James.1:17
“... pawl cu an thleng aw nain Pathian cu a
thleng aw dah lo;..”
Heb.13:8
“Jesuh Khrih cu mizan, tuihsun le kumkhua in a hmun
ringring a si.”
Kan leilung pi hi kan zoh tikah
kumtin, caan tin in a thleng aw rero. Kan nuntu khawsak dan, kan thuamawk dan,
kan cei awk dan, kan ei in , kan inn le lo, ram kaih hruaiawkdan, kan ei hawl
dan, kan hmanmi thil ziangkim hi a thleng aw rero ih a hmunmi zianghman a um
lo. Minung kan dinhmun khal a thleng aw cingcing. Thusimtu 3:15 ih tu ih “a
ummi hi a rak um ciami an si ih hmailam ih a um lai dingmi khal hi a um cia mi
thotho a si” a ti bangin thil hi san khat hnu san khat a her kual aw rero ih a
thleng aw rero men a si. Hi leitlun ih thil a thleng aw rero mi pawl hi rel
thluh zik sehla rel thluh a har zet ding.
1. A hmun lo leilung leh a hmun
Pathian
Kan leilung hi cu a danglam rero mi, a
thleng aw reromi a si, a hmun timi hi leilung tlun ah a um thei lo. Lei tlun cu
a thleng aw rero, a danglam rero ti theih feng tikah leitlun ah hngatawknak
tlak a um lo zia leh tlaihsan ding tlak an um lo zia a lang ter.
#
Tui sun ih mi mawi bik hi thai sun ahcun a mawi bik a si nawn lo.
#
Tui sun ih lian bik hi thai sun ahcun mi lian bik a si nawn lo.
#
Tui sun ih mi cak bik kha thai sun ahcun mi cakmi a si nawn lo.
#
Tui sun ih mi thiam bik kha thai sun ahcun a thiam bik nawn lo.
#
Tui sun ih mi fim bik kha thai sun ahcun a fim bik a si nawn lo.
#
Tui sun ih milian khal thai sun ah mi farah an cang ṭheu.
#
Tui sun ih sinak sang a nei mi khal thaisun ah dinhmun niam an si ṭheu.
#
Tui sun ih kan uar zetmi khal thaisun ah zianghman lo ah an cang ṭheu.
Tui sun ih “Bik” dinhmun ih a dinngmi
hi thai sun ahcun bik a si nawn lo ding ti thei fiangtu in tui sun ih “Bik”
parah an thinlung an phum lan dah lo. Leitlun ahcun tui sun ah “Bik” a si
ruangih kan tlaihsan a si ahcun thaisun ah kan ṭap leh ding. Tui sun ah kan mah
rori dinhmun ṭha ih kan din ruangah si aw kan unau sungkhat leh ṭhianrual ṭha
dinhmun ṭha ih an din ruangih rak duh aw emem hi a um theih. Asinan leitlun hi
cu a hmun lam a danglam leh ding ti theih ngah ah hi cun cu vek ih duhaw pawl
hi thinlung thup te’n mi ih hnihsanmi an si ṭheu.
Leitlun ahcun a hmunmi zianghman an um
lo nan kan Pathian cu ziang tik hmanah a danglam ve dah lo, a hmunmi Pathian a
si.
#
Kan Pathian cu tui sun ni tiang a cakbik a si ih a si lan vivo ding.
#
Kan Pathian cu tuisun ni tiang a lian bik a si ih a si lan vivo ding.
#
Kan Pathian cu ziangkim thei a si ih a si lan ta ding.
#
Kan Pathian cu ziangkim tuah thei a si ih a si lan ta si.
#
Kan Pathian cu hmun kip um a si ih a si lam ta ding.
#
Duh dawtnak ih khat Pathian a si nak hi tuisun ni tiang a hmun lai.
#
Rinum Pathian a sinak khal tui sun ni
tiang kel a awh lai.
#
Abraham hnen tumaw cop Pathian, tuisun kan hrangah tumaw cop Pathian
#
Israel pawl umlo lak ihsin a cawmtu kha tuisun ni tiang in cawmtu a si.
Hlan ihsin mangbangza thilmak a tuah
reo tu kan Pathian kha tuisun ni tiangah a thil titheinak hi a danglam hrih lo,
ziangkim a tuah thei ringring. Baibal hi siar aw la Pathian ih thilti theinak
na hmuhmi pawl hmuahhmuah hi tui sun ni tiang a kel a si lai ti thei aw la na
hrangah ziangtluk hnangamnak a si ding.
2.
A thlengawmi Leilung leh thleng aw
lo Pathian thu
a) Zalennak :
Pathian in in rundam tikah mi zalen si dingah in rundammi kan si. Asinan cui
kan zalennak kha sual khuhnak ih hman ding a si lo 1Pit.2:16. Eden human sungih
Pathian in minung hnenih a pekmi khal kha Pathian siang cin ih zalennak a si.
Leitlun ih cozah pawl hin zalennak hi a feh pi vivo tikah thil tampi a thleng
aw mi a um rero ih a um rero lai ko ding. Nu le pa sualnak tla hi sual emem ih
kan ruah lai ah nu le pa lungkimnak ih
tuah hnuhnu cun sual ih ret a si nawn lo, neih bang aw ṭhitawknak hman ram
tampi ah sian a si zo tikah sual ih ruah a si nawn lo vivo ih mak tinak khal a
um lo vivo.
Leitlun
ih ukawknak ih ruangah thil tampi a tleng aw rero nan kan pathian cun tui sun
ni tiangah a thu a ṭhin hrih lo ti kan theih a ṭul. A cozah pakhat in thiang ih
a ruah hmanah zumtu cun Pathian thu sungih nung ding kan si sawn ih Pathian thu
in a sianglo a si ahcun kan hrangah tuah thiang a si cuang lo. Pathian cun thu
in ṭhen tikah a cozah dan in thu in ṭhen lo dingih Amai thu vekin thu in ṭhen
ding a si. Pathian thu ih sian lo mi kan
tuah a si ahcun Pathian cun cozah danin a sian si tiah in ngaidam dah lo ding.
Kan zalennak hi Pathian thu ih siancin zalennak si ringring hramseh.
b) Hmanrua leh Style :
Tu lai kan san kan zoh tikah Pathian kan
biak dan leh hmanrua, leh thil dang tampi hi a danglam vivo. A tlangpi thu in
vun zoh sehla:
#
Biakinn kan sak dan a danglam vivo.
#
Music instrument kan hmanmi a danglam
vivo.
#
Kan thuam awk dan a danglam vivo.
#
San thar thil, Computer, projector...tvp kan hmang vivo.
#
Hla sak kan hruai awk dan a danglam vivo.
Thil
a danglammi hi rel vivo sehla rel ding a tam zet ding. Tui hlan kum 10 leh tu
ih kan dinhmun hi vun thlir sehla thil danglam rel ding tampi a um ding. Pathian
thang ṭhatnak ding ah hin ziangvek hman rua khal kan hmang thei ih style
danglam tla kan hmang thei ko ih an tlem ṭheh ko. A thupi mi cu ziangvek
biakinn kan nei ih, ziang vek instrument kan hmang ih ziangvek style kan hmang
khal a si le Pathian hi thlarau leh thutak ih kan biak ngah ding hi a si
Jn.4:24. Pathian kan thang ṭhat dan style pawl hi a thleng aw rero ding nan
Pathian cu thutak leh thlarau ih biak ding a si timi cu a thleng aw dah lo
ding. Curuangah a thupi bik ṭhelh lo te ih kan hruai aw thei a thu pi zet. Ziangvek thil kan hmang ti hnak in Pathian lung kan tong ngah maw ti hi a thu pi sawn.
c) Ceiawk/thuamawk dan:
Kan leilung hi a her awk rero bang tukin kan cei awk/thuamawk dankhal a thleng
aw vivo. Kan thuam hnaw hruh duh zawng khal a thleng aw rero ih hmailam khal ah
a thleng aw rero ding kham theih thil a si lo. Leitlun ih ramtin leh hnam tin
hin thuamawk dan tla kan nei ih ziangvek ram/hnam thuamkhal Pathian ah an tlem ṭheh
ko ding tin ka ruat. Asinan kan theih a ṭulmi cu khawvel mipawl um dan vekih um
dingah Pathian in in siang lo ti hi a
si.Cei awk/ thuam awk dan thuhla ah a hleice in biakinn sungih kan um
dan ding kan zoh hnik pei. Asile ziangvek thuamhnaw kan hrut pei timi Bible
sungah vun zoh ta sehla.
#
Zoh mawi tawk ih thuam awk ding. 1 Tim.2:9-10
#
A luktuk ih thuam awk lo ding. 1 Tim.2:9-10
# Lenglam thuamawk ih mawinak hi
Pathian in a thupit bik lo. 1 Pit.3:1-5
#
A thiangfaimi thuam hnaw hruh ding. Suah.19:9-10
Bible
hin santiluan thilthar hi hnong ding in ti lo ih ziangvek san ih kan um khal a
si le zoh mawi te ih kan thuam awk ding hi a thupi mi a si. Zoh mawi kan ti
tikah theih ṭulmi cu kan um nak khua le ram ih zoh mawi an timi thuamhnaw a si
thei a ṭul. Kan ni ih zoh mawi kan timi hi kawl pawl hrangah zoh mawi a si lo
men thei. Curuangah zumtu cun kan umnak, kan thlen nak khua le ram ih zir in zoh
mawi te ih kan thuam aw ding hi a thupi zet. A hlei ce in Pathian biaknak hmun
ih kan feh ding tikah ziang vek lung put nei in kan thuam aw timi hi a thu pi
zet. Mi dang an thuam awk hnak ih hleihluat zetih thuam aw hi zumtu hrangah a ṭul
lemlo.
Khawvelmi
pawl ih an thuamawk/ceiawk dan vek in thuam aw tahrat ih Biakinn kan ra hi cu
kan mai thinlung ahcun style kan ti aw zet men thei nan Pathian in in lawm
lemlo men thei. Pathian thu cu a danglam dah lo ih ziangvek san a rung thlen
khalah Amah kan biak khawmnak hmun ahcun zoh mawi te ih kan thuam awk ding hi
zumtu pawl nun dan ding a si.
Na thuam hnaw hruhmi in
khwvel lam maw a lo hoi ter Pathian lam sawn ti cek aw ṭheu aw.
Thu
netnak ah, kan leilung ih thil a thleng aw rero mi hi minung ih kham theih a si
lo. Tui hnu ah khalah a thleng aw rero lai ding. Hi a thleng rero mi leilung ah
zumtu pawl kan tlang leng ve tikah Pathian sian cin ih kan thleng awk hi a
thupi mi a si. Pathian thu leng lan ih thleng danglamnak hi Pathian in duhmi a
si dah lo. Leilung dan thlun ih thleng aw ding kan si lo ih Pathian thu vekin
Leilung hi thleng danglam tu ding sawn kan si.
Pathian
thu lo vekin a thleng aw rero mi leilung hi
Pathian
thu vekin a thlengaw mi ah kan tuah a ṭul.
