Pathian Naih

         Saam 73:28 Asinain Pathian va naih cu thil ṭha a si. CKJV

Pathian naih timi thu  kan sim dingmi hi zumlo tu in Pathian a naih dinglam thu a  si lo. Zum lo tu in Pathian naih theinak khal a nei lo. Tluksiatnak ih ruangah kan zate’n Pathian thawn a hla aw mi kan si ih kanmah in Pathian kannaih thei nawn lo ruangah a Fapa thisen ih ruangah Pathian thawn a nai aw temi kan si zo. Rundamnak thu ahcun kan in Pathian kan naih/pan thei lo ruangah Amah Pathian in in rung naih, in rung pan sawn a si (Efe.2:13). A tu  ih kan rel dingmi Pathian naih thu hi cu zumtu pawl kan nunnak ih Pathian naih lam sawn kha a si. Baibal sungah Pathian naih timi ṭongfang hi hmuh ding a tam tuk lo, a tu zawng cun a tam men thei. Kan ṭhum awknak ding cu Saam 73:28 kha a si ding. Pathian naih timi ṭongfang hi kan hmanmi Baibal in a hmang lo men thei, Pathian kiangih um ti tla in a um ding. Kan thupi thawn mil aw in Pathian naih timi ṭongfang hman a si ding. Cun hi ṭongfang hi CKJV ah hman a si.

          A hmaisa ah Saam 73 nak thuhla tawite’n vun zoh hmaisa sehla. A ngantu Asaf hi Levi mi a si bangin Pathian Biakinn ih hla hruaitu leh awmmawi lamih ṭuanvo neitu a si. Hmansehla a kiangkap thil um dan a zoh tikah khawlvelmi, Pathian ngaihsak lo pawl an lian, an ṭhansoh sawn a hmuh tikah Pathian a rennak ihsin bang tahratih khawvelmi pawl vekih um ve mai duhnak thinlung a nei. Curuangah ka tluk zik thlang tiah a ti. Asinan cui mi ṭha lopawl ih lennak cu ziang tikvek in a net ti mi a hmuh feng sal tikah cun khawvelmi lennak pawl dawtnak thinlung a nei nawn lo ih Pathian ih a hmannak zawn, a hnaṭuan te hi lungawi takih ṭuan theinak a nei sal. Cucun kei ka hrangah Pathian naih hi a ṭha bik a si tiin Saam 73 a net ter. Saam 73 sermon kimcang siar duhtu hrangah >>>>SAAM 73

1. Pathian naihtu ding

          Saam cangantu in Pathian naih timi a rel tikah kanmah in Pathian va naih ding khi a rel duhmi a si. Asinan kei ka hrangah cun Pathian va naih hi a ṭha a si (Sam.73:28 CKJV). Ziangruangah kan mah ih Pathian va naih ding a si kan ti thei ti asile Pathian cun ziangtik hmanah a mi pawl in hlat, in tlansan hmaisa dah lo. “Pathian zangfah te’n in naih hram aw” tiih dil khal a ṭul lo. Ziangah tile kan hnenah a um ih kanmah in naih ringring tu Pathian a si. Pathian in a mi pawl a hlat dah lo, ami pawl  sawnin Pathian kan hlat san ṭheu sawn. Saam 73:27 ah “na hnen ihsin a hla mi pawl cu  an hlo ral ding, a lo uiret san tu pawl hmuahhmuah cu na siatsuah thluh” (CKJV) tiah a ti bangin Pathian a hlat ṭheutu hi a minung, zumtu kan si bangin a naihtu ding khal kan mah kan si. Pathian thawn kan naih aw maw kan hla aw sawn timi cu kan mai parah a ṭhum aw mi a si. Pathian thawn kan hla aw a si ahcun ziang tik hmanah Pathian mawh a si dah lo ding kan mai mawh a si ding,Pathian in a ṭuanvo a hlen lo siloin kan mah in kan ṭuanvo kanhlen lo a si ding, Pathian in in hlat siloin kan mah in Pathian kan hlat ṭheu sawn a si. Pathian cun ziangtik hmanah in hlat dah lo. Pathian cun ami pawl thawn naih awk ding hi a hrial dah lo ami pawl sawn in ama hnaih hi kan el ṭheu.

2. Pathian naih

          Zum lo tu pawl cun Pathian an hlat thei lo, ziangah ti le Pathian thawn an nai aw hrih lo hrimhrim, cu bangin Pathian khal an naih thei lo. Zumtu pawl hi Pathian naih theitu le hlat theitu cu kan si. Pathian naih timi cu ziang a si pei?

Pathian naih timi umzia hi rel cio sehla rel dan tampi a um men thei. Saam 73 hi kan ṭhum awknak a si vekin Pathian naih timi tarlang sehla.

          Kan ṭuanvo ṭuan : Pathian naih timi cu Pathian in ṭuan dingih in timi  kan ṭuan hi Pathian naih a si. Mi tuah vek ka tuah maw ti hnak in Pathian in tuah dingih in fialmi ka tuah maw timi hi a thu sawn. Mi tuah vek kan tuah ve ringot hi Pathian in kan tuah dingih in fial lo mi a si ahcun Pathiankanrak hlat ziar tla a si sawn thei. Asaf nun ramih kan rel asile a nih hrangah cun Pathian naih timi cu a liang parih a ummi, Biak inn ih hla hruai le awnmawi lamih hman awk hi Pathian a naihnak a si. Pathian in ṭuanvo in pekmi hi kei cu ka tling lo tiin kan ṭuan lo a si ahcun Pathian kan hlat ih kan hmabak cu hloh ral ding hi a si. Pathian in ṭuanvo in pe asi ahcun kan tling tawkih ṭuan ding kan si. Tlin ruangih ṭuan ding siloin tlin tawkih ṭuan ding kan si. Pathian in tlin tawkih a ṭuantu pawl a vui hram dah lo, ṭuan lo pawl sawn hi a zuah dah lo.

          Pathian in kan hmaika ih ṭuan ding in ti mi kan tuah lo tikah Pathian hlattu kan si ih ti lo ding in timi kan ti tik khalah Pathian hlattu kan si.

# Moses in Pathian ih fial vekin lungpi thu a pe lo ih Kanaan ram a lut lo.

# Saul in Pathian ih fel vekin that ding timi a that ṭheh lo ih siangpahrang

   tohkham a sung.

# Jonah cu Pathiah ih fialnak lamah feh lo in a tlan ih ngapi ih dolh a tong.

          Pathian in in retnak zawn ah ṭuanvo in pekmi kan tuah hi Pathian naihtu kan si. Ṭuanvo in pekmi dai thlangih kan um hin Pathian kan hlat a si. Asaf khalin Pathian ih ṭuanvo a pekmi bansan in khawvelmibang tukih um a duh thang hi a tluk zik nak a si. Hmansehla khawvelmi pawl ih an netnak a hmuh feng tikah cun pathian ih ṭuanvo a pekmi ṭuan hi an hrangah a rak ṭhat bik zia a hmu. Cucu au suahpi  in “Pathian va naih  hi ka hrangah a ṭha” tiah a ti. Hi tawk ih ‘a ṭha’ a timi hi ‘a ṭha bik’ relnak a si.

          Mai dinhmun ih lungkim : Mai dinhmun ih lungkim kan ti tikah Pathian ih in rtnak sawn ih lungkim rel duhnak a si. Zumtu pawl hi Pathian in in  retnak zawn hi a bang aw cio lo. 1 Kor.12:14-17 Ruangpum hi taksa ṭhen pakhat lawng a si lo, taksa ṭhen tampi a si. Ke in, “Kei cu kut ka si lo hrangah ruangpum ih ta ka si lo,” tibang sehla, cutiih a ti ruangah taksa ṭhen a si lo ngaingai ding maw? Cule hna hin, “Kei cu mit ka si lo hrangah ruangpum ih ta ka si lo,” ti sehla, cutiih a ti ruangah taksa ṭhen si loin a um ngaingai ding maw? Ruangpum hi mit va si thluh bangsehla ziangtinso thu a theih ding? Cule hna lawng sibang sehla ziangin so rim a hnim ding? Sikhalsehla atuih thil umdaan vek hin, Pathian in taksa ṭhen dangdang cu an umnak ding hmun ciarah Amah ih duh vekin a ret a si.

Kawhhran cu Khrih ruangpum a si ih taksa ṭhen hi ruangpum hrangah an zate,n an thupi ṭheh. “An umnak hmuh ziarah Amah ih duhnak vekin a ret” a ti bangtukin Pathian in zumtu pawl hi retnak zawn te a nei ṭheh. Cui Pathian ih in retnak zawn ih lungkimte ih um hi Pathian naih a si. Pathian in in si ter nawk zawnih lungkim lo kan si ahcun Pathian hlattu kan si. Tu ah Pathian in ziangmi dinhmun ah in ret ti kan nunnak ah zoh fiang aw sal uh. Cui Pathian in retnak zawn ah kan lung a kim maw? Pathian ih in retnak zawn ih kan lung a kim lawngah lungawi te’n a hna kan ṭuan thei ding. Mai hnaṭuanmi ih lungawi lo,lungawi te’’ ṭuan lo hi a ṭuantu’i hrangah phur a rit lawng si loin Pathian hrangah siseh kiangkap um hrangah siseh nun a hahdam lo.

# Lucifer hi a dinhmun ih a lungawi tawk lo rungah van ihsin hlon thla a si.

# Adam le Eve khalin theirah an ei tikah an dinhmun ah an lung a kim nawn lo.

# Joshua cu Moses bawntu a sinak ah a lung a kim tawk ih khaisan a si.

Asaf khalin Pathian ih a retnak zawn ih lungkim te’i um hi a ṭha bik ti a hmuh ngah hnuah cun ziang dang hman a thinlung sungah a lang thei nawn lo.

Kan sinak thupit ter : Kan sinak thupit ter ti tikah kan farah le lennak, kan thiam le thiam lonak lam rel duhnak si lo in Pathian in a hnaṭuannak ih in hmannak zawn, in siternak zawn hi thupi tak ih ret kha sim duhmi a si. Sual in Pathian ih that ṭhet ding a timi that ṭheh lo ih a zuan ṭum ah Samuel in “nangmah cun zianghman ka si lo tiah na ruat aw ding nan….” A ti bang tuk in kan mah cun zianghman ah kan neih  aw lo men thei, kan theih ṭulmi cu Pathian ih in retnak dinhmun hi zianghman ih kan siar lo a si ahcun Pathian zianghman ih siar lo le Pathian hlattu kan si. Pathian ih in retnak thei fiang ih rinum te’n cui in siternak kha thupi tak ah kan ruat a sile Pathian naih tu kan si. Pathian in a  lo siternak kha zianghman in kan siar lo a si ahcun Pathian hlattu kan si. Thuṭhimnak ah Pathian in Pastor dinhmun ih in ret a sile cui pastor kan sinak kha tupi takah kan ruat a si le Pathian naihtu kan si hi, pastor sin an pastor si le si lo hman thei aw cuca lo ih ti dualdo vekin kan um men a si ahcun Pathian kan naih lo tinak a si. Asaf khalin cui Pathian ih a siternak dinhmun khal thupi zet ah ret in      Sam. 73 net a khar thu kan hmu thei.

Pathian naih timi hi rel ding tampi a um ding, Saam 73 hmangih kan relmi ah kan nunnak zoh sal in Pathian naihtu kan si maw si lo cek aw sehla, Pathian naihtu kan si theinak dingah a thar in thazang la thar cio uh si.