...Kei
cu nunnak an ngah ih tlamtling zetih an neihnak dingah ka ra a si. Jn.10:10
Rome san lai ih thleng an ti dank an
theih cio vekin misual thi dingih an thu an relmi pawl cu thinglamtah parih
khen that hi a si. Mi ziangtluk tam so thinglamtah parah an khen that zo ding
timi cu feng a harzet ding nan an tam ko ding ti cu zum a um. Asinan
thinglamtah ih an thahmi pawl ih ruangah hin leilung in thuanthu danglam pi a
thlen ciamco lo. Tu ahcun Thinglamtah cu kan theih zetmi leh a hleice in Khristian
pawl tla cun kan tlaihsan bikmi ah a cang. Ralthlak za a simi thinglamtah cu a
sunglawi zetmi thinglamtah ah a cang. Zo ih ruangah a si kan ti le Jesuh ih
ruangah a si. Thing lamtah mannei tertu cu kan Bawipa Jesuh Khrih a si.
1. Mithi kan si.
...Kei cu nunnak an ngah ih tlamtling zetih
an neihnak dingah ka ra a si. Jn.10:10
Nunnak
kan ngahnak dingih a runnak san cu mithi kan si ruangah a si. Nunnak nei cu rak
si sehla nunnak kan ngahnak dingih a run kha a tul lo ding. Cui mi thi kan
sinak cu taksa lamah si lo in
thlarau lamah a si. Luk.9:60 ah Jesuh in” Mithi
cu mithi in phum ko haiseh” a ti tikah taksa ih mithi kha a mithi lala tin an
phun ding cu thl cangthei lo a si ti cu Jesuh in a thei ve ko ih, cui a tongkam
in duhsan a nei sawn. Cucu taksa ih a thimi kha thlarau lamih mithi( taksa cu
nung) pawlin phum ko haiseh tinak tluk a si. Cui thihnak ihsin kan mah tein
nunnak kan pek awk sal thei lo tikah Jesuh in nunnak kan neih theinak dingih a
runnak san cu a si.
2. Jesuh ih thihnak
“Moses
in nelrawn ah fung parih dar rul a thlai bangtuk in Milai Fapa khal thlai a si
ve ding Jn.3:14. A tawng zawngin kan sim asile Nunnak hrangah Thihnak a
tul. A um zia cu thlarau lamih mithi a simi kannin pawl in nunnak kan ngah
theinak dingah Jesuh in thihnak a tuar a si. Kan Nunnak hrangah Jesuh in a Nunnak
a pe. Jesuh hi Pathian a sinak ah thi thei lo a si ko nan a thimi pawl in
nunnak a ngahnak ding hrangih thih a tul tikah a thitheimi hi lei taksa nei ih
a rung suahnak a si. Cu ti’n a runsan cu ti hlawhtlingin thinglamtah parah
thihnak a tuar. Cui Jesuh thihnak ih ruangah thinglamtah, zo hman in suanawknak
ih a hman dah lo mi cu Paul in ka Bawipai’ thinglamtahnak suan ding dang ka nei
lo a ti bangin tui sun ni ah cun zumtu pawl in kan sunsak zetmi thinglamtah ah
a rung cang.
3. Kumkhaw nunnak
Cuti cun amah a zumtu
hmuahhmuah cu kumkhua nunnak an ngah ding Jn.3:15.
Kumkhaw nunnak cu khui tawkah a um, ziangti’n kan co thei ding tile Amah zumnak
ah a si ih amah a zumlo tu cun kumkhaw nunnak an nei ve lo. Jesuh cun a nunnak
cu in pe zo sihman sehla kumkhaw nunnak timi hi tu ah kan za te’n kan co hrih
lo. Zo pawl in kumkhaw nunnak an co kan ti asile amah a zumtu pawl lawngin kan
co a si. Curuangah zumtu leh zumlotu kan danglamnak cu kumkhaw nunnak co leh co
lo kan sinak tak cu a si. Kumkhaw nunnak timi cu a lei ih lei ding siseh la zo
hman a lei theitu kan um lo ding. Kumkhaw nunnak cu rel lo hi lei nunnak hman a lei theitu kan um lo. Cu tlukin a
sunglawimi nunnak cu kan lei dingah in phut lo ih Jesuh zumtu pawl hnenah
Pathian in in pe a si. Ziangtluk sungawi so a si. Curuangah Jesuh zumtu pawl hi
ziang dang hmuahhmuah hnakin mihual van tha kan si hleice.
A
siartu hnenah Pathian in hlawknak thar lo pe hram seh.
No comments:
Post a Comment