlen zik tikah hlasak thawm le laam thawm a thei. Hnenum a suh tikah a nau  kha himdam te’n a ra kir sal ih a pa in caw note a rak thah thu a sim. Cui thu a theih tikah a lungawi zet ding hmang tinak ih laiah a thin a heng riangri.

          Hi thu kan zoh tikah thil a thlengmi hi mangbang za a si. Mai nau rori ra kir sal cu lungawi tuk ding khi a bang nan thin heng in a um. Hi fa u deuh ih um dan hi a sual thlak kan ti men thei nan amah vek hi kan rak si ziar ding ti a phan um. Kan lakih misual zet in rundamnak a co tikah maw lole zumtu tlusia a tun din awk sal tikah mi tampi an lung a awi ih an rak lom rero laiah thinlung thup te’n rak thinheng, lungawilo tivek hi a um thei. Cu vek mipawl  tun din an si ih lom  an hlawh rero tikah zo ha rak lungawi lo ṭheu kan ti asile fa U sawn vekih Pai’ hna ṭuan rero vetu, thei tawk ih Pathian hrangih rak hmang aw rero pawl an si ṭheu. Thei tawk ih hmang aw rero pawl thinhengnak suah ter ṭheu tu cu a tluse mipawl an tundin awk sal tikih lom le sunsak an hlawh caan ah a si ṭheu. Kan nunnak ah fa u vek kan si lo ding hi a thupi zet. Kan lakah mi sersuak aw sal,Pathian hnenih kir sal an um tikah mi in an lom, an sun loih tikah rak thinhengtu siloin rak lungawi pi vetu kan si ding hi a thu zet.

2. Sunsak ṭul a tipi lem lo ( Luk.15:28)

          Fa u sawn cun a nau sawn lomnak ih puai an tuahmi thuhla  thei tikah a thinheng lawng si loin inn sungah a lut duh lo. Inn kiangte cu a theng zo nan a lut duh lo. Fa nau sawn hi a ra kir tikah a pa in hni puan ṭha bik a hruh ter, zung hruk a hruk ter, ke dam a dam ter lawng siloin a caw faate thau bik that in lungawi puai a tuah. Fa nau sawn a ra kir tikah a pa cun cu tluk ih a rak sunsak laiah a fa u sawn cun ṭul a ti lemlo. A pa cun a fa ra kirmi hrangah uimi a nei lo, a ṭha thei bikin a rak tuamhlawm. Hlo thlo ih nung ra kir sal hrangih cuvek thil rak timlam ciamco kha fa u cun a lungkimpi lo nasa.

          Zumtu, kawhhran in kan hna thupi bik cu zum lotu pawl runsuah ding a si rualrual in zumtu thar le a tluse mi pawl tundin hna hi kan thlahthlam thiangmi a si lo. Kawhhran sung khal ah hi vek thu tete ih ruangah hmuh awk thiamlonak hi a suak thei. Tluse mipawl Pathian lamih an kir sal tikah cuang pawl rak sunsak ih tundinnak ah sumpai sensoh a rak ṭul ṭheu. Cui dinhmun kan thlen tikah tundin hna rak sunsaktu maw kan si lole ṭul rak ti lemlo tu sawn kan si kan nunnak zoh aw cio uh si. Pathian ih in koltermi thlawsuah hi a hmannak dingih kan hman ngah ding a thupi zet. Tundin hna hi kan theitawk in sunsak cio ding kan si.

3. Iksiknak a nei (Luk.15:28)

          Fa u sawn ih lungawilonak pakhat cu iksiknak a si. Iksiknak hi mai ṭanghma hainak ihsin suak a si ih miih an comi co ve awm ih theih awknak khal a si. Fa u cun a pa’i hna teima takih a ṭuan ih a pa in ziang a tuah sak ve lo laiah duh tawk ih nung, hlo thlau a naupa ra kir sal kha a pa in cu tluk ih a rak lom kha a lungawi lonak a si. a naupa hman in lom a hlawh a si ahcun anih hi cun a nau hnakih lom hlawh tlak sawn in a thei aw.

          Hi fa u sawn ih thinlung hi kan nei ve cio ko dingah ka zum. Kan lakah lommi le sunloih deuh mi an um a si ahcun ‘kei khal lom ka phu ve nan’ ti thinlung nei in in lawm ve pei maw ti hi kan thinlung in a bawh khiokhi ṭheu. Hi thinlung hi thil ṭha lo suah tertu a si ruangah zumtu in kan ralrin a ṭul nasa. Zohman ih lom  khalih ngol cuanglo hi zumtu pacang hna a si sawn. Kan ṭuan nasat le kan teimak nasat thawn kan hnakih ṭuan lo pawl sunsak le lom an hlawh tikah fa u bangih rak iksiktu si hlah uh si.

          Hi fa u ih vuinak thu ah a pa ih thuletnak kha ka duh zet. “Ka fapa nang cu ka hnenah na um ringring ih ka neihmi thil hmuahhmuah hi nangmah ih ta an si” tiah a pa in a ti. Fa u sawn hi cu a neitu a si vekin finkhawitu ding dinhmun a sinak kha lang ter. Cuvekin kan ni zumtu pitling deuh sawn in a tuai thar aw tete pawlhi sunsak le lom an hlawh tikah rak beisei vet u ding kan si lo ih neitu, rak buaipi vet u ding sawn kan si. A nauhak sawn kha a u sawn in kan rak tuamhlawm sawn ding a si.

4. Leem a theih lo (Luk.15:28-29)

          Fa u sawn kha a thin heng ti kha a pa in a theih tikah a va leem thu kan hmu. Leem a theih lo ti ṭongfang cekci hi hmuh ding a um lo na’n leem a theih lo kan tinak san cu cang 28 ah a pa ih leem nak thu a lang ih cang 29 ah fa u sawn in a pai in a leem cingin thu a rak elnak  kan hmu thei.

          Zumtu pawl hi leem ṭul lo ih um theimi si cio sehla duh thusama si ko nan leem ṭul dinhmun ah kan ding ṭheu. Hi zawn ah thil poizet cu leem theih lo, leem asile luar par kai sinsin ih rak um hi a si. Zumtukan siih lemm ṭul dinhmun ih kan din pang khal asile leem har lo mi tal si zuam uh si. Mi dang va leemtu ding kan si laiah leem harsa mi kan si pang ahcun fa u vek kan si tinak a si. Ziang si maw thu le hla  umle rak ngol man ringring, rak thinheng man ringring zumtu kan si pang maw? Hi fa u tu khal a pa in leem khal sehla voi tam a leemnak thu cu hmuh ding a um cuang lo. Mi ih leem cawk lo, leem ding ci ih ruah lo mi tla kan si pang maw. Kan duhdan vekih thil a thlen lo hmanah fa u vekih lung khong ṭhelṭhel ihkan um lo ding hi a thu pi nasa.

          Hi Jesuh ih tahṭhim thu a simmi hi sim hlawh zetmi a si. Cu mi ah fa nauta lam dinhmun sawn rel uar (emphasis) nak thu cu kan thei tam zet ding tiah ka ruat. Cu mi rual in tui ṭum ah zumtu pawl hi fa u sawn vekih lungput kan neih lo ding a thupit zet vekin fa u lam thu sawn uar takin kan ngannak san a si. Pathian in hi thu hmangin nan nunnak lo ṭhanglianter hramseh.