Nan hrangih tumtahnak ka neihmi cu
keimah lawngin ka thei. Tumtahnak ka neihmi cu siatralnak si loin mi neinung
nan sinak dingah a si; cuih tumtahnak cu nan ruahsannak le nan hmailam hrang a
si.Jer.29:11
A tlunih tarlangmi hi Baibal cang lar
zet a si ih, kum a thar tikah rual le pi hnenah kumthar cibainak duhsaknak
thawn kan kuat ṭheumi a si. Bung 29 pummi kan zoh a si le kan nunnak hrangah
zir ṭha tamzet a um, saltangmi Judah mi pawl hnenih kuatmi a si ko nan, tui sun
ih zumtu pawl kan nunnak ih ralrinnak ah le thazang laknak hrangah a ṭha zetmi
a si.
1. Pathian in a mi pawl
sualnak a zoh liam men lo
Jehoiakim in Judah siangpahrang a ṭuan
kum thumnak ah Babilon siangpahrang Nebuchadnezzar in a do ih minung tampi sal
ah a hruai hai. Ziangruangah hi bangtuk thil a thleng kan ti le Judah mipawl in
Pathian a phah san, milem an biak, Pathian duhlo zawngih an nun ruangah Pathian
ih kut thlaknak/dantatnak a si. Nebuchadnezzar in raldo hiarnak thinlung a nei
ih Judah ram a do ti men a si lo. Pathian siannak tello in khawvelmi pawlin
Pathian mi pawl parah hi bang tuk thil an tuah thei lo. Lei mithmuh ah sal ih a
kaitu hi Judah siangpahrangah a si nan thlarau lam mit ih kan zoh asile sal ih kuattu
hi Pathian a si.
Hi thu ihsin kan hmuh theimi cu
Pathian hi duhdawtnak ih khat Pathian a si ko nan sualnak poisa lo ih duhdawtnak
neitu Pathian a si lo. Pathian cun misual pawl a duhdawt ruangah a Fapa neihsun
a pek, hmansehla cui a duhdawtnak cu sual khuhnak ih hman a duh dah lo.
Adam
cu a sualnak ruangah Pathian ih dantat a tuar.
Abraham
a sing ruangah Israel pawl sal an tang.
Moses
in thupek a thlun lo ruangah Kanaan ram a thlen lo phah.
Israel
pawl lam an pial raungah miphun dang kut sungah voi tam an tang.
Sual
in Pathian thu a pial san ruangah a siangpahrang tohkham a sung.
David
in mi nupi a ihpi raungah a innsangah hremnak rapthlak a thleng.
Jonah
in Pathian fialmi lam a dungtun ruangah ngapi pum a thleng.
Minung
cun kanparih thil ṭha a tuahtamtu, in bawm ṭheutu, bawi upa ...tvp pawl hi an
sual hman ah kan ti ngam ṭheu lo, hmaisongmi leh ṭihmi kan nei. Mi pakat kan
parah si maw khawtlang hrangih thil a ti ṭhat deuh cun a mawhnak huhsak kan
cing ṭheu. Pathian cu cuvek a si ve lo, Izip ram ihsin Israel hruai suaktu
dingih a hmanmi Moses hman a hlah lo, a dik lonak ah a hrem mai. Pathian hmai
ih thil ṭha kan tuahmi hin kan sualnak a khuh ding ti ih ruah ding a silo.
Pathian cun ṭhat man in pek bang tukin sualman khal in pe, kan sual zat in in
thungrul lo men.
2. Pathian in tawkthlang
seh ti can a nei.
“Bawipa in, ‘Babilon ram ih nan umnak kum sawmsarih a kim tikah nan parah
seherhnak ka nei ding ih nan khua le nan ram ah kirter sal dingih ka lo tiammi
vekin ka kimter ding. Jer.29:10. Pathian in Judah mi pawl
cu an sualnak ruangih hramnak a pekmi cu Babilon ramah kum 70 sung
sal tang ding hi a si. Kum 70 a kim hlan ahcun suah
duhzet khal hai sehla an tal suak thei cuang lo. Pathian siannak tello in
khawvelmi in kan parah siatnak an tlen thei lo vek in Pathian in tawk thlangseh
a ti lo ahcun mah te ih tal suah theih a si ve lo. Pathian ih dantatnak sungih
sin mah te ih tal suah thei khal an um dah lo. Curuangah Judah mi pawl hnenah
Babilon ih umhmun khur hnget dingin a fial: nupi pasal nei dingah, inn ṭha te
sak dingah, hmuah tuah dingah, fate nei dingah, an umnak khawipi ih ṭhatnak
hrang ṭuan dingah leh an hrang thlacam dingah a fial. Hmansehla cui khawi hrang
ṭhatnak an tuahmi cu an mai hrang ṭhatnak khal a si.
Lei dan ahcun mi pakhat hi a sualman
tuarnak ihsin luat dingah ti dan a phunphun a um thei. Bawi upa pawl tlon
lungawinak in si maw, sumpai theh vorhnak in si maw ti dan a um ṭheu. Pathian
cu minung vekin ti theih a si lo, amah in cu tin siseh a ti dan vekin a si ko.
Baibal sungih kan hmuh mi ah a tlangpi thuin kan sim a si le tuar ding a timi
an tuar ṭheh, cu lole sual sir ih a lam an hawi tikah Pathianin a runsal ṭheu.
Pathian cun a mipawl hi an sualnak
ruangah midang kut sungah a thlen ṭheu nan midang kut sungah a ret landah lo,
run suak sal lo in a um dah lo. Babilon sal ih a tangmi Judahmi pawl khal kum
70 a kim cun Pathianin a run suak sal.
Izip
salih a tangmi Israel pawl Pathian in a run suak sal.
Midian
pawl kut sungih sin a run suak sal.
Filistine
pawl ih kut sungih sun a run sual sal.
Satan
sal sung ihsin khalin in runsuak sal.
Pathian
cun a mi pawl a hrem ṭheu nan a dungtun dah lo ti a fiang. Pathian in in hrem
tikah in hnong, in dungtun tinak lam a si lo, in duhdawt ruang sawnah a si.
3. Pathian in an
hrangah tumtah a nei.
Pathian cun Judahmi pawl cu an sualnak ruangah sal a tan ter ko nan a
thlahthlam cuang lo ih a theih hngilh lo ti a fiang. Ziangah tile an hrangah
tumtahnak a nei ih cui a tumtahnak cu an hrangh thilṭha a si. Asualmi a minung
pawl hrangah a ṭhami tumtahnak Pathian in a nei.
Minung cun mi theih hngilh hi kan
awlsam zet. Ti ding nei tam in kan hna ahkan buai tuk nakah theih hngilh mi
tampi kan nei ṭheu: kan koppi ih suahni, an ṭulmi, innsang hrangh tuah ṭul mi
leh special thil pawl kan hngilh ṭheu ih buainak, tawhawknak tiang a suak ṭheu.
Curuangah miṭhen in “ mai koppi suah ni hngilhlo ih um thei dan ṭhabik cu voi
khat hngilh phot hi a si” an ti hngehnge. Pathian cun ziang tik hmanah in
theihngilh lo, in thei ringring, kan ṭulmi khal a thei ringring.
Pathian cun a tiam cia vekin kum 70 a
kim tikah Babilonihsin an ramah an kir sal ih an khua le an ram, an inn leh lo,
Biakinn tla an tung ding sal. An khua an ram tundin salnak dingih thil ṭul
tampi bomnak khal an ngah. Pathian in a duhmi cu an tuar ding ri ngot si lo in
amah Pathian hnenih an kir sak ding kha a si. Cutikah keimah in ko
ding. Ka hnenah ra in thla nan cam tikah ka lo theihsak ding, Jer.29:12.
Pathian in kan sualnak ruangih
harsatnak hmangih nun in sim tikah : Pathian in in duhdawt lo, ziangah ka parah
hi vek a thleng ter? tiah kan ruat ṭheu. Pathian cun harnak ih in thlen ter
hmanah kan hrangah tumtahnak ṭha a nei. Cui tuarnak khalin in net ter lo ding.
Pathian in nunnak ih thil ṭha sawn kanngah theinak dingah ṭha lo ih kan ruahmi
pawl kan par ah a thleng ter sawn a si. Kan kut ih zinan bal/rim a kai mi cu
tidai hnak aiin a zinan ti dum in a ti fai thei sawn bang tukin kan ṭhatnak
ding hrangah thil ṭha lo kan timi a hmang ṭheu.
Maw Bawipa kan
Pathian, Kan hrang thil tampi na tuah zo. Nangmah bangtuk zohman an um lo. Kan
hrangah mangbangza tumtah mi na nei; A zate in sim le phuan ṭheh tum sehla, ka
sim cawk dah lo ding. Sam.40:5
